— 124 —
negri? Tentoe ada sala satoe perkara jang kita tiada bisa dapet taoe, akoe doega, sebagimana akoe soeda bilang lebi doeloe, orang telah dateng lebi doeloe dari kita; Mazarin roepanja djenga, koetika ia bitjara pada akoe, tapi pikirannja tetep boeat toelak akoe poenja perminta'an. Apa kau tiada dapet liat, begimana riboet keliatannja itoe orang orang di Palais Royal ? Roepa roepanja ada sala satoe perkara penting lagi dioeroes. Apa brangkali Cromwell soeda kirim satoe oetoesan padanja?
„Satoe oetoesan dari negri Inggris,“ kata Lord de Winter, tiada bisa, njonja! akoe soeda djalan begitoe tjepet, hingga tiada bisa ada orang dateng lebi doeloe. Tiga hari jang baroe berselang akoe brangkat dan dengen tipoe dan brani akoe soeda bisa lolos dari kepoengan moesoe; akoe naek kreta sewa dengen akoe poenja pengikoet Tony, kamoedian sesampenja di tepi laoet dari ini negri akoe soeda beli koeda jang akoe naeken sampe di Parijs. Akoe taoe betoel, Radja tiada nanti ambil poetoesan sablonnja dapet kabar dari Sri Baginda.“
„Dan kau moesti bilang padanja, Mylord,“ kata Permisoeri dengen swara sedi, akoe tiada bisa toeloeng satoe apa, akoe rasaken banjak sengsara, ja lebi sengsara dari Radja sendiri, kerna akoe kepaksa boeat tinggal idoep di tempat pemboeangan dan menoempang pada sobat sobat jang hatinja serong, sedeng iaorang tiada sekali perdoeliken akoe poenja kesoesahan. Bilang pada Sri Baginda, ia moesti trima peroentoengannja dan meninggal sebagimana satoe Radja jang moelia haroes berboeat. Akoe nanti dateng padanja boeat djalanken itoe hoekoeman sama sama.“
