— 187 —
djadi linjap, lantaran inget iboenja poenja nasehat koetika idoep. Begitoelah koetika Thian Hok menangis depan petinja ini ma toea, Liem Sie An soeda boedjoek dengen roepa-roepa perkataan soepaja Thian Hok tiada terlaloe bersedi, hingga Thian Hok djadi sedikit girang meliat ajahnja soeda beroba banjak boeat dirinja.
Satelah beres dan koetika hari koeboer iboenja Liem Sie An sampe, dengen sedikit oepatjara ini mait dimawa ka tempat koeboeran jang tiada sebrapa djaoe pernanja. Liem Sie An dan Thian Hok telah tinggal di Bwe-koan boeat menoenggoe sampe oeroesan djadi beres semoea.
**
Sekarang mari kita liat pada Thian Pouw jang sedeng intip perboeatannja Hek-kat dan Tong Kim Sioe.
Di itoe malem sasoedanja titaken Tiong Djin berlaloe, ia lantes toetoep pintoe kamar dan goelak goelik saorang diri dipembaringan memikirken begimana dan akal apa boeat pledjokin perboeatannja Tong Kim Sioe. Di itoe malem ia tiada bisa tidoer poeles hingga ampir pagi baroelah ia bisa meremken matanja, tetapi baroe sadja sakedjepan, ia rasaken hari soeda terganti dengen siang, maka boeroe-boeroe ia lompat dari pembaringan aken tjoetji moeka dan boeka tokonja.
Tiong Djin jang dari setadi soeda menoenggoe
