— 248 —
Meilleraie dipanggil dan diprenta boeat bawa satoe barisan jang ia kira perloe boeat pergi liat, lantaran apa rahajat negri berboeat begitoe roepa.
Ini maarschalk jang memang soeka berklai tiada kwatir satoe apa, dan menoeroet adat kebiasa’an dari orang orang peprangan di itoe masa iaorang pandang sanget renda pada rahajat negri. Ia bawa saratoes limapoelee soldadoe dan maoe liwat di djembatan Louvre, tapi di sana ia dapetken de Rochefort dengen ia poenja limapoeloe soldadoe dan kira kira sariboe limaratoes orang bersendjata dengen pedang. Di sana itoe maarschalk tentoe tiada bisa liwat, maka ia djoega tiada tjoba itoe perkara dan djalan teroes di tepi soengi.
Ia djalan sampe di djembatan Pont Neuf jang didjaga oleh Louvieres. Di itoe tempat maarschalk tjoba menjerang, tapi ia disamboet dengen tembakan begitoe seroe, boekan sadja dari orang orang jang djaga itoe djembatan, tapi ampir dari sekalian djendela dari roema roema jang pernanja menoedjoe ka itoe djembatan, di sana bebrapa orang dari barisannja tiwas djiwanja.
Maarschalk moendoer ka toadjoean Halien jang didjaga oleh Planchet dan baroe sadja ia dateng deket, Planchet dengen orangnja soeda menjerang lebi doeloe, hingga ini maarschalk kepaksa moendoer dan ambil djalanan Ka Saint Honore straat, di Hallen ia dapet lagi keroesakan bebrapa orang.
Di Saint Honore straat ia dapatken tempat jang didjaga oleh itoe pengemis dari gredja Saint Hutasche. Itoe tempat boekan sadja didjaga oleh orang lelaki, tapi orang orang prempoean
