— 303 —
tjoetjoenja Hendrik de Groote, tentoe itoe barang makanan jang memang soeda lesat rasanja djadi rasa lipet ganda enaknja.
Hertog manggoet sebagi maoe mengoetjap trima kasi boeat itoe poedjian sedeng Grimaud jang berdiri di blakangnja La Ramee ampir djadi tersenjoem.
— „La Ramee,“ kata hertog, „kau betoel pande bitjara dengen manis boedi.“
— „Boekan boeat poedji pada Monseigneur,“ kata La Ramee, „akoe tjoema kaloearken sadja apa jang akoe rasa dalem hatikoe."
— „Djadi dengen sabenernja kau soeka pada akoe?" menanja hertog
— „Ja, akoe maoe bilang, akoe tentoe tiada bisa di hiboerken djikaloe Monseigneur pergi dari Vincennes.“
„Ane betoel kau poenja soeka pada akoe.“
„Abis apa Monseigneur maoe bikin di loear?“ kata La Ramee. „Boleh djadi Monseigneur nanti berboeat sala satoe perkara jang boleh bikin Sri Ratoe djadi goesar dan pengabisannja nanti dikirim ka Bastille, di mana keada'annja tiada begitoe baek sebagi di Vincennes. Betoel akoe moesti mengakoe toean de Chavigny boekan saorang jang manis boedi, tapi toean de Tremblay lebi djelek lagi adatnja.
„Begitoe!“ kata hertog dengen awasin lotjeng jang keliatan djaroemnja djalan sanget plahan.
— „Apa orang boleh harep dari saorang sebagi toean de Tremblay jang ada djadi soedaranja satoe padri Capucijner dan dapet pladjaran baek dari Kardinaal Richelieu? O! sasoenggoenja Monseigneur boleh bilang masi beroentoeng, Sri Ratoe jang masi inget kesian pada Monseigneur, soeda prenta boeat tahan Monseigneur di ini
