— 222 —
hatinja itoe njonja moeda, lantaran dapet soeami jang kolot. Apapoela dirinja ada begitoe tjantik, maka bener-bener ia seseli peroentoengan sendiri jang begitoe tjilaka.
Njonja itoe ada familie dari kaoem Tio dan bernama Giok-go. Katjantikannja itoe soeda membikin si kolot djadi tjinta bener-bener. Tida ada satoe apa jang tida dibeliken, kaloe sadja istri itoe maoe. Tapi maski poen makan dan pake ada serbah tjoekoep Giok-go masi belon merasa senang.
Tapi Kwa-eng roepanja tida taoe, kaloe oemoernja jang banjak ada mendjadi halangan boeat kasenangannja itoe njonja jang lagi sedeng beraoes dengen kaplesiran. Saban-saban kaloe liat moeka istrinja jang seperti berdoeka, ia soeka menanja: apa jang njonja itoe lagi pikiri. Tjoba kaloe ia taoe, brangkali ia tida tanjaken itoe.
Giok-go memang satiap hari ada berdoeka sadja, kaloe ia sedeng berada sendirian di dalem roema. Boekan djarang ia seseli orang toeanja jang mata doewitan, jang soeda rangkepi djodonja pada ini pembesar kolot, jang tjoema bisa membri sadja rasa alot.
Tapi sekarang apa ia bisa berboeat? Ia soeda menikah dan telah mempoenjai soeami, tap kaloe liat laen-laen orang moeda jang mempoenjai pasangan tjakep, pikirannja djadi kalangkaboet dan niat-niatan jang sabenernja tida haroes ada dalem hatinja saorang prampoean jang bersi, poen djadi timboel.
