— 77 —
dateng biar djarangan. Perkara si batauw toea akoe poenja tanggoengan."
— „Koei Hoa, apa boleh akoe tanja, begimana makanja kau ada ditangannja ini batauw?"
— „Kaloe maoe di tjeritaken ada terialoe pandjang. Akoe moesti seboet dari bermoela dari akoe masi djadi anak-anak. Akoe sabetoelnja ada orang dari provincie Hokkian afdeeling Teng Tjioe-hoe, ajahkoe bernama Yap-sian ada pegang djabatan panglima prang di Tay-wan Oetara. Dalem peprangan antara Tiongkok dan Japan, ia kena dikalaken maka ia melariken diri ka Shang-hai. Itoe waktoe akoe masi ketjil. Iboekoe lari ka Amoy dengen bawa akoe dan satoe boedak prempoean. Sabetoelnja akoe poenja ajah hendak adjak iboekoe tetapi ditenga perdjalanan ada banjak moesoe jang pegat, maka djadi terpentjar. Apa tjilaka iboe-koe ditenga perdjalanan dapet soesa, lantaran di praoe dapet angin dan ombak besar, sesampenja di Amoy dapet sakit heibat dan meninggal doenia dengen tinggalken akoe bersama akoe poenja boedjang prempoean."
Bitjara sampe disini, Koei Hoa menarik napas, kamoedian ia teroesken:
„Beroentoeng akoe poenja boedjang prempoean ada saorang jang baek, kerna sasoedanja oeroes mait iboe-koe, ia piara padakoe dengen baek, seperti anaknja sendiri. Satelah akoe poenja oesia
