III
HOUW SENG DJALANKEN TIPOE
DENGEN MEMBOEKA PERDJAMOEAN. — SOEN
SIN MEMBOEDJOEK SATROE
BOEAT MENOELOENGI
SOEDARA.
Kadatengannja Soen Sin di itoe pagi, pembatja tentoe soeda bisa doega apa maksoednja. Jaitoe boekan laen dari pada hendak adjak Soen Liep singkiri diri ka goenoeng Tenghoensan, kerna berhoeboeng dengen itoe pembalesan jang dilakoeken atas saroemia tangganja Mouw Gong-bok, ia koea-tir itoe soedara toea nanti karembet-rembet.
Doegahan itoe poen bener sekali.
Tapi latjoer, sabelon maksoed itoe dinjatakan, Jo Thijsioe soeda kaboeroe dateng. Maka waktoe Soen Liep masoek di kamar toekar pakean, ia lantas kaloear dari pintoe samping dan semboeni di satoe tempat, boeat liat apa jang nanti terdjadi dengen diri Kokonja.
Soen Liep jang belon taoe sama sekali atas kamatiannja Mouw Tjie, djoega tida taoe kaloe Soen Sin ada tjampoer tangan dalem itoe perkara jang samalem, maka dengen tida sekali merasa tjoeriga dan dengen roepa senang ia trima itoe doea tetamoe ka dalem roema.
