Tjeng Haij Wan Ke
TJENG HAIJ WAN KE
ATAWA
PERMOESOEAN DARI GLOEMBANG PERTJINTA'AN.
I.
Doea Kekaseh.
Gadis jang terkesian, Kiang Bwe Sian, pada satoe hari dengen memegang tangannja ia-poenja ketjintaän, Tjia Bek Kheng, telah berkata dengen soeara dalem tenggorokan:
„Oh, Ko, Ko, akoe moehoen, biarlah kaoe lantas tinggalken akoe. Ach, akoe menjesel sekali, bahoea akoe dengen Ko poenja ketjintaän tjoema bisa berdjalan hingga sebegini sadja.“
Bek Kheng menangis sesenggoekan dan dengen soeara piloe ia berkata:
„Moaij, begimanatah kaoe boleh keloearken ini perkataän? Oh, kaoe tentoe tiada loepa, jang akoe perna bilang: Biarpoen apa djoega jang nanti terdjadi, toch akoe tiada aken bisa berpisa atawa tertjere dari Moaij. Ach, Moaij, tidakah kaoe menjinta akoe dan tidakah djoega kaoe telah membales tjintakoe? Aken tetapi, mengapatah ini hari dengen mendadak boleh ada ini perobahan? Moaij, ketahoeilah, bahoea boeat sekarang ini, laen-laennja hal brangkali djoega akoe aken bisa menoeroet, tetapi ada laen boeat ini satoe oeroesan, akoe tentoe tiada nanti maoe moefakat. Hareplah Moaij bisa menimbang hatikoe dan djanganlah tjoba djatoken itoe seksaän. Lagipoen, apatah salanja kaloe Moaij tjoba tjeritaken sebagian dari sebab-sebab jang membikin kaoe sampe keloearken ini perkataän?“
„Ko, kenapatah kaoe moesti begitoe berkeras?“ berkata Bwe Sian dengen aer-mata jang berlinang-linang, „kaloe Ko soeda tiada tega meninggalken Moaij, toch kedjem sekali bila Moaij bisa sampe hati melempar pada Ko. Tjoema sekarang oleh sebab timboel soeatoe soeal baroe jang teramat soeker, sedeng Moaij tiada boleh tjeritaken pada Ko, boekanlah ada lantaran dengen sengadja Moaij hendak menjimpen saroepa resia boeat Ko. Sesoenggoenja, kaloe Moaij moesti menoetoerken itoe sebab, tentoe aken membikin tambanja Ko poenja kesoekeran; dari itoe, Moaij soeda rasa ada lebi baek djangan tjeritaken sama-sekali, jang kendati lantaran ini, Ko bisa djadi koerang seneng pada Moaij. Paling betoel, Ko, anggep sadja Moaij ini ada orang jang soeda mati, masakah Ko nanti bisa tarik kaloear poela dari dalem peti, boeat memaksa Moaij menika?“
„Tentoenja Moaij tiada mengenal betoel hatikoe, maka Moaij telah mengaloearken ini roepa perkataän,“ berkata sekarang Bek Kheng dengen aer-mata jang berlinang, „saoemoer-idoepkoe poenja keberoentoengan adalah bergantoeng padamoe; sebaliknja biar kesoekeran begimana djoega dateng menimpa, toch akoe tiada aken bisa tinggalin pada Moaij. Maka itoe, Moaij, toetoerken doeloe itoe sebab kenapa kita-orang moesti terpisa, agar soepaja bisa diperdamiken dengen pelahan-pelahan, atawa tjoba liat apakah soenggoe kita-orang tiada bisa dapetken djalan boeat singkirken itoe satoe halangan? Samentara kaloe bener-bener akoe tiada bisa kawin dengen Moaij; ja, apa-boleh-boeat; di lahir, akoe aken berlakoe seperti soeda loepaken Moaij poenja diri, selamanja sebrapa bisa akoe tjoba kerasken hati boeat tiada deketin Moaij poela. Aken tetapi, Moaij haroes mengarti hatikoe dan kenal baek niatankoe. Dari bermoela sampe pada achirnja, akoe poenja ketjintään soeda seraken pada Moaij, maka djoega tiada aken bisa dipindaken lagi boeat laen orang. Akoe tetepken padamoe, Moaij, kaloe akoe tiada bisa dapetken Moaij boeat istri, akoe aken selamanja tinggal boedjang!“
„Ko, roepanja kaoe soeda artiken kliroe akoe-poenja maksoed!“ berkata lagi Bwee Sian, „apa jang akoe telah bitjaraken, adalah jang berhoeboeng dengen akoe-poenja peroentoengan dan nasib djelek. Maskipoen akoe sanget menjinta padamoe, maskipoen akoe-poenja hati antero telah mendjadi kepoenjaänmoe, tapi toch seperti soeda dibilang dengen lantaran peroentoengan djelek jang melilit dirikoe, maka itoe maoe-tida-maoe akoe kepaksa moesti berpisa djoega dengen kaoe. Oh, Ko, ketahoeilah, djoestroe boeat goenanja, Ko, dari itoe baroe ada ini pikiran dan ini maksoed jang sanget tiada menjenengken, sekalipoen itoe rasanja seperti memoetoesken djantoeng ampoenja sakit. Sebaliknja kaloe boekan begitoe, satoe moestail aken akoe bisa lempar itoe pengrasaän tjinta dan menjiksa aken diri sendiri. Sedeng sebabnja itoe, sesoenggoenja Ko, boeat samentara ini akoe masi belon boleh tjeritaken terang, oh, akoe moehoen, akoe mengharep demi kaoe-poenja kemoerahan, djanganlah kaoe mendesek akoe dan djanganlah kaoe memaksa akoe moesti tjeritaken sekarang.“
Sehabisnja berkata, aer-moekanja bersorot sedih sekali; itoe aer-mata jang mirip seperti moetiara, djato berketes-ketes ka bawah, membasaken sebagian badjoenja. Sedeng Bek Kheng hendak moelai bitjara lagi, tetapi tiada kira selagi ia mengangkat kepalanja, mendadak ia dapet liat Bwe Sian poenja papa, Kiang Tjeng Tjoan, soeda berdjalan kaloear dari dalem roema.
„Papa !“ demikian kedengeran Bwe Sian poenja satoe soeara panggilan, jang berbareng dengen itoe keliatan tjepet sekali ia telah lari memboeroe ka hadepan ajahnja. Samentara Bek Kheng poen kepaksa mengmengikoetin dari blakang: di mana, sesoeda bitjara sedikit dengen orangtoea itoe lantas berdjalan poelang dengen saorang diri.
Dan Bwe Sian djoega dengen ikoetin ajahnja, bertindak satoe-satoe kombali ka roemanja.
„Dengen pertemoean kaoe-orang ini hari,“ begitoe Tjeng Tjoan moelai menanja pada si gadis, koetika marika soeda berada dalem roemanja, „apatah jang dia telah bitjaraken?“
Bwe Sian tiada bisa menjaoet, hanja tinggal gojang-gojangin kepalanja. Itoe aermata jang oepama moetiara poetoes tali, djato bergoeling-goeling ka bawah.
Tjeng Tjoan mengarti kesengsaraän hati sang poetri, dari itoe sebagi hendak memboedjoek, ia berkata dengen kesoesoe:
„Anakkoe, akoe mengarti kaoe terlaloe bersengsara, brangkali djoega ada lebi heibat rasanja dari pada penanggoengan orang jang bakal trima hoekoeman boenoe. Aken tetapi, oh, Allah, akoe djoega tiada bisa berdaja laen lagi. Anakkoe jang baek, tidakah kaoe soeda bitjara apa-apa padanja?“
Bwe Sian menahan aken djatonja aermata, tetapi dengen hati jang antjoer dan soeara piloe ia toetoerken satoe persatoe tentang segala apa jang baroesan ada dibitjaraken olehnja dengen Bek Kheng.
„Ja, ja, inilah ada terlaloe soeker,“ katanja Tjeng Tjoan sambil mengela napas, „paling perloe moesti dipikir satoe djalan jang sampoerna boeat bri djawaban padanja, agar tiada sampe menerbitken banjak tjoeriga hati bagi dia itoe.“
„Aken tetapi,“ berkata Bwe Sian, „ini toch boekan ada satoe soeal jang terlaloe soeker.“
„Boleh djadi bener begitoe,“ saoetnja poela Tjeng Tjoan, „tetapi djika dengen adanja hal demikian sampe moesti menerbitken orang poenja tjoeriga hati, itoe djoega tiada bisa terlaloe baek. Sedeng sesoedanja kaoe mengaloearken itoe perkataän, bolehlah boeat samentara tra-oesa dibitjaraken poela lebi pandjang: hanja paling penting, jalah moelai sekarang hingga selandjoetnja kaoe bisa berlakoe lebi ati-ati.“
II.
Pikoelan hati.
~ ~ ~
Koetika Tjeng Tjoan soeda oetjapken itoe perkataän jang pengabisan, sigra djoega dengen terboeroe-boeroe ia berlaloe dari dampingan anaknja. Samentara itoe. tinggallah Bwe Sian saorang diri jang, moesti terdjoenken dirinja dalem gloembang dari laoetan pikiran. Sesoenggoenja djoega ia soeda tiada bisa dapetken poela soeatoe djalan jang sampoerna dalem ini kesoekeran jang lagi mengantjem.
Kaloe ia moesti tjeritaken hal jang bener pada Bek Kheng, nistjajalah itoe bakal tiada bisa ditjega terbitnja seroepa ketjilakaän heibat. Atawa dengen lantaran memandeng pada Bwe Sian, anak moeda itoe aken lantas meloepaken dan melinjapken segala hal, inilah ada mendjadi satoe kekoerangan besar bagi kebedjikan jang haroes dari orang idoep dan bakal berarti djoega, Bwe Sian sendiri jang mengeniaja pada Bek Kheng sampe moesti nampakken itoe kedosaän. Sedeng sebaliknja kaloe teroes meneroes hal dipegang resia olehnja dan tiada maoe memberi taoe pada anak moeda itoe, Bek Kheng tentoe aken selaloe tjoerigain dirinja atawa menoedoe dia itoe tiada memegang djandji, sengadja poetoesken pertjintaän di separo djalan, oleh kerna Bwe Sian mempoenjai ketjintaän baroe. Soenggoe inilah ada sanget dirasa berat oleh si gadis dan ia bakal tiada bisa dapetken djalan tjara begimana boeat tjoetji-bersi noda demikian. Apalagi Bwe Sian tiada bisa loepaken bahoea Bek Kheng ada saorang anak moeda jang bertabeat brangasan: maka itoe, hatinja tiada dapet tida merasa koeatir, kaloe-kaloe dengen lantaran ini sigra terbit soeatoe hal jang tiada dapet didoega. Oh, Bwe Sian merasa bahoea ia tentoe bakal teritoeng satoe orang jang berdosa besar bagi doenia ini.
Sedeng Bwe Sian di sini lagi teroembang-ambing dalem gloembang pikoelan-hati, serta tiada sekali bisa dapetken poetoesan jang baek; adalah di sana, Bek Kheng penoe ketjoerigaän dalem hatinja, tiada ada soeatoe sinar terang jang bisa menoentoen padanja berdjalan dari tempat kegelapan.
Bek Kheng jang setelab terpisa dari djantoeng-hatinja, menoedjoe poelang ka roemanja: koetika baroe sadja kakinja melangka pintoe roema, sigra djoega kedengeran ia lepasken soeara keras dan menangis dengen sedih.
Siapa djoega tentoe mendjadi kaget kaloe mendadak dapetken kedjadian demikian. Begitoelah ia-poenja iboe, Sim Hoedjin, jang lagi berdoedoek dalem roema, telah bangoen melompat lantaran kaget, dengen berlari-lari langsoeng ia memboeroe kaloear, menoebroek dan memelok sang anak dengen kedoea tangannja.
„Anakkoe,“ berkata ia dengen soeara terpoetoes-poetoes, apatah artinja ini? . . . . Tidakah kade soeda diperhinaken dan diganggoe?. . . . Oh, bilanglah pada iboemoe!. . . . .“
„Tida, tida,“ berkata Bek Kheng dengen golengin kepalanja, biarlah Mama djangan slempang hati. Akoe tida apa-apa!. . .
„Kaloe begitoe, sebab apatah kaoe moesti menangis?“
Bek Kheng poenja aer-mata sigra djoega mengoetjoer toeroen dengen deres sekali.
„Oh, Mama,“ katanja dengen soeara piloe, „ketahoeilah, bahoea Bwe Sian soeda tiada soeka lagi padakoe!. . .“
Brangkali tiada ada begitoe kaget mendenger soeara goentoer, dari pada seperti mendenger ini penjaoetan, maka Sim Hoedjin laloe berkata dengen soeara terprandjat:
„Ach, ada hal demikian! Oh, apatah soenggoe perkataänmoe? Sebab apatah dia soeda tiada maoe lagi padamoe? Tidakah ada soeatoe sebab perboeatanmoe jang menjebabken dia berketjil hati?“
„Begimanatah akoe brani bikin dia koerang seneng?“ berkata lagi Bek Kheng dengen aer-mata jang berlinang-linang, „akoe djoega tiada bisa mengarti mengapa boleh djadi begitoe. Tjoema dia soeda bilang, jang dia tiada aken bisa menika lagi padakoe.“
Sambil berkata demikian, ia toetoerken satoe-persatoe segala keadaän dan segala perkataän jang baroesan dibitjaraken antara dia dengen Bwe Sian.
Hoedjin tinggal diam sembari perhatiken orang poenja tjerita dan sebentar-sebentar hanja keliatan ia mengela napas pandjang. Ia djoega tiada bisa mengarti tentang sebab apa boleh djadi begitoe roepa.
„Aken tetapi, ini djoega boekan mendjadi soeatoe soeal jang terpenting,” demikian berkata sang iboe kemoedian, „kaloe dia soeda berlakoe begitoe soenggoean, kaoe toch boleh tra-oesa pikirin poela. Kaoe boleh tjari poela dan menika dengen laen prempoean, toch doenia jang tida sadaon-kelor, tiada koerang gadis-gadis jang berparas eilok, masatah tjoema moesti Bwe Sian saorang.”
„Ach, Mama, djanganlah kaloearken poela ini bitjara. Tiada ada lagi laen prempoean di doenia ini jang bisa lebi baek dari Bwe Sian! sekalipoen boleh djadi ada jang berparas eilok oepama bidadari di langit, toch akoe-poenja ketjintaän jang soeda ditoempaken antero boeat Bwe Sian, tiada lagi bisa digerakken oleh apa djoega, Saoemoer idoepkoe tiada aken bisa teroba poela pri-ketjintaänkoe toe!”
Sim Hoedjin keliatan sedikit mendongkol dan dengen soeara membentak ia berkata:
„Anak edan! Sesoedanja dia tiada maoe padamoe, kaoe masi djoega hendak toenggoein dia dengen setjara edan; soenggoe, itoelah ada lakoenja saorang jang paling goblok!“
„Dia tiada soeka lagi padakoe, tentoelah ada satoe sebab jang menjoekerken padanja,“ berkata Bek Kheng. „dari itoe biarlah pelahan-pelahan akoe berdaja boeat sampe bisa mendapet taoe itoe sebab, kemoedian baroelah berdami poela dengen dia, tjara begimana jang baek.“
Kombali Bek Kheng moesti menarik napas pandjang setelah oetjapken ini perkataän.
„Oh, Bwe Sian, Bwe Sian!“ kata lagi ia seperti orang meratap, „djika soenggoe kaoe melempar ako nistjajalah akoe aken mendjadi saorang jang paling bertjilaka di doenia ini..... Ach, soenggoe ketjiwa akoe moesti idoep seperti satoe manoesia.....Och, Allah, Allah! apatah dosakoe sampe akoe moesti menerima ini roepa seksaän?..... Ja, ja, akoe brani pastiken boekan soewadjar Bwe Sian hendak tinggalken akoe. Dia tentoe tiada tega aken berboeat demikian dengen menoeroet kemaoeannja sendiri!“
Mendenger ini ratapan, Sim Hoedjin merasa sanget belas-kesian, djoega tertjampoer dengan pengrasaän geli. Kemoedian ia laloe berdaja sebrapa bisa aken tjoba menghiboerken hatinja sang anak jang tjoema satoe-satoenja itoe.
„Ma,“ berkata lagi Bek Kheng, „soeda lama kaoe tiada perna berkoendjoengan di sana. Apatah tiada, baek djika besok kaoe tjoba pergi djalan-djalan ka roemanja, atawa brangkali dia nanti bisa bitjaraken apa-apa padamoe?“
Sasaät lamanja Hoedjin berdiam seperti orang asik berpikir, kemoedian laloe kedengeran ia berkata:
„Baeklah, besok akoe nanti pergi!“
Esoknja hari, bener djoega Sim Hoedjin telah dateng ka gedong itoe familie Tjia, jang kebetoelan Tjeng Tjoan itoe tempo lagi keloear roema, maka kedatengannja Hoedjin melaenken disamboet oleh Bwe Sian.
Si gadis koetika baroe sadja berdjoempa dengen Hoedjin, sigra djoega dengen tiada tertahan, aer-matanja djato berlinang-linang di kedoea pipinja jang haloes. Membikin Sim Hoedjip moesti merasa sapoeloe bagian ampoenja kesian dan dengen memegang tangannja Bwe Sian, ia menanja satoe persatoe dengen setjara lemah-lemboet. Aken tetapi, Bwe Sian soeda tetepken hatinja aken tiada maoe petjaken itoe resia jang terkandoeng, selaen dari pada mengoendjoek jang ia terpaksa moesti bikin poetoes perhoeboengan dengen Bek Kheng.
Samentara Hoedjin lagi berada dalem saroepa kesangsian jang sanget heibat, djoestroe saät mana, Tjeng Tjoan soeda poelang, maka Hoedjin poen kombali telah tjoba berdaja aken mengharep bisa dapet denger apa-apa dari orang-toea itoe.
„Djanganlah ketjil hati, So-so,“ berkata Tjeng Tjoan dengen ketawa, „ini soeal perkawinan adalah sama sekali akoe tiada perna tjampoer taoe. So-so melaenken boleh dapet ketrangan dari Bwe Sian sendiri, dia soeka atawa tida; kerna itoe semoea tiada perloe diperdameken lagi dengen akoe.”
Sambil oetjapken ini perkataän, Tjeng Tjoan soeda kaloearken kombali brapa pata perkataän sebagi orang memaen, hingga inilah membikin Hoedjin semingkin merasa bingoeng, tiada satoe apa jang bisa bikin ia djadi terang. Ia sekarang mengarti, tiada perloe moesti bitjara dengen Tjeng Tjoan lebi djaoe poela, sedeng dalem hatinja adalah merasa sapoeloe bagian tiada seneng : achirnja seperti orang oering-oeringan ia bangoen berdiri dari tempat doedoeknja, berpamitan dengen itoe ajah dan anak teroes berdjalan poelang.
Sepandjang djalanan poelang, traoeroeng dalem hatinja masi sadja mengira-ngira dan menimbang-nimbang. tjara begimana ia haroes bikin seneng hatinja sang poetra jang toenggal.
III.
Nasehat satoe iboe.
~ ~ ~
Tatkala dapet liat iboenja soeda poelang, Bek Kheng tjepet menjamboet sembari menanja dengen setjara kesoesoe:
„Mama, apatah jang dia soeda bitjaraken padamoe?”
„Dia?” meneges Hoedjin sambil menepok tangan, „sama djoega seperti apa jang dia kemaren telah bitjaraken sendiri padamoe, Akoe djoega tiada bisa dapet menebak apa jang dimaksoedken olehnja. Oh, anakkoe jang baek, ada paling betoel, kaloe kaoe lantas menoeroet sadja seperti apa jang akoe telah bilang, loepakenlah dia itoe djangan pikiran poela pada Bwe Sian jang sekarang soeda tiada soeka padamoe!”
„Ach, Mama,” berkata Bek Kheng dengen menangis, „itoelah ada soeatoe hal jang soeker akoe bisa berdjalan!”
Boleh djadi selamanja Sim Hoedjin belon perna marain anaknja seperti ini kali, demikianlah dengen soeara aseran ia membentek anak itoe dan berkata:
„Kaoe tiada bisa kerdjaken, mendjadi djoega kaoe tiada maoe menoeroet adjarankoe? Tetapi, ach, apatah sebenernja jang kaoe lagi pikir maoe kerdjaken?”
Mendenger begitoe, Bek Kheng merasa begimana iboenja ampoenja morka; ia tinggal bingoeng terlongong-longong, kemoedian dengen aer-moeka jang penoe kesedihan, ia lari masoek ka dalem kamar toelisnja.
Samentara itoe, koetika sang iboe dapet liat anaknja soeda berlaloe, ia djadi mengela napas seperti hendak entengkan itoe tindihan bagi hatinja dan berkata saorang diri:
„Ini anak soenggoe mempoenjain pikiran terlaloe boetek. Dalem brapa hari ini roepanja selaloe mengoendjoek seperti orang ilang seoemanget dan ilang ketjerdikan, semoea itoe tiada laen dari sebab itoe satoe prempoean, sampe membikin oeroesan besarnja seperti diloepaken oleh dia. Sedeng itoe anak prempoean poen seperti sengadja soeda berlakoe begitoe aneh, soenggoe tiada beda marika berdoea seperti satoe moesoe.“
Sedeng Hoedjin riboet memikirin ini hal, koenjoeng-koenjoeng ia dapet denger Bek Kheng di dalem soeda kasih denger ia-poenja soeara tangisan jang sedih sekali. Inilah membikin Hoedjin seperti tiada taoe apa jang ia moesti berboeat; achir-achirnja ia laloe berdjalan masoek kadalem kamar itoe. Ia dapet liat, Bek Kheng dengen tengkoeroepin kepala di atas medja, menangis sesenggoekan tiada brentinja.
„Apatah artinja ini?” menanja Hoedjin dengen tiada sabaran „oh”, akoe ingin mengetahoei, hal apatah jang ditangisin oleh kaoe? Atawakah kaoe tangisin ajahmoe? Atawa djoega kaoe hanja tangisin itoe anak prempoean?”
Mendenger ini perkataän, Bek Kheng seperti merasa dirinja disiremin olej aer-ijs. Itoe hati jang berbakti sekean lama ini oepama dilipoeti oleh gloembang tjinta, sekarang mendadak moentjoel lagi. Seperti orang tiada merasa ia berkata dengen soeara terprandjat:
„Oh, ma, ma! apa kaoe bilang? Tidak perna anak brani meloepaken itoe permoesoean besar dari papa!”
„Djika demikian, tjobalah kaoe rapetin matamoe,” berkata lagi Hoedjin dengen soeara sentakan, „dan pikir-pikir kematian ajahmoe jang sanget mengeneskan, oh, itoe keadaän jang mengeriken waktoe ia hendak menarik napas pengabisan. Soeda begitoe, kaoe haroes bisa oendjoekin ambekanmoe dan perbetoelken soemangetmoe, dengen setjara satoe lelaki perloe tjepet-tjepet kaoe berdaja boeat tjari itoe moesoe, agar kemoedian kaoe lantas bisa bikin satoe pembalesan sembabat. Oh, akoe merasa ngeri sekali, kaloe sampe kedjadian dengen tjoema lantaran satoe anak prempoean, kaoe laloe bikin dirimoe djadi tiada berharga.”
Baroe sadja denger habis ini perkataän, Bek Kheng melompat dari tempat doedoeknja, berloetoet di tana moehoen keampoenan dari iboenja. Sedengn Hoedijin tjepet tarik ia bangoen, sambil berkata poela:
„Och, anak, boekannja akoe sengadja terlaloe membri tegoran pada dirimoe, hanja” sebenernja oleh sebab dirimoe mempoenjain tanggoengan dan perhoeboengan jang teramat besar, maka itoe akoe moesti berkoeatir, jang lantaran sanget bersedihan kaoe bakal bisa diserang oleh penjakit. Kaloe sampe kedjadian begitoe, tiada sadja kaoe tiada aken bisa membales moesoe ajahmoe, tapi djoega dirikoe aken idoep piatoe di atas doenia dan sama siapakah akoe bisa harep boeat toempangin diri poela . . . . . . .”
Tempo soeda berkata sampe di sini, lebi doeloe njonja toea toe telah mengoetjoerken banjak aer-mata saking sedihnja hati, sedeng Bek Kheng jang dengerken itoe semoea, menangis sesenggoekan dengen soeara jang lebi piloe dari pada setadian. Menjadi sekarang, ini iboe dan anak telah menangis dengen saling berhadepan sampe koetika lamanja.
Samendjak itoe, Bek Kheng tida lagi memikirin Bwe Sian, dalem sanoebarinja tiada poela bertempat itoe djantoeng-hati, hanja iapoenja seantero pikiran, seantero kenang-kenangan, ditoempaken semoea boeat itoe napsoe pembalesan, jalah niatan aken mentjari itoe moesoe dari orang-toeanja.
IV.
Pembalesan sakit - hati.
~ ~ ~
Bek Kheng poenja ajah ada bernama Taij Tjhoen, satoe orang jang~perna mendjabat pangkat Tie Koan dari sala~satoe afdeeling dalem provincie San Tong. Begitoe, dalem perkerdjaännja, di satoe kali tempo ia memereksa saroepa perkara, dengen ia-poenja ketjeroboan jang tiada disengadja, ia telah merangket satoe orang jang hanja tertoedoe, tetapi kemoedian ternjata tiada bersala. Orang mana, ada bernama Tan Wie Seng; siapa, ada saorang jang bertabeat brangasan dan saben hari berhati angkoe serta peninggi, maka ini kali setelah menerima kehinaän demikian jang boekan ada kedosaännja, sigra djoega hatinja merasa sanget penasaran tertjampoer dengen pengrasaän teramat maloe; dari itoe sekaloearnja dari dalem kantoor, zonder berpikir pandjang, langsoeng ia tjegoerken dirinja ka dalem soengi dan djadi binasa di sitoe djoega.
Kabar djelek ini tentoe sadja dengen tjepet sampe djoega di roemanja. Wie Seng mempoenjain satoe soedara moeda bernama Hok Seng, satoe sastrawan jang berilmoe tinggi, baek dalem ilmoe soerat, maoepoen dalem ilmoe kebisaän dari orang peprangan. Tempo ia ini dapet denger kabar ketjilakaän dari soedara-toeanja, serta taoe djoega lantaran sampe terbitnja itoe kebinasaän, sigra djoega hatinja mendjadi teramat penasaran. Saät mana keliatan ia telah menggigit-gigit giginja sendiri, sedeng matanja bersorot begitoe roepa seperti djoega hendak mengaloearken api, njata hatinja boekan maen ampoenja sakit. Kemoedian ia laloe dateng dalem kantoor provincie, mendakwa atas Taij Tjhoen poenja perboeatan, agar ia bisa dapetken keadilan.
Aken tetapi, beroentoeng Taij Tjoen masi mempoenjain bintang terang, maka kendatipoen Hok Seng telah madjoeken pengadoean beroelang-oleng, toch itoe perkara tinggal didiamin sadja. Taij Tjhoen tiada perna dapetken bintjana soeatoe apa.
Koetika Hok Seng merasa jang dengen ini djalan ia tiada bisa dapetken kepoeasan bagi penasarannja, laloe ia beringin aken bikin pembalesan dengen goenaken ia-poenja kaki-tangan sendiri; begitoelah ini pikiran selaloe dikandoeng olehnja dan ia tentoe nanti lakoeken begitoe lekas ia dapet tempo bagoes.
Djoestroe dateng temponja Taij Tjhoen telah mendjalanken tjoekoep iapoenja kewadjiban di itoe afdeeling, ia moesti dateng ka provincie boeat menoenggoe laen titah bagi iapoenja perkerdjaan jang baroe. Sewaktoe dalem perdjalanan, Hok Seng jang soeda bersedia lebih doeloe, telah memegat padanja di satoe djalanan sepi. Seret itoe Tie Koan jang soeda tiada berdaja, tendangan dan djotosan didjatoken beroelang-oelang atas badannja Taij Tjhoen, sampe ia ini moesti moentaken banjak dara, jang tempo sepoelangnja di tempat menginep, tiada-oesa toenggoe lama lagi, sigra djoega ia moesti nampakken adjalnja.
Tatkala ia ampir mengela napas pengabisan, ia koeatken djoega hatinja menoelis sapoetjoek soerat peninggalan seperti orang berkata jang meninggalkan testament. Soerat mana, tiada mempoenjain perkataän pandjang, maka terlaloe ringkes dan ada berarti:
„Anakkoe, Bek Kheng, apabila besar, djangan loepaken moesoe jang memboenoe ajahmoe, jalah Tan Hok Seng!”
Iapoenja Hoedjin, Sim Sie, setelah trima itoe soerat peringetan atawa telah beresken pengoeboeran atas maitnja sang soeami, laloe membawa Bek Kheng madjoeken pengadoean pada pembesar di itoe tempat, sambil djoega dateng ka provincie boeat minta dikaloearken prenta aken menangkep si pemboenoe, prenta dari kantoor besar telah didjalanken.
Hok Seng apabila mendapet denger ini kabar, lebi siang soeda lari minggat setaoe kamana perginja, sampepoen iapoenja bajangan tiasa dapet ditjari lagi.
Dengen menanggoeng kedoekaän jang sanget dan kesedihan jang tiada dapet dikata, Sim Sie Hoedjin kepaksa bawa Bek Kheng poelang ka Kang So, iapoenja tempat asal.
Waktoe mana, Bek Kheng baroe beroesia ampat taon, maskipoen ia soeda boleh dibilang mempoenjain ketjerdikan atawa mempoenjain djoega sedikit pengetahoean, tetapi belon sampoerna aken dibitjaraken tentang soeal pembalesan sakit-hati. Demikianlah dengen zonder merasa, soeda berlaloe lagi bilang blas taon blakangan, betoel tempo itoe Bek Kheng soeda moelai teritoeng dewasa, dengen iapoenja roman jang tjakep dan penggawakaan jang tegap, serta djoega mempoenjain berbagi-bagi pladjaran jang bagoes.
Ada satoe kebetoelan, tempo Lie Kak, bekas Taij Tjhoen poenja penggawe poelang di Kang So dan soedan berdjoempa dengan Hoedjin, sambil menoetoer, bahoea, dia perna dapet liat Hok Seng di Tji Tjioe, tetapi sajang sekali, ia belon sempet tjari taoe tempat tinggalnja itoe moesoe besar.
Bek Kheng koetika soeda denger itoe warta, keliatan ia merasa amat gegetoen sedeng giginja beradoe satoe dengen laen, sakedjapan itoe ia lompat berdiri dari tempat doedoeknja, sambil mendesek pada iboenja aken soepaja lantas bersama-sama brangkat ka Tji Tjioe, boeat mentjari itoe Tan Hok Seng, membales sakit hatinja.
Hoedjin satempo meliat anaknja mempoenjain napsoe dan ambekan sedemikian roepa, adalah dalem hatinja merasa sanget bersoekoer. Dari itoe laloe bersama brangkat ka Tji Tjioe; di mana, marika menjaroe nama palsoe dan berdiam denger hati dan pikiran jang selaloe tiada bisa meloepaken tentang soeal pembalesan, dengen ati-ati marika serepin sana-sini boeat tjari sampe dapet itoe moesoe besar.
Kombali satoe taon telah berlaloe, sedari marika pinda tinggal di itoe kota, tetapi masi djoega belon bisa beroentoeng dalem marika-poenja penjelidikan. Achirnja di sitoe, Bek Kheng soeda bisa berkenalan dengen Tjeng Tjoan, sampe blakangan sebab saling menjinta satoe sama laen, ia soeda bertoenangan lagi dengen Bwe Sian.
Tempo marika-poenja pertjintaän soeda berdjalan begitoe djaoe, Bek Kheng merasa tiada perloe moesti pegang resia apa-apa boeat ia-poenja toenangan itoe, maka djoega ia telah tjeritaken teroes-terang ia-poenja nama jang sedjati, berserta sebab-sebab jang membikin ia moesti goenaken nama palsoe. Lebi djaoe, ia minta pada Bwe Sian, soepaja djangan tjeritaken poela ini pada laen orang.
Samentara Bek Kheng lagi menoetoerken riwajatnja, adalah Bwe Sian mendengerken semoea dengen lakoe amat teliti, achirnja seperti orang jang dapet inget apa-apa, ia telah berkata:
„Tan Hok Seng? Oh, ini nama boekan asing lagi boeat akoe. Akoe seperti perna dapet denger berkali-kali, tetapi di mana akoe belon bisa lantas dapet inget. Toenggoe, akoe tjoba pikir!“
„Moestail amat Moaij perna kenal itoe nama,“ berkata Bek Kheng dengen ketawa, „oh, Moaij, djanganlah sampe inget kliroe laen orang.“
Bwe Sian masi djoega beroepa seperti orang jang lagi asik berpikir, kerna ia tiada pertjaja kaloe sesoenggoenja ia belon perna dapet denger itoe nama, tetapi setelah sekoetika berselang, tempo ia masi belon bisa dapet inget, kepaksa djoega ia djadi berkata dengen ketawa:
„Akoe pertjaja moestinja lebi doeloe akoe perna mendenger nama begitoe, tetapi soenggoe menjesel dalem sewaktoe ini akoe tiada bisa lantas dapet inget. Akoe poelang, akoe nanti boleh tanja pada papa. Dia tentoe aken bisa kombaliken akoe-poenja ingetan, soepaja akoe tiada loepa lagi aken itoe nama.“
„Akoe harep kaoe tiada kliroe,“ berkata Bek Kheng, „ini tentoe aken menoeloeng banjak padakoe.“
Demikian, tempo Bwe Sian soeda poelang di roemanja, ia laloe tjeritaken pada ajahnja segala apa jang ia dapet denger dari toenangannja.
„Papa,“ katanja Bwe Sian kemoedian sesoeda tjerita habis, „nama Tan Hok Seng. anak seperti kenal baek, lebi betoel seperti djoega anak perna ketemoeken dia di soeatoe tempat.“ Samentara Tjeng Tjoan setelah denger habis semoea tjerita anaknja, tiada kedengeran ia ada bersoeara sepatapoen, melaenken aer-moekanja dalem sebentaran tempo sadja soeda mempoenjain perobahan bebrapa kali, atawa satempo biroe, atawa satempo poeti, atawa sebentar lagi mendadak beroba mera.
„Eh, papa, kenapa? Oh, mengapa?” menanja Bwe Sian dengen hati jang merasa kaget.
„Tiada kenapa — apa,.....” saoetnja Tjeng Tjoan dengen soeara sedikit bergoemeter dan terpoetoes-poetoes. „hanja akoe lagi soeker pikirin soeatoe hal. Ach, akoe teramat kesel, tjobalah, kaoe kaloear doeloe. Akoe perloe tinggal sendirian boeat poeter otakkoe aken memikir, kemoedian akoe aken bitjara, apa-apa padamoe !”
Bwe Sian balikken badannja aken berlaloe, tetapi tiba-tiba ia berpaling dan berkata dengen ketawa :
„Papa, kaoe moesti tjoba inget-ingetin, adakah itoe orang jang bernama demikian ?”
V.
„Akoelah TAN HOK SENG!”
~ ~ ~
Apabila Bwe Sian soeda berlaloe, Tjeng Tjoan bangoen berdiri dari tempat doedoeknja, sambil berdjalan moendar-mandir di sakiternja itoe roeangan, kedengeran ia mengela napas pandjang, demikian teroes meneroes hingga satenga djam lamanja, ternjata bahoea dalem hatinja, itoe tempo ada terselip saroepa pikiran jang teramat soeker, sedeng sesoedanja berselang sedikit lama poela, baroelah dengen kepala toendoek dan paras lesoe ia berdjalan kaloear.
„Bwe ! Bwe !” demikian ia berseroe sepandjang djalan.
Bwe Sian lagi berada di dalem kebon, memetik kembang-kembang baroe ; koetika mendenger ajahnja memanggil, dengen tjepet ia laloe memboeroe.
„Kaoe memanggil akoe, papa ?” menanja ia koetika soeda berhadepan.
„Mari ikoet akoe,” berkata Tjeng Tjoan sambil berdjalan masoek, sedeng Bwe Sian ikoetin dari blakang.
Apabila marika soeda berada di dalem, Tjeng Tjoan soeroe anaknja berdoedoek di satoe korsi.
„Apatah artinja ini semoea, papa ?” tanja Bwe Sian dengen hati jang merasa sanget bimbang. Kiang Tjeng Tjoan kombali djadi menarik napas dengen pelahan; dan sadjoeroes kemoedian baroelah ia menanja:
„Tjobalah kaoe tjeritaken padakoe, pernakah sesoenggoenja kaoe dapet liat itoe Tan Hok Seng?”
Bwe Sian djadi semingkin heran oleh kerna itoe pertanjaän jang tiada mempoenjai poko, aken tetapi moeloetnja toch traloepoet telah menjaoet sadja dengen sakenanja:
„Mengapa akoe tiada perna ketemoeken? Malahan dalem hatikoe, mirip seperti ada bertempat bajangannja itoe orang, tjoemalah akoe tiada bisa bilang jang bener.”
„Brangkali kaoe masi inget, waktoe kapantah kaoe perna ketemoeken dia?" menanja lagi Tjeng Tjoan.
Bwe Sian tjoba goenaken otaknja boeat memikir sekoetika lamanja, achir-achir ia lantas berkata:
„Djoega tiada dapet diïnget pada waktoe kapan, boleh djadi di masa selagi ketjil."
„Kaoe inget djoega masi ada lagi satoe Tan Wie Seng?"
„Tan Wie Seng? Tan Wie Seng?" berkata Bwe Sian dengen sanget terprandjat, „oh ini nama, seperti djoega akoepoen kenal baek. Tidakah bisa djadi Tan Wie Seng dan Tan Hok Seng, sebenernja ada satoe orang sadja? Ach, tida, akoe kliroe. Akoe seperti merasa betoel bahoea itoe moesti ada doea orang! Aken tetapi, papa, kenapatah kaoe soeda moesti seboet lagi itoe nama Tan Wie Seng?"
Tjeng Tjoan manggoetin kepalanja dan kemoedian berkata:
„Bwe, djangan kaoe menanja doeloe aken jang laen, akoe masi perloe menanja lagi padamoe: Apakah baroesan Bek Kheng poen ada toetoerken djoega prihan Tan Wie Seng?"
Seperti orang moelai tersedar dari kegelapan, Bwe Sian menjaoet:
„Oh, ja, maskipoen dia tiada ada toetoerken tentang Tan Wie Seng, tetapi dia toch ada tjerita bahoea Tan Hok Seng ada poenja satoe soedara-toea, sedeng itoe satoe permoesoean adalah terbit dari lantaran itoe soedara-toea djoega. Menilik dari sini, mendjadi njata Tan Wie Seng sebenernja adalah Tan Hok Seng poenja soedara-toea, dan njata djoega bahoea Wie Seng dan Hok Seng tentoenja moesti ada doea orang. Papa sekarang bisa kenal pada Tan Wie Seng, moestinja djoega taoe adanja Tan Hok Seng?"
Lagi satoe kali Tjeng Tjoan keliatan manggoet-manggoetin kepalanja jang dibarengin dengen tarikan napas pandjang.
„Moestail amat kaloe akoe tiada mendapet taoe," berkata ia kemoedian, „oh, Bwe, ketahoeilah olehmoe, bahoea Tan Hok Seng itoe . . . . . . sebenernja, adalah Kiang Tjeng Tjoan, kaoe-poenja papa sendiri ampoenja nama aseli. Kaoe mengarti, Bwe. Akoelah Tan Hok Seng!" Boekan alang kepalang kagetnja Bwe Sian apabila soeda mendenger ini perkataän, sedikit lagi ia ampir djato terdjoengkel dari atas korsinja. Sebentar kemoedian, setelah, tetepken soemanget dan pikirannja, ia berkata :
„Papa, benerkah perkataänmoe ini? Apatah kita boekan orang Tji Tjioe ? Tidakah akoe ini tiada mempoenjain empek ? Oh, dari manatah kaoe soeda kaloearken ini perkataän. papa ?”
„Tiada mendjadi heran kaloe kaoe soeda tiada dapet taoe ini semoea,” berkata Tjeng Tjoan dengen soeara lesoe, „oleh kerna itoe tempo kaoe tjoema baroe beroesia satoe taon lebi, tentoelah kaoe soeda tiada bisa taoe ini semoea.”
Sehabisnja berkata, ia laloe tjeritaken satoe persatoe segala riwajatnja jang doeloe-doeloe berhoeboeng dengen itoe soeal permoesoean. Tjerita mana, bagi kita tentoe soeda boekan asing poela, maka tiada perloe moesti dioelangken lagi. Samentara Tjeng Tjoan setelah tjeritaken riwajatnja sampe bagian ia telah lakoeken itoe pembalesan atas dirinja Taij Tjhoen, laloe kemoedian ia berkata lebi djaoe :
„Sedari hari itoe sesoedanja akoe memoekoel Taij Tjhoen, akoe laloe bawa kaoe ka Soe Tjoan dan berdiam di sitoe sambil menjemboeniken diri boeat bebrapa boelan lamanja, baroe kemoedian akoe kombali lagi. Tadinja akoe memang ada orang berasal kelahiran Tji Tjioe, maka djoega bagi soeara dan perkataän ini tempat akoe bisa oetjapken dengen tetes sekali, sampe mirip betoel dengen pendoedoek jang aseli dari Tji Tjioe. Akoe lantas menjaroe laen nama, serta tjampoerken diri selakoe orang Tji Tjioe, sedeng lama-kelamaän akoe moelai dengen pelahan-pelahan berkenalan dengen pendoedoeknja, hingga achirnja taon liwat taon akoe mendjadi dapet ini kedoedoekan sebegimana adanja ini hari. Dalem anggepankoe sekian lama, akoe merasa dirikoe soeda dapet tempat jang sampoerna, di mana akoe bisa idoep dengen seneng zonder dapet ganggoean soeatoe apa; aken tetapi, siapa kira anggepankoe soeda tersesat begitoe djaoe, marika sekarang soeda dateng tjari sampe di sini. Kendati akoe taoe, bahoea dalem satempo marika tiada aken bisa bikin apa-apa adakoe, tetapi toch ini mendjadi djoega soeatoe kepikiran bagikoe jang selamanja nanti tinggal berakar dalem hatikoe.
Mendenger habis ini perkataän, dengen tiada merasa Bwe Sian poenja seantero anggota bergoemeteran, sedeng hatinja berdebar keras.
„Djika demikian,” berkata ia dengen soeara sember, „teranglah jang Bek Kheng Ko Ko ada teritoeng akoe-poenja sala-satoe moesoe.”
Tjeng Tjoan mengela napas, boeat sekoetika ia tiada bisa lantas menjaoet. Dalem sedikit saät, kamar mana berada dalem kesepian dan baroe ada perobahan koetika Tjeng Tjoan kedengeran moelai berkata lagi:
„Oh, permoesoean! ja, sesoeatoe permoean ada perloe sekali sebisanja. lantas dibikin habis dan tiada haroes moesti diket semingkin dalem. Kaoe-poenja empe soeda mendjadi korban dari kemaoeannja sendiri, sedeng ajahnja Bek Kheng adalah akoe jang poekoel mati, maka bila dipadoe bisa ternjata jang pembalesan mana akoe telah berkerdja meliwat wates, dari itoe begimana kita sekarang masi boleh pandeng marika seperti satoe moesoe. Aken tetapi, bagi soeal perkawinan kaoe-orang, menoeroet dari djalanannja Liang-sim, atawa adanja kebedjikan dan atas kepantesan, soenggoe akoe merasa betoel tiada sekali boleh dilangsoengken. Maka itoe kita moesti bisa pikir soeatoe djalan jang baek, agar bisa ada itoe alesan jang sampoerna aken bri poetoesan padanja dengen tiada sampe menjoerigaken. Djoestroe ada baek sekali bahoea kaoe berdoea melaenken bikin perdjandjian dengen moeloet sadja, mendjadi belon ada soeatoe kepastian jang sah, hingga bakal tiada terlaloe menjoekerken. Djalan jang paling oetama, adalah moelai sekarang kaoe perloe djaoeken dirimoe sedikit-sedikit dari dia, djangan sekali tjoba berdeketan poela, kerna haroes didjaga betoel djangan lantaran koerang ati-ati dalem pembitjaraän. bakal sampe mengadaken soeatoe gloembang persetorian jang tiada terdoega.”
VI.
Penanggoengan TJINTA.
~ ~ ~
Dari satoe-satoe pitoetoer sang ajah, soeda membikin sedar aken Bwe Sian bisa mengarti jang hal ini mempoenjain perhoeboengan teramat besar, aken tetapi ia pertjaja, hatinja tiada bakal mempoenjain ketegahan boeat bisa lantas lemparin Bek Kheng.
Ia djoega soeda perna pikir beroelang-oelang atawa mentjari berbagi-bagi djalan, agar bisa membalik ini satoe hal, tetapi oleh sebab soeal ini soeda mendjadi terlaloe roewet, biar begimana djoega tiada aken ada harepan boeat bisa dibikin betoel kombali. Maka itoe, maoe-tiada-maoe ia kepaksa moesti tempatken seantero kesedihan hatinja pada satoe tangisan. Dan dalem bebrapa hari keblakangan, ia tiada dateng-dateng pada Bek Kheng. Kebetoelan lagi, oleh sebab Sim Hoedjin diserang oleh penjakit enteng, maka djoega Bek Kheng tiada ada poenja kesempetan boeat koendjoengin Bwe Sian.
Orang jang soeda perna teroembang-ambing dalem gloembang pertjintaän, nistjaja tiada merasa heran lagi, kaloe di sini bakal ditoetoerken bahoea itoe tjara melaenken bisa berlakoe tjoema boeat sebrapa hari sadja; sedeng seliwatnja itoe, Bwe Sian soeda merasa tiada beta lagi, dengen diam-diam ia telah dateng menilik pada Bek Kheng djoega perna bales mengoendjoengin sampe bebrapa kali.
Baroe satenga boelan sadja, perhoeboengan antara Bwe Sian dan Bek Kheng kombali soeda seperti sediakalanja. Maskipoen dalem sepandjang tempo itoe, dalem hatinja Bwe Sian ada menanggoeng kesoekeran jang tiada dapet dikata, tapi toch ia sendiri merasa tiada baek aken menjeritaken pada itoe ketjintaän.
Ia sendiri jang rasaken itoe pikoelan-hati! Tjoema dia sendiri djoega jang moesti mengoetjoerken aer-mata di tempat tiada ada orang jang dapet liat! Ia menangis dan sesambatan di loear taoenja Bek Kheng.
Kendati si gadis soeda berlakoe begitoe roepa, tapi toch boeat aer-moekanja ia tentoe tiada mempoenjain kebisaän boeat semboeniken itoe semoea bekas. Bek Kheng soeda bisa dapet liat djoega begimana dalem tempo jang blakang ini, si kekaseh seringkali beroepa seperti orang jang lagi memikoel kesoesahan, tiada lagi begitoe bergoembira sebagimana doeloe-doeloenja. Tiada bisa disangkal lagi dalem hatinja soeda moesti menjelip pengrasaän tjoeriga dan koeatir, sedeng bila ia tanjaken itoe pada Bwe Sian, ia tiada sekali bisa dapetken penjaoetan betoel.
la masi selaloe pikir aken tjari djalan boeat bisa mengiboerken hatinja si gadis. Samentara itoe. adalah Tjeng Tjoan jang telah mengambil poetoesan tetep, aken tjereken marika berdoea dari satoe pada laen, tempo meliat ini doea kekaseh kombali soeda rapet poela, maka ia laloe oelangken boeat satoe kali lagi penegorannja atas diri Bwe Sian.
Siapa poen aken tiada heran, bahoea Bwe Sian itoe koetika semingkin rasaken hatinja sakit, menindinja kesedihan tamba dirasaken heibat. Achirnja ia dapet pikir djoega, mati-idoep oeroesan ini soeda tiada ada poela pengharepan aken bisa berachir baek; sedeng kaloe soeda begitoe, boekan tiada lebi baek ia lantas lebi siangan bikin poetoes perhoeboengannja dengen Bek Kheng, soepaja anak-moeda itoepoen bisa dengen lekas tra-oesa pikirin lagi dirinja.
Sedeng hatinja soeda mempoenjain ini pikiran, adalah sekarang moeloetnja tiada tega boeat sigra mengeloearken itoe perkataän.
Begitoe dengen begitoe, satoe boelan lagi soeda berlaloe dengen zonder merasa dan Tjeng Tjoan kombali moesti dengerken tjomelannja bahoea marika-poenja perhoeboengan soeda terlalóe rapet poela, dari itoe ia perloe membri nasehat pada sang anak aken tjoba deagen pelahan-pelahan djaoeken diri dari pada Bek Kheng.
Dari perbilangan ajahnja ini kali. Bwe Sian merasa betoel-betoel ia moesti menoeroet, maka sesoedanja menangis dan meratap boeat brapa djam lamanja, diam- diam ia telah djandjiken Bek Kheng boeat dateng padanja, di mana dengen kerasken hatinja ia minta soepaja marika-poenja perhoeboengan bisa lantas dipoetoesken sampe di sini. Inilah soeda kedjadian sebegimana telah ditoetoerken pada bagian pertama dari ini tjerita.
Ketahoeilah pembatja, tadinja Tjeng Tjoan itoe memang ada saorang jang arif bidjaksana dan berkebedjikan, dalem banjak taon telah menempoe doenia ini dengen berbagi-bagi pengliatan dan pengrasaän pait-getir, sedeng setelah mengalamin itoe satoe roepa kedjadian, hatinja soeda lantas dibri kesabaran banjak sekali. Ia merasa amat menjesel dan koetoekin dirinja sendiri, bahoea ia-poenja perboeatan dalem hal terseboet soeda dilakoeken dengen amat tjerobo. Sedeng bagi keadaän sekarang, lebi doeloe ia-poen telah pikir aken seraken Bwe Sian pada Bek Kheng, agar soepaja dengen djalan mana, bisa diharep permoesoean satoe sama laen berachir sampe di sitoe dan habis sama-sekali. Aken tetapi, setelah kemoedian ia pikir dan pikir lagi. ternjata ini boekan ada djalan jang sampoerna betoel, oleh kerna kapan marika satoe sama laen soeda teriket familie, nistjaja ada lebi gampang boeat terboekanja itoe resia, baek dari perboeatan sendiri, maoepoen dengen pengoendjoekan laen orang. Kaloe sampe kedjadian demikian, oh, semoea-moea aken lebi soeker lagi bisa diberesken. Demikian laloe ia mengambil ketetepan boeat lebi siang dipoetoesken sadja itoe semoea perhoeboengan, tetapi boeat ini, ia djoega soeda pikir djika didjalanken dengen mendadak, nistjajalah tjepet menerbitken orang-poenja ketjoerigaän hati, dari itoe ia soeda bri nasehat agar Bwe Sian moelai dengen pelahan-pelahan djaoeken dirinja dari Bek Kheng, soepaja kemoedian dengen terpoetoesnja itoe perhoeboengan tiada sampe terlaloe menjoerigaken hati orang.
Boleh djadi Tjeng Tjoan soeda kliroe dengen petaännja. Ia brangkali tiada taoe banjak bahoea ketjintaännja itoe doea orang moeda soeda berakar sampe di bagian poentjaknja, biarpoen di lahir bisa tertampak pertjerean dari marika, tapi toch bagi batin tiadalah perna berkiser barang sedikit.
Bisa dikata djoega satoe keoentoengan, jang Bek Kheng setelah trima nasehat dari iboenja jang aloes tetapi tadjem, sigra djoega seantero pikirannja bertoempoek pada toedjoean boeat pembalesan sakit-hati, maka Bwe Sian boeat samentara waktoe seperti terloepa olehnja, sampepoen tentang soeal perkawinan, ampir satoe boelan lebi soeda liwat tiada taoe dioelangken poela.
VII.
Pemboeka resia.
~ ~ ~
Samendjak Sim Hoedjin, iboe dan anak, pinda ka Tji Tjioe, marika soeda berdiam di sana satoe taon lebi, aken tetapi itoe hal tentang penjerepan jang diharep-harep oleh marika, boekan sadja belon bisa berhasil, malahan djoega soeda tiada ada soeatoe apa jang bisa kena kepegang.
Maskipoen dalem sepandjang tempo blakangan ini, bagi Bek Kheng tiada sekali bisa linjapken pikirannja boeat Bwe Sian, adalah Bwe Sian selama itoe soeda tiada taoe dateng koendjoengin anak moeda kita itoe. Terkadang djoega Bek Kheng perna dateng ka sana, tetapi Bwe Sian perlakoeken dia, dengen setjara amat dingin, atawa seperti orang jang sengadja hendak asingken dirinja dari pergaoelan. Bek Kheng boekan ada satoe djedjaka jang bodo. Ia sampe mengerti bahoea lakoenja Bwe Stan pada dirinja boekanlah soeda diandjoerin oleh kemaoean hati sendiri jang sedjati. Ia bisa dapetken kenjataan jang gadis itoe dalem sekean lama ini, selaloe berada dalem kedoekaän, dilamoen oleh gloembang kesedihan, nistjajalah dalem hatinja moesti ada menjelip soeatoe oeroesan jang teramat roewet, satoe resia-hati jang tida dapet ditjeritaken boeat laen orang. Maka djoega Bek Kheng boekan sadja tiada mendjadi koerang seneng atas lakoenja si kekaseh jang dengen tega meloepaken perdjandjian, mala-mala ia telah berdjandji pada hatinja sendiri aken bisa serepin itoe resia jang tersemboenji, agar kemoedian iapoen bisa berdaja dengen djalan jang baek boeat bantoe meringanken pikoelannja itoe gadis jang ditjintaken dengen sagenap hatinja.
Apa-maoe, iapoenja iboe, Sim Hoedjin, jang soeda merasa tiada beta berdiam lebi lama di laen kota, laloe inget aken poelang ka tempat kelahirannja, maka itoe ia soeda paksa anaknja boeat toeroetin ini kemaoean. Bek Kheng telah merasa tiada bisa membanta keinginannja sang iboe jang soeda tetep, soenggoe inilah telah teritoeng satoe sebab poela jang membikin pikirannja djadi terlebi koesoet. Aken tetapi, sedeng ia lagi berada dalem kebingoengan, tiada sekali bisa disangka bahoea semoea resia jang tadinja tersimpen rapet, sekarang bakal dateng temponja terboeka.
Itoe orang jang doeloean soeda membri rapportan ini-itoe pada Hoedjin, jaitoe Lie Kak, ada orang berasal dari Go Koan, bersamaän satoe kampoeng dengen Bek Kheng, doeloenja koetika Taij Tjhoen lagi maoe mendjabat pangkat, Lie Kak telah dibawa boeat toeroet berkerdja padanja. Dalem sepandjang tempo itoe, boekan djarang Lie Kak trima boedi dari orang bangsawan itoe, maka Lie Kak jang menanggoeng boedi itoe sekean lama tiada perna meloepaken dan djoega saben waktoe ia selaloe berpikir aken bisa membales. Itoe hari sedari ia soeda membri kabar tentang adanja Tjeng Tjoan di Tji Tjioe, laloe ia sendiri pergi tinggal di Ouw Pak, tetapi di sana ia tida beroentoeng. Satoe taon ia berdiam di sitoe dengen tinggal menganggoer dan dengen kesel laloe kemoedian ia balik poelang. Koetika ia dapet taoe Bek Kheng dengen iboenja masi berdiam di Tji Tjioe, ia mengarti itoe tentoe ada berhoeboeng dengen soeal pembalesan sakit-hati, keinginan aken membri bantoean sigra djoega timboel dalem hatinja, maka iapoen lantas menjoesoel ka Tji Tjioe dan bertemoe dengen Bek Kheng serta Hoedjin.
Sim Hoedjin merasa sanget girang dengen kedatengannja Lie Kak dan laloe toetoerken dengen teroes-terang satoe-persatoe apa telah terdjadi selama ia berdiam di ini kota.
Mendenger itoe penoetoeran, Lie Kak tinggal bingoeng sekoetika lamanja dan kemoedian baroelah kedengeran ia berkata:
„Pada taon jang berselang, maskipoen akoe perna menampak Tan Hok Seng, tetapi akoe tiada kenal tempat-tinggalnja. Akoe brani pastiken, bahoea akoe tida sampe didjoestaken oleh matakoe sendiri, melaenken sekarang akoė belon bisa bilang pasti, dia masi berdiam di sini atawakah soeda minggat ka laen tempat? Bagi daja sekarang, ada baek akoe lantas pergi kaloear boeat tjoba serepin kabarnja. Sebentar lagi kita-orang boleh bitjara lebi banjak.“
Hoedjin oendjoekken iapoenja rasa soekoer dan bertrima-kasi, sambil mengharep djoega bisa lekas mendapet kabar menjenengken.
Moelai itoe hari, dengen giat Lie Kak soeda berkerdja boeat goenanja ini familie, tetapi maskipoen teroes-meneroes soeda brapa hari ia lakoeken itoe penjelidikan, toch perkerdjaännja belon djoega bisa mengoendjoek hasil.
Lima hari soeda berlaloe. Bek Kheng jang terkenang aken Bwe Sian, laloe ingin aken pergi mengoendjoengin; sedeng Lie Kak djoega soeda ikoet bersama-sama.
Djoestroe itoe koetika, Tjeng Tjoan ada di roema, maka Lie Kak jang dapet liat padanja, mendadak ia soeda merasa sanget terprandjat, ampir di itoe saät djoega nama: „Tan Hok Seng“ menobros kaloear dari moeloetnja, kaloe sadja tadinja ia boekan ada orang jang soeda lama berkerdja dalem kantoor negri, hingga dalem segala hal ia bisa berkerdja dengen teliti; dari itoe, kendati ia soeda taoe sama siapa ia lagi berhadepan, en toch ia soeda tiada bersoeara, tiada mengoendjoekken perobahan soeatoe apa dari sorot-moekanja. Samentara itoe Tjeng Tjoan sama-sekali tiada mengenalin dia, mendjadi tiada sampe kedjadian apa-apa di itoe tempo.
Koetika hendak poelang, sebegimana Bek Kheng, Lie Kak poen toeroet djoega berpamitan dengen Tjeng Tjoan.
Sekaloearnja dari roema toe, Bek Kheng soeda maoe teroes poelang ka roema, tetapi Lie Kak soeda sengadja ambil laen djoeroesan, jang koetika baroe berdjalan sedikit djaoe, Lie Kak dapet liat di sitoe ada tana kosong jang sepi, dan ia brenti bertindak. Bek Kheng sigra djoega menanja sebabnja?
„Kongtjoe jang sekean lama telah kandoeng niatan boeat membales sakit-hati, adakah soeda mengetahoei Tan Hok Seng itoe ada orang matjem apa?“ Demikian Lie Kak soeda berkata dengen ketawa dingin.
„Begimana akoe bisa bilang,“ saoetnja Bek Kheng, „toch akoe tiada perna bertemoe dengen itoe orang.“
„Djika demikian,“ berkata poela Lie Kak dengen disertaken djoega satoe ketawa memenjindir, „tentoenja kaoe kenal Kiang Tjeng Tjoan itoe ada orang matjem apa?“
Bek Kheng keliatan beroepa seperti orang terprandjat.
„Perloe apa kaoe moesti menanja begitoe? Dia toch ada kita-poenja sobat jang paling baek.“
Lie Kak manggoetin kepalanja beroelang-oelang, sambil menarik napas.
„Tiada boleh disalaken kaloe selama ini kaoe soeda tiada bisa ketemoeken itoe moesoe besar, oleh sebab kaoe-poenja mata soeda seperti dibikin boeta olehnja. Oh, Kongtjoe, ketahoeilah olehmoe, itoe moesoe besar jang saben saät tiada bisa diloepaken oleh hatimoe, sebenernja adalah itoe sobat jang satiap tempo kaoe bisa berhadepan.“
Betoel seperti orang jang kaget mendenger soeara gledek, demikianlah Bek Kheng maoe melompat lantaran saking terprandjatnja. Dengen kentjeng ia laloe menarik tangannja Lie Kak, sedeng matanja lebi doeloe mengawasin ka ampat pendjoeroe dan selagi ia maoe bitjara apa-apa, ia dapet pandeng dari satoe kakoes jang berada di hadepan telah kaloear, satoe orang. Orang mana, Bek Kheng kenalken adalah Tjeng Tjoan poenja sala-satoe boedjang jang soeda lama dilepasken, bernama Tio Toa; sedeng ia ini ada beroepa seperti orang jang lagi perhatiken betoel pada marika itoe.
Sambil menarik pada Lie Kak, Bek Kheng berkata: „Di sini ada orang, biarlah kita poelang sadja dan kemoedian bitjara lebi pandjang poela.“
Lie Kak poen tiada membanta lagi orang poenja perbilangan, maka ia-orang laloe bersama-sama berlaloe dari itoe tempat.
VII.
Serba-sala.
~ ~ ~
Baroe sadja melangka pintoe roema, itoe rasa koeatir dan tjoeriga jang sebentar tersimpen dalem hatinja Bek Kheng, sampe saät ditjega lagi kaloearnja, sedeng dari moeloetnja melaenken kedengeran ia berkata beroeiang-oelang.
„Ach, inilah soenggoe heran sekali ! soenggoe terlaloe gaib !“
Iapoenja bebrapa oetjapan ini, dalem sedikit saät sadja soeda dapet didenger oleh Sim Hoedjin, jang boeroe-boeroe telah dateng di loear. Sebelonnja Hoedjin bisa boeka soeara boeat menanja, Lie Kak lebi doeloe dengen tindakan besar soeda madjoe paranin Hoedjin, seraja membri hormat ia berkata: „Slamet, Thaij-Thaij! Sapoeloe taon poenja sakit-hati jang terdendem, sekarang soeda moelai tertampak bajangannja.“
Apabila mendenger ini perkataän, Hoedjin seperti mendadak dapet pengrasaän heran tertjampoer kaget, atawa sedih tertjampoer girang. Ia lantas silaken Lie Kak berdoedoek serta kemoedian menanja satoe-persatoe tentang hal itoe.
Lie Kak laloe menjeritaken bahoea Kiang Tjeng Tjoan itoe adalah Tan Hok Seng poenja saroean.
Seperti orang jang berada dalem kegelapan, demikianlah Hoedjin dan Bek Kheng koetika mendenger itoe perkataän, marika sama-sekali tiada bisa habis mengarti dan boeat sekoetika lamanja ini iboe dan anak tinggal diam dengen tiada bisa bersoeara soeatoe apa.
Setelah berselang lagi sedikit saät, baroelah kedengeran Hoedjin moelai berkata lagi:
„Kaloe begitoe, Kiang Tjeng Tjoan itoe ada mendjadi kita-orang poenja moesoe besar ?“
„Tentoe tiada bisa sala lagi. Djikaloe boekan dia, masakah boleh ada siapa lagi ?“
Bek Kheng masi merasa sangsi atas kebeneran itoe dan berkata :
„Kaoe pertjaja, jang kaoe tiada kliroe kenalin orang ?“
Lie Kak menepok tangannja satoe kali seraja berkata kemoedian :
„Oh, ini toch boekan ada satoe perkara sembarangan sadja, begimana akoe brani bitjara dengen memboeta, sesoenggoenja djoega dia itoelah ada Tan Hok Seng, itoe pemboenoe jang dengen kepelannja mendjotos akoe-poenja Loja, itoe orang kedjem jang dengen kakinja menendang akoe-poenja madjikan. Semoea akoe tida bisa loepaken, dalem pengrasaänkoe itoe kedjadian seperti baroe tjoema kemaren. Ja, akoe brani tanggoeng, akoe brani pastiken bahoea akoe tiada kliroe lagi.“
Kombali Sim Hoedjin tinggal berdiam boeat sedikit saät, sedeng kemoedian seperti orang jang baroe tersedar, kedengeran ia berkata :
„Oh, bener ! Ini perbilangan tiada bisa disangkal lagi. Anakkoe, Bek Kheng, kaoe tentoe masi inget, bahoea itoe hari sesoedanja kaoe tjeritaken pada Bwe Sian tentang itoe permoesoean, baroelah keliatan dia moelai berdjaoean dengen kaoe, atawa sesoeda berselang brapa hari lagi, sigra djoega, dia madjoeken itoe permintaän boeat memoetoesken perhoeboengan. Dia sendiri soeda mengetahoei antara dirinja dengen dirimoe ada teriket satoe permoesoean, maka itoe dia tiada boleh bersobatan poela dengen kaoe. Oh, soenggoe inilah ada satoe boekti jang tjoekoep terang. Dan sekarang sesoedanja kita-orang djoega mendapet taoe itoe resia, haroeslah kita-orang moesti lakoeken ini pembalesan dengen tjepet, agar djangan sampe mendjadi kasep. Aken tetapi anakkoe, begimana kaoe pikir ?”
Bek Kheng tinggal diam seperti patoeng, sampe sekoetika lamanja ia tiada bisa boeka soeara soeatoe apa.
„Eh, kenapa kaoe tiada bersoeara ?” membentak Hoedjin dengen morka. „Akoe taoe, kaoe tentoe tiada bisa lepasken Bwe Sian. Aken tetapi, kaoe haroes bisa mengarti, bahoea permoesoean dari memboenoe bapa, tiada maoe bersama-sama idoep di moeka boemi ini. Dan sekarang roepanja oleh sebab tjoema satoe anak prempoean, kaoe soeda lantas hendak pandeng itoe moesoe besar dari ajahmoe, seperti satoe familie. Ach, satoe orang jang mempoenjain hati kemanoesiaän, nistjajalah aken tiada maoe berlakoe begitoe. Oh, anak apatah kaoe tiada maloe orang banjak nanti ketawain kaoe, saloeroe doenia nanti menista dirimoer !”
Maskipoen digoesarin sampe begitoe roepa, toch Bek Kheng tinggal tiada bitjara seperti tadi. Dalem hatinja diam-diam tjoba menimbang-nimbang aken itoe doea soeal : TJINTA atawa MOESOE ; sedeng setelah berselang sedikit lama lagi, baroe kedengeran ia bisa berkaata dengen soeara moendoer madjoe :
„Djangan lantas keboeroe goesar, mama: masatah anakmoe ini aken bisa begitoe hina sebegimana perbilanganmoe, tjoemalah...”
Berkata sampe disini, kombali ia djadi berdiam dan tinggal bingoeng, sedeng setelah berselang sedikit lama lagi baroe kedengeran ia meneroesken poela perkataännja.
„Boeat membales sakit-hati, itoelah ada satoe oeroesan besar. Dari itoe perloe moesti diperdamiken dengen tjara teliti, agar kemoedian bisa dapetken soeatoe djalan jang sampoerna dan mengapalah moesti begitoe terboeroe dalem satoe tempo ini, sedengken dalem tempo sapoeloe taon masi bisa bersabar, masatah boeat sedikit tempo tiada bisa ditahan lagi?”
Koetika soeda mendenger ini perkataän Hoedjin poenja aer-moeka pelahan-lahan moelai keliatan tiada begitoe goesar sebegimana tadinja.
„Perkataänmoe demikian djoega tiada terlaloe kliroe. Tetapi, Lie Kak, kaoe brangkalai soeda pikirken soeatoe djalan jang baek?”
Lie Kak jang meliat roepanjan Bek Kheng ada seperti masi selaloe bersangsi, belon ada soeatoe ketetepan jang betoel, maka itoe ia djoega belon brani lantas oendjoekken pikirannja dengen lantjang, hanja soeda menjaoet sadja :
„Bener, Thaij-thaij, djanganlah terlaloe keboeroe napsoe. Akoe aken tjoba berpikir dalem sedikit tempo, kemoedian baroelah berdami poela dengen Thaij-thaij.”
Mendenger ini perkataän, Hoedjin merasa bertrima-kasi dalem hatinja, aken tetapi berbareng itoe, satoe kenangan jang menjedihken poen toeroet dateng menempel dalem pikirannja ini orang toea. Ia merasa sakit begimana soeaminja doeloe soeda moesti binasa dengen tjara jang mengeriken ; begitoe, semingkin berpikir semingkin membikin hatinja merasa antjoer, achirnja ia tiada seneng berdoedoek dan djoega tiada seneng berdiri, laloe masoek ke dalem kamarnja sendiri boeat mengaso.
IX ~ (Penoetoep).
Soeratnja Bwe Sian.
~ ~ ~
Setelah meliat Sim Hoedjin soeda berlaloe dari sitoe, kombali Bek Kheng tinggal bingoeng boeat sekoetika lamanja.
„Apatah ini hal bisa didapetin soeatoe djalan jang sampoerna boeat bisa membaekken bagi kedoea fihaknja,” demikian berkata ia kemoedian seperti soeara dalem hati.
„Kongtjoe,” menjamboeng Lie Kak dengen tjepet, „akoe kira, ada soeker sekali bisa diharep aken dapat djalan tjara demikian, hanja moesti satoe diantara doea. Oh, Kongtjoe, paling baek kaoe moesti linjapken itoe pengrasaän tjinta dan dengen lekas berdaja aken atoer pembalesan, agar djangan sampe marika nanti lebi doeloe toeroenken tangan, begitoe mendapet taoe kita-poenja maksoed jang dikandoeng.”
Bek Kheng tinggal gojangin kepala dan tiada berkata-kata poela.
Waktoe itoe soeda moelai malem, semoea oranag telah isi peroetnja dan kemoedian laloe pada kombali di tempat sendiri-diri boeat mengaso.
Malem itoe, adalah mendjadi satoe malem jang paling bersengsara bagi Bek Kheng, ia sama-sekali tiada perna tidoer poeles, roepa-roepa pikiran selaloe dateng menggoda. Satoe tempoe, ia pikir jang moesoe besar dari ajahnja masi belon bisa terbales, sigra djoega seantero soemangetnja seperti tiada bisa merasa seneng, tangannja menepok pada pinggiran randjang, ia bersoempa aken memboenoe Tjeng Tjoan dengen tangannja sendiri. Aken tetapi, di laen saätnja ia dapet lagi laen roepa pikiran jang bertentangan dengen pikirannja bermoela. Hatinja tiada aken bisa merasa tega lakoeken itoe kekedjeman jang bersangkoet atas dirinja Bwe Sian, itoe gadis eilok jang berparas sebagi satoe bidadari dan beradat lemah-lemboet saoepama aer. Oh, ia tiada tega bikin sakit hatinja itoe ketjintaän dengen cara membikin pembalesan, demikian hatinja sekarang moelai mendjadi lemah poela.
Sampe hari soeda mendjadi siang, itoe doea roepa pikiran masi selaloe bertaroeng dengen heibat dalem hatinja, satoe sama laen tiada maoe mengala, membikin djoega Bek Kheng soeda tiada bisa mengambil poetoesan apa-apa.
Baroe sadja ia bangoen dari pembaringan, sigra djoega ia soeda berniat aken tjari pada Lie Kak boeat tjoba berdami lagi lebi djaoe. Sekoenjoeng-koenjoeng ia dapet denger soeara ketokan pintoe dan berbareng itoe ia dapet trima sepoetjoek soerat. Koetika baroe dapet liat soerat itoe hatinja Bek Kheng mendadak djadi bergontjang keras.
Pada moekanja soerat mana, ada tertoelis perkataän : „Tersampeken kahadepan Bek Kheng Sianseng,“ samentara bagian blakangnja ada diboeboeh dengen satoe hoeroef: „Bwe.” Inilah soeda tjoekoep membikin anak moeda kita beroepa seperti orang keilangan soemanget dan kepoetoesan akal.
„Dia . . . . . . Oh, dia ! . . . . . Boekantah ini ada soeratnja Bwe Sian!” Begitoe ia berkata dengen soerra terpoetoes-poetoes.
Ia tjepet boeka soerat itoe dan batja lebi djaoe:
Boedjangkoe, Tio Toa, soeda dapet denger Ko poenja pembitjaraän di itoe tana kosong dan poelang di roema tjeritaken ini hal, mendjadi Moaij dan ajah sigra mengetahoei bahoea Ko Soeda kenalin kita orang. Semoea resia telah terboeka.
Moaij tiada boleh bikin Ko mendjadi satoe anak jang tidak berbakti, tapi djoega Moaij lebi tiada bisa tinggal meliatin Ko nanti toempaken dara ajahkoe.
Samentara itoe, ajahkoe jang setelah mengetahoei resianja terboeka, sigra djoega berniat aken bawa Moaij minggat ka tempat djaoe.
Beroelang-oelang Moaij soeda pikir aken bisa dapetken satoe djalan jang sampoerna, agar soepaja bisa membaekin kedoea fihaknja. Tetapi, djalan jang demikian, ada terlaloe soekoer bisa didapetken. Achirnja Moaij djadi inget, bahoea Ko poenja ajah soeda bikin binasa empekoe dan ajahkoe kombali soeda memboenoe ajahmoe, sedeng Ko sekarang ada memikoel kewadjiban boeat membikin pembalesan poela; ternjata, jang ini permoesoean selama-lamanja tiada aken bisa habis. Apalagi Moaij jang soeda seraken diri aken mendjadi Ko poenja istri, maskipoen itoe tjoema baroe beroepa satoe perdjandjian, tetapi Allah tentoe bisa persaksiken Moaij poenja kesoetjian hati. Satoe kali, kita-poenja perdjodoan moesti terpoetoes oleh kerna saroepa halangan jang tiada dapet disingkirken, Moaij tentoe aken mengorbanken semoea kesenengan doenia, tinggal tiada menika boeat membela kesetiaän, atawa tiada lantas mati boeat merawatin ajah. Oh, Ko, demikian jang tadinja Moaij soeda tetepken pikiran, jalah idoep boeat ajah dan djoega boeat Ko.
Aken tetapi sekarang, perkara soeda terlaloe mendesek. Moaij berada dalem keadaän serba-sala, hingga tiada ada ketjerdikan apa djoega jang bakal bisa membalik hal ini pada keboenderan. Oh, tida laen djalan lagi, hanja Moaij poenja iket-pinggang djoega jang nanti mengambil korban dirikoe.
Tentang Ko poenja maksoed pembalesan, tentoelah tiada ditoedjoeken tetep paka ajahkoe atawa pada diri anaknja. Maka dengen Moaij poenja kematian, brangkali djoega itoe satoe soeal besar sigra bisa mendjadi beres. Bagi ajahkoe, soeda bisa teritoeng ada orang jang telah menggantiken dia mati, samentara boeat Ko, bisa djoega dikata soeda melakoeken pembalesan dengen adanja kematian dari anaknja Ko poenja moesoe. Mendjadi moelai ini hari teranggep semoea sakit-hati soeda terbales-himpas.
Moaij pertjaja, jang Ko saorang bidjaksana, boediman dan pemoerah, nistjaja pada sesoedanja Moay mati, Ko aken bisa meneroesken djoega itoe pertjintaän antara mantoe dengen mertoeanja, atawa gantiken Moaij boeat toeloeng merawat dan liat-liatin ajahkoe jang toea.
Och, Ko, dengan matinja Moaij bakal bisa membaeken persobatan antara doea familie dan melinjapken itoe pendengeran jang ngeri tentang pembalesan sakit-hati; inilah ada mendjadi Moaij poenja niatan satoe-satoenja jang dikandoeng dalem hati sebelonnja berpisa dengen doenia, atawa mendjadi satoe pengharepan jang teroetama pada sesoedanja mati.
Dengen Ko poenja tjinta bagi dirikoem Moaij pertjaja Ko tentoe tiada tega bikin kepiran pengharepan Moaij jang paling penghabisan.
Moaij kenal djoega Ko ada saorang jang berpengartian loeas, hingga Moaij rasa tiada perloe dioelangin poela. Kaloe Ko maoe goenaken sedikit otak boeat berpikir, nistjaja Ko aken merasa permoehoenan Moaij itoe ada berdasar djoega atas kepantesan.
Moaij poenja achir kalam,
Tan Bwe Sian.
Koetika Bek Kheng soeda membaca habis soerat itoe, saät mana ia djadi menangis keras satoe soeara, sedeng berbareng itoepoen ia djato pangsan di atas djoebin dengen tiada inget orang poela.
Sim Hoedjin, Lie Kak dan orang sadalem roema, tempo mendenger ini soeara, rame-rame soeda memboeroe ka itoe tempat dan berdaja dengen tjepet boeat menoeloeng orang jang pangsan.
Sedikit lama kemoedian, Bek Kheng baroe tersedar poela, tapi kombali kedengeran ia menangis dengen sedih, dan kemoedian baroelah ia batjaken itoe soerat boeat kasi denger pada sang iboe.
Sim Hoedjin jang mengenang aken Bwe Sian poenja prilakoe baek dan manis boedi dalem sepandjang tempo jang liwat, poen tra-oeroeng telah mengoetjoerken aer-mata jang deresnja seoepama oedjan.
Sim Hoedjin djoega ada satoe prempoean jang berhati moelia dan djoedjoer, koetika mana sesoedanja berpikir dengen teliti atas boenji soeratnja Bwe Sian itoe, ia djadi berkata pada Bek Kheng:
„Bek Dji, itoe taon Hok Seng membinasaken ajahmoe, adalah berhoeboeng dengen sebab boeat membales sakit-hatinja ia-poenja soedara toea; sedeng sekarang ini kita soeda hendak bikin pembalesan poela, njatalah ini permoesoean aken berdjalan selandjoetnja, bales-membales tiada sekali bisa habisnja. Apalagi sesoedanja ada ini perkara dari Bwe Sian, haroeslah itoe semoea pengrasaän jang bermoesoean dengen familie Tan itoe. Samentara itoe, Bwe Sian jang soeda ada poenja perdjandjian bertoenangan dengen anakkoe, ada pantes djoega kaoe perlakoeken Tjeng Tjoan dengen baek, atawa lebi betoel kaloe kaoe bisa pegang teroes itoe kewadjiban antara mertoea dengen mantoe, sebegimana Bwe Sian telah pertjajaken itoe padamoe. Tjara demikian, baroe bisa dibilang kaoe soeda berboeat kebedjikan manoesia jang bener.”
Bek Kheng tiada menoenggoe sampe si iboe oelangken lagi perkataän boeat kadoea kalinja, sigra djoega ia mengadjak Lie Kak, pergi bersama-sama ka roemanja Tjeng Tjoan.
Di mana, dengen memelok Bwe Sian ampoenja mait, ia meratap dan menangis sampe brapa kali djato klenger. Kemoedian ia laloe oendjoekin djoega soeratnja Bwe Sian pada Tjeng Tjoan.
Itoe saät djoega seperti orang baroe tersedar, Tjeng Tjoan moesti mengarti sebabnja Bwe Sian poenja kematian, demikian djoega koetika soeda menampak tjara lakoenja Bek Kheng sekarang ini, segala apa soeda mendjadi terang bagi dia.
Dengen memelok Bek Kheng, ia koetjoerken banjak aer-mata toea.
Sedeng Bek Kheng dengen berloetoet di hadepannja itoe orang toea, memanggil dengen soeara lemboet dan penoe ketjintaän:
„Mertoeakoe!”
TAMAT.