40
tida djoega maoe masoek sampe Cordier tida sabaran, bilang padanja:
Aio, lekas akoe dengar soeara kreta masoek kemari. Kita nanti kena ketangkep berboeat begini.
Kontji nommor doea di masoekin bisa masoek di poeter bisa terpoeter, tinggal kontji nommor tiga.
Adapoen betoel Rabiot mase masoekin kontji itoe ke dalem slot kadengaran soeara orang boeka pintoe dengan keras, dan kadengaran djoega soeara orang banjak dateng ke itoe kamar, sembaring njonja-njonja berseroe-seroe neef Rabiot, mana kau, lagi apa kau di sitoe.
Rabiot poekoel djidatnja dengan kepelan sebab menjeselnja jang orang-orang tida kasi dia tinggal diam.
Henri Cordier lekas tjaboet itoe kontji-kontji di kasi pada Rabiot serta katanja: Baek-baek toean Rabiot itoe gagak-gagak jang laen semoea soedah dateng djaga djangan sampe dia orang dapet sangka apa-apa.
Rabiot soedah bingoeng dia boeroe-boeroe keloear dengan moeka berkringatan dan poetjat, sampe di loear ada ampat orang berpakejan itam.
Clement ada bersama-sama, katanja: Ini dia toean Josept Rabiot.
