— 176 —
soldadoe-soldadoenja djadi lebi brani dan lantas naek teroes sambil bersoerak-soerak.
Kerna tida dapet tjegahan, maka sabentaran sadja itoe bebrapa ratoes soldadoe soeda sampe di Tjigiethia. Tapi di sini poen tida kaliatan satoe orang, melihat begitoe baroelah Teng-giok merasa bertjekat.
Koenjoeng-koenjoeng hatinja djadi takoet, waktoe dapet inget: jang itoe kawanan begal tentoe soeda toeroen goenoeng aken pergi ka Tengtjioe; dan kaloe bener sabagimana jang telah didoega, apatah nanti djadinja di itoe kota.
,,Oh, inilah tida boleh gegaba sakali," kata ini Tothongtjie dalem hati: ,, keadahan di kota Tengtjioe ada lebi penting dari pada penjerangan di sini. Kaloe ini semoea begal pada toeroen, akoe koeatir Houw Seng tida sanggoep menangkis."
Sasoedanja berpikir tetep, ia lantas prenta soldadoenja lekas toeroen kombali, kerna berdiam lebi lama di ini tempat kosong, tida bergoena.
Itoe waktoe oedara djadi samingkin gelap.
Tapi baroe sadja iaorang melaloei sedikit djaoe, dari depan kaliatan sarombongan soldadoe, jang djoega dateng dengen bersoerak-soerak. Kerna itoe waktoe amat gelap dan satoe pada laen tida bisa kenalin siapa adanja, masing-masing laloe menjerang dengen seroeh.
Achir-achir, dari soearanja itoe doea rombongan barisan jang lagi serang menjerang, marika dapet kanjatahan, bahoewa iaorang lagi berklai sama
