— 59 —
Koei Hea koetika dapet mabok laoet. Ia inget Koei Hoa kasi koewe padanja. Semoea itoe ia djadi inget kombali. Perkara perkara jang doelo telah terkenang diotaknja ini orang moeda.
„Tiada goena akoe pikirken pada Koei Hoa," berpikir Thian Hok didalem hati, sasoedanja doedoek bengong sakean lama, „tjoema-tjoema itoe nanti membikin roesak badankoe."
**
Liem Sie An inget sekarang Thian Hok oesianja soeda masoek doea poeloe, soeda waktoenja boeat ditjariken pasangan, kaloe ditinggal diam, dikoeatir nanti Thian Hok maen gila diloearan, satoe hal soesa sekali boeat „diobatken", apapoela Thian Hok soeda boleh diandelken dalem perkara dagang. Perkara kawin boekan perkara gampang, moesti dirempoeken doeloe pada 'ma dan istrinja, kaloe bisa maoe ditjariken pasangan orang dari Tiongkok, kamoedian bawah ka Siam. Satelah tetep pikirannja, Sie An tetepken dalem boelan Tjiagwee aken poelang ka Tiongkok boeat bitjaraken ini oeroesan, tetapi pada Thian Hok ia tiada maoe bilang apa-apa.
Dalem toko Hiap Tjiang, Liem Sie An ada sajang sekali pada satoe penggawe bernama Tong Kim Sine, selaennja ia soeda bekerdja lama, poen ada setia, dalem sebegitoe lama ia bekerdja blon
