— 274 —
„Soenggoe latjoer rahajat negri, toean, akoe taoe itoe perkara sampe abis,“ kata Athos.
Kamoedian iaorang terpisa satoe pada laen.
„Baek djoega ini sore kita maoe pergi pada Scarron,“ kata Athos, „kita nanti menjataken kita poenja toeroet soesa hati dalem itoe perkara.“
„Tapi siapa adanja itoe toean Scarron, jang bikin seantero Parijs djadi riboet pikirannja,“ kata Raoul, „apa ia satoe mantri jang soeda di petjat dari djabatannja?“
„Ja, Allah, boekan, burggraaf,“ kata Athos, „ia tjoema saorang bangsawan renda sadja, tapi tadjem pikirannja dan brangkali ia soeda bikin Mazarin djadi goesar padanja, lantaran ia mengarang sala satoe sair.
„Mengarang sair? Akoe kira itoe pakerdjan'an sanget hina bagi saorang bangsawan,“ kat Raoul.
„Memang itoe pakerdja'an ada koerang pantes tapi djikaloe mengarang sair jang loetjoe, boleh djadi djoega pengarangnja dapet nama baek, sebagi toean de Rotrou. Tapi akoe kira lebi baek djangan tjoba itoe pakerdja'an.“
„Djadi toean Scarron ada satoe pengarang?“ menanja Raoul.
„Ja, dan sekarang kau soeda taoe keada'annja di itoe tempat, burggraaf. Djaga kau peonja diri di itoe roema; djangan banjak bitjara dan lebi baek pasang koeping sadja biar trang.“
„Baek, toean,“ kata Raoul.
„Kau nanti dapet akoe bitjara bebrapa lama dengen saorang bangsawan, pada siapa akoe ada bersebat, jaitoe padri d'Herblay. Kau soeda sring denger akoe bitjara dari padanja.“
— „Akoe inget itoe perkara, toean.“
