— 126 —
Sasoedanja doedoek sedikit lama Tan Sam lantes berpamitan poelang, jang di anter sampe di loear roema oleh Tjit Mah.
Tjit Mah koetika masoek laloe doedoek dibangkoe dengen oering-oeringan, dan ia berdjandji didalem hati, seande sekali ini Koei Hoa tiada maoe toeroet ia poenja kemaoean, ia aken goenaken kakerasan, kerna ia anggep Koei Hoa ada ditangannja, apa soeka ia boleh bikin.
„Semingkin akoe pikir, djadi lebi bentji pada Thian Hok," kata Tjit Mah kamoedian,,,kaloe tiada ada si Thian Hok jang halangin, tentoe akoe soeda dapet kantongin doeit banjak, jang soeda boleh dipastiken akoe prenta pada koei Hoa boeat „petelin" doeitnja Tan Sam. Tetapi jang akoe heran, kenapa si Koei Hoa djoega lengket sama si Thian Hok, jang sekarang boekan sadja soeda djadi roedin, poen bapanja soeda tiada akoeh anak lagi. Boeat apa dideketin sematjem orang kaja si Thian Hok? Ah bener-bener si Koei Hoa kliroe pikir. Doeloean djoega ada banjak orang jang maoe pada si Koei Hoa, selaloe Koei Hoa toelak, hingga tempo jang baek boeat akoe djadi liwat."
Selagi Tjit Mah maoe berbangkit keliatan dari loear djalan mendatengin kita poenja Koei Hoa jang manis. Roepanja ada sanget koesoet sekali, jang satelah masoek di kamarnja sendiri, laloe doedoek bengong saorang diri.
