181
lantas ambil obat semangkok dan soeroeh anaknja doedoekken itoe orang satengah mati, dan lantas dia tjekokken obatnja itoe. Tida lama sasoedahnja itoe obat toeroen, orang jang ampir mati itoe lantas moelain tarik napas dan melek, serta lihat jang dirinja ada doedoek dalem praoe, dan di depannja ada doewa orang prampoewan. Dia lantas berkata: Tantoe ma jang soedah toeloeng sama saja, sa-orang jang soedah tida kepingin hidoep lebih lama lagi.
Itoe prampoewan toewa djadi girang sekali dan berkata: Ja; tapi marilah masoek ka dalem goeboek-praoe lebih doeloe. — Kamoedian lantas dia panggil anaknja dan berkata: Giok Tjia! tjobak kaoe pergi ambil pakeannja kaoe poenja entia!
Sasoedahnja Tjoen Sing masoek ka dalem goeboek praoe, dan itoe pakean jang disoeroeh ambil soedah dateng, dia lantas toekar pakean dan mengadep kasih hormat pada itoe prampoewan toewa dengen maoe berloetoet. Ito prampoewan toewa lihat bagitoe, lantas tjepet tjegah sama dia, dan berkata: Kita-orang ada toekang tangkep ikan sadja, dan tiada pake itoe adat berloetoet-loetoet bagitoe.
Tjoen Sing berkata: Ma soedah toeloeng saja poenja djiwa, patoet saja membilang banjak trima kasih.
