— 447 —
maka ija soedah berlakoe lama, aken berangkat ka kota Parijs.
Tidalah salah, kaloe toewan Morrel merasa males aken pergi pada Danglars itoe: ija poelang dari Parijs ada dengen kadoekaän besar sekali, oleh kerna, permintaännja tertampik. Aken tetapi tida sekali ija ada mengomel atawa njataken kabentjiannja dengen satoe perkataän poen, hanja setelah datang, ija memeloek menangis pada istri dan pada anaknja sendiri, membri taoe dengen manis pada Emmanuel, laloe masoek ka kamar toelis dan memanggil Cocles.
Sedeng begitoe, njonja Morrel berkata pada Emmanuel: Sekaranglah kita-orang tida aken tertoeloeng lagi."
Sesoedahnja njonja Morrel berkata-kata sekoetika lamanja sama nona Julie dan Emmanuel, ija lantas soeroeh nona Julie menoelis pada ija (Julie) poenja soedara lelaki ijang ada di tangsi di Nimes, soepaja soedara ini lantas dateng di Marseille. Njonja Morrel itoe ada rasa perloe berkoempoel sama anak-anaknja semoewa aken menahan kasoesahan besar ijang ada mengantjem padanja. Lain dari begitoe, ija poenja anak lelaki Maximiliaan Morrel namanja, maski baroe beroemoer doewa poeloeh doewa tahon, ada tjeredik, berhati tetap dan toeloes, hingga bitjaranja sering-sering ditoeroet oleh toewan Morrel.
Tatkala Maximiliaan itoe soedah sampe besar aken memegang satoe kerdjaän, ajahnja tida maoe tentoeken ijang ija misti pegang kerdjaän ini atawa itoe, hanja soedah tanjaken soekanja anak itoe sendiri ijang lantas bri taoe, ingin bekerdja di dalem balatentara. Di dalem itoe kerdjaän ijang terpilih olehnja sendiri, Maximiliaan ada berlakoe baik, hingga sigralah djoega ija soedah dapetken pangkat tweede Luitenant. Di dalem ija poenja barisan ija terkenal seperti
