85
Kwee boleh djadi beroentoeng mendapet pangkat, boewat bikin bagoes kembali bapanja poenja nama, kami minta biar besoek kamoe djadi lebih bagoes dari ini hari.
Habis bilang bagitoe, Tan Djit Sing lantas poelang sama-sama anak istrinja ; hambanja lantas sadia-in medja boewat sembajang.
Hie Tong lihat itoe medja boewat sembajangin bapanja, lantas sadja dia sembajang lebih doeloe, berloetoet dan menangis dengen sedih. Tempo hari soedah djadi malem, dia lantas masoek tidoer. ― Itoe malem ada toeroen hoedjan angin besar sekali, sampe itoe kembang (bwehoa) semoewa djadi rontok.
Hie Tong tempo bangoen pagi dan lihat itoe kembang samoewa soedah rontok, dia djadi sakit hati sekali, sampe membanting dirinja sendiri dan djadi kalenger. Tempo dia inget kembali, dia lantas tarik napas dan berkata : Ja, goewa poenja bapa bagitoe tjilaka sekali peroentoengannja, sampe maoe disembajangin brangkali misti djadi oeroeng?
Kamoedian dia lantas djalan aken kasih taoe hal itoe pada Tan Djit Sing. Tempo sampe di depan pintoe astana, dia bertemoe sama satoe boedak prampoewan dan lantas kasih taoe, jang dia maoe minta bertemoe pada Tan Djit Sing. Itoe boedak prampoewan lantas masoek pergi kasih taoe ; kamoedian lantas dateng kombali dan adjak
