— 220 —
djang djalan Touw Hin boekan sadja tida diperlakoeken bengis, malah rawatan jang dibriken poen ada sampe baek dan omongan-omongan poen ada sampe manis.
Dengen begitoe, sampelah iaorang di kota Tjiangtekhoe dengen tida koerang soeatoe apa.
Itoe doea oppas laloe serahken persakitan bersama soerat jang ia bawa. Itoe pembesar sasoedanja meliat soeratnja Hoe-ie, laloe kasi balesan, jang boenjinja: ia soeda trima itoe persakitan nama Touw Hin dan itoe doea oppas laloe balik kombali.
Di sini kombali Touw Hin goenaken lagi ia poenja oewang boeat menjoewab pada pembesar-pembesar, cipier dan pendjaga-pendjaga boei, maka kadatengannja itoe bisa dikatjoealiken dari atoeran biasa.
Biasanja menoeroet itoe atoeran jang boeroek, sasoeatoe persakitan jang baroe dateng dari laen tempat, moesti dirangket doeloe saratoes rotan, baroe dimasoeki ka dalem pendjara boeat djalanken hoekoemannja, -- Apa itoe boekan atoeran gila?, kerna salaennja moesti terhoekoem, djoega diseksa?
Tapi biarlah penjalin dari ini tjerita lempar itoe semoea, dengen tida oesah membikin critiek, hanja dengen ringkes dibilang, dalem sedikit waktoe sadja Touw Hin soeda dapet banjak kenalan, kerna salaennja rojal menjoewab, djoega boedi bahasanja manis, jang membikin orang djadi soeka.
