226
dateng aken membri hormat, sebab saja tiada taoe pe'm ada disini.
Bwee-hoedjin berkata: Pe'm djoega tiada taoe, hiantit ada di tempat ini. Beroentoeng sekali jang sekarang kita dapet bertemoe.
Kamoedian dari itoe, Tjoen Sing lantas oendjoek hormat pada Khoe-hoedjin dan Insian Siotjia, dan lantas doedoek sama-sama.
Sasoedahnja Tjoen Sing doedoek, Bwee-hoedjin lantas berkata: Pe'm poenja anak Bwee Liang Giok, dia pergi di Gitinkoan tjari Houw Loan, dia poenja bakal mertoewa. Bagimana maka dia boleh djatoeh di hiantit poenja roemah dan djadi bertoenangan sama hiantit poenja entji, itoe pe'm tida sekali mengarti. Tjobaklah hiantit kasih tjerita jang terang.
Tjoen Sing lantas berkata: Sekarang pe'm seboet itoe Houw Loan, saja djadi amat sakit hati, kerana dia satoe orang djahat sekali, sama djoega binatang alas.
Bwee-hoedjin lantas menanjak: Kenapa bagitoe?
Tjoen Sing lantas tjerita, jang Houw Loan soedah maoe bikin tjilaka sama Bwee Liang Giok, dan Hie Tong soedah membela sampe mendjadi mati. Teroes-meneroes Tjoen Sing itoe tjeritaken perkara Bwee Liang Giok sampe abisnja. Bwee-hoedjin tempo habis denger itoe semoewa, hatinja djadi sakit sekali,
