— 132 —
soeda diniat, made tjaboet roempoet sama akar-akarnja, hingga siapa djoega familenja kaoem Mouw Tjie jang ada, aken dibasmi sampe abis.
Kamoedian iaorang benain sagala barang-barang berharga dari itoe kamar dan prenta itoe rahajat bawa lebi doeloe, sedeng jang sabagian tinggal boeat membantoe. Di antara itoe barang-barang jang dapet dirampas, ada teritoeng djoega barang kapoenjahannja Houw Seng, jang sekarang telah dapet diambil poelang kombali.
Mouw Tjie poenja pahlawan jang lagi tidoer di kamar loear, satelah denger soeara riboet-riboet lantas masoek ka dalem. Tapi baroe sadja marika sampe di pertengahan gang jang meneroes ka kamar, Tjo Loen lantas pegat dan batjok kapalanja, sedeng Siauw Tjhit sabet lehernja itoe pahlawan jang satoenja, hingga sabentaran sadja itoe doea pahlawan telah binasa djiwanja.
Khouw Thaij-so dan Houw Seng basini boedjang-boedjang dan siapa sadja jang dikatemoe. Selang tida antara lama, dalem itoe roema soeda tida kaliatan lagi satoe orang, maka Siauw-tjhit bersama kawannja laloe ambilin roempoet dan kajoe-kajoe kering, boeat bakar roemanja Mouw Tjie.
Api lantas berkobar-kobar, hingga oedara kaliatan mera.
Bebrapa pendoedoek jang tinggal berdeketan dengen itoe roema, satelah liat sorotnja api lantas pada bangoen dengen maksoed maoe membri pertoeloengan. Tapi baroe sadja iaorang ka loear dari
