— 95 —
Kita ambil ringkesnja bahoea Liem Sie An berdoea anaknja telah belajar ka negri Siam, jang lantaran dapet angin baek soeda sampe di sana dengen slamet, dimana lantes sadja Liem Sie An pergi ka toko Hiap Tjiang, djoestroe Liem Thian Hok sedeng preksa boekoe-boekoe brapa banjak ia soeda bikin abis oewang bapanja, hingga ia djadi kaget sekali lantaran Liem Sie An poenja dateng ada dengen mendadak sekali.
Liem Sie An panggil Thian Hok berdoea Tong Kim Sioe dateng dihadepannja, dimana tiada lama kamoedian dengen kepala toendoek Thian Hok samperin ajahnja dengen penoe rasa takoet, jang satelah abis sodja ini orang toea, ia laloe berdiri disamping.
„Anak binatang!” memaki Sie An dengen mata melotot pada Thian Hok. „Akoe tiada njana sekali, jang kau soeda bisa berlakoe tiada kepantesan membikin abis boekan sedikit oewang di toko Hiap Tjiang. Kaloe taoe bakal begitoe, tentoe akoe tiada soedi panggil kau dateng kamari djadiken kau koeasa.”
„Kau, Tong Kim Sioe, begimana!” berkata Sie An kamoedian satelah meliat Thian Hok tinggal toendoekin kepala, sambil berpaling pada ini koeli. ,,Akoe soeda pesen dalem segala hal djangan terialoe dilepasin pada Thian Hok, tetapi njata sekali kau tiada perhatiken ini pesenan, hingga Thian
