24
TJERITA ROMAN
Njonja Jansen berpikir sampe brapa djaoeh ia ada hak boeat toeroet tjampoer dalem laen orang poenja oeroesan roemah tangga. Ia taoe jang ia tida mempoenjai hak, tapi ia begitoe tjinta pada Bwee. Ia nanti berboeat apa jang ia bisa boeat tjegah jang Bwee Hoa djadi goendiknja orang, teroetama dari kapitan Be Goat Soe jang betoel terkenal hartawan besar, tapi namanja tida terlaloe wangi, teroetama di dalem oeroesan prempoean. Ia nanti bitjaraken dengen soeaminja, barangkali itoe toean tanah bisa berboeat satoe apa boeat kebaekannja Bwee Hoa.
Koetika blakangan Bwee Hoa diambil poelang oleh baboe Soemi dan toean Jansen kombali dari kongsi, njonja Jansen laloe toetoerken apa jang ia dapet denger dari Bwee Hoa dan anggep ada satoe „schande” jang anak begitoe manis seperti Bwee moesti djadi goendiknja kapitan Be Goat Soe.
Tapi penjeselan njonja Jansen ada besar, waktoe soeaminja seabisnja mendengerken iapoenja penoetoeran tjoema ganda goleng kepala.
„Orang Tionghoa ,istrikoe, poenja adat istiadat ada laen dengen kita,” kata toean Jansen, „di mana dalem masjarakat kita bergoendik atawa berbini lebih dari satoe dianggep satoe kedosa'an besar, di dalem masjarakat Tionghoa