317
„Persetan, sekarang akoe dapet satoe pikiran,“ kata Nell.
„Tjoba boeka kaoe poenja peti barang barang, Fox,“ katanja pada itoe klontong.
„Bikin apa?“
„Kaoe nanti liat.“
„Ajo boekalah, sobat,“ kata Rogers tatakala ia liat Fox merasa koerang senang.
„Akoe nanti tjeritaken akoe poenja maksoed,“ kata Nell. „Itoe pei ada besar dan lebar akoe poenja badan ketjil dan koeroes. Kaloe akoe bisa masoek dalem itoe peti... Kaloe akoe bisa masoek, akoe djadi bisa ikoet sama Fox dan sesampenja di sitoe, ia boleh taro akoe dalem kamarkoe.“
Beroelang oelang Nell tjoba masoek dalem itoe peti, tapi sia sia sadja, itoe peti koerang besar.
„Ini boekan namanja anggep perkara ada penting,“ kata Rogers. „Mari kita tjari laen dialan. Denger! Poekoel sepoeloe kaoe bikin padem lilin atawa lampoe dalem kaoe poenja kamar. Kaloe semoea soeda sepi, itoe nona tentoe aken kloear dari itoe roemah. Kaoe nanti ketemoeken kita orang di djalanan.“
„Teroetama djaga, djangan itoe nona dapet liat apa apa,“ kata Bernard.
Fox soeka menoeroet.
„Akoe maoe djalanken itoe maksoed.“ katanja, „tapi kaoe moesti hati hati, sebab itoe bangsat bisa tipoe padamoe.“
„Djangan koeatir boeat kita orang,“ djawab Rogers. „Biarlah kaoe sendiri berhati hati.“
„Sekarang akoe pergi,“ kata Fox dan ia masoeken poela barang barangnja dalem koffer jang Nell taro di blakangnja.
