77
pada kita boewat anak. Mengarti? Beroentoeng sekali boewat kita poenja hari toewa, kamoe taoe?
Habis itoe, dia lantas adjak Hie Tong ka kebon kembang dan kasih satoe kamar boewat dia tinggal di sitoe.
Hie Tong soenggoeh tinggal di sitoe, dia tida taoe roemah itoe Tan Djit Sing poenja. Dia poenja hati pikirin sadja dia poenja perkara, sampe tida bisa tidoer. Dia inget jang iboenja pergi di Shoatang tida sekali ada kabar-kabarnja. Besoeknja pagi, tempo dia baroe kaloewar dari kamar, Ong Tjeng dateng padanja dengen bawak kertas merah, dan berkata : Anakkoe! kamoe misti toelis ini thiap. Mengarti? Loïa maoe pake ini hari boewat pergi ketemoe sama sekalian poenggawa di sini dan sobat-andenja, kamoe taoe?
Hi Tong lantas menanjak: Toelis nama siapa dalem ini thiap?
Ong Tjeng lantas balik menanjak, katanya:
Kamoe kata apa?
Hi Tong menjahoet: Loïa siapa namanja?
Ong Tjeng lantas gojang kepala dan berkata: Ah, betoel kamoe anak bodo sekali! sampe Loïa poenja nama kamoe tida taoe! Kita poenja Loïa, ija itoe Hiang Ti hweshio poenja ade. Kamoe taoe? Hoe Hiang Ti dia poenja nama Tan Djit Ko, Mengarti? Doeloe
