115
nanti lantas kasih kabar pada Bwee Liang Giok. Kamoedian dia lantas pergi dari sitoe.
Tjoen Sing, jang memang tida taoe berpisah sama Bwee Liang Giok, lantas dateng di kamar dan doedoek sama-sama Bwee Liang Giok itoe.
Itoe waktoe Tan Djit Sing ada doedoek di dalem sama-sama istrinja dan dia berkata, jang hatinja girang sekali, sebab lihat Tjoen Sing dan Bwee Liang Giok ada roekoen sekali. Sedeng dia lagi doedoek bitjara, lantas dateng orangnja jang djaga pintoe kasih taoe, jang di loewar ada Tihoe dan Tikoan maoe bertemoe padanja. Tan Djit Sing lantas berkata: Ini doewa poenggawa dateng di sini, tantoe ada perkara apa-apa jang koerang enak. Habis bilang bagitoe, dia lantas pergi ka loewar, bertemoe pada doewa poenggawa itoe dan lantas saling mengoendjoek hormat satoe sama lain. Sasoedahnja semoewa berdoedoek. Tan Djit Sing lantas berkata : Taijdjin berdoewa dateng di sini ada kabar apa ?
Tihoe lantas berkata: Saja dateng bri taoe, jang ini pagi ada orang berkoeda dateng dari kota-Kadja membri kabar, jang Maha Radja soedah kasil keloewar satoe soerat titah, jang nanti dateng di sini terbawak oleh Sinsiang Lonw Kie dan Hanlim-i Tong Tjin. Itoe orang jang berkoeda bilang, Sinsiang,
