— 194 —
masi moendoer madjoe. Sakean lama ia toendoeki kapala sambil berpikir.
Sabelonnja bisa ambil poetoesan, Tjo Loen, Soen Sin dan jang laen-laen semoea pada dateng ka itoe tempat. Djaoe-djaoe waktoe itoe bebrapa orang gaga jang tadi pagi masi djadi moesoe, satelah liat padanja, laloe membri hormat dan memboedjoek dengen roepa-roepa perkatahan menghiboer, soepaja itoe Tothongtjie soeka bersariket padanja.
,,Soenggoe, soeda lama kita-orang kenangken Hianheng poenja kapandean dan kagagahan," kata itoe orang berame: ,,baroe sekarang dateng itoe waktoe bisa bertemoe; dan kita-orang harep jang ini pertemoean nanti bawa karoekoenan boeat bisa berkoempoel sama-sama di atas goenoeng."
Banjak lagi laen-laen perkatahan manis, hingga Loan Teng-giok jang memang lagi bersoesa hati, achirnja menoeroet djoega.
Houw Seng djadi amat girang, satelah liat itoe bekas goeroe soeka berkoempoel pada fihaknja.
Sigra djoega marika laloe berangkat dari itoe rimba, naek ka atas goenoeng sambil bersoerak-soerak, ada djoega jang menjanji dan tepok tangan, sampe soearanja djadi rioeh.
Waktoe sampe di atas goenoeng, Khouw Thayso laloe kaloear menjamboet dan silaken itoe orang-orang gaga masoek ka roewangan Tjigie-
