41
Radja dalem perkara apa, maka diboenoeh mati. Itoe 4 soeroehan lantas kasih taoe samoewa Bwee Kwee poenja hal.
Tempo dia orang bitjara bagitoe, dia orang tida kira, jang ada satoe boedak bernama Tan Lioe soedah denger itoe rasia samoewa, dan ini Tan Lioe satoe orang jang moeloet botjor sekali. Tempo habis denger orang bitjara, Tan Lioe ada merasa gatel badannja, dan inget maoe pergi mandi. Dia lantas djalan ka logwar dan kasih taoe sama penoenggoe pintoe, soepaja pintoe djangan dikontji doeloe, sebab dia maoe pergi mandi. Di djalan dia bertemoe sama sa-orang bernama Touw Sin. Ini Touw Sin tanjak sama dia, katanja Taisiok sampe sekarang baroe kaloewar, apa ada perkara apa?
Tan Lioe menjahoet: Tida ada perkara apa-apa tjoema saja maoe pergi mandi, sebab badan ada berasa gatel.
Touw Sin bilang Sekarang masih siang; baiklah kita pergi doeloe di waroeng arak dan minoem sedikit.
Tan Lioe bilang baik dan lantas pergi sama-sama masoek di waroeng arak. Sembari doedoek minoem, dia orang omong-omong. Touw Sin tanjak: Ini hari ada dateng soeroehan dari Kota Radja, ada apa perkara?
Tan Lioe menjahoet: Baik kita minoem sadja, traoesa perdoeli itoe perkara.
Itoe Touw Sin kata: Di dalem ini sate-
