281
dara.
Tempo boedaknja dateng dan kasih taoejang dia misti menoenggoe sebentaran di kamar tetamoe, ini Khoe Kwe lantas sadja masoek di kamar itoe, dan dengen kaget dia melihat Bwee Liang Giok atawa Bok Ing ada di sitoe. Bok Ing djoega ada djadi kaget sekali, tempo lihat Khoe Kwe itoe. Dia-orang berdoewa tidak bitjara doeloe apa-apa, hanja lantas sadja saling peloek dan menangis sama sama. Sasoedahnja menangis sedikit lama, dia orang lantas berganti tjeritaken diri sendiri poenja perdjalanan, sadari waktoe dia-orang satoe dan lain berpisah masing-masing. Khoe Kwe atawa Tjoen Sing ada soeka sekali dalem hati, tempo denger soedaranja (Hing Goan) masih ada di negri sendiri, dan Bok Ing atawa Bwee Liang Giok girang sekali, tempo dapet taoe jang emanja ada dengen slamet.
Tempo itoe boedak toewa dateng madep pada Pang Lok Thian dengen membawak soerat, Pang Lok Thian ada djadi goesar sekali, dan berkata: Binatang! Boekan kami soedah bilang, djangan trima orang dateng atawa soerat? Kenapa kaoe brani langgar itoe?
Itoe boedak lantas berloetoet dan berkata: Boekan hamba niat langgar loïa poenja printah. Jang dateng ini ada doewa orang: Jang satoe Tetok Koenboen poenja anak, jang lain Bok Ing, jang sering sekali loïa seboet; itoe
