TIDA DJADI LEBI TERANG
Dengen sengadja Kim-djin pilih tempat jang djaoe dari penonton-penonton laen, kerna sekarang ia merasa perhatian aken lebi banjak ditoedjoeken pada itoe gadis dari pada lajar poetih. Koetika lebi baek boeat bitjara banjak saperti di itoe waktoe, ia tida nanti gampang dapetken lagi.
Djoega ia ingat jang itoe gadis bisa bitjara Blanda, maka lekas djoega pembitjaraan dilakoeken dalem itoe bahasa antara marika berdoea. Iboenja itoe gadis jang djoega menganter, sama sekali tida menaro perhatian pada marika poenja pembitjara’an, kerna sedeng ketarik betoel-betoel oleh apa jang ia liat; tjoema kadang-kadang ia menanja apa artinja letter-letter jang dikasi liat.
„Akoe merasa girang sekali bisa bertemoe poela dengen kaoe, nona,” kata Kim-djin.
Itoe gadis mesem, tapi lantaran dalem gelap tentoe sadja tida dapet diliat oleh Kim-dijin.
„Akoe kira kita poenja berkenalan aken djadi satoe persobatan,” djawab itoe gadis, „sebab saperti djoega kita berdjandji, saban-saban kita bertemoe di tempat tontonan.”
„Wan kaoe tida merasa tida senang boeat itoe pertemoean-pertemoean jang tida terdoega ?”
„Och, apa djoega jang mendjadi alesan ?”
„Djadi kaoe tida merasa kaberatan, djikaloe akoe lebi sering bertemoedengen kaoe ?”
31
