303
nanti menetapkan dia poenja pengakoean jang soeda dia bitjara dalem pendjara.
Ming ada doedoek atas krossi president.
Belon taoe dia ada begitoe terhormat, pantes dan gagah; belon taoe dia merasa kabratan seperti sekali ini.
Atas permintaännja Perkins dia soeda lepaskan Liou Siou akan datang mengadap seperti saksi, tetapi Ité, jang doeloe soeda djadi pesakitan jang paling besar ada doedoek dekat hakim-hakim di sabelanja njonja Liou, jang djoega soeda di rasa oleh itoe president dari pengadilan misti ada sama-sama pada ini preksaän.
Djoega itoe toekang madat glap dan sobatnja, toean Arthur, jang soeda bekerdja banjak atas menangkepnja itoe pemboenoe, ada sama-sama. Itoe Radja moeda soeda mengirim satoe officier akan mengadakan dia.
Ming soeroe diam itoe orang-orang jang datang nonton, jang soeda toetoep moeloetnja sahabisnja dia-orang di poekoeli dengan tjamboek oleh soldadoe-soldadoe policie Tatkala orang-orang soeda berdiam baroe itoe president angkat bitjara dan tanja itoe pesakitan :
― Angkaoe betoel Tchou, bekas toekang potong di Founsi.
― Tchou ada saija poenja nama,-menjaoet itoe orang ― dan doeloe saija djadi toekang potong di Founsi.
― Apo angkaoe soeda boenoe itoe Lin pada malem kawinnja?
― Ja, itoe saija soeda bikin.
― Dan kenapa angkaoe soeda berboeat itoe kedjahatan?
