— 201 —
deket pinggir soengi iaorang tiada bisa djalan teroes. Djalanan soeda sesek dengen orang jang tahan itoe koeda, kretanja dibikin djato balik sebla. Raoul dengen itoe bebrapa soldadoe jang anter Comminges blon sampe naek kombali atas iaorang poenja koeda, iaorang toeroet djalan diblakang kreta dan koetika liat itoe orang banjak serang lagi itoe kreta, Raoul dengen itoe soldadoe soeda djadi semingkin mara dan toesoek bebrapa orang jang mendese padanja. Tapi djoestroe ini perboeatan bikin orang banjak djadi semingkin mara. Antara itoe orang banjak ada djoega keliatan jang bawa snapan dan bebrapa banjak sendjata tadjem. Soeara tembakan dari snapan ada kadengeran, roepa roepanja tjoema ditembaken ka atas, tapi itoe soeara dan soeara treakan orang banjak soeda bikin marika poenja hati djadi semingkin panas; dari djendela djendela tingkatan sebla atas tiada brentinja orang lemparken barang barang. Sabenernja apa jang orang treaken ampir tiada kadengeran satoe apa, kadang kadang ada kadengeran dengen Djata:,,Boenoe! boenoe barisan pendjaga! lempar itoe officier di soengi Seine !"
Raoul jang topinja soeda roesak kena dilemparken roepa roepa barang dari atas dan moekanja soeda kaloear dara, rasa boekan sadja ia poenja tenaga soeda ampir abis, tapi pikirannja djoega soeda djadi bingoeng; matanja soeda djadi mera dan di hadepannja ia liat itoe bebrapa ratoes tangan sedia boeat robek padanja, apabila ja djato. Comminges jang masi ada dalem kreta jang terbalik soeda koesek koesek ramboetnja saking mara. Soldadoe jang anter padanja djoega tiada bisa dateng menoeloeng, masing masing
