112
djoega anaknja toeroet karang itoe tjerita, dan dia lantas kasih satoe kepala tjerita, jang tjeritanja misti lantas dikarang oleh Bwee Liang Giok dan Tjoen Sing berdoewa.
Bwee Liang Giok dan Tjoen Sing, masing-masing lantas pergi di medja toelis, dan tida dengen pikir-pikir lagi, lantas sadja dia orang menoelis dengen tjepet dan lantas djadi.
Tan Djit Sing djadi soeka hati sekali, dan tempo dia lihat itoe doewa karangan, dia berkata : Betoel bagoes sekali karangan ini! — Sembari bilang bagitoe, Tan Djit Sing ada inget jang Tjoen Sing poenja karangan ada sedikit koerang baik. Kemoedian dia lantas berkata pada doewa anak itoe: Kamoe poenja karangan ada sampe baik; tapi kamoe misti teroes djoega beladjar lagi, soepaja tambah lagi pengartian.
Sasoedahnja itoe, Bwee Liang Giok dan Tjoen Sing djadi sama sadja dengen orang bersoedara : siang malem, selamanja dia orang berdoewa ada bersama-bersama sadja. Tida lama sahabisnja Tan Djit Sing lihat karanganja Bwee Liang Giok, dia teroes masoek kasih taoe pada istrinja, jang dia soedah oedji betoel Bwee Liang Giok poenja pengartian, dan sekarang ada tetep ingetan maoe ambil Bwee Liang Giok itoe boewat mantoe. Habis bilang begitoe, lantas dia soeroeh istrinja atoer sadja bikin persadiaän boewat menga-
