PEGANG RESIA.
„Itoe akoe tida bisa bilang, Hoen, sebabdi mana ada doea jang maoeken apa-apa jang tjoema satoe, tentoe sadja tida nanti doea-doeanja bisa dapetken apa jang di'ingin.“
„Dan dalem ini perkara kaoe berada dalem kadoedoekan lebih baek, tapi soekoer kaoe belon taoe di mana ia tinggal.“
Kim-djin kombali tertawa. la tertawaken Liang-hoen jang sama sekali tida doega, bahoewa Kim-djin soeda taoe di mana roemahnja itoe gadis, ja, malah boekan bagitoe sadja, tapi djoega soeda pernah djalan-djalan sama-sama, doedoek sama-sama dalem satoe kandara'an, pegang lengannja dan kamoedian djabat tangannja.
Tapi Liang-hoen kira ia poenja sobat tertawa lantaran laen.
„Kaoe tentoe anggep ada gampang sekali boeat tjari taoe di mana ia tinggal dan siapa adanja ia poenja orang toewa. Tapi kaoe moesti ingat kota Betawie boekan sabesar piring nasi atawa mangkok sajoer.“
Kim-djin angkat poendak!
„Tapi kenapa kaoe bilang akoe mempoenjai kadoedoekan lebih baek dalem ini perkara ?“ tanja ia kamoedian.
„Sebab kaoe selamanja berada di Betawie, boekan saperti akoe ; tiga boelan sakalih baroe akoe berada di ini kota boeat satoe boelan lamanja. Dalem itoe tiga boelan akoe salaloeh moesti bikin perdjalanan.“
19
