— 138 —
Betoel tiada lama lagi ia denger swara tindakan orang djalan dan iaorang bitjara dengen berbisik ; d’Artagnan moendoer lebi dalem.
Bermoela d’Artagnan telah djadi sanget heran koetika ia dapet liat doea orang lelaki liwat di depannja, tapi koetika ia denger swara dari satoe antara itoe doea orang sanget lemas, ia djadi mengarti, itoe orang ada saorang prempoean menjaroe dengen berpake pakean lelaki.
D'Artagnan denger itoe orang berkata:
„Djangan kwatir, Reré, perkara begitoe tiada nanti bisa kedjadian lagi; akoe soeda dapet liat satoe djalanan resia, satoe gowa jang liwat di sebla bawa ini djalan besar dan djikaloe kita angkat satoe batoe besar sadja jang ada di sebla depan roema, soeda tjoekoep boeat kau kaloear masoek dari itoe djalanan dengen tiada oesa kwatir satoe apa lagi."
„O!" menjaoet laen swara jang d’Artagnan kenalken sebagi swaranja Aramis, „akoe brani soempa, djikaloe boekan boeat djaga soepaja kau poenja nama tiada djadi tersiar, prinses, dan akoe tjoema sabatang karang sadja, tentoe ...."
— „Akoe taoe, akoe taoe kau boekan sadja saorang gaga, tapi kau sanget soeka maen silat; tapi kau moesti inget, boekan sadja boeat akoe kau moesti djaga kau poenja diri, tapi boeat kita poenja koempoelan djoega. Oleh kerna itoe kau moesti ati ati dan pake pikiran pandjang."
— „Akoe selamanja sedia boeat toeroet prenta, njonja, apabila itoe prenta dikaloearken dengen swara begitoe aloes.
„O!" kata itoe orang dengen swara aloes.
„Ada apa?" menanja Aramis.
