— 55 —
Itoe algodjo soeda tiada bisa bitjara lagi dan toetoep matanja.
Grimaud poenja pikiran djadi sanget sangsi, ja inget kesian dan tiada maoe tinggalken itoe orang jang maoe poetoes djiwa saorang diri, tapi ia pikir lagi, sanget perloe ia balik ka Parijs boeat kasi kabar pada toeannja. Itoe koetika ia denger orang dateng dan koetika ia menengok ia dapet liat toean roema makan djalan masoek dengen satoe dokter jang baroe ketemoe ditjari.
Bebrapa orang djoega toeroet masoek, kerna itoe perkara soeda tersiar di dalem doesoen dan masing masing ingin dapet taoe, begimana doedoeknja itoe perkara.
Dokter hampirken itoe orang jang loeka, jang itoe koetika lagi pangsan.
„Orang moesti tjoba tarik itoe sendjata,“kata dokter dengen gojang kepalanja.
Grimaud inget apa jang loeka soeda bilang padanja dan menengok ka laen djoeroesan.
Dokter boeka badjoenja jang loeka, robek ia poenja kemedja dan dapet liat itoe pedang ditoesoek sampe di betoelan gagangnja.
Dokter pegang itoe gagang dan sedeng ia tarik kaloear itoe sendjata, jang loeka awasin padanja dengen bengong, sedeng matanja soeda moelai diam sadja Koetika itoe sendjata soeda ditarik abis kaloear dari loekanja, algodjo poenja moeloet kaloear boesa mera dan koetika ja mengela napas, dari loekanja lantes kaloear banjak dara. Ia awasin pada Grimaud, merinti plahan dan tiada lama poela ia tarik napasnja jang pengabisan.
Grimaud poengoet itoe pedang jang masi basa dengen dara dan jang masing masing tiada
