— 178 —
apapoela pada waktoe malem; swara ombak dan swara apgin dan gojangnja kapal! Sabenernja akoe soeka mengakoe, akoe lebi soeka, tinggal di klooster di Noisy dari pada ada dalem satoe kapal di waktoe malem,“
Athos tersenjoem sedi, kerna maski ia denger apa jang Aramis bitjara padanja, hatinja pikirken laen perkara, kamoedian ia djalan hampirken de Winter.
Aramis toeroet di blakangnja.
„Kenapa de Winter tingka lakoenja begitoe?“ kata Aramis. „Sabentar bentar ia meneggok ka blakang; apa jang ia maoe liat di blakangnja?“
De Winter apabila soeda dapet liat sobatnja lantes djalan lebi tjepet.
„Kau kenapa, Mylord?“ Athos tanja, „kenapa kau poenja napas tersengal sengal?“
„Tiada apa,“ de Winter menjaoet; „tiada apa, tapi koetika akoe djalan di tepi laoet, rasanja ....“
De Winter menengok lagi ka blakang.
Athos awasin Aramis.
„Mari kita brangkat,“ kata de Winter, „biar kita brangkat. Kapal soeda menoenggoe pada kita dan itoe praoe moesti bawa kita ka kapal, akoe ingin akoe soeda ada di kapal.“
De Winter menengok lagi.
„Bilang toch, apa kau ada ketinggalan sala satoe perkara?“ menanja Aramis.
„Boekan, tjoema satoe hal jang bikin akoe djadi kwatir,“ menjaoet de Winter.
„Ia soeda dapet liat padanja,“ kata Aramis dengen berbisik pada Athos.
Iaorang toeroen tangga hampirken praoe. De Winter prenta sekalian pengikoet toeroen doeloe
