— 224 —
Laen harinja Giok-go kasiken djoega makanan-makanan enak. Touw Hin trima itoe dan oetjapken trima kasi atas si njonja poenja kabaekan hati. -- Lebi dari itoe, tida !
Blakangan ini njnja jang meliat lakoenja Touw Hin begitoe roepa, kombali soeroe Touw Hin beli apa-apa, jang dilakoeken dengen djoedjoer. Dan lantaran ini, membikin Giok-go djadi terlebi aoes.
Kerna api birahi samingkin hari tamba berkobar, sekarang ini nonja tida merasa maloe-maloe lagi. Saban-saban kaloe ia menjoeroe atawa membriken barang, tangannja jang begitoe poeti, aloes dan montok tentoe dibikin tersenggol dengen badannja itoe lelaki gaga. Tapi Touw Hin jang boekan saorang pemoloran, tida gampang djadi tergioer.
,,Ah, goblog bener itoe orang, kaloe sabegitoe djaoe ia belon mengatahoei akoe poenja maksoed." kata Giok-go dalem hati dengen roepa sengit: ,,masatah ia tida taoe ? itoe toch tida boleh djadi, boekan ? ---Apa bener-bener ia tida taoe, atawakah tjoema belaga sadja ?"
Tapi sabenernja memang Touw Hin tida ada pikir sampe di sitoe. Kerna ia poen ada satoe Hohan jang gaga dan djoedjoer. Saorang jang djoedjoer memang tida pikir djahat atas dirinja laen orang. Katjoeali orang-orang jang djahat dan bertabeat boeroek, jang bisa mendoega laen orang poen ada boeroek dan djahat.
Itoe hari sahabisnja melakoeken pekerdjahan
