— 236 —
Kwa-eng dengen girang bangoeni itoe tjoetjoe. Sedeng Pek-hoa kasi taoe, bahoewa ajahnja poen ada kirim hormat dan mengirim djoega barang- barang anteran sabagi tanda mata, harep Lie Kwa-eng soeka trima dengen senang hati.
„Ah, boeat apatah moesti mengirim sagala barang-barang, sedeng perkatahan sadja soeda tjoekoep,” saoet Kwa-eng sambil bersenjoem, dan titahken Touw Hin boeat trima dan bawa masoek. Sakalian kasi taoe pada istrinja atas kadatengannja ini tjoetjoe.
Kamoedian itoe tjoetjoe disilaken berdoedoek, dimana Lie Kwa-eng laloe menanjaken apa-apa atas Pek-hoa poenja ajahanda dan koelawarga.
Sedeng Touw Hin sambil membawa itoe barang-barang berdjalan masoek, ada berkata dalem hatinja:
„Achir-achir itoe orang tjakep katemoe pasangannja. Ah, kaloe Giok-go dapet liat parasnja Pang Pek-hoa, tentoelah...... tentoelah. Ja, kasian akoe poenja Lie Kwa-eng jang toea dan baek, la tentoe tida kaoemanan lagi. Djangan kata......... djangan kata.....hm !, boeat tjioem djoega brangkali ia tida kabagian lagi.”
Waktoe ia sampe ka dalem, Giok-go lagi moengsang-mangsing pada diri sendiri, lantaran meliat lakoenja Touw Hin jang dianggap begitoe goblok. Tapi satelah liat itoe orang gaga dateng kombali dengen membawa apa-apa di tangan,