Siotjia kepala batoe

by Tang King Tjan

BOELAN POERNAMA

(teks tidak terbaca)ap-tiap pertengahan (teks tidak terbaca) The Monthly Stories (teks tidak terbaca)ERNAMA“, Bandoeng.

Abonnement per kwartaal f 1.50, pembajaran lebih doeloe. Proefnummer tida dikirim. Harga ketengan f 1.- per djilid.

---

---

SIOTJIA KEPALA BATOE
Oleh : TAN KING TJAN.

---

---

Taon ka 2

November 1930

No.18

PEROBAHAN BESAR!

Moelai laen boelan kita aken moelai bikin Reorganisatie atas penerbitannja „BOELAN POERNAMA“ berhoeboeng dengen kapentingannja batja'an di ini waktoe, di mana penghidoepan kita ada tertjengkerem oleh satoe pengaroe dari peridaran Djaman jang bisa membawa pada karoesakan.

„Kita koedoe taoe apa jang sekarang kita haroes berboeat,“ demikianlah itoe ada Motto dari toelisannja Toean Im Yang Tjoe jang bakal dimoeat dalem „BOELAN POERNAMA“ Januari-nummer, dengen Kalimat:

„GELAP GOELITA LANTARAN SAJAPNJA KAMPRET DARI YOMANI.“

(Oplaag 10.000 Exemplaar)

.

Kenapa laen-laen toelisan moeatnja dioendoerken ?

Itoelah kerna keada'an, penghidoepan dan pergerakan Sociaal di ini masa jang kapentingannja meminta boeat kita lantes moeat ini toelisan.

Dan kamoedian liatlah bagimana nanti „BOELAN POERNAMA“ membikin perobahan !

Siotjia Kepala Batoe
OLEH
TAN KING TJAN.

„BOELAN POERNAMA“ No. 18.

---

DRUKKERIJ „LITERA“, PANGERAN SOEMEDANGWEG 89 — BANDOENG.

Betoel, pengidoepan perloe sama tjinta, tapi lebi benar lagi tjinta perloe dengen pengidoepan. . . . .

Tjoe-kat Liang.

SIOTJIA KEPALA BATOE

oleh

TAN KING TJAN.

I.
SATOE GADIS BANDEL.

Weltevreden waktoe lepas tenga malem. . .

„Hoei, Hoei, dengarlah akoe-poenja perkataän! Boekankah kaoe soeda besar? Lagi satoe doea taon bakal menikah, apakah pantes saban malem sadja kaoe glandangan sampe djaoe malem, saperti djoega kaoe ada satoe anak lelaki? Anak prempoean, apapoela jang soeda djadi gadis toch boekan moestinja berboeat bagitoe?”

„Ah mama memang banjak sadja omong. Toch Hoei soeda besar, dan saperti mama sendiri soeda bilang, Hoei soeda ampir tjoekoep oemoer, Hoei soeda bisa djaga diri sendiri, maka apa halangannja Hoei-nio pergi ka mana soeka, baek siang atawa malem?”

Perbantahan bagitoe terdjadi antara njonja Tjoe-bing dengen ia-poenja anak prempoean satoe gadis jang beroesia kira-kira sembilan blas taon. Hoei-nio ada satoe gadis jang tjantik; lebi djaoe ia mempoenjai itoe sifat boeat tida berlakoe pemaloean di hadepan siapa djoega. Ia mempoenjai itoe sifat-sifat jang bisa membikin satoe prempoean moeda djadi dikagoemin oleh orang-orang lelaki moeda : kaeilokan dan ketjantikan. Hoei-nio ada mempoenjai kagesitan dan katjerdikan. Tjoema sadja ia ada mempoenjai djoega sitat-sifat jang koerang bagoes, saperti soeka membantah orang toeanja poenja kemaoean. Tapi satoe sifat jang paling djelek jang dipoenjai oleh itoe gadis, adalah: ia tida betah diam di roemah!

Djikaloe sang iboe sedeng mandorin koki di dapoer, ia melondjor di krosi males sembari membatja boekoe tjerita. Di waktoe sore sedeng iboenja bekerdja mengatoer oeroesan roemah tangga, dengen kasi satoe atawa laen alesan, Hoei-nio selaloe tjari djalan boeat pergi. Tida perdoeli hawa oedara ada bagoes atawa toeroen oedjan lebat, toçh ia kaloearken djoega ia-poenja sepeda dan pasiar dalem kota . . . .

Hoei-nio ada ada satoe gadis jang boleh djadi anggep dirinja ditjiptaken meloeloe boeat idoep dalem kasenangan. Dalem roemah ia tjoema tidoer, makan, maen moesiek, bersihken koekoe, berias, pake pakean bagoes dan menjanji dari baroe melek mata sampe di waktoe ia anggep soeda sampe temponja boeat pergi pasiar. Teroetama ia poenja menjanji jang ampir tida brentinja sering-kalih membikin ia-poenja iboe djadi oering-oeringan. Kerna iboe jang mana tida aken mendjadi djengkel, djikaloe ia sendiri moesti bekerdja, maskipoen dibantoe dengen banjak baboe, tapi berbareng dengen itoe moesti dengarin djoega poetrinja jang soeda bagitoe besar menjanji teroes meneroes, hingga boekan sadja orang-orang dalem roemah sendiri, tapi tetangga-tetangga poen sering-kalih kadengaran banting kaleng atawa laen-Iaen barang boeat adaken soeara riboet, boeat njataken marika poenja tida senang . . . . ?

Tapi Hoei-nio tida perdoeliken iboenja marah atawa tida, tetangga-tetangga anggep ia-poenja menjanji ada menjenangken atawa tida. Ia pentang moeloetnja dari pagi sampe sore, sampe di waktoe membatja boekoe poen tida djarang ia menjanji teroes.

Dengen pendek bisa dibilang, itoe anak dara tida ada goenanja dalem ia-poenja roemah. Pakerdjaän apa djoega ia tida maoe lakoeken, dan teroetama ini sifat pemales jang sering-kalih mendjadi sebab dari moentjoelnja bentrokan antara itoe gadis dan ia-poenja iboe.

Sekarang kombali terdjadi pertjektjokkan! Hoei-nio telah poelang di waktoe soeda liwat tengah malem. Ia tida bisa terangken ka mana ia soeda pergi, kerna ia taoe betoel, djikaloe ia kasi katerangan bahoea ia telah koendjoengin sobat sobatnja, tida djarang iboenja mentjari katerangan lebi djaoe dan ia-poenja djoesta djadi ternjata. Boleh djadi ada paling gampang boeat bilang sadja ia telah menonton bioscoop, tapi katerangan bagitoe biasanja membikin ia-poenja iboe djadi menanja, apa jang dipertoendjoekken, dimana ia menonton dan laen-laen lagi. Dan Hoei-nio anggep itoe samoea katerangan tida perioe.

Lagi sakalih: ia soeda besar, ia soeda ampir dewasa dan menoeroet anggepannja ia soeda bisa djaga diri sendiri, hingga ia tida oesa ditilik lagi saperti satoe anak jang baroe bisa djalan. Ia ingin merdika dan merdika bagitoe loeas, saperti ia sendiri anggep ada baek boeat dirinja.

„Apa kaoe kira ada bagoes boeat glandangan di waktoe malem Hoei, ingatlah, kaoe ada satoe prempoean, satoe gadis. Bahaja jang mengantjem pada kaoe ada banjak sekali, djikaloe kaoe tida maoe robah kaoe-poenja klakoean. Tjobalah kaoe dengar-dengar, apa jang orang ada bilang tentang kaoe-poenja diri. Akoe jang mendjadi iboe, tentoe sadja tida bisa senang mendengar itoe samoea tjerita jang mendjelekin kaoe-poenja diri !”

„Orang-poenja tjerita, iboe? Perdoeli orang bilang apa tentang akoe-poenja diri.” bagitoe itoe gadis membri djawaban pada iboenja. „Hoei tida perdoeli apa jang orang bilang tentang Hoei poenja diri. Sebab djikaloe kita miskin, toch belon tentoe „orang” maoe membri pertoeloengan. Boekankah sekarang kita djoega tida dapet pengidoepan dari laen orang?”

Njonja Tjoe-bing gojang-gojang kepala, lantaran kewalahan.

Bagitoe selamanja pertjektjokkan antara itoe iboe dan anak berachir. Sang iboe tida koeat boeat bertaroeng lidah dengen poetrinja, jang boekan sadja brani, tapi djoega tida soeka gampang menjerah. Hoei-nio tida soeka mengalah dan djikaloe iboenja belon diam, maski bagimana djoega ia mendesak teroes sampe sang iboe menjerah kalah.

Tapi siapa jang moesti disalahken, djikaloe Hoei-nio djadi satoe gadis jang bagitoe kepala batoe ? Tida ada laen, hanja iapoenja ajah dan iboe sendiri, jang telah menjinta dengen kliroe pada poetrinja itoe.

Lantaran tjoema mempoenjai satoe poetra, Tjoe-bing dan istrinja selaloe toeroetin maoenja Hoei-nio, di waktoe ia ini masi ketjil. Djikaloe sang ajah marah, nistjaja sang iboe jang melindoengin, dan sebaliknja djikaloe sang iboe jang hendak kasi adjaran sadikit keras pada poetrinja, sang ajah jang menghalangi. Lantaran bagitoe djoega Hoei-nio djadi aleman boekan maen. Seringkalih,

djikaloe sang ajah terlaloe menjomel, iboenja Hoei-nio berkata: „Hoei-nio masi ketjil; ia belon mengarti apa-apa, djikaloe ia soeda besar dan soeda djadi lebi mengarti, tentoelah ia tida nanti bagitoe nakal lagi saperti sekarang. Ia tentoe mempoenjai pikiran pandjang dan bisa bedaken apa jang baek dari jang tida baek.”

Sekarang Hoei-nio soeda djadi satoe gadis jang ampir dewasa, tapi ia tida robah kelakoeannya, hanja berbalik brani lawan iboenya. Ia-poenja ajah jang bekerdja siang dan malem sekarang tida terlaloe perhatiken lagi pada poetrinja itoe, kerna ia moesti goenaken seantero pikirannja boeat pegang tegoeh atawa perbaekin ia-poenja keadaän, kerna ia-poenja perdagangan jang moendoer membikin ia berkoeatir sekali.

Besoknja Hoei-nio tida pergi ka mana-mana. Ia diam sadja dalem kamar dan aneh sekali, di itoe hari ia-poenja soeara menjanji tida kadengaran. Boleh djadi lantaran menganggep itoe hal ada sanget loewar biasa, njonja Tjoe-bing masoek dalem kamarnja Hoei-nio. Apa Hoei-nio sakit, hingga ia poenja kagoembiraän ilang? Atawa . . . . . . .

Satelah sang iboe masoek, ia dapet liat Hoei-nio sedeng tengkoeroep di pembaringan sambil toendjang djanggoet dengen kadoea tangannja. Ia bengong sadja dan tida perdoeliken pada iboenja jang hampirken padanja.

Dengen loepaken segala apa jang telah terdjadi di waktoe malemnja, njonja Tjoe-bing menanja:

„Kaoe kenapa, Hoei? Ini soeda djam sabelas dan kaoe belon kaloear dari kamar. Kaoe-poenja roti dan telor masi sedia di medja makan. Tjoklat jang disediaken boeat kaoe soeda dingin.”

Hoei-nio menoleh sabentaran pada iboenja dan kamoedian berkata:

„Soeda, iboe, djangan ganggoe padakoe. Akoe sedeng pikirken satoe soewal jang sanget roewet!”

„Soewal apa?”

„Soewal jang akoe tida bisa mengarti!”

„Tjoba kaoe kasi taoe padakoe, brangkali akoe bisa memberi katerangan,” kata njonja Tjoe-bing.

„Akoe sedeng pikirin soewal lelaki dan prempoean. Akoe sekarang djadi prempoean dan lantaran itoe kaoe larang akoe pergi ka mana akoe soeka di waktoe malem. Tapi djikaloe akoe ada satoe lelaki, brangkali kaoe tida kaberatan, biarpoen bermalem-malem akoe tida poelang . . . . .”

„Tida, Hoei, itoe tida benar. Djikaloe kaoe ada satoe anak lelaki, nistjaja soeda sering kaoe rasaken rotan, kaoe mengarti?” kata sang iboe dengen bengis.

Sekarang Hoei-nio doedoek di pembaringan dan memandang pada iboenja dengen paras goerem.

„Ja, djangan kira anak lelaki djoega boleh djalan glandangan tida karoeanan! Dan apa jang satoe anak lelaki tida boleh lakoeken, lebi lagi terlarang boeat anak prempoean,” kata njonja Tjoe-bing lebi djaoe. „Itoe soewal kaoe tida oesa pikirin, sebab soeda djadi satoe kepastian, baek lelaki atawa prempoean, apalagi jang masi moeda, djikaloe soeka terlaloe banjak glandangan di waktoe malem, achirnja tida nanti djadi orang jang baek. Jang lelaki djadi badjingan, pemabokan, pemaen-top atawa laen-laen lagi dan jang prempoean djadi boengah raja.”

Parasnja Hoei-nio djadi lebi goerem lagi mendengar perkataän-perkataännja ia-poenja iboe, teroetama jang dioetjapken paling blakang. Ia hendak kaloearken perkataän keras, tapi iboenja soeda baliken badan dan tinggalken ia dengen roepa sanget tida senang.

Bebrapa hari lamanja sasoeda terdjadi itoe pertjektjokkan, Hoei-nio maoe tinggal di roemah. Tapi djikaloe orang kira ia berboeat bagitoe lantaran perhatiken apa jang telah dibilang oleh iboenja, doegaän bagitoe ada kliroe sanget.

Hoei-nio marah, maka djoega ia tida kaloear dari kamarnja. Kombali sang iboe toendjoekken kalemahan hati. Njonja Tjoe-bing prentah baboe anterken makanan ka kamarnja Hoei-nio, kerna koeatir itoe poetri jang ngambek nanti kelaparan dan djadi sakit; dan kombali Hoei-nio dapet kamenangan . . . . . . .

---

„Boelan Poernama” No. 18.

II.
LAMARAN JANG DITOLAK.

Bebrapa minggoe telah liwat sedari terdjadi itoe perselisihan antara Hoei-nio dan iboenja, tempo pada soeatoe hari, Hoei-nio sedeng melondjor di satoe divan sambil membatja satoe boekoe tjerita. Itoe waktoe itoe gadis poenja ramboet — jang boleh djadi menoenggoe waktoe boeat dibikin koetoeng — terlepas menoetoepin sebagian dadanja, jang sebagian tida tertoetoep dengen pakean, kerna Hoei-nio berpakean pyama jang di bagian dadanja terboeka lebar. Satoe kandaraän masoek dalem pekarangan itoe roemah, tapi sama sekali itoe gadis tida perhatiken dan waktoe tida lama kamoedian ia dengar ada soeara orang mengetok pintoe, poen ia tjoema menoleh sabentaran dan membatja teroes. Satoe baboe memboeka pintoe dan tida lama kamoedian anter masoek saorang prempoean setengah toewa. Tempo liat itoe tetamoe, Hoei-nio tjoema manggoet dan laloe membatja teroes. Ini sikep membikin itoe tetamoe djadi tertjengang, tapi kamoedian ia mengikoet teroes pada itoe baboe jang bawa ia ka roeangan blakang, di mana njonja Tjoe-bing sedeng repot bekerdja.

Roepanja itoe doea orang toewa soeda kenal lama satoe pada laen, kerna njonja Tjoe-bing sigra tinggalken pakerdjaännja dan silahken ia-poenja tetamoe doedoek di satoe divan dan ia poen doedoek di sitoe.

„Soeda lama sekali kita tida pernah bertemoe satoe pada laen,” kata njonja roemah, „dan akoe merasa girang sekali jang ini hari kaoe mengoendjoengin padakoe.”

„Benar sekali, soeda lama sekali kita tida bertemoe. Tapi inilah tida mengheranken, sebab saperti djoega kaoe, akoe poen selaloe repot dengen pakerdjaän mengoeroes roemah tangga. Tapi kaoe sendiri ada mempoenjai anak prempoean, jang tentoe membantoe pada kaoe. Baroesan akoe liat Hoei-nio berbaring di roeangan tengah, apa brangkali ia koerang enak badan?”

„Tida, dan kenapa kaoe menanja bagitoe?”

Roepa-roepanja itoe tetamoe djadi sangsi boeat membri djawaban atas itoe pertanjaän. Ia berdiam sabentaran dan kamoedian baroelah ia berkata:

„Sebetoelnja akoe-poenja kedatengan ada boeat satoe oeroesan jang penting djoega, 'njah Tjoe-bing! Kaoe-poenja anak prempoean tjoema satoe dan akoe ada poenja satoe anak lelaki, djoega tjoema satoe! Bagimana kaoe-poenja anggepan djikaloe kita djadi besan?”

Iboenja Hoei-nio djadi bengong! Ia bengong saperti djoega pertanjaännja ia-poenja tetamoe ada terlaloe aneh!

„Kaoe ingin berbesan padakoe?” tanja ia.

„Ja, dan kenapa tida? Apa barangkali kaoe anggep akoe tida berharga boeat djadi kaoe-poenja besan?“

„Boekan bagitoe, 'njah Tjin-koei, tapi apa jang kaoe bilang baroesan akoe anggep tjoema leloetjon meloeloe. Siapa jang maoe pilih anakkoe djadi mantoenja?”

Itoe tetamoe jang diseboet njonja Tjin-koei mengelah napas.

„Kenapa?” tanja ia.

„Kaoe toch liat sendiri, itoe anak kerdjanja tjoema tidoer bangoen sadja. Goenanja tida ada sama sekali, bagimana bisa djadi orang-poenja mantoe?”

„Abis apa maoe kata, 'njah Tjoe-bing? Boekan djaman sekarang memang soeda moestinja bagitoe? Kita orang-orang toewa jang soeka ngadoek di dapoer, kita jang repot mengoeroes roemah tangga, boekan samoeanja diseboet kaoem kolot? Orang moeda djaman sekarang mempoenjai pikiran laen tentang pengidoepan. Tjoba 'njah Tjoe-bing pergi dengarin orang bitjara perkara kemadjoean. Kaloe ada anak-anak prempoean jang disoeroe beladjar masak, katanja didjadiken baboe dapoer. Kaloe maoe anak-anak kita dibilang madjoe moesti bisa menjanji, maen piano, naek di tooneel maen bangsawan. Kaloe maoe kasi menikah anak, sekarang orang toewa tjoema boleh djadi toekang bajar ongkosnja, jang djadi anak jang pilih pasangan sendiri.”

„Tapi kenapa kaoe sendiri dateng melamar? Boekankah akoe boleh anggep kaoe-poenja pertanjaän tadi saperti lamaran?”

„Betoel, dan akoe melamar atas permintaännja akoe-poenja anak,” kata njonja Tjin-koei.

Njonja Tjoe-bing berpikir sabentaran. Kamoedian ia tertawa dan berkata:

„Biarlah kita tetap djadi kenalan jang baek, njonja Tjin-koei, maski apa djoega jang aken terdjadi. Ini perkara lebi baek kita serahken sadja pada kita-poenja anak-anak. Kaoe melamar atas maoenja kaoe-poenja anak dan akoe poen maoe toeroet kaoe-poenja sikep jang boleh dibilang soeda menoeroet „kemadjoean,” dan sekarang baek kaoe tanja Hoei-nio sendiri, apa ia soeka atawa tida djadi kaoe-poenja mantoe.”

„Ja, itoe akoe moefakat, apa akoe boleh bitjara dengen ia?”

„Tentoe sekali!”

Hoei-nio dipanggil dan djoestroe ia sedeng membatja satoe bagian dari itoe tjerita jang sanget menarik hati. Tidalah heran permoela ia poera-poera tida dengar panggilannja ia-poenja iboe dan tempo iboenja oelangken,

dengen oering-oeringan ia berbangkit dan menghampiri . . . . . . .

Njonja Tjin-koei merasa kesal meliat pakeannja itoe gadis jang boleh djadi nanti aken djadi mantoenja.

„Ini ada 'ntjim Tjin-koei, Hoei, masa kaoe tida kenal. Kaoe ini gadis matjem apa? Ada tetamoe boekan sedoeh koffie, sediaken koewe, tapi tanja poen tida!”

„Ach orang lagi batja boekoe rame,” kata Hoei-nio.

Njonja Tjoe-bing melirik pada tetamoenja dan sang tetamoe melirik pada njonja roemah.

„Hoei,” kata poela sang iboe, „'ntjim Tjin-koei lamar kaoe boeat anaknja.”

Hoei-nio djadi bagitoe terkedjoet, hingga ia lepasken itoe boekoe jang tadinja ia pegang.

„'Ntjim lamar padakoe?” tanja ia.

„Benar, boeat akoe-poenja anak. Ia bernama Oen-liang.”

„Akoe tida kenal,” kata Hoei-nio dengen pendek.

„Tapi kaoe boleh berkenalan dengen ia,” kata itoe orang jang boleh djadi aken diseboet mertoewa oleh Hoei-nio.

Itoe gadis berdiam sabentaran.

„Apa ia soeda sekola di H.B.S.?” tanja Hoei-nio blakangan.

„Soeda loeloes!”

„Apa ia pande voetbal, bisa maen tennis?”

„Akoe kira itoe doea permaenan ia bisa,” kata njonja Tjin-koei.

„Bisa maen moesiek dan dansa?”

„Tentoe sadja, tapi dansa akoe kira tida, sebab ia bilang tida enak peloek-peloek orang prempoean jang ia tida kenal. Oen-liang memang ada sadikit pemaloean!”

„Bisa stuur auto?”

„Wah di mana ia beladjar? Kita tida poenja auto, nona Hoei”

„Apa ia-poenja soeara bagoes, pande menjanji?”

„Itoe akoe tida taoe, sebab akoe djarang dengar ia menjanji. Lagipoen akoe dengar samoea orang-poenja soeara ampir sama sadja, maka akoe tida taoe apa Oen-liang mempoenjai soeara jang bagoes atawa tida.”

„Ah tida maoe, Hoei-nio tida maoe kawin dengen ia,” kata Hoei-nio kamoedian dan laloe tinggalken itoe tetamoe dan iboenja.

„Nah kaoe dengar sendiri,” kata njonja Tjoe-bing dengen pelahan waktoe Hoei-nio soeda berlaloe, „akoe bilang apa, siapa jang soeka ambil mantoe pada anak bagitoe matjem. Akoe harep sadja kaoe tida djadi goesar.”

Njonja Tjin-koei bersenjoem dan mengelah napas.

„Boeat akoe tida ada halangannja,” kata ia, „dan akoe nanti sampeken pada anakkoe djawaban jang nona Hoei kasi.”

Marika berdoea bitjara lagi bebrapa lamanja dan kamoedian itoe tetamoe pamitan.

Njonja Tjin-koei dapet pemandangan jang tida bagoes tentang dirinja gadis-gadis djaman sekarang. Boleh djadi ia mengira dalem doenia tida ada gadis jang mempoenjai sikep berbeda dari Hoei-nio. Sepandjang djalan ia mengelah napas dan bebrapa kalih ia mengoeroet dada.

„Boekan ditanja apa anakkoe bisa tjari oewang; boekan ditanja apa Oen-liang orangnja ba ek atawa tida, tapi. jang ditanja voetbal, tennis, moesiek, dansa dan njanji! Lailah, saperti djoega dengen itoe samoea satoe lelaki bisa kasi makan pada anak bininja, kaloe tida bisa tjari oewang. Soenggoe akoe tida mengarti pikirannja orang bagitoe.”

Dengen pikiran tida karoean itoe njonja sampe di roemahnja. Di satoe fihak ia djadi pikirin, dengen tjara bagimana ia moesti kasi hiboeran pada ia-poenja poetra jang tentoe djoega aken djadi berdoeka djikaloe mendengar itoe lamaran ditolak. Sebaliknja diam-diam ia merasa moesti bergirang, jang ia tida oe sa djadi mertoewanja Hoei-nio jang sama sekali ia tida penoedjoe boeat djadi mantoenja. Tida oesa disangkal lagi

Hoei-nio ada eilok dan tjantik; itoe gadis ada poetrinja saorang hartawan, tapi apa goenanja itoe samoea, djikaloe ia tida bisa djadi satoe istri jang baek.

Bagitoelah dengen membawa pemandangan jang tida bagoes njonja Tjin-koei sampe di roemahnja, dimana Oen-liang menoenggoe dengen tida sabar.

Baroe sadja iboenja toeroen dari ka ndaraän. itoe djedjaka soeda menanja:

„Kabar baek, mama?”

Njonja Tjin-koei tida lantas menjaoet, hingga Oen-liang oelangken pertanjaännja.

„Biasanja kaoe soeka berlakoe sabar, Oen-liang,” kata njonja Tjin-koei kamoedian, „toenggoelah doeloe sampe akoe doedoek dan mengaso, boekankah akoe masi tjape?”

Betoel sadja Oen-liang tida mendesak lebi djaoe, tapi ia tida maoe berlaloe dari damping iboenja. Ia ingin dengar djoega kabar di itoe waktoe.

„Tempo akoe deteng,” bagitoe njonja Tjin-koei moelai menoetoer, „akoe liat itoe gadis jang kaoe minta akoe lamar sedeng berbaring di satoe divan . . . . . . .”

Oen-liang merasa sadikit djengkel. Ia tida ingin dengar apa jang iboenja liat dalem roemahnja itoe gadis jang ia merasa tjintaken, tapi ingin dengar poetoesan jang pasti: lamarannja ditrima atawa ditolak. Tapi Oen-liang ada satoe poetra jang selaloe

berlakoe hormat pada ajah dan iboenja dan maskipoen ia merasa djengkel, ia tida kasi njata, hanja berdiri diam boeat mendengarin iboenja bitjara lebi djaoe.

„Ia sama sekali tida berbangkit, waktoe akoe masoek dan akoe liwat di dampingnja.”

Sasoedanja berkata bagitoe sang iboe memandang pada poetranja boeat dapet liat, apakah itoe katerangan ada membawa pengaroeh atas sikepnja Oen-liang atawa tida. Tapi ternjata Oen-liang tinggal berdiri diam.

„Akoe mendjadi heran dan laloe katemoeken iboenja, pada siapa akoe tanja apa itoe gadis brangkali sedeng sakit. Ternjata ia ada bagitoe seger saperti kaoe atawa akoe. Apakah kaoe mengarti ia-poenja sikep?”

Oen-liang gojang kepala.

„Itoelah menandaken jang itoe gadis tida bisa berlakoe hormat pada orang toewa, hingga ada satoe tetamoe daleng poen ia tinggal berbaring.”

Kombali sang iboe memandang pada Oen-liang. Ini djedjaka sekarang toendjang djanggoet dengen ia-poenja tangan kanan saperti sedeng berpikir keras.

„Akoe madjoeken lamaran pada iboenja, tapi 'ntjim Tjoe-bing bilang, dalem ini djeman orang toewa boleh dibilang soeda tida berkoeasa atas dirinja ia-poenja anak-anak dalem oeroesan menikah. Maka akoe moesti madjoeken itoe lamaran pada itoe gadis sendiri, jang sigra dipanggil.”

„Ia dateng dan akoe lantes bitjara teroes terang apa jang djadi maksoednja akoe-poenja kedatengan. Ia madjoeken roepa-roepa pertanjaän, dari mana akoe dapet anggepan bahoea orang jang aken djadi ia-poenja soeami moesti pande maen voetbal, maen tennis, taboeh piano dan laen-laen pekakas moesiek, bisa dansa, pende stuur auto. Tapi ia tida ada madjoeken pertanjaän jang menoendjoekken ia ada pikirken beratnja pengidoepan.”

„O, bagitoe, dan apa kaoe djawab?” tanja Oen-liang dengen berdebar hati.

„Akoe kasi katerangan salengkapnja, tapi . . . . . . .”

„Ia menolak,” kata Oen-liang dengen kaget.

„Betoel, ia menolak, lantaran ia anggep kaoe tida menjoekoepin ia-poenja pengharepan dan djoega lantaran ia belon kenal pada kaoe. Tapi, Oen-liang, akoe kira kaoe tida oesa menjesal lantaran itoe penolakan. Dalem ini kota akoe rasa masi banjak laen gadis jang aken bikin kaoe lebi beroentoeng dari pada djikaloe kaoe menikah dengen itoe gadis jang baroesan akoe katemoeken. Akoe moesti merasa menjesal, lantaran ia ada poetrinja akoe-poenja kenalan lama. Tapi boeat bitjara teroes terang: akoe

sabetoelnja tida penoedjoe padanja, kerna akoe anggep ia boekan pantesnja djadi kaoe-poenja pasangan. Orang lelaki jang poenja ratoesan riboe roepia baroelah aken bisa menjoekoepin segala permintaännja dan bisa lajanin ia-poenja tjara menoentoet pengidoepan. Tapi kaoe, Oen-liang, perloe dengen satoe istri jang bisa mengoeroes kaoe-poenja roemah tangga diwaktoe kaoe moesti bekerdja keras boeat bisa dapet pengidoepan jang pantes. Kaoe moesti mempoenjai satoe penoendjang, satoe pembantoe jang bisa membri bantoean dan hiboeran pada kaoe, boekan satoe istri jang saban sore menoenggoe kaoe-poenja kedatengan boeat prentah kaoe kaloearken oewang boeat segala plesiran jang tida bergoena, boekan satoe istri jang tida betah di roemah jang kaoe moesti dapet.”

Oen-liang tida kata apa-apa. Ia mengelah napas beroelang-oelang.

„Bilanglah kaoe tida terlaloe djengkel, Oen-liang,” kata poela sang iboe dengen soeara memboedjoek, „djikaloe kaoe maoe, akoe nanti lantes serep-serepin dimana ada gadis jang dirasa bisa bikin kaoe djadi beroentoeng.”

„Akoe menjesal memang menjesal iboe,” djawab Oen-liang, "tapi akoe kasi kepastian, sabisanja akoe aken loepaken padanja. Tapi ada lebi baek kaoe djangan kesoesoe tjari gadis laen, toenggoelah sampe akoe-poenja pikiran djadi tetap, kerna kaoe tentoe mengarti, jang itoe penolakan membikin akoe djadi tida karoean pengrasaän.”

Njonja Tjin-koei gojang-gojang kepala dan memandang pada poetranja dengen pengrasaän kasian . . . . . . .

---

„Boelan Poernama” No. 18.

III.
PILIHANNJA HOEI-NIO!

Di satoe djalanan jang ketjil dan sepi, jang berada di loear kota ada keliatan saorang moeda jang berpakean perlente sekali. Ia-poenja badjoe berwarna blaoe toea ditimpalin dengen tjelana wol semoe koening. Dasinja jang terbikin dari soetra jang paling aloes boleh djadi baroe sadja kaloear dari toko. Satoe slampe soetra ada keliatan dari ia-poenja sakoe badjoe seblah atas. Di ia-poenja djidat ada menempel katja mata jang pinggirannja terbikin dari koelit, sedeng ia-poenja kepala tertoetoep dengen satoe pet jang dipasang terbalik. Tida djaoe dari itoe orang keliatan ada berdiri satoe motorfiets, jang telah bawa ia ka itoe tempat.

Soeda kira-kira satengah djem lamanja itoe orang berada di itoe tempat sepi. Tida brentinja ia djalan moendar-mandir, tapi achirnja boleh djadi ia merasa tjape dan laloe doedoek di itoe motorfiets. Tida bisa salah lagi itoe orang sedeng menoenggoe kedatengannja laen orang, kerna di waktoe ada kendaraän jang mendatengin ia intjerken betoel-betoel matanja dan laloe kasi liat ia-poenja rasa djengkel, waktoe ternjata itoe kandaraän tida membawa dateng orang jang ditoenggoe. Saban-saban ia memandang pada ia-poenja tangan kiri dimana ada terdapet satoe horlodji mas. Orang jang ditoenggoe boleh djadi soeda tida pegang betoel djandjinja, kerna samingkin lama itoe orang moeda keliatan djadi samingkin tida sabar.

Achirnja, sasoedanja ia menoenggoe lagi satengah djem, baroe keliatan satoe auto jang mendatengin. Dari masi djaoeh soeda bisa keliatan bahoea penoempangnja itoe kandaraän soeda tondjolken kepalanja keloear tenda, saperti djoega ia moesti bantoe meliat apa djalanan ada terhalang atawa tida. Mendadak boleh djadi ia kenalin itoe pemoeda jang sedeng berdiri di damping motorfiets. Itoe penoempang auto kibarken sapoe tangannja dengen roepa girang sekali. Tida lama kamoedian itoe auto soeda berada di dampingnja itoe motorfiets dan dikasi brenti. Penoempangnja lontjat toeroen dan disamboet dengen peloekan oleh itoe lelaki moeda.

Penoempang itoe ada satoe prempoean moeda jang boekan laen dari pada Hoei-nio, poetrinja 'ntjim Tjoe-bing.

„Apa kaoe soeda menoenggoe lama?” tanja ia sambil bersenjoem.

Itoe lelaki kedepin mata dan lepasken pada Hoei-nio. Ia kaloearken dompet oewangnja

dan kasiken satoe ringgitan pada chauffeurnja itoe auto jang sasoedanja menanja apa ia tida perloe menoenggoe, laloe djalanken poela kandaraännja.

„Apa kaoe soeda menoenggoe lama?”

„Wah lama sekali, akoe sampe djengkel. Tjoba djikaloe akoe tida liat kaoe kibarken sapoe tangan, hingga akoe tida bisa tebak kaoe jang dateng, boleh djadi akoe soeda kasi dirikoe dilindes itoe auto. Nah, akoe sampe djadi bagitoe djengkel!”

„Kaoe bisa sadja, 'ngko Tjing-biauw. Ngobrolnja memang pande, tapi kaoe manis sekali maoe menoenggoe disini, maski akoe dateng laat. Akoe tertahan, kerna tadinja akoe-poenja iboe tida soeka kasi idzin boeat akoe pergi.”

Roepanja itoe lelaki soeda kenal betoel tabiatnja itoe gadis, kerna dengen roepa heran jang dibikin-bikin ia menanja:

„Apa betoel? Ah, akoe tida kira kaoe-poenja iboe dan ajah masi ada bagitoe „kolot.” Masatah kaoe jang terpladjar tinggi, jang pande bitjara bebrapa bahasa asing moesti dikoeroeng saperti anak ajam. Inilah katerlaloean. Sikep bagitoe moesti dilawan sakerasnja. Orang prempoean moesti berklai boeat ia-poenja kamerdikaän, djangan kasi dirinja diperlakoeken saperti barang dagangan jang moesti disimpen dalem lemari atawa dalem peti lantaran koeatir nanti djadi boeloekan atawa djadi boesoek”

„Akoe poen selamanja bantah kemaoeannja akoe-poenja ajah dan iboe; tida kasoedian dipingit,” djawab Hoei-nio jang merasa senang sekali mendengar perkataännja Tjing-biauw.

„Tentoe sadja, di'ini djeman kemadjoean, siapa jang kasoedian dikerem dalem roemah. Merdika, pergi ka mana kita soeka, plesir, itoelah jang perloe boeat kita-poenja pengidoepan,” kata itoe pemoeda jang laloe peloek pinggangnja Hoei-nio. „Dan sekarang, Hoei, akoe bersedia boeat bawa kaoe ka mana sadja kaoe soeka. Benzine akoe sedia tjoekoep, band doea-doea ada baroe, hingga tida oesa koeatir mogok di tenga djalan.”

Dengen roepa menjinta Hoei-nio memandang pada Tjing-biauw.

„Bawa sadja ka mana kaoe soeka, akoe sendiri tida taoe betoel keadaän di loear kota,” kata itoe gadis sambil bersenjoem.

„Apa kaoe soeka pergi ka tempat mandi? Dimana kita bisa bernang bagitoe senang saperti ikan dalem laoet?”

"Apa di sana sering orang dateng?”

„Di hari minggoe dan hari besar memang di itoe tempat ada rame, tapi di hari-hari bagini tida ada satoe manoesia, hingga di sana kita ada merdika saperti djoega boeroeng di oedara, boleh berboeat apa jang kita maoe.”

„Kaoe pande sekali bikin peroepamaän,” kata Hoei-nio, „senang saperti ikan dalem laoetan, merdika saperti boeroeng di oedara.”

„Dan bagitoe beroentoeng saperti Adam dan Eva dalem sorga, kerna kaoe ada di dampingkoe,” menjamboeng Tjing-biauw sambil memandang pada Hoei-nio.

Itoe gadis melengos, kerna maskipoen ia ada satoe gadis jang tida pemaloean, kaloe idoeng lelaki ampir menempel dimoekanja, ia masi merasa maloe.

„Marilah kita brangkat,” berbisik ia.

Tjing-biauw kasi bekerdja masinnja ia-poenja motorfiets dan sasoedanja dapet kenjataän jang Hoei-nio doedoek betoel di blakangnja, ia lariken itoe kandaraän dengen tjepat sekali.

Kamana marika pergi dan apa jang marika berboeat kamoedian itoelah tida oesa diterangken, tapi di waktoe Hoei-nio berada poela di roemahnja, matahari soeda lama silam dan lampoe-lampoe soeda lama dikasi menjalah. Itoe gadis roepanja tjape sekali, kerna bagitoe lekas ia sampe, ia masoek dalem kamar, toeker pakean dan teroes berbaring.

Besok paginja, satelah mata hari soeda naek tinggi, baroelah keliatan Hoei-nio moentjoel dari kamarnja dan katemoeken iboenja, jang ingin minta peritoengan dari poetrinja.

„Akoe maoe tanja, kemaren kaoe pergi kamana, dari tengahari sampe sore dan apa jang kaoe berboeat?”

„Ach mama selamanja soeka riboet lantaran perkara bagitoe. Boekankah Hoei sering bilang, bahoea Hoei boekan anak ketjil lagi jang masi menjoesoe? Hoei tida perloe dianter-anter oleh baboe djikaloe Hoei maoe pergi. Soedalah, mama, djangan tanja ka mana Hoei pergi, kerna Hoei soeda besar, soeda bisa bawa diri sendiri!”

„Tapi akoe tida soeka kaoe pergi ka mana-mana,” kata sang iboe sambil banting-banting kaki. „Anak prempoean djikaloe soeda besar dan belon menikah, haroes membantoe iboenja mengoeroes roemah tangga. Tapi kaoe sama sekali tida ada goenanja. Dari pagi, baroe melek mata, moeloet kaoe sadja dipentang lebar-lebar membikin orang poenja koeping djadi pengang. Djikaloe makanan soeda sedia, kaoe moentjoel boeat makan dan kamoedian pergi dan sampe sore baroe poelang. Apakah kaoe tida maloe?”

„Abis Hoei moesti kerdja apa?”

„Kerdja apa? Selamanja pakerdjaän dalem roemah tangga ada banjak. Djikaloe maoe tida ada kakoerangan pakerdjaän boeat kaoe lakoeken. Kaoe boleh oeroes kaoe-poenja pakean sendiri, djangan moesti beli sadja di toko dengen harga tiga ampat kalih

lipet lebi mahal dari pada djikaloe kaoe goenting dan djait sendiri!”

„Mama toch tida ingin akoe djadi toekang djait. Hoei poenja djari nanti roesak kena djaroem. Djangan sentara Hoei jang tida biasa goenaken djaroem, toekang mendjait jang paling pande poen masi sering kena ketoesoek djaroem.”

Njonja Tjoe-bing oeroet dada. Ia merasa kewalahan boeat kasi pengadjaran pada itoe poetri jang berkepala batoe.

„Kaoe toch boleh bantoe akoe tilik pakerdjaännja koki? Biar kaoe tida kerdjaken sendiri, kaoe boleh mandorin sadja.”

„Aih, mama, apa perloenja? Koki dimandorin, apa goenanja? Mama maoe Hoei tilik pakerdjaännja Koki? Apa sebab? Barangkali mama koeatir koki nanti tjolong makanan? Toch tida sebrapa dan mama nanti moesti kaloearken lebi banjak oewang kaloe Hoei poenja mata sakit lantaran kena asep atawa kena koelit bawang. Lagipoen Hoei tida nanti bisa djadi mandor, kerna Hoei tjoema taoe makanan jang enak, tapi tida taoe bagimana moesti bikinnja.”

„Dan kaoe tida maloe bilang bagitoe? Kaoe satoe prempoean jang tida bisa masak dan tida brani pegang djaroem?”

„Apa perloenja Hoei perhatiken itoe samoea?”

„Perloenja banjak sekali! Djikaloe kaoe soeda djadi orang poenja istri kaoe moesti bisa, kerna djikaloe kaoe-poenja soeami tida mampoeh piara koki, tentoe kaoe djoega tida makan, djikaloe tida bisa masak sendiri.”

„Tapi apa perloenja di ini kota didiriken bagitoe banjak roemah makan, mama?” tanja Hoei-nio jang tida maoe mengalah.

„Ja perloenja tentoe sadja boeat djoeal makanan pada orang-orang matjem kaoe. Tapi djikaloe kaoe-poenja soeami tida poenja bagitoe banjak oewang boeat beli makanan di roemah makan dan kaoe tida bisa masak, tentoelah kaoe moesti makan soto atawa goreng tauwhoe saban hari!”

„Tida, mama, tida nanti Hoei-nio poenja soeami moesti ada orang jang bisa beli makanan di roemah makan dan makanan klas satoe.”

„Hm! Itoe akoe maoe liat!”

„Tentoe sadja mama boleh liat,” kata Hoei-nio jang djadi sengit. „Hoei poenja bakal soeami orangnja tjakep, ganteng, poenja banjak oewang, pinter dan gagah brani. Tjoba mama liat djikaloe nanti ia dateng kamari, tapi ati-ati, djangan sampe mama kepintjoek.”

Mendadak Hoei-nio tertawa saperti djoega ia bitjara bagitoe dengen memaen di hadepannja ia-poenja satoe kenalan, boekan di hadepannja ia-poenja iboe.

Njonja Tjoe-bing djadi sanget goesar, tapi

Hoei-nio soeda tinggalken padanja. Tadinja itoe gadis hendak bersantap pagi, tapi lantaran terdjadi itoe perselisihan dengen iboenja, ia oeroengken maksoednja dan masoek kombali dalem kamarnja.

Dan kombali sang iboe toendjoekken kalemahannja, kerna tida lama kamoedian satoe baboe bawaken makanan pada Hoei-nio.

Maskipoen tentang dirinja Hoei-nio tersiar banjak tjerita jang koerang sedap terdengarnja, toch orang jang madjoeken lamaran atas dirinja itoe gadis poen tida koerang banjaknja. Banjak orang moeda jang anggep Hoei-nio ada satoe gadis jang memenoehin marika poenja pengharepan baek dengen djalan langsoeng maoepoen dengen perantaraännja orang toewa marika meminang dirinja itoe gadis.

Pada soeatoe hari pada Hoei-nio dikasi taoe, bahoea ia telah dilamar oleh satoe orang jang betoel tida hartawan, tapi toch dianggep ada pantes boeat djadi soeaminja.

Tapi Hoei-nio angkat poendak.

„Akoe soeda melamar dan ditrima,” kata ia dengen adem, saperti djoega apa jang ia bilang itoe ada soewal jang paling saderhana boeat ia-poenja familie.

„Apa kaoe bilang ?” tanja njonja Tjoe-bing dan soeaminja, jang kebetoelan berada sama-sama goena bitjaraken itoe perkara.

„Akoe soeda melamar dan ditrima!”

„Kaoe melamar? Kaoe satoe prempoean melamar, apa kaoe tida maloe?” tanja sang ajah jang lantes djadi marah, ternjata dari ia-poenja moeka jang djadi merah, sedeng kringat moelai keliatan di djidatnja.

„Kenapa djoega tida?” tanja Hoei-nio, tapi di hadepannja ia-poenja ajah ia tida brani berlakoe terlaloe kewat, dan lantaran itoe djoega ia oetjapken itoe pertanjaän dengen soeara pelahan.

„Dimana ada itoe atoeran, satoe gadis melamar satoe djedjaka,” kata njonja Tjoe-bing.

„Aih, betoel-betoel akoe tida mengarti, kenapa toch dalem doenia moesti ada itoe perbedaän, mama. Satoe lelaki boleh lamar satoe gadis, tapi sabaliknja satoe gadis tida boleh berboeat bagitoe pada satoe lelaki jang ia penoedjoe! Boekankah ini ada gandjil sekali? Dan apa sebabnja, Boekankah lelaki dan prempoean sama-sama ada manoesia?”

„Ha, kaoe kombali maoe toendjoekken kaoe-poenja kapinteran, ja?” tanja Tjoe-bing sambil gebrak medja. „Apakah itoe jang djadi boeahnja kaoe-poenja pladjaran boeat mana saban boelan akoe moesti kaloearken oewang boekan sadikit?”

„Boekan bagitoe, papa, tapi Hoei tida mengarti, apa sebabnja pada satoe lelaki

satoe hal di'idzinken dan pada satoe prempoean tida?”

„Ja, sebab prempoean dan lelaki masing-masing mempoenjai kewadjiban sendiri-sendiri. Satoe lelaki haroes bisa tjari oewang boeat kasi pengidoepan pada anak istrinja dan sang istri ada mempoenjai kewadjiban boeat mengoeroes roemah tangga. Dengen bagitoe laki istri djadi saling membantoe. Dari ini sadja soeda bisa dimengarti, jang banjak hal jang boleh dilakoeken oleh lelaki tida boleh dilakoeken oleh orang prempoean, djoestroe lantaran adanja perbedaän antara lelaki dan prempoean. Maka djoega moesti dianggep tida pantes djikaloe satoe gadis melamar satoe djedjaka.”

„Toch, Hoei soeda berboeat bagitoe, dan djikaloe tida dengen „dia” Hoei-nio tida nanti menikah, tida nanti, tida nanti!’”

Sekarang Hoei-nio poenja sifat kepala batoe keliatan, kerna ia ampir bertreak-treak waktoe oetjapken perkataän-perkataän paling blakang; tangannja terkepel dan ia tendang-tendang djoebin bagitoe keras, hingga satoe tegel jang dipasang tida terlaloe koeat djadi terbelah doea!

„Anak tjilaka, anak doerhaka!” berseroe ajahnja. „Apa kaoe tida bisa berlakoe lebi hormat di hadepan kaoe-poenja ajah dan iboe?”

Hoei-nio poenja aer-mata membasahin kadoea pipinja, boekan lantaran pengrasaän menjesal, tapi lantaran terlaloe gergetan, lantaran terloe sengit.

„Kaoe moesti toeroet orang toewa poenja maoe,” kata poela ajahnja.

„Tida, Hoei tida nanti menikah dengen siapa djoega, katjoeali dengen itoe satoe orang, jang Hoei kenal, dengen siapa Hoei soeda bergaoel lama. Tjoba papa pikir, bagimana laki istri bisa beroentoeng djikaloe sebelonnja menikah belon kenal, belon bergaoel? Boekan lantaran soeda bergaoel bisa djadi terbit rasa tjinta?”

„Hm! Itoe tjerita basi akoe soeda bosen dengar,” kata Tjoe-bing. „Itoe tjerita memang djoega sering dioetjapken oleh orang-orang moeda satengah mateng saperti kaoe. Marika anggep marika pegang pacht segala matjem kapinteran dalem doenia; orang toewa soeda tida poenja pikiran. Anak sekola jang masi pake tjelana koetoeng poen sekarang ingin dianggep dirinja banjak lebi taoe dari ajah dan iboenja jang lahirken marika, dalem perkara pernikahan dan pertjintaän. Hoei, pendeknja akoe maoe bilang, kaoe moesti toeroet kita-poenja maoe. Djikaloe tida, ja, masa bodo, kaoe nanti menjesal di blakang hari.”

„Hoei tjoema aken menikah dengen dia,” katanja dan pergi masoek dalem kamar. . . . . . .

---

IV.
. . . . . . . TAPI ORANG TOEWANJATIDA PENOEDJOE.

Moelai itoe hari tida brentinja pertjektjokkan terdjadi, teroetama antara Hoei-nio dan ia-poenja iboe. Lantaran itoe djoega njonja Tjoe-bing anggep paling baek Hoei-nio dikasi menikah, soepaja itoe anak ada djaoe dari ia, boeat siapa ia tida oesa poesingken diri lagi. Laen dari itoe djikaloe Hoei-nio soeda menikah, tentoelah itoe segala tjerita tentang dirinja Hoei-nio aken sirep sendiri. Tjoe-bing sendiri moefakat dengen pikiran istrinja, tapi itoe ajah dan iboe mengarti, jang dalem ini hal marika moesti berlakoe ati-ati sekali. Marika moesti perhatiken djoega, adatnja Hoei-nio jang bagitoe keras. Apabila marika maoe goenaken paksaän, boleh-boleh marika nanti dapetken maloe. Bagitoelah sekarang Tjoe-bing dan istrinja goenaken kalemesan. Marika harep dengen goenaken boedjoekan dan perlakoean jang manis, marika bisa bikin Hoei-nio poenja hati djadi lemas dan maoe toeroet marika-poenja kainginan. Boeat bikin keadaän tida tinggal genting selamanja, oeroesan pernikahan itoe iboe dan ajah tida seboet-seboet lagi. Dengen bagitoe bisa ditjegah moentjoelnja kasengitan. Sekarang Hoei-nio ditilik lebi baek. Djikaloe ia hendak pergi dan kasi alesan hendak belandja, dengen mendadak ia-poenja iboe poen perloe beli barang-barang, dan „ikoet” Hoei-nio pergi belandja, hingga itoe gadis tida dapetken maksoednja. Djikaloe Hoei-nio bilang ia hendak pergi koendjoengin satoe kenalannja, tentoelah njonja Tjoe-bing njataken kainginan boeat berkenalan dengen iboenja itoe sobat dan „anter” Hoei-nio pergi ka roemahnja itoe sobat. Dengen berboeat bagitoe, betoel djoega njonja Tjoe-bing tida bisa lakoeken poela pakerdjaännja jang sehari-hari, tapi ia sekarang djadi tilik segala tindakannja Hoei-nio. Maskipoen itoe gadis tida brentinja tjari akal boeat bisa pergi sendirian kamana ia soeka, toch njonja Tjoe-bing ternjata tida maoe kalah dalem hal mentjari pikiran boeat bikin batal maksoednja sang poetri. Poen Tjoe-bing sekarang lebi perhatiken oeroesan roemah tangga. Boleh djadi ia soeda bisa bikin lebi tegoeh kedoedoekannja hingga sekarang ia bisa petjah perhatiannja ka doewa djoeroesan. Lebi siang dari biasa ia poelang dari kantoornja dan saban hari ia berlakoe bagitoe roepa, hingga maoe atawa tida, Hoei-nio moesti berdiam di dampingnja satoe doea djam lamanja. Pelahan dengen pelahan Hoei-nio poenja

tingkah lakoe keliatannja berobah djoega. Di waktoe doeloean ia biasa glandangan sendirian, sekarang ia moesti hadepin ajahnja jang minta ia-poenja penglajanan, dan dengen tida merasa lagi ia-poenja sifat jang lebi baek moentjoel. Perhoeboengan antara itoe gadis dengen orang toewanja djadi lebi baek, kerna sekarang sang ajah menaro perhatian pada poetrinja dan meminta perhatiannja Hoei-nio. Seringkalih Tjoe-bing sendiri adjak Hoei-nio pergi menonton bioscoop atawa laen-laen pertoendjoekkan. Tentoe sadja Hoei-nio tida menolak, tapi Tjoe-bing berboeat bagitoe boekan sekali-kali kerna ia soeka tontonan, tapi meloeloe boeat halangin Hoei-nio pergi menonton sendirian. Ia koeatir dari roemah itoe gadis brangkat sendiri, tapi di tengah djalan katemoe penganter jang ia, Tjoe-bing, sendiri tida ingin liat.

Pelahan dengen pelahan dan sadikit dengen sadikit keliatan terdjadi dengen perobahan pada dirinja Hoei-nio dan dengen girang Tjoe-bing dan istrinja mendapet kenjataän, bahoea Hoei-nio poenja adat toch masi bisa dirobah. Marika teroes menaro perhatian sepenoehnja, maskipoen itoe hal ada meminta marika poenja pikiran dan tenaga jang boekan ketjil. Tapi lantaran mengandoeng pengharepan, jang satoe kalih marika bisa bikin Hoei-nio djadi satoe poetri jang „dengar kata,” lantaran tersoeroeng dengen pengrasaän tjinta sajang boeat marika poenja anak jang tjoema satoenja, marika tida kenal tjape dan selaloe tjari pikiran boeat halangin Hoei-nio poenja segala tindakan jang marika anggep tida bagoes. Bagitoelah pelahan dengen pelahan Hoei-nio djadi biasa lagi djikaloe pergi dari roemahnja dengen dianter oleh ia-poenja iboe. Ia tida merasa djengkel lagi djikaloe pergi menonton, dengen dianter oleh ia-poenja ajah, sedeng doeloean ia merasa kamerdikaännja dikoerangi, djikaloe ia dilarang pergi menonton sendirian. Tapi memang djoega ada satoe perbedaän besar antara larangan boeat pergi menonton sendirian dan dianter menonton, antara dilarang pergi dan dianter pergi. Satoe larangan membikin Hoei-nio djadi lebi berkepala batoe, tapi djikaloe ia bilang hendak pergi ka satoe tempat dan iboenja bilang hendak mengikoet, ia sendiri merasa berat boeat menolak. Dengen goenaken akal-akal aloes, baek Tjoe-bing maoepoen istrinja bisa bikin itoe gadis maoe lebi perhatiken oeroesan roemah tangga. Bagitoelah Tjoe-bing jang biasanja berlakoe sanget saderhana sekarang djadi „aleman.” Ini perkataän ada dari Hoei-nio sendiri jang sekarang moesti temanin ajahnja. Di waktoe bersantap Tjoe-bing ingin Hoei-nio ada bersama-sama dan

djikaloe sore boekan djarang sang ajah minta poetrinja membatja boekoe tjerita dan ia sendiri mendengarin. Itoe samoea Tjoe-bing lakoeken meloeloe boeat bikin Hoei-nio djadi lebi betah tinggal di roemah.

Sebagi djoega banjak orang prempoean soeka dengar dirinja dipoedji, Hoei-nio jang tjerdik poen ternjata masi mempoenjai itoe sifat. Ampir saban hari ia dipoedji, djikaloe ia toeroet prentahnja ia-poenja iboe atawa ajah, dan boleh djadi lantaran kepingin dengar poedjian lebi moeloek lagi, ia moelai berladjar boeat pahamken pakerdjaän-pakerdjaän jang biasa dilakoeken oleh orang prempoean.

Perlakoean jang lebi menaro perhatian, perlakoean jang aloes ternjata ada berpengaroeh sama besarnja dengen sikep menoeroetin sadja dari sang ajah dan iboe.

Tentoelah sadja Tjoe-bing dan istrinja djadi merasa sanget girang meliat itoe samoea perobahan, jang maskipoen terdjadi dengen pelahan, tapi toch bisa terliat njata sekali.

Tapi . . . . . dalem satoe hal ternjata Hoei-nio tida bisa dirobah kamaoeannja, ja-itoe: dalem soewal pernikahan. Waktoe pada soeatoe hari kombali njonja Tjoe-bing bitjaraken itoe hal dengen samar-samar, dengen lantes Hoei-nio njataken, bahoea ia belon robah sama sekali pikirannja dan ia tetap bakal menikah dengen itoe satoe djedjaka jang ia kata memang ia soeda tjintaken sedari bebrapa lamanja, jang menoeroet ia-poenja kata, ia soeda taoe betoel adat lembaganja, baek tingka lakoenja dan mempoenjai kadoedoekan jang baek.

Samentara itoe dengen sia-sia sadja bebrapa banjak kalih Tjing-biauw tjoba katemoeken pada Hoei-nio. Ini hal sesoenggoenja membikin itoe orang moeda djadi heran. Ia taoe pasti, bahoea Hoei-nio tida pergi ka laen tempat, tapi kenapa sekarang bagitoe soesah katemoeken itoe gadis! Bebrapa kalih saban hari tentoe Tjing-biauw djalan moendar-mandir atawa berkandaraän motorfiets di depan roemahnja Hoei-nio, tapi sebagitoe lama ia tida beroentoeng boeat bertemoe.

Sampe pada satoe hari ia braniken hati dan laloe dateng mengoendjoengin. Kabetoelan sekali Hoei-nio ada di roeangan blakang, sedeng iboenja jang samboet kedatengannja itoe orang moeda.

„Apa akoe boleh bertemoe dengen Hoei-nio, 'ntjim?” bagitoe ia menanja sasoedanja membri hormat pada njonja Tjoe-bing.

Njonja roemah djadi tertjengang dan merasa tida senang waktoe dengar itoe lelaki moeda jang ia tida kenal sama sekali lantes seboet sadja namanja ia-poenja poetri, jang

toch soeda djadi gadis jang ampir dewasa.

„Siapa kaoe? Dan apa perloenja kaoe minta bertemoe dengen akoe-poenja anak?” tanja njonja Tjoe-bing, jang biarken itoe orang moeda tinggal berdiri.

„Ach akoe ingin katemoe sadja,” kata Tjing-biauw. „Ia ada akoe-poenja sobat baek dan soeda lama akoe tida bertemoe dengen ia. Maka akoe dateng kamari boeat menanjaken ia-poenja kasehatan dan sekalian katemoeken padanja.”

„Tida bisa,” kata njonja Tjoe-bing, „dengen menjesal akoe tida bisa kasi kaoe bertemoe dengen Hoei-nio. Akoe anggep boekan ada satoe kepantesan jang satoe gadis bertemoe dengen satoe lelaki moeda jang boekan djadi ia-poenja familie!”

„'Ntjim, akoe toch soeda kenal lama padanja? Apa halangan boeat akoe katemoeken padanja.”

„Akoe jang djadi halangan,” kata njonja Tjoe-bing. „Akoe tida idzinken anakkoe bitjara dengen sembarang orang.”

Tjing-biauw keroetken djidatnja.

„Hoei-nio toch soeda besar, 'ntjim, akoe kira ia ada merdika boeat berkenalan dan bergaoel dengen siapa sadja jang ia soeka.”

„Djoestroe lantaran ia soeda besar tida ada itoe atoeran jang memaksa akoe kasi idzin boeat ia bertemoe dengen kaoe atawa lelaki jang mana djoega!” djawab njonja Tjoe-bing.

Tjing-biauw djadi sengit dan hendak kaloearken perkataän-perkataän jang tentoe djoega bakal tida terlaloe enak didengar, tapi mendadak ia djadi bersenjoem dan manggoet ka satoe djoeroesan, di sampingnja njonja Tjoe-bing.

Hoei-nio moentjoel dengen mendadak.

„Apa kaoe soeda lama, 'ngko Tjeng-biauw? Akoe anggep kaoe manis sekali soeka dateng mengoendjoengin padakoe. Mama, ini 'ngko Tjing-biauw, akoe-poenja sobat jang paling baek.”

Njonja Tjoe-bing djadi bengong sesaät lamanja, tapi dengen lekas ia toendjoekken, bahoea ia tida maoe lepasken kakoeasaän dalem roemahnja, maka dengen soeara keras ia berkata:

„Hoei-nio, akoe larang kaoe bitjara dengen lalaki jang akoe tida kenal! Dan kaoe, akoe minta dengen sanget soeka lantes berlaloe dari sini!” Perkataän-perkataän jang dioetjapken paling blakang ditoedjoeken pada Tjing-biauw.

Ini djedjaka djadi sangsi-sangsi dan mengharep Hoei-nio nanti bantah prentahnja ia-poenja iboe, tapi njonja Tjoe-bing tida maoe kasi koetika boeat Hoei-nio banjak bitjara. Ia menoendjoek ka pintoe dan oelangken prentahnja.

Lantaran merasa maloe, Tjing-biauw berlaloe sasoedanja lebi doeloe memandang pada Hoei-nio dengen sorot mata jang „menikam” hatinja itoe gadis, kerna lekas sekali Hoei-nio roeboehken dirinja di satoe sofa jang berada di itoe roeangan, toetoepin moekanja dengen kadoewa tangan dan menangis tersedoe-sedoe.

Njonja Tjoe-bing biarken sadja Hoei-nio menangis, tapi kamoedian ia liat Hoei-nio djadi beringas, maka ia menghampiri dengen maksoed boeat membri nasehat dan hiboeran, tapi Hoei-nio memandang iboenja dengen mata mendelik.

„Kaoe soeda bikin roesak akoe-poenja kabroentoengan,” kata ia.

„Kenapa? Apakah lantaran akoe larang kaoe tida boleh bitjara dengen ia, akoe soeda bikin roesak kaoe-poenja kabroentoengan?”

„Apa mama tida mengarti, ia ada akoe-poenja toendangan?”

Njonja Tjoe-bing djadi terkedjoet.

„Kaoe-poenja toendangan?”

„Benar, dan sekarang tentoe ia poetoesken itoe pertoendangan lantaran perlakoean tida bagoes jang mama toendjoekken baroesan.”

„Hm! Akoe tida kira, jang kaoe tida merasa maloe, Hoei, boeat pilih laki. Tapi akoe maoe bilang, djikaloe ia memang tjinta pada kaoe, tentoelah ia dateng lagi kamari, maski perlakoean apa djoega ia dapetken dari akoe. Boekankah tjinta sedjati bisa lawan segala roepa halangan?”

„Tapi kaloe ia tida dateng? Djikaloe ia ada bagitoe agoeng boeat tida tinggal diam itoe hinaän?”

„Itoelah tjoema menandaken ia-poenja tjinta pada kaoe ada tipis sekali. Tapi, Hoei, apa kaoe soeda sering bergaoel padanja?”

Hoei-nio tida mendjawab. Itoe pertanjaän sekarang ia tida bisa djawab kerna sekarang ia merasa maloe. Djikaloe doeloean iboenja madjoeken pertanjaän bagitoe, tentoe dengen lantes ia djawab: „betoel," kasatoe lantaran ia ingin selaloe melawan iboenja, kadoewa lantaran memang doeloean ia tida pernah merasa maloe-maloe lagi.

„Hoei,” kata poela sang iboe, „djikaloe kaoe tjinta padanja, biarlah ia madjoeken lamaran dan kita boleh oeroes itoe perkara lebi djaoe. Akoe nanti minta kaoe-poenja ajah selidikin ia-poenja keadaän. Djikaloe memang kaoe-poenja djodo, tentoelah djoega kita tida nanti bikin kaberatan. Tapi kaoe moesti mengarti, dari katjintaän sadja orang tida bisa idoep. Ada djoesta djikaloe orang bilang bahoea djikaloe ada katjintaän, maskipoen di lobang semoet poen orang bisa idoep broentoeng. Orang melahirken

anak ada soesah dan piara anak ada lebi soesah lagi. Kaoe djadi kita-poenja anak jang tjoema satoe-satoenja. Kaoe-poenja ajah dan akoe ingin liat kaoe djadi beroentoeng, maka kita maoe selidikin lebi doeloe orang jang bakal djadi kaoe-poenja soeami. Lantaran kita hendak djaga kaoe-poenja kapentingan sabisanja, maka djoega kita tida idzinken kaoe berlakoe sembarangan.”

„Tapi ia tjinta padakoe dan akoe tjinta padanja,” kata Hoei-nio jang masi belon linjap amarahnja, „ia tjakep dan mempoenjai sifat-sifat jang akoe anggep bakal akoe beroentoeng. Kita soeda bergaoel soeda tjoekoep lama, boeat bikin akoe djadi kenal betoel ia-poenja tabiat.”

Dengen tida merasa Hoei-nio kasi djawaban atas pertanjaännja sang iboe, jang tadi ia tida maoe djawab lantaran merasa maloe.

„Akoe tida maoe berbantah dengen kaoe, Hoei, tentang kenal baek orang poenja tabiat lantaran tjoema bergaoel meloeloe. Tapi akoe moesti kasi ingat, bahoea dalem pergaoelan sabisanja orang semboeniken ia-poenja sifat-sifat djelek dan tjoema toendjoekken segala apa jang bisa dibilang bagoes. Tapi baeklah kaoe djangan djadi soesah hati. Akoe nanti bitjaraken ini soewal dengen kaoe-poenja ajah. Djikaloe ternjata penjelidikan jang nanti dibikin berhasil menjenangken, kaoe tida oesa koeatir tida nanti menikah dengen itoe djedjaka.”

Dengen ini perkataän-perkataän njonja Tjoe-bing bisa djoega bikin sabar pada Hoei-nio.

Siapa adanja itoe Tjing-biauw? Ia terkenal sebagi saorang moeda jang rojal, tapi orang tida taoe betoel sabetoelnja ia berasal dari mana dan dimana ia tinggal. Kebanjakan ia berdiam dalem hotel, tapi sering djoega ia dikatemoeken dalem roemah jang lebi pantes diseboet goeboek. Apa ia-poenja pakerdjaän atawa perdagangan, itoelah tida banjak orang taoe. Tapi orang kenal betoel ia sebagi satoe orang jang pande sekali goenaken lidah. Ia-poenja bitjara, ia-poenja sikep di waktoe mengomong, itoe samoea ada sanget menarik, apapoela djikaloe ia bitjara di hadepan orang-orang prempoean. Ia sering terliat di roemah-roemah perkoempoelan, dimana boekan djarang ia bitjara dengen membri andjoeran-andjoeran pada orang-orang moeda boeat djadi madjoe, boewang segala platoeran koeno dan kolot, andjoerken orang-orang prempoean bergerak boeat dapetken kamerdikaän dan lepaskan diri dari pemboedakan pada orang lelaki. Tapi samentara di hadepan pergaoelan ia seringkalih oetjapken perkataän-perkataän jang merdoe,

jang bisa dianggep banjak menggenggam nasehat, adalah di laen fihak, roemah-roemah hina poen kenal Tjing-biauw saperti salah satoe langganan jang paling sering dateng. Roemah-roemah djoedi ampir saban malem dapet itoe kahormatan boeat trima ia-poenja koendjoengan.

Tjing-biauw sabetoelnja tida mempoenjai pakerdjaän. Ia tjoema idoep dengen mengadoe peroentoengannja di medja djoedi. Itoelah jang mendjadi sebab hingga di ini malem ia bisa memegang oewang riboean roepia, bisa doedoek auto jang bagoes atawa menginap di hotel jang besar, boeat besok paginja bawa ia-poenja samoea pakean ka roemah gade dan djadi roedin saperti satoe pengemis jang paling miskin.

Dengen Tjing-biauw memang Hoei-nio soeda berkenalan lama dan Tjing-biauw poen memang harepken satoe kalih bisa dapetken Hoei-nio djadi istrinja, boekan sadja lantaran Hoei-nio tjantik, tapi teroetama itoe gadis-poenja ajah jang terkenal sebagi saorang hartawan jang membikin Tjing-biauw „tempel” itoe gadis. Laen dari itoe diantara gadis-gadis jang soeda tida terlaloe diwatesin kamerdikaännja, Hoei-nio ada jang paling gampang didekatin dan itoe gadis jang bagitoe pande melawan iboenja di waktoe bertengkaran ternjata gampang sekali dibikin toendoek dengen perkataän-perkataän jang manis dari Tjing-biauw, jang ternjata pande sekali menarik hatinja itoe gadis.

Saperti soeda didjandji, njonja Tjoe-bing bitjaraken hal pertoendangan antara Hoei-nio dan Tjing-biauw. Tjoe-bing poen njataken pikiran, djikaloe memang di antara itoe doewa anak moeda soeda ada perhoeboengan bagitoe roepa ada baek marika poen membantoe boeat rangkepken sadja itoe doewa orang moeda djadi laki istri, asal sadja ternjata memang betoel Tjing-biauw poenja klakoean dan pengidoepan ada pantes boeat djadi soeaminja Hoei-nio. Tapi dengen lekas djoega, Tjoe-bing dapet katerangan-katerangan jang membikin ia djadi goesar pada Hoei-nio. Katerangan-katerangan jang didapet oleh Tjoe-bing ada sama saperti soeda ditoetoerken di atas.

„Hm!” Tjoe-bing berkata sendirian, „katalah dengen bergaoel orang bisa taoe betoel satoe orang-poenja tabiat dan keadaän! Hoei-nio bergaoel dengen Tjing-biauw dan tjoema liat sadja apa jang memang bisa keliatan di loear. Ia tjoema liat sikep jang menarik hati, paras jang tjakep, tapi apa jang tersemboeni di dalem ia tida bisa atawa tida maoe liat. Apakah akoe moesti toeroetin maoenja Hoei-nio. Apakah akoe moesti biarken sadja akoe poenja anak jang tjoema satoe-satoenja djadi istrinja

satoe orang samatjem Tjing-biauw, satoe orang jang tida poenja pakerdjaän, satoe pendjoedi dan satoe pemogor? Inilah tida nanti. Akoe berboeat dosa djikaloe akoe berboeat bagitoe. Akoe djadi sajang anak dengen kliroe djikaloe akoe toeroetin sadja maoenja.”

Tjoe-bing ambil poetoesan tetap boeat kasi mengarti, jang Hoei-nio tida bisa djadi istrinja Tjing-biauw. Tapi apa ia moesti berboeat djikaloe Hoei-nio mengantjem? Ini soewal ia moesti perhatiken betoel, kerna maskipoen di waktoe paling blakang sikepnja Hoei-nio soeda banjak berobah, tapi toch dalem itoe hal ternjata itoe gadis masi maoe toeroetin kainginan sendiri sadja.

Apakah ia nanti mampoeh melarang?

Inilah ada satoe soewal jang membikin itoe ajah djadi marasa serba salah. Berdjem-djem ia bitjaraken itoe fatsal dengen ia-poenja istri dan djoega njonja Tjoe-bing koeatir, Hoei-nio tida nanti maoe mengarti dan aken teroes membatoe . . . . . . .

---

„Boelan Poernama” No. 18.

V.
SATOE OEDJIAN.

Tjing-biauw tida moentjoel lagi di roemahnja Hoei-nio dan djoega tida tjoba tjari perhoeboengan lagi dengen itoe gadis. Ia merasa gemes pada iboenja itoe gadis jang soeda perlakoeken ia tida samoestinja.

„Hm! Apa ia kira akoe terlaloe kepinginan menikah dengen anaknja?” bagitoe dalem goesar ia berkata. „Satoe prempoean jang bagitoe genit, jang boleh disangsiken kasoetjiannja, djangan sentara satoe, poeloehan poen akoe bisa dapetken dengen gampang.”

Bebrapa lamanja Tjing-biauw tinggal mendongkol, tapi pelahan dengen pelahan ia roendingken lagi oentoeng dan roeginja djikaloe ia menikah dengen Hoei-nio.

Ia dapet kenjataän, bahoea ia tjoema bisa dapet kaoentoengan djikaloe ia djadi soeaminja itoe gadis. Kasatoe Hoei-nio ada tjantik, hingga banjak orang aken djadi mengiri djikaloe Hoei-nio berdamping padanja. Ia boleh merasa poeas dalem ini satoe hal djikaloe ia menikah dengen itoe gadis. Kadoea Hoei-nio ada poetrinja saorang hartawan. Sebagi mantoenja saorang hartawan sadikitnja ia boleh tida perloe

pikirin tempat tinggal dan pengidoepan, kerna masatah Hoei-nio nanti bikin ia kelaparan, maski tinggal menoempang di roemah orang toewanja. Dan laen dari itoe, Hoei-nio sendiri tentoe sadikitnja membawa „mas kawin” jang satida-tidanja ada tjoekoep boeat marika bisa beroemah-roemah sendiri dan kasi pengidoepan jang senang boeat satoe doea taon maski jang djadi soeaminja tida maoe mentjari pengasilan. Dan djikaloe kamoedian sang ajah dan iboe soeda meninggal doenia . . . . . . . siapa lagi jang trima harta? Tentoe Hoei-nio dan segala apa jang aken djadi miliknja Hoei-nio aken djadi miliknja djoega itoe prempoean poenja soeami.

Bagitoelah sasoedanja pikir boelak balik bebrapa lamanja, ia ambil poetoesan boeat tjari perhoeboengan poela dengen Hoei-nio dan loepaken itoe perlakoean dari njonja Tjoe-bing jang doeloean bikin ia djadi bagitoe mendongkol. Ia anggep perlakoean bagitoe „perkara ketjil” tapi boekan lantaran ia-poenja tjinta ada bagitoe koeat hingga ia sanggoep pikoel itoe hinaän, hanja lantaran menoeroet ia-poenja peritoengan ia moesti berlakoe sabar dan djangan terlaloe gampang lepasken pada Hoei-nio, jang ia anggep bakal bisa membri pengidoepan jang senang padanja.

Dengen djalan soerat-menjoerat blakangan ia samboeng poela perhoeboengannja dengen itoe gadis sampe achirnja Tjoe-bing dapet taoe itoe perkara.

„Kaoe tida nanti menikah dengen satoe orang bagitoe,” kata Tjoe-bing pada Hoei-nio. „Kaoe bilang kaoe soeda kenal betoel ia-poenja tabiat dan keadaän, tapi apa kaoe taoe, jang ia-poenja pengidoepan meloeloe bergantoeng pada pendjoedian? Akoe kira, djikaloe kaoe menikah padanja, boekan ia jang djadi soeami jang aken kasi makan pada kaoe, tapi kaoe jang moesti peliara padanja. Tjoba kaoe pikir, apakah kaoe tida merasa terlaloe rendah, hingga boekan sadja kaoe moesti mengrawat padanja tapi djoega kasi pengidoepan? Tida, Hoei, akoe tida pertjaja kaoe soeda kenal betoel ia-poenja tabiat dan pikiran dan akoe lebi pertjaja ia tida tjinta kaoe dengen satoeloesnja hati. Djikaloe Hoei-nio boekan poetrinja saorang jang bisa diseboet mempoenjai harta, maskipoen itoe harta tida terlaloe besar, nistjaja Tjing-biauw perhatiken poen tida!”

„Papa, kaoe-poenja anggepan terlaloe rendah tentang dirinja 'ngko Tjing-biauw, dan akoe melarang kaoe bitjara bagitoe,” kata Hoei-nio. „Masatah akoe tida bisa taoe ia-poenja keadaän dan tabiat. Ia tjinta padakoe, itoelah akoe taoe pasti lantaran bergaoel dengen ia bagitoe lama. Djikaloe ia

ingin menikah dengen akoe, meloeloe ada lantaran tjinta, saperti beroelang-oelang ia njataken di hadepankoe.”

„Itoe samoea ada kabiasaän koeno dari orang lelaki moeloet manis. Hoei, akoe pastiken pada kaoe, bahoea djikaloe kaoe menikah dengen ia dan kaoe tida boleh mengandel lagi padakoe, kaoe boleh kelaparan. Memang djoega Tjing-biauw sering pegang oewang riboean roepia, tapi boekan djarang djoega ia moesti pindjem oewang pada sobat-sobat boeat beli makanan, kerna ia sendiri tida pegang oewang sapeser boeta. Akoe soeda tjari katerangan saloeasnja, dan djikaloe itoe katerangan ada menjenangken, dengen pasti akoe tida nanti menghalangin kaoe-poenja kainginan, tapi katerangan-katerangan jang akoe dapetken tida ada satoe jang bisa membikin akoe djadi ingin ambil mantoe padanja.”

„Tapi ia tjinta padakoe,” kata Hoei-nio.

„Akoe koeatir ia tjinta akoe poenja oewang,” kata Tjoe-bing. „Hoei, pikirlah, apa jang nanti terdjadi dengen kaoe, djikaloe kaoe menikah dengen satoe orang jang biasa menoentoet pengidoepan sebagi satoe . . . . .” Tjoe-bing hendak oetjapken perkataän badjingan, jang boleh djadi ia rasa pantes boeat Tjing-biauw, tapi lantaran meliat Hoei-nio djadi sengit, ia oeroengken maksoednja.

„Pendeknja bagini sadja, papa, kita bikin oedjian!”

„Oedjian bagimana?”

„Akoe nanti panggil ia kamari. Doeloe mama ada bilang, djikaloe ia tjinta dengen satoeloesnja hati padakoe, tentoelah ia dateng, maski doeloe ia soeda dihinaken oleh mama.”

„Dan djikaloe ia soeda dateng?”

„Kaoe kasi taoe, bahoea akoe boleh menikah dengen ia, tapi dengen perdjandjian, jang akoe tida nanti bawa, satoe apa, pendeknja ia moesti anggep ia menikah dengen saorang jang paling miskin, jang tjoema membawa satoe potong kaen dan satoe badjoe. Akoe brani bertaroh satoe ganda sapoeloeh, dengen tida sangsi-sangsi lagi, tentoe ia aken trima itoe perdjandjian.”

„Boleh djadi, Hoei, tapi lagi sakalih kaoe moesti ingat apa djadinja dengen kaoe-poenja pengidoepan di kamoedian hari? Akoe anggep Tjing-biauw boekan satoe orang jang bisa mengasi pengidoepan pada satoe istri, apapoela satoe istri jang saperti kaoe, jang sama sekali tida pikirin pait getirnja pengidoepan, jang goreng ikan sadja bisa bikin angoes sampe tida bisa dimakan.”

Hoei-nio diboedjoek pergi dateng boeat lepasken kainginannja tapi ternjata daja oepajanja Tjoe-bing dan istrinja tinggal sia-sia meloeloe. Achir-achirnja Hoei-nio kaloearken

antjeman, bahoea djikaloe ia tida dikasi menikah dengen Tjing-biauw dengen baek, boleh djadi ia aken ambil poetoesan nekat dan minggat ikoet itoe katjintaän, atawa ia boenoeh diri.

Lantaran soeda terlaloe djengkel, Tjoe-bing berkata: „Djikaloe bagitoe baek, akoe toeroetin kaoe-poenja maoe. Dari pada kaoe boenoeh diri, kaoe lebi baek ikoet padanja. Dengen bagitoe akoe tida oesa keloearken oewang boeat beli peti dan koeboer kaoe. Tapi kaoe inget, kaoe boleh menikah padanja, tapi tjoema dengen membawa saprangkat pakean kaoe aken keloear dari ini roemah. Oewang satoe cent dan barang perhiasan jang berharga, maski satoe potong poen tida boleh kaoe bawa.”

„Baek, papa,” djawab Hoei-nio.

„Dan sekarang kaoe boleh toelis soerat padanja dan oendang ia kamari, tapi kaoe moesti terangken dengen pasti dengen perdjandjian bagimana kaoe aken djadi istrinja dan djangan sekali ia harep jang berbareng dengen dapetken kaoe, ia bakal dapet djoega sadikit harta. Ia djangan harep sekali-kali, dan di harian kaoe menikah akoe nanti njataken bahoea akoe-poenja achli-waris boekan kaoe, tegasnja akoe hapoesken kaoe-poenja samoea hak boeat trima warisan djikaloe akoe atawa kaoe-poenja iboe meninggal doenia.”

Tjoe-bing ambil itoe poetoesan lantaran ia meliat Hoei-nio soeda tida bisa dibikin taloek. Segala nasehat jang baek, itoe gadis tida maoe perdoeliken, dan dari pada dapetken poetrinja boenoeh diri, adalah lebi baek kasi ia idoep teroes tapi dengen tida oesa perdoeliken lebi djaoe padanja.

Bebrapa hari kamoedian Tjing-biauw trima soeratnja Hoei-nio, jang kasi taoe, bahoea ia menoenggoe datengnja itoe katjintaän di sembarang waktoe. Dengen girang Tjing-biauw batja itoe soerat.

„Dasar akoe-poenja peroentoengan bagoes,” bagitoe ia berpikir. „Toch achirnja itoe nona manis bersama hartanja aken djadi djoega akoe poenja.”

Dengen pake pakean jang paling bagoes jang ia ada-poenja, di itoe sore Tjing-biauw dateng poela di roemahnja Tjoe-bing, tapi djaoe dari ia-poenja doegaän, ia-poenja kedatengan ditrima dengen adem sekali oleh Tjoe-bing dan istrinja. Sasoedanja Tjing-biauw disilahken doedoek, itoe doea orang toewa tinggalken padanja. Tida lama kamoedian Hoei-nio moentjoel. Itoe waktoe parasnja itoe gadis keliatan goerem dan maskipoen ia njataken girangnja bertemoe poela dengen sang ketjintaän, tapi toch parasnja menoendjoekken jang itoe pertemoean boekan terlaloe menggirangken.

„Akoe girang sekali, jang sekarang roepanja kita ada merdika boeat bertemoe satoe pada laen, Hoei,” kata Tjing-biauw. ”Boeroe-boeroe akoe dateng kamari, sasoedanja trima kaoe-poenja soerat jang paling blakang. Aih, rasanja akoe kangen sekali pada kaoe. Soerat menjoerat memang ada menjadi hiboeran, tapi adalah lebi memoeasken djikaloe kita bisa bertemoe poela.”

Lantaran itoe waktoe dalem itoe roeangan tida ada laen orang, Tjing-biauw laloe pegang tangannja Hoei-nio dan itoe gadis biarken sadja kekasihnja berlakoe bagitoe.

„Tapi kenapa kaoe-poenja paras ada goerem, Hoei?” berbisik Tjing-biauw kamoedian.

„Apa kaoe betoel-betoel tjinta padakoe, 'ngko Tjing-biauw?”

„Aih, Hoei, apakah kaoe masi sangsi? Biar doenia kiamat sapoeloeh kalih, akoe-poenja tjinta pada kaoe tida aken djadi berobah.”

„Apa betoel?”

„Akoe brani soempah dimana djoega boeat tetapken apa jang akoe bilang.”

„Soekoer djikaloe betoel bagitoe, 'ngko Tjing-biauw. Makanja akoe minta kaoe dateng, adalah akoe hendak kasi satoe kabar pada kaoe.”

„Akoe harep kabar baek, Hoei!”

„Baek dan djelek, 'ngko Tjing-biauw.”

„Hé, kenapa bagitoe?”

„Akoe soeda mengakoe teroes-terang di depan papa dan mama dan sekarang akoe bisa kasi taoe pada-kaoe, jang papa dan mama njataken satoedjoe kaoe menikah dengen akoe.”

„Itoe toch ada satoe kabar baek, Hoei!”

„Betoel, tapi dengen satoe perdjandjian.”

„Perdjandjian, perdjandjian apa?”

„Jang akoe nanti kaloear di harian menikah dengen tjoema membawa pakean jang menempel di badankoe. Oewang satoe cent atawa barang perhiasan mas inten satoe potong poen akoe tida boleh bawa. Kaoe djadi aken menikah dengen satoe gadis jang sanget miskin.”

Tjing-biauw djadi sanget terkedjoet. Ia diam bebrapa lamanja dan tangannja Hoei-nio poen ia lepasken poela. Kamoedian ia tjoba bersenjoem dan tjari perkataän-perkataän boeat membri hiboeran pada Hoei-nio dan njataken bahoea itoe perdjandjian poen ia trima, tapi koeping jang lebi terang tentoe aken dapet dengar sari soearanja, bahoea samoea perkataän jang ia oetjapken tida kaloear dari hati jang djoedjoer. Pembitjaraän lebi djaoe antara marika berdoea terdjadi dengen tida membawa kagoembiraän dan tida lama kamoedian Tjing-biauw berpamitan.

Katjintaännja itoe djedjaka telah dioedji dan gagal, tapi Hoei-nio belon djoega djadi mendoesin. Ia tetap pertjaja jang Tjing-biauw tjintaken padanja dengen soenggoe hati dan dengen bangga ia kasi taoe pada ajah dan iboenja, bahoea Tjing-biauw telah trima itoe perdjandjian, dan tambahken, bahoea memang djoega dari doeloean poen ia tida sangsi bahoea Tjing-biauw aken ambil sikep bagitoe . . . . . . .

---

„Boelan Poernama” No. 18.

VI.
TJOPOT POLESANNJA.

Tjing-biauw rasaken saperti djoega kepalanja disirem dengen aer ijs waktoe dengar Hoei-nio poenja katerangan tentang itoe perdjandjian jang ditentoeken oleh iboe dan ajahnja itoe gadis. Ia-poenja hati saperti mentjelos, tapi ia masi bisa dapetken djoega perkataän-perkataän boeat membri hiboeran pada Hoei-nio sekalian semboeniken pengrasaännja jang benar. Tapi sasoedanja berada di djalanan, di waktoe ia lariken ia poenja motorfiets sebagi angin, ia tida bisa semboeniken poela ia-poenja rasa katjele dan menjesal.

„Hoei-nio zonder harta tida ada harganja, malah djadi satoe halangan boeat akoe,” berpikir ia. „Sekarang akoe ada merdika, djikaloe akoe-poenja oewang akoe boleh plesir sesoekanja dan djikaloe akoe lagi kantong kempes akoe boleh menoempang pada akoe-poenja kawan-kawan. Tapi djikaloe akoe-poenja istri, pada siapa akoe mengandel, boekan sadja akoe tida aken dapet kasenangan, malah akoe aken dapet tanggoengan jang berat. Tida, Hoei, tida maski akoe menjesal, djikaloe kaoe tjoema bisa persembahken ketjantikan, boeat akoe

kaoe tida bergoena. Ketjantikan, akoe tida perloe dapet dari kaoe; apa jang akoe perloe jalah harta dengen mana akoe bisa beli ketjantikan. Moelai ini waktoe kita poenja perhoeboengan poetoes!”

Tapi maskipoen ia soeda ambil poetoesan bagitoe, toch ia masi teroes bales soerat-soeratnja Hoei-nio, saperti djoega memang ia masi harep aken djadi soeaminja itoe gadis. Djoega ia masi soeka dateng pada Hoei-nio. Sebagi satoe lelaki ia tida merasa roegi boeat saban-saban berdamping dengen satoe gadis, apapoela satoe gadis jang tjantik. Pergaoelan merdika antara lelaki dan prempoean memang djoega tjoema bisa membawa kaoentoengan pada si lelaki. Lelaki mana jang nanti sia-siaken itoe koetika boeat bisa beromong-omong dengen satoe gadis, pegang tangannja, atawa trima soegoehan jang ledzat?

Pada soeatoe hari, Hoei-nio tanja, kapankah marika-poenja hari beroentoeng aken ditentoeken. Dengen lantes Tjing-biauw seboetken satoe tanggal, bagitoe sadja, zonder dipikir lagi, kerna memang ia poen tida-poenja maksoed boeat menikah dengen itoe gadis.

Itoe tanggal disampeken pada Tjoe-bing dan istrinja, dan itoe orang toewa tjoema bilang pada Hoei-nio: „masa bodo.”

Tapi soenggoe heran sekali, moelai dari itoe waktoe Tjing-biauw djadi lebi djarang moentjoel. Samentara itoe Hoei-nio sendiri membikin persediaän jang ia rasa perloe boeat ia-poenja hari nikah. Dari ia-poenja oewang simpenan sendiri jang tida sebrapa besar ia beli pakean penganten dan laen-laen jang ia rasa perloe. Ajah dan iboenja tida membantoe sama sekali dan samingkin dekat itoe hari mendatengin, Tjoe-bing dan istrinja keliatan lebi djengkel, boekan girang, saperti biasanja orang toewa jang hendak menikahken anaknja.

Marika ambil poetoesan boeat bikin sadikit perdjamoean di hari nikahnja Hoei-nio dan di'itoe hari djoega penganten prempoean aken ikoet soeaminja ka roemahnja sang soeami . . . . . . .

Achirnja itoe hari jang diseboet oleh Tjing-biauw ampir sampe. Doewa hari lagi Hoei-nio aken menikah. Segala persediaän soeda lengkap tatkala di waktoe pagi satoe soerat disampeken pada Hoei-nio.

Dengen lekas itoe gadis sobek envelopnja. Dan dengen hati berdebar-debar ia membatja dan kamoedian ia bertreak dan djadi limboeng dan achirnja ia roeboeh di satoe krosi dengen tida ingat orang. Njonja Tjoe-bing jang dapet liat itoe kedjadian djadi sanget repot dan lantes panggil soeaminja poelang dari tokonja.

Tjoe-bing tanja apa jang mendjadi sebab hingga mendadak Hoei-nio djadi bagitoe roepa.

Soerat jang terlepas dari tangannja Hoei-nio dibatja dan soerat itoe berboenji:

„Hoei jang tertjinta,

„Dengen menjesal akoe moesti me-
„ngabarken, jang dengen mendadak
„akoe moesti berlaloe dari ini kota.
„Satoe oeroesan jang sanget penting
„memaksa akoe berboeat bagitoe. Akoe
„ingat, di hari noesa kita moesti me-
„nikah, tapi itoe pernikahan moesti
„dioeroengken, moesti ditoenda sampe
„disatoe hari jang akoe belon bisa
„seboet kapan. Akoe harep kaoe tida
„djadi goesar.”

„Badjingan besar,” Tjoe-bing memaki.

⁂

Tjing-biauw telah harep-harep, jang diwaktoe bertoendangan Tjoe-bing nanti robah itoe perdjandjian, atawa tarik poelang sama sekali itoe perdjandjian jang tida mengoentoengken pada Hoei-nio dan bakal soeaminja. Tapi ternjata itoe harepan sia-sia belaka. Ini hal dapet diketahoei betoel oleh Tjing-biauw jang saperti ada dibilang di atas, sering djoega mengoendjoengi pada Hoei-nio poen boleh djadi ada mengandoeng itoe harepan, kerna sebisanja ia tjoba mengambil hatinja sang iboe. Segala apa ternjata tida bergoena. Sekarang sang ajah dan iboe jang berlakoe keras.

Sasoedanja dapet kenjataän, bahoea Hoei-nio aken djadi istrinja dengen tida membawa satoe apa, Tjing-biauw oendoerken diri dan ia ambil poetoesan aken berboeat bagitoe doewa hari sabelonnja harian menikah bakal sampe.

Laen dari itoe ada lagi laen sebab jang membikin Tjing-biauw ambil itoe poetoesan getas. Bebrapa hari lebi doeloe ia telah berkenalan dengen satoe djanda moeda jang mempoenjai sadikit harta. Boeat taro perhatian penoeh pada itoe djanda dan boeat laloeken satoe halangan, ia moesti lantes lepasken Hoei-nio dan bagitoe ia telah berboeat.

Tjoe-bing dan istrinja mengelah napas waktoe dapet batja itoe soerat. Itoe bebrapa baris perkataän jang berboekti keliatan itam di atas kertas poeti ada lebi berpengaroeh dari beriboe perkataän jang tida bisa dikasi beroepa. Hoei-nio tida maoe mengarti, djikaloe padanja dibilang jang Tjing-biauw itoe ada satoe orang jang berklakoean tida baek; ia djadi goesar djikaloe dengen samar-samar ajah atawa iboenja njataken doegaän bahoea saorang bagitoe matjem brangkali ingin menikah

dengen itoe gadis boekan lantaran memang ia menjinta, tapi lantaran mempoenjai maksoed-maksoed jang tida dibilang bagoes. Tapi sekarang itoe soerat soeda tjoekoep boeat membikin Hoei-nio djadi sedar dari impiannja!

Ajah dan iboenja Hoei-nio merasa sanget bersoekoer jang itoe lelakon berachir bagitoe roepa. Marika anggep pasti, bahoea ini satoe poekoelan soeda tjoekoep membikin Hoei-nio poenja rasa soeka pada Tjing-biauw berbalik djadi rasa bentji jang tida terhingga dan boeat menambahken itoe kabentjian, Tjoe-bing merasa perloe boeat tjari katerangan lebi djaoe tentang sebab-sebab jang sabenarnja, hingga Tjing-biauw oendoerken diri disaät jang pengabisan. Ia soeda mempoenjai doegaän, bahoea itoe perdjandjian tida menjenangken jang djadi sebab sabetoelnja, tapi ia masi bersangsi apa itoe doegaän tida kliroe, kerna boekankah bebrapa lamanja Tjing-biauw masi teroesken perhoeboengannja dengen Hoei-nio maski soeda taoe adanja itoe perdjandjian.

Dengen lekas djoega Tjoe-bing dapetken katerangan jang di'ingin dan lebi gampang lagi ia dapetken katerangan itoe, kerna Tjing-biauw tida terlaloe semboeniken keadaänja jang sekarang. Ia tida bisa resiaken, bahoea ia soeda poenjaken itoe djanda jang mempoenjai harta dan masi moeda, kerna itoe djanda sendiri tida ingin marika poenja perhoeboengan diresiaken, malah ingin marika toendjoekken di mata orang banjak, jang marika sekarang soeda djadi laki istri. Dan permintaän bagitoe roepa soesah ditolak oleh Tjing-biauw, jang telah njataken tjinta pada itoe djanda jang moesti diakoeh tida mempoenjai paras djelek.

Tjoe-bing merasa girang satelah dapetken itoe samoea katerangan.

„Dasar akoe-poenja anak masi mempoenjai peroentoengan bagoes,” ia berpikir. „Djikaloe Hoei-nio menikah dengen itoe lelaki, akoe kira tentoe ia tida bisa beroentoeng, tapi soekoer sekarang ini lelakon soeda liwat dan di laen hari tentoe Hoei-nio berlakoe lebi ati-ati. Akoe harep sadja moelai dari sekarang ia aken mendoesin, bahoea dengen bergaoel sadja, orang tida bisa taoe orang laen poenja hati.”

Tapi sabaliknja ada satoe hal laen jang membikin Tjoe-bing dan istrinja djadi berkoeatir.

Ternjata itoe poekoelan jang didapetken oleh Hoei-nio ada terlaloe keras; itoe gadis tida tahan trima itoe serangan jang heibat sekali.

Inilah tida mengheranken. Dalem hari-hari jang paling blakang ia selaloe bergirang, mengingat jang kabroentoengan ampir sampe. Boekankah lagi bebrapa hari sadja ia aken

djadi istrinja itoe orang jang ia tjintaken? Dan maskipoen betoel itoe pernikahan tida dapetken penerimaän jang samoestinja dari ia-poenja orang toewa, toch ia harep djikaloe soeda menikah dan ternjata Tjing-biauw berklakoean baek, saperti jang ia harep ajah dan iboenja poenja pikiran djadi berobah dan tarik poelang itoe poetoesan jang tida menjenangken.

Dalem kagirangan, di waktoe ia mengandoeng penoeh pengharepan, mendadak dateng itoe soerat jang bikin moesna ia-poenja samoea pengharepan!

Hoei-nio djadi sakit, sakit keras! Bebrapa blas hari lamanja ia tinggal mengatjo dan menoeroet katerangannja thabib jang mengobatin, ia-poenja zenuw terganggoe keras dan moesti didjaga betoel, soepaja ia tida dapet kaget, djoega di waktoe djikaloe ia soeda semboeh . . . . . . .

---

„Boelan Poernama” No. 18.

VII.
MANA SOEAMIKOE . . . . . ?

Bebrapa lamanja Tjoe-bing dan istrinja moesti berkoeatir atas keadaännja Hoei-nio, tapi pengrawatan jang teliti, pendjagaän jang sampoerna achirnja membikin keadaännja itoe gadis djadi lebi baek. Pelahan dengen pelahan ia djadi semboeh, dan achirnja sasoedanja liwat tiga minggoe lamanja, bisalah dibilang, bahoea bahaja jang paling besar soeda liwat, tjoema sadja pada njonja Tjoe-bing dikasi taoe, bahoea sabisanja moesti didjaga soepaja si sakit tida dapet kaget dan segala apa jang bisa menggontjangken hati haroes disingkirken.

Pada soeatoe pagi, sasoedanja satoe malem teroes ia tidoer njenjap, Hoei-nio boeka matanja. Ia memandang ka kiri dan kanan dan hendak berbangkit tapi ia rasaken toeboehnja sanget lemah. Kabetoelan sekali di itoe saät iboenja masoek dalem ia-poenja kamar dan lantes tjegah ia geraken badan.

„Kaoe tida boleh, belon boleh banjak bergerak, Hoei,” kata iboenja dengen girang, waktoe ia liat Hoei-nio kenalin padanja.

„Apa akoe sakit, mama? Dan brapa lama akoe sakit?”

„Kaoe sakit berat sekali, Hoei, tapi

sekarang soekoer kaoe moelai djadi semboeh, tapi djangan bergerak, Hoei, dan djangan terlaloe banjak bitjara. Akoe harep kaoe aken djadi waras saperti doeloe dalem sadikit tempo, tapi perloe kaoe toeroet betoel akoe-poenja maoe, kerna djikaloe kaoe membantah, nistjaja lagi bebrapa lamanja kaoe moesti tinggal dalem kamar, malah bisa djadi djoega kaoe-poenja penjakit kamboeh kombali.”

Hoei-nio manggoet.

Dengen dibantoe oleh satoe djoeroe rawat jang pande, achirnja Hoei-nio poenja keadaän djadi bagitoe roepa, hingga bisa dibilang ia soeda terlepas dari bahaja.

Pelahan dengen pelahan ia-poenja pikiran jang djernih balik kombali, dan moelai ingat-ingat apa jang telah terdjadi sabelonnja ia sakit. Ia ingat bahoea ia ampir menikah dan satelah mengingat bagitoe, ia merasa tentoe sekali ia soeda djadi istrinja Tjing-biauw. Dan dengen mendadak, dengen tida terdoega sama sekali, di soeatoe pagi ia menanja pada iboenja:

„Mama, boekankah akoe soeda menikah?”

Djikaloe krosi jang ia sedeng doedoekin djadi patah dan ia djatoh terdjoengkel di itoe saät, brangkali njonja Tjoe-bing tida djadi bagitoe kaget saperti tempo mendengar itoe pertanjaän.

Djawaban apa ia moesti kasi. Inilah ada satoe saät jang penting, djikaloe ia kasi djawaban jang kliroe, jang membikin kaget pada Hoei-nio nistjaja itoe gadis poenja penjakit aken kamboeh kombali. Tapi apa jang nanti membikin ia kaget dan apa tida? Inilah sang iboe tida taoe dan di itoe waktoe ia djadi berkoeatir sanget.

Hoei-nio memandang teroes pada iboenja dan menoenggoe djawaban. Ia merasa heran jang djawaban itoe tida lantes dikasi.

„Apa betoel, mama, akoe toch soeda menikah?”

„Betoel, Hoei, kaoe soeda menikah . . . . . !” djawab njonja Tjoe-bing dengen soeara jang ampir tida kadengaran, dan memandang dengen teliti pada poetrinja boeat liat sesoeatoe perobahan jang bisa terdjadi pada dirinja itoe gadis sasoedanja dengar ia-poenja djawaban.

Tapi Hoei-nio tida djadi kaget mendengar itoe djawaban, malah keliatan ia bersenjoem.

„Tapi djikaloe akoe soeda menikah, di mana adanja akoe-poenja soeami?” tanja ia kamoedian.

Kombali satoe pertanjaän jang soeker didjawab dengen lantes, sebab memangnja Hoei-nio toch belon bersoeami.

„Ia sedeng pergi, Hoei, lagipoen sekarang kaoe belon boleh bertemoe dengen ia, sebab kaoe masi sakit, nanti kaoe-poenja

hati bergontjang, bisa bikin kaoe sakit lagi.”

„Ia pergi kamana, mama?”

„Ia pergi ka satoe tempat djaoe, boeat bantoe oeroes perdagangannja kaoe-poenja papa.”

Tapi Hoei-nio poenja pikiran di'itoe waktoe soeda tjoekoep terang.

Katerangannja ia-poenja iboe ia anggep ada sadikit aneh, kerna maski bagimana djoega moesti dianggep sadikit loear biasa jang soeaminja diprentah pergi ka tempat djaoe, sedeng ia sendiri jang djadi istri sedeng sakit keras, bagitoe keras, menoeroet katerangannja ia-poenja iboe, hingga bebrapa minggoe lamanja ia tida ingat orang. Inilah ada satoe katerlaloean, djikaloe boekan satoe kadjoestaän.

„Apakah tida ada laen orang, mama, jang bisa oeroes itoe pakerdjaän, hingga akoe-poenja soeami djoega jang moesti pergi sedeng akoe sendiri sakit keras?” menanja ia.

Betoel kaoe sakit keras, Hoei, tapi tida berbahaja, maka djoega dianggep tida ada halangannja ia pergi. Laen dari itoe akoe jang rawat kaoe dengen dibantoe oleh satoe djoeroe rawat dan sekarang kaoe-poenja keadaän soeda bagitoe roepa, hingga itoe djoeroe rawat tida perloe lagi. Kaoe senanginlah hati, bagitoe lekas kaoe djadi semboeh betoel, kaoe tentoe aken bertemoe dengen kaoe-poenja soeami.”

Hoei-nio manggoet, njataken ia soeka toeroet maoenja ia-poenja iboe.

Di itoe sore Tjoe-bing dan istrinja lama sekali roendingken, apa jang marika moesti berboeat lebi djaoe. Tjoe-bing bilang ada baek, djikaloe Hoei-nio soeda semboeh betoel, tjeritaken sadja doedoeknja perkara jang sabenarnja, tapi sang iboe tida moefakat. Njonja Tjoe-bing anggep katerangan bagitoe aken membikin Hoei-nio djadi kaget dan berdoeka dan boleh djadi aken membikin itoe gadis djadi sakit poela.

„Abis menoeroet kaoe-poenja anggepan apa jang kita moesti berboeat?” tanja soeaminja.

„Akoe dapet satoe pikiran, tapi akoe tida taoe kaoe satoedjoe atawa tida,” djawab njonja Tjoe-bing. „Hoei-nio tida ingat apa jang sabetoelnja telah terdjadi. Ia anggep dirinja soeda menikah, dan akoe doega boleh djadi ia tida ingat djoega ia telah menikah dengen siapa. Akoe rasa dari pada kasi taoe doedoeknja perkara jang sabenarnja, adalah lebi baek djikaloe kita tjariken satoe djedjaka jang kita penoedjoe boeat djadi Hoei-nio poenja soeami dan djikaloe Hoei-nio memaksa ingin bertemoe dengen ia-poenja soeami, kita kasi bertemoe dengen itoe djedjaka.”

„Tapi djikaloe ia kenalin, jang itoe lelaki boekan itoe orang jang ia anggep soeaminja?”

„Itoe waktoe baroelah kita kasi katerangan jang sabenarnja.”

„Tapi itoe lelaki tentoe aken dapet maloe dan djadi goesar pada kita. Kaoe hendak bikin permaenan dengen orang-poenja kahormatan.”

„Toch akoe maoe tjoba," kata njonja Tjoe-bing. „Apa kaoe kenal anaknja Tjin-koei?”

„Anaknja Tjin-koei? Oen-liang jang bekerdja pada satoe toko minjak tanah? Tentoe sadja akoe kenal padanja. Itoe anak memang baek dan djikaloe ia jang disoeka oleh Hoei-nio, dengen lantes akoe trima ia-poenja lamaran.”

„Memang Oen-liang soeda pernah minta iboenja lamar Hoei-nio, tapi Hoei-nio menolak. Sekarang akoe hendak bermoefakat dengen itoe anak dan ia-poenja orang toewa. Akoe nanti terangken doedoeknja perkara dengen tida semboeniken apa djoega dan terangken sekalian kita-poenja maksoed. Djikaloe Hoei-nio kenalin padanja, ia moesti oendoerken diri poela. Ia toch tida oesa maloe, kerna tjoema bebrapa orang sadja jang bakal dapet taoe ini permaenan komedie. Djikaloe Hoei-nio tida kenalin atawa sasoedanja bertemoe padanja soeka menikah dengen ia, biarlah kita rajaken marika-poenja hari nikah sasoedanja Hoei-nio djadi semboeh betoel.”

Tjoe-bing berpikir lama sekali, tapi achirnja ia berkata: „Akoe tida taoe djalan jang lebi baek, tjobalah kaoe bitjaraken itoe soewal dengen Oen-liang dan ia-poenja orang toewa Tapi akoe koeatir marika aken menolak.”

Sasoedanja bermoefakat bagitoe, njonja Tjoe-bing pergi ka roemahnja njonja Tjin-koei, jang saperti soeda dibilang, ada djadi ia-poenja kenalan sedari masi ketjil. Dengen pandjang lebar ia toetoerken maksoednja ia-poenja kedatengan. Njonja Tjin-koei djadi tertjengang dan lantaran ia sendiri sabetoelnja tida terlaloe penoedjoe pada Hoei-nio dan doeloepoen ia melamar meloeloe atas desakan keras dari fihaknja ia-poenja anak, maka ia menolak, tapi njonja Tjoe-bing meminta pertoeloengan bagitoe sanget, hingga njonja Tjin-koei maoe djoega bitjaraken itoe hal dengen soeaminja, jang ternjata djadi tertawa waktoe dengar apa maoenja ia-poenja tetamoe

„Akoe sendiri anggep ini satoe kedjadian loetjoe, tapi akoe tida maoe tanggoeng apa jang kamoedian aken terdjadi dengen kaoe-poenja anak, djikaloe apa jang kaoe atoer gagal. Tapi tjobalah bitjaraken itoe perkara dengen Oen-liang sendiri. Djikaloe ia

memang tjinta kaoe-poenja anak, boleh djadi ia soeka djadi boneka saperti jang dimaksoedken. . . . . . .”

Sekarang Hoei-nio djadi semboeh dengen tjepat. Saban hari ia rasaken kakoeatannja djadi bertambah dan pada soeatoe pagi, waktoe ia tjoba berbangkit, ia rasaken badannja enteng, kepalanja tida pening lagi dan dengen pelahan ia toeroen dari pembaringan dengen tida dibantoe oleh siapa djoega. Dengen pelahan ia menghampiri katja dan dengen kaget ia liat bajangannja sendiri. Ia-poenja toeboeh ada koeroes sekali, matanja tjelong dan ia-poenja moeka ada poetih saperti kertas, sedeng bibirnja poen poetjat. Ia pegang-pegang pipinja dan kamoedian memandang pada toeboeh sendiri. Sambil mengelah napas ia balik ka pembaringan dan baroe sadja ia doedoek ia-poenja iboe masoek.

„Akoe soeda semboeh betoel, mama,” kata ia, „baroesan akoe soeda tjoba berbangkit dan djalan satoe doewa indak, akoe tida rasaken kepala mabok lagi, tjoema sadja akoe kira akoe belon koeat betoel.”

„Akoe girang sekali, Hoei, jang kaoe-poenja kewarasan badan soeda balik dengen tjepat, akoe kira kaoe soeda boleh berbangkit, tapi djangan djalan banjak. Satoe doewa tindak brangkali boleh djoega.”

„Betoel, mama, dan Hoei nanti toeroet mama-poenja maoe. Tapi, mama, kapan akoe-poenja soeami poelang.”

Njonja Tjoe-bing mengelah napas.

„Kaloe kaoe soeda semboeh betoel, kaoe boleh bertemoe dengen kaoe-poenja soeami.”

„Toch sekarang Hoei soeda semboeh, mama. Apa ia belon poelang dari perdjalanan.”

„Akoe kira lagi bebrapa hari ia aken balik.”

Hoei-nio tida mendesak lebi djaoe.

Tapi pelahan-pelahan ia mendjadi sangsi, apakah betoel ia soeda menikah. Sasoedanja ia boleh djalan-djalan di dalem itoe kamar, ia memboeka lemari dan di sitoe ia katemoeken segala barang jang ia sediaken boeat ia-poenja hari nikah masi berada di tempatnja dengen tida terganggoe. Ia-poenja sepatoe masi bersih saperti belon terpake dan masi berada dalem doosnja. Sluier penganten masi terlepit rapi, djoega dalem doos.

„Tida, tida bisa djadi,” bagitoe ia berpikir, akoe belon menikah, tapi apakah sebabnja, mama bilang betoel akoe soeda bersoeami? Siapa adanja akoe-poenja soeami? Tjing-biauw?”

Ia merasa perih waktoe oetjapken itoe perkataän!

Sekarang ia tida sangsi lagi, ia ingat

betoel apa jang telah terdjadi. O, itoe soerat . . . . . . .

Tapi soenggoe heran! Ia tida merasa doeka atawa menjesal! Sebagi djoega ia-poenja penjakit ada sebagi meleboer ia-poenja toeboeh dan soemanget, itoe penjakit membikin Hoei-nio saperti baroe terlahir dan ia-poenja pengrasaän boeat Tjing-biauw tida mengikoet.

Ia tjoema mengelah napas beroelang-oelang, tapi tida satoe keloehan terdengar kaloear dari bibirnja . . . . . . .

---

„Boelan Poernama” No. 18.

VIII.
ADOE OENTOENG.

Tiga hari kamoedian, di waktoe Hoei-nio belon mendoesin, satoe anak moeda dianter masoek ka dalem itoe gadis-poenja kamar. Itoe djedjaka roepanja maloe dan kikoek satelah berada dalem itoe kamar, jang pintoenja tinggal terboeka sabelah, ia djadi tjelingoekan dan laloe doedoek di satoe krosi jang berada di sampingnja itoe pembaringan.

Njonja Tjoe-bing sama sekali tida mendoega, jang Hoei-nio soeda ingat betoel apa jang telah terdjadi dengen dirinja dan lantaran kombali itoe anak tanja dimana adanja ia-poenja soeami, maka Oen-liang dioendang boeat dateng, saperti soeda didjandji.

Dengen hati berdebar-debar itoe djedjaka menoenggoe apa jang aken terdjadi. Ia ada saperti saorang jang mengadoe oentoeng. Apakah ia aken djadi beroentoeng atawa tjilaka?

Dengen pandjang lebar padanja telah dikasi taoe, apa jang mendjadi sebab hingga njonja Tjoe-bing madjoeken itoe voorstel jang aneh. Dan Oen-liang ternjata tida sangsi-sangsi waktoe ia soeda mengarti apa jang dimaksoed.

„Akoe toeroet kaoe-poenja maoe, 'ntjim,” ia berkata, „djikaloe akoe bisa membantoe bikin ia semboeh, biarpoen doeloe ia soeda menolak akoe-poenja lamaran, akoe aken lakoeken apa jang kaoe ingin. Tjoema sadja ada koerang baek, djikaloe akoe masoek dalem kamarnja, boekan? Dan kamoedian djikaloe ia tida kenalin padakoe, tapi ia anggep betoel-betoel ada ia-poenja soeami?”

„Kaoe boleh menikah dengen ia djikaloe ia soeda semboeh betoel!” kata njonja Tjoe-bing

„Dan djikaloe ia kenalin, tentoelah akoe dioesir, tapi biarlah akoe maoe njataken, bahoea boeat itoe akoe tida nanti menjesal, tapi djikaloe terdjadi bagitoe, akoe kira kaoe nanti kasi katerangan jang perloe agar akoe tida djadi terlaloe maloe.”

Bagitoelah di itoe hari, Oen-liang moesti djalanken rol jang tida enak.

Lagi sakalih apa aken terdjadi djikaloe Hoei-nio mendoesin dan dapet liat Oen-liang berada dalem kamarnja?

Mendadak terdengar soearanja Hoei-nio jang mendoesin. Ia mengoelet dan mengoewab dan berbalik. Ia koetjek-koetjek matanja dan waktoe soeda melek ia dapet liat saorang lelaki doedoek di satoe krosi dekat pembaringannja. Sekarang ia merasa sadikit heran dan dengen tjepat ia berbangkit. Samentara itoe Oen-liang doedoek diam sadja sembari toendoek.

Hoei-nio pandang padanja dan kamoedian dengen soeara sadikit keras ia menanja:

„Kaoe ini siapa? Apa perloenja kaoe berada dalem akoe-poenja kamar? Apa kaoe boekan dokter?”

Oen-liang gojang kepala dan parasnja berobah djadi merah.

„Akoe. . . . .akoe. . . . .ada kaoe-poenja soeami dan baroe poelang dari perdjalanan,” kata ia dengen soeara pelahan. „Apa kaoe tida kenalin padakoe?”

„Akoe-poenja soeami? Kaoe boekan akoe-poenja soeami, akoe belon pernah menikah!”

„Toch dalem waktoe paling blakang kaoe selaloe tanja, kamana kaoe-poenja soeami, dan sekarang akoe dateng.”

„Tida, djangan djoestaken padakoe,” kata Hoei-nio. „Akoe belon pernah menikah. Akoe bakal menikah, tapi oeroeng, dan itoe orang jang tinggalken padakoe, boekan kaoe. Ach, djangan orang kira sekarang akoe soeda djadi gila hingga tida bisa kenalin orang. Boekan, boekan kaoe, tapi siapa jang kasi idzin kaoe masoek kamari di waktoe akoe tidoer.”

Sekarang Oen-liang berbangkit. Ia anggep tida perloe boeat teroes berpoera-poera lebi lama. Hoei-nio toch soeda tida saperti

lingloeng lagi hanja soeda poenjaken kombali ia-poenja pikiran jang djernih seanteronja.

„Maaf, nona,” kata ia, „akoe sekarang dapet kenjataän, bahoea akoe tida perloe djalanken itoe rol, jang orang ingin akoe djalanken di hadepan kaoe. Akoe dapet kenjataän jang sekarang kaoe soeda semboeh betoel, jang membikin akoe bersoekoer dan merasa girang. Soekalah kaoe dengar akoe-poenja katerangan, apa sebabnja sekarang akoe ada di sini?”

„Baek, kaoe ini siapa.”

„Akoe bernama Oen-liang,” katanja, „The Oen-liang. . . . . . .”

„Oen-liang?”

Hoei-nio berdiam sabentaran. Rasanja itoe nama ia pernah dengar, tapi dimana dan kapan?

„Biarlah akoe tjerita, apa kaoe soeka mendengarin? Tapi doedoeklah, akoe kira kaoe belon tjoekoep koeat boeat tinggal berdiri terlaloe lama.”

Hoei-nio doedoek.

„Kaoe-poenja iboe telah dateng padakoe,” bagitoe Oen-liang moelai membri katerangan. „Ia telah kasi taoe, bahoea ia dapet kenjataän, jang kaoe telah loepaken kedjadian jang telah membikin kaoe djatoh sakit bagitoe berat. Kaoe anggep kaoe soeda menikah dan tanja kamana soeamikoe telah pergi. Djikaloe kaoe-poenja iboe bilang kaoe belon pernah menikah, ia koeatir kaoe djadi dapetken poela satoe poekoelan jang heibat, jang bisa membikin kaoe djadi sakit kombali. Lantaran itoe djoega ia atoer ini akal dan minta akoe djalanken ini rol jang tida terlaloe bagoes boeat mengakoe djadi kaoe-poenja soeami. Tapi sekarang, lagi sakalih akoe dapet kenjataän kaoe soeda semboeh betoel dan soeda bisa berpikir saperti biasa. Akoe-poenja kewadjiban soeda akoe penoehken. Kaoe soeda ingat, bahoea kaoe belon menikah dan kaoe tida djadi sakit poela. Akoe rasa tida oesah dikoeatir lagi jang kaoe aken djadi sakit poela.”

Dengen mendadak Hoei-nio djadi dapet pemandangan laen sekali. Ini ada satoe orang moeda jang dengen sendiri maoe membantoe menjegah ia dapet sakit lagi, saperti jang ada didoega, djikaloe padanja dikasi taoe, bahoea sabetoelnja ia belon menikah dan bikin ia djadi ingat lagi pada itoe kedjadian jang tida enak. Dengen tida mempoenjai pengharepan pasti, bahoea itoe perboeatan bakal membawa kaoentoengan, itoe orang moeda telah kasi itoe bantoean. Apa sebabnja?

„Ngko Oen-liang,” katanja dengen soeara lebi sabar, „apakah kaoe bisa bilang padakoe, apa jang mendjadi sebab hingga

kaoe maoe membantoe pada iboekoe boeat lakoeken ini lelakon? Dan kenapa djoestroe kaoe jang dipilih boeat djalanken ini rol?”

Kombali parasnja Oen-liang djadi berobah merah.

„Akoe kira gampang didoega, nona,” djawab ia, „pertama doeloean akoe soeda pernah minta iboekoe lamar kaoe, tapi kaoe menolak. Lantaran itoe brangkali kaoe-poenja iboe pilih padakoe. Dan kenapa akoe maoe lakoeken ini permaenan jang berbahaja? Apakah kaoe tida bisa menebak? Ingatlah akoe pernah minta iboekoe lamar pada kaoe.”

Hoei-nio toendoek sadja.

Djadi maskipoen soeda ditolak lamarannja, maskipoen soeda ditampik, toch Oen-liang masi tinggal tetap tjintaken padanja. Apakah ia ada laen dari Tjing-biauw, atawa samoea lelaki ada sama sadja?

Ia laloe melirik pada itoe djedjaka dan tempo dapet kenjataän bahoea Oen-liang sedeng toendoek sadja, menoenggoe apa jang ia moesti berboeat lebi djaoe, Hoei-nio djadi brani memandang padanja.

Ia dapet kenjataän jang Oen-liang, maskipoen tida bisa dibilang ada bagitoe tjakep saperti Tjing-biauw, tapi toch tida mempoenjai apa-apa jang bisa membikin orang djadi bentji padanja. Ia-poenja sikep tida menerbitken rasa djemoe dan keliatannja ia bisa berlakoe sopan.

„'Ngko Oen-liang,” achirnja Hoei-nio berkata, „akoe mengarti baek sebab-sebabnja dan maksoednja kaoe-poenja berada dalem ini kamar, dan akoe membilang banjak trima kasi boeat kaoe-poenja bantoean pada itoe maksoed jang baek dari akoe-poenja iboe. Akoe sekarang, saperti tadi kaoe poen ada bilang, memang betoel soeda semboeh betoel, maskipoen akoe masi lemah sekali. Tapi akoe ingat betoel segala kedjadian jang doeloe, di waktoe akoe belon sakit. Tapi tjoba kaoe pandang padakoe, boekankah akoe ada berbeda sekali dari doeloe ?”

„Betoel, nona, kaoe banjak koeroes.”

„Dan djelek?”

„Tida, kerna akoe doega apa jang kaoe alamken aken merobah sama sekali kaoe-poenja sikep, kaoe-poenja pengidoepan.”

„Dan sasoedanja taoe segala apa jang telah terdjadi dengen dirikoe, kaoe masi djoega soeka ambil istri. . . . . . .?”

„Ja!”

„Ah, 'ngko, kaoe brangkali aken robah lagi kaoe-poenja pikiran, djikaloe soeda tida ada di ini roemah.”

„Tida, nona, kaoe toch bisa doega dari apa jang akoe berboeat ini hari bahoea akoe-poenja pengrasaän tida berobah, boekan?”

Hoei-nio mengelah napas!

„Biarlah kita poetoesken pembitjaraän sampe di sini, 'ngko Oen-liang. Tapi akoe maoe bilang, datenglah lagi besok sore, apa kaoe soeka?”

„Tentoe sekali, nona, akoe selamanja ada bersedia boeat membikin kaoe mendjadi girang. Djikaloe akoe-poenja koendjoengan ada membawa kagirangan boeat kaoe, atawa . . . . . ah salah, akoe tida boleh bilang bagitoe. Djikaloe kaoe soeka trima akoe-poenja koendjoengan, tentoelah saban ada tempo akoe nanti mengoendjoengin.”

„Baek, nah sampe besok sore!”

Oen-liang hendak berlaloe, tapi waktoe ampir melangkah pintoe ia menanja:

„Apa akoe moesti bilang pada kaoe-poenja iboe?”

Hoei-nio bersenjoem.

„Boeat samentara waktoe bilang sadja akoe belon taoe kaoe siapa, dan akoe anggep kaoe ada . . . . . ada . . . . . kaoe soeda taoe, boekan?”

Oen-liang manggoet dan laloe berpamitan.

Dengen lelah Hoei-nio baringken diri di pembaringannja. Roepa-roepa pikiran jang bertentangan dateng ganti-berganti.

Oen-liang kaloear dari itoe kamar dengen pengrasaän lega dengen mengandoeng pengharepan. Tadinja ia tida doega sama sekali jang itoe permaenan aken berkasoedahan bagitoe bagoes. . . . . . .

Sesampenja di loear njonja Tjoe-bing jang menoenggoe dengen berdebar-debar hati, oeroek ia dengen roepa-roepa pertanjaän.

„Ia anggep akoe ada soeaminja, 'ntjim, dan minta akoe kombali besok sore, waktoe akoe kasi taoe, bahoea akoe belon boleh menemanin padanja terlaloe lama.”

„Dan apa jang kaoe aken berboeat?”

„Dengen kaoe-poenja idzin, akoe aken balik besok sore.”

Njonja Tjoe-bing gojang-gojang kepala.

„Apa kaoe kira ia-poenja pikiran soeda djadi roesak, hingga ia tida kenalin kaoe boekan itoe orang jang sabetoelnja ia anggep ada soeaminja?”

Oen-liang mesam . . . . . . .

„Boeat ini hal kaoe djangan koeatir,” kata ia. „Akoe nanti membantoe sampe ia-poenja pikiran terang balik kombali. . . . .”

---

Kaloe kepalsoehan boleh diliat, di dalem Doenia tida ada penipoean. . . . . . .

Tjoe-kat Liang.

IX.
DASAR DJODONJA.

Lama sasoedanja Oen-liang brangkat, baroelah njonja Tjoe-bing masoek dalem kamarnja Hoei-nio boeat meliat keadaännja itoe anak. Dengen girang ia dapet kenjataän, bahoea di itoe waktoe Hoei-nio keliatan lebi seger dan tempo liat iboenja, Hoei-nio menanja:

„Soeda djem brapa sekarang, mama?”

„Kira-kira djem sabelas, Hoei.”

„Pantes akoe soeda lapar, tadi malem akoe tidoer enak sekali, mama!”

„Itoe akoe harep, Hoei.”

Doewa-doewa roepanja tida maoe lantes bitjaraken prihal koendjoengannja Oen-liang, saperti djoega itoe hal ada sanget tida enak boeat marika. Doewa-doewa merasa likat boeat madjoeken itoe soewal, dan bagitoelah tempo blakangan Hoei-nio soeda dikasi bersantap, baroelah ia menanja:

„Mama, jang tadi dateng, apa betoel ada Hoei poenja soeami?”

Sambil menanja Hoei-nio memandang teroes pada iboenja dan boleh djadi ia koeatken hati boeat tida barengin itoe pertanjaän dengen tartawa berkakakan.

„Betoel,” djawab njonja Tjoe-bing dengen pelahan, „tapi kenapa kaoe menanja bagitoe? Apa kaoe tida kenalin padanja?”

„Rasanja ia boekan akoe-poenja soeami, tapi djikaloe mama bilang betoel, tentoelah tida kliroe.”

Njonja Tjoe-bing tida kata apa-apa lagi. Ia tida mengarti, jang Hoei-nio sedeng ganggoe padanja, tapi apa jang Hoei-nio bilang membikin ia djadi berpikir lagi. Tapi maski bagimana djoega ia merasa girang, bahoea itoe pertemoean tida membawa kasoedahan djelek bagi dirinja ia-poenja anak, malah sekarang keliatan Hoei-nio moelai goembira.

Di hari esoknja, Hoei-nio bilang ia ingin berpakean saperti orang jang soeda semboeh betoel, kerna ia merasa tida enak dan tida betah moesti teroes berpakean saperti djoega satoe hari teroes ia tida boleh berlaloe dari pembaringan. Ia minta kaos dan sepatoe dan berdandan saperti biasa djikaloe ia berada di roemah, jaitoe maski ia pake pyama, toch ia pake kaos dan sepatoe.

Kira-kira djem lima sore keliatan Oen-liang dateng. Ia tida ada lebi perlente dari di hari kemarennja, dan orang bisa liat, jang ia dateng teroes dari tempat pakerdjaännja, dengen tida mampir lebi doeloe di roemahnja. Lebi doeloe ia bitjara bebrapa lamanja dengen njonja Tjoe-bing

dan djoega Tjoe-bing ada berserta. Itoe laki istri roendingken pandjang lebar apa jang kamoedian aken terdjadi, tapi Oenliang bilang, marika boleh pertjaja pada dirinja jang nanti tjoba laloeken segala kasoekeran. Diam-diam Oen-liang djadi ingin tertawa djikaloe mengingat pada itoe doewa orang toewa jang sabetoelnja tida taoe betoel apa jang telah terdjadi di hari kemarennja.

Tempo ia dianter masoek dalem itoe kamar, Hoei-nio sedeng doedoek di satoe sofa jang berada dalem itoe kamar dan Oen-liang laloe doedoek di itoe krosi dekat pembaringan.

„Apa kaoe banjak baek ini hari, nona?” tanja ia.

„Betoel, akoe rasaken dirikoe segar sekali ini hari,” djawabnja Hoei-nio.

„Akoe girang mendengar kaoe berkata bagitoe,” kata Oen-liang.

Bebrapa lamanja marika berdoea tinggal boengkem sadja, kerna tida taoe moesti landjoetken pembitjaraän dengen tjara bagimana. Hoei-nio adoeken oedjoengnja ia-poenja kedoewa sepatoe, dan Oen-liang poen goenaken oedjoeng sepatoenja boeat tjoret-tjoret djoebin.

Toch tida selamanja marika bisa tinggal boengkem bagitoe, dan achirnja Hoei-nio djoega jang moelai berkata poela.

„Apakah kaoe-poenja pengrasaän belon berobah sedari kemaren, 'ngko Oen-liang?”

„Boektinja toch akoe dateng lagi, nona.”

„Ah seboet sadja akoe-poenja nama,” kata Hoei-nio. „Dan sekarang akoe kira soeda tjoekoep maen komedie di hadepan matanja iboe dan ajahkoe. Soekalah kaoe anter akoe kaloear dari ini kamar? Inilah ada pertama kalih jang akoe kaloear dari kamar, sedari akoe sakit.”

„Dengen segala senang hati.”

Oen-liang masi sangsi-sangsi, tapi waktoe ia liat Hoei-nio belon koewat djalan saperti saorang jang seger, ia angsoerken tangannja dan toentoen Hoei-nio kaloear. Ia minta dianter ka roeangan tengah, di sitoe ia liat ajah dan iboenja sedeng doedoek bitjara bisik-bisik, dimana waktoe liat Hoei-nio dan Oen-liang moentjoel, marika djadi sadikit kaget.

„Papa, mama, ini boekan 'ngko Tjing-biauw jang soeda mati, tapi 'ngko Oen-liang, akoe-poenja toendangan, jang kaoe pilihken,” kata Hoei-nio.

Tjoe-bing dan istrinja djadi saling pandeng dengen bengong, tapi achirnja marika berdoea tertawa senang sekali . . . . . . .

„Toch kaoe kenalin ia boekan itoe lelaki jang telah bikin kaoe sakit keras, Hoei," kata sang ajah.

„Kemaren djoega akoe soeda taoe itoe

hal,” djawab Hoei-nio sambil mesam. „Sabetoelnja soeda doewa hari lebi doeloe akoe ingat bahoea akoe belon menikah. Itoe pagi akoe menggratak di lemari dan dapetken boekti-boekti, bahoea ada kliroe sekali, djikaloe kaoe anggep akoe soeda menikah. Tida, akoe belon menikah dengen siapa djoega. Tapi sekarang akoe taoe papa dan mama poenja maksoed, dan biarlah akoe tida membantah lagi kaoe berdoewa poenja kemaoean.”

„Itoelah membikin kita girang, Hoei.”

Dengen berbareng Tjoe-bing dan istrinja berkata bagitoe. Lama sekali marika berampat bitjara dengen girang, dan waktoe lampoe-lampoe soeda dinjalahken, Oen-liang anter kombali Hoei-nio ka kamarnja dan baroelah ia berpamitan, dan poelang ka roemah orang toewanja, dimana dengen sanget girang ia kasi taoe pada ia-poenja ajah dan iboe, bahoea ia soeda bertoendangan dengen itoe gadis jang ia telah pilih, tapi sekarang ia sendiri boleh dibilang jang dipilih.

„Dasar doenia soeda toewa,” kata njonja Tjin-koei, „perkara jang bagitoe aneh bisa terdjadi. Tapi kaoe moesti berlakoe ati-ati, Oen-liang! Doeloean poen akoe soeda bilang, Hoei-nio ada saorang prempoean jang mempoenjai angen-angen dan pikiran laen dari pada prempoean moeda jang kebanjakan; djikaloe kaoe soeda menikah, kaoe moesti pegang kendali dengen keras, djikaloe tida akoe koeatir boekan kaoe aken djadi beroentoeng, tapi merasa menjesal telah ambil ia sebagi istri.”

"Apa jang aken terdjadi nanti, iboe, biarlah kita djangan pikirin doeloe. Segala apa poen bisa berobah, 'ntjim Tjoe-bing sendiri baroe sadja kasi taoe padakoe, bahoea dalem waktoe blakangan, Hoei-nio poenja adat memang soeda banjak berobah. Soeda lama orang djarang soeka liat ia djalan sendirian. lni sadja soeda bisa dianggep ada satoe tanda jang baek, jang ia toch masi bisa trima nasehat-nasehat jang baek.”

Moelai itoe waktoe djarang-djarang Oen-liang dateng mengoendjoengin pada Hoei-nio dan di waktoe bertemoe nistjaja marika mengobrol lama sekali, tapi jang dibitjaraken boekan meloeloe perkara tjinta. Djikaloe Tjing-biauw doeloe menarik hatinja Hoei-nio dengen ia-poenja perkataän-perkataän manis jang selaloe mengandoeng oempakan, adalah Oen-liang mempoenjai kabiasaän jang laen sekali. Ia sering bitjara tentang ia-poenja kawan-kawan, dan di waktoe bagitoe ia biasa poedji siapa jang haroes dipoedji dan tjela apa jang ia rasa haroes dapet tjelaän. Ia bitjara tentang pakerdjaännja

dan bikin djoega Hoei-nio ketarik hati dan menaro perhatian boeat ia-poenja kabiasaän sahari-hari.

Samentara itoe Hoei-nio soeda djadi semboeh betoel dan pada soeatoe hari Tjoe-bing kasi taoe, bahoea soeda ampir waktoenja boeat tetapken kapan pernikahan antara marika berdoewa bakal dibikin.

„Akoe menoeroet sadja,” kata Oen-liang.

„Tapi Oen-liang,” kata poela Tjoe-bing.

„Akoe hendak madjoeken satoe perdjandjian pada kaoe. Kaoe ada satoe laki-laki, dan tentoe djoega kaoe soeda pikir, jang djikaloe kaoe soeda mempoenjai niatan boeat menikah, tentoelah kaoe sanggoep djoega kasi pengidoepan pada kaoe-poenja istri, boekan ?”

„Itoe jang memang akoe harep, dan maskipoen akoe-poenja gadjih sekarang tida terlaloe besar, tapi djikaloe Hoei maoe menoentoet pengidoepan jang saderhana, akoe kira, kita tida oesa djadi melarat.”

„Itoe jang memang diharep, dan apa kaoe soeda ambil poetoesan dimana kaoe hendak berdiam sasoedanja menikah?”

„Akoe kira, kita bakal beroemah-roemah sendiri,” kata itoe anak moeda sambil melirik pada Hoei-nio.

Dengen moefakatnja kadoewa fihak, hari nikahnja itoe doewa orang moeda ditetapken. Hoei-nio tida perloe bikin persediaän terlaloe repot, kerna memang segala apa soeda sedia. Poen ini kalih Tjoe-bing tida maoe adaken keramean dan njataken kainginannja, bahoea di harian menikah itoe sapasang merpati aken pindah ka roemah sendiri.

Lantaran adanja itoe perdjandjian. Oen-liang djadi sadikit repot, tapi toch waktoe harian ia moesti menikah sampe, ia soeda bersedia boeat bawa istrinja ka marika-poenja roemah sendiri . . . . . . . .

---

Mas, kendati bagimana dioedji, aken tinggal mas; tapi tembaga maski bagimana disepoeh toch achirnja loentoer . . . . .

Tjo-kat Liang

X.
PENOETOEP

Sasoedanja menikah, Hoei-nio sering kalih pikirin pengidoepannja dalem bebrapa taon jang paling blakang. Boekan djarang ia berkata sendirian dan menjataken herannja, bagimana doeloe ia bisa menoentoet pengidoepan matjem bagitoe. Ia merasa aneh, kenapa doeloe ia bisa menganggep bahoea dalem doenia tjoema ada satoe lelaki sadja jang bisa bikin dirinja merasa beroentoeng, jaitoe Tjing-biauw, jang blakangan tinggalken padanja boeat tida moentjoel kombali dalem pengidoepannja. Satoe hal laen membikin ia kadang-kadang djadi tertawa. Boekankah doeloe ia anggep bahoea ada satoe kepastian jang pengrasaän tjinta tjoema bisa ditimboelken sasoedanja bergaoel lama, saperti ia merasa telah tjintaken Tjing-biauw. Tapi kenapa pada Oen-liang poen ia bisa lantes menjinta sasoedanja berkenalan dalem bebrapa hari sadja. Dan apa sebabnja apa jang doeloean ia anggep ada pengrasaän tjinta, jaitoe pada Tjing-biauw, bisa linjap dengen bagitoe gampang?

Lebi lagi ia djadi tida bisa mengarti, djikaloe dapet kenjataän, bahoea ia sendiri poenja adat telah berobah banjak sekali. Ia sekarang mempoenjai satoe pengrasaän poeas djikaloe goenaken perkataän aloes ia bisa bikin laen orang merasa girang. Sabisanja ia kasi dirinja dipimpin oleh soeaminja jang tjintaken padanja dengen sesoenggoenja hati. Hoei-nio tida ingat boeat membantah djikaloe Oen-liang oendjoekken padanja ia-poenja kewajiban sebagi satoe istri jang baek, malah sabisanja ia tjoba pladjarken segala pakerdjaän jang doeloe ia anggep ada terlaloe rendah boeat ia lakoeken.

Dalem satoe boelan pertama sedari marika menikah, boleh dibilang marika tjoema makan makanan dalem kaleng meloeloe, tapi pelahan dengen pelahan Hoei-nio merasa jang itoe keadaän tida bisa dibiarken selamanja. Di waktoe pertama kalih ia trima oewang dari soeaminja, ia merasa jang oewang itoe didapetken dengen soesah pajah, kerna boeat dapetken itoe oewang, soeaminja moesti tinggalken ia saban hari dari djam delapan sampe djam lima sore. Sasoedanja bermoefakatan, ia ambil poetoesan boeat panggil satoe koki, dan belandja sendiri, tapi lekas sekali ia dapet kenjataän jang belandja sajoeran poen ada satoe „kunst” jang moesti dipladjarin lebi doeloe, kerna ia liat, djikaloe ia beli apa-apa dengen harga sapoeloeh cent, ia-poenja koki bisa dapetken itoe barang sama banjaknja

dengen harga lima atawa anem cent sadja. Sekarang ia moesti mengakoe bahoea boekan kepandean pentang soeara, boekan kepandean taboeh piano dan djoega boekan kepandean dansa jang perloe boeat ia-poenja kabroentoengan sebagi satoe istri jang baek. Itoe samoea tida ada goenanja sama sekali, tapi apa jang doeloe ia anggep tida perloe sekarang ternjata sanget perloe boeat ia-poenja pengidoepan.

Dan kombali ia mendjadi heran, djikaloe ingat pada itoe samoea.

Samentara itoe Oen-liang toendjoekken, bahoea ia ada satoe soeami jang baek, dan lantaran marika saling mengalah dalem segala hal, dan djoega lantaran marika-memang menjinta satoe pada laen, marika poenja pengidoepan ada tentram dan penoeh kagirangan, jang membikin djoega girang pada marika-poenja orang toewa.

Sasoedanja dapet kenjataän bahoea Oen-liang djadi satoe mantoe jang baek, Tjoe-bing poen tida merasa kaberatan boeat tempatken itoe mantoe di satoe kadoedoekan jang tinggi dalem ia-poenja peroesahan sendiri.

Bagitoelah sasoedahnja mendoesin dari kakliroeannja, „Siotjia Kepala Batoe” dapetken ia-poenja tempat jang santousa dalem pengidoepan. . . . . . .

Apa jang terdjadi dengen Tjing-biauw?

Sasoedanja ia idoep sebagi laki istri dengen itoe djanda hartawan, Tjing-biauw poen dapetken pengidoepan jang sanget menjenangken padanja. Ia dapet satoe istri jang boleh dibilang tjantik djoega dan ia tida oesa bekerdja satoe apa boeat dapet pengidoepan. Ia tida perloe tjari oewang, saban hari ia boleh berpakean bagoes dan dahar santapan jang ledzat, dan lantaran itoe samoea ia djadi loepaken kewadjibannja satoe soeami. Tapi itoe sadja belon membikin ia djadi poeas. Pelahan dengen pelahan sasoedanja ia dapet lebi banjak kamerdikaän dari ia-poenja istri dalem oeroesan oewang, ia moelai poela dengen pengidoepannja jang doeloe Roemah-roemah djoedi kombali dapet ia-poenja koendjoengan, dan roemah-roemah hina poen liat ia-poenja langganan lama dateng kombali.

Permoela istrinja Tjing-biauw tida dapet taoe perboeatan jang tida bagoes dari itoe lelaki, tapi ibarat kata asep tida bisa ditoetoep, toch achirnja Tjing-biauw poenja tingkah lakoe diketahoei djoega olehnja, jaitoe tatkala Tjing-biauw bagitoe brani boeat piara satoe njai jang tjantik, satoe prempoean Boemipoetra dari satoe tempat jang djaoe.

Pertjektjokan tida bisa tida terdjadi, perhoeboengan antara itoe laki istri djadi genting. Achirnja Tjing-biauw jang ternjata

brangasan loepaken dirinja poenja keadaän dan poekoel istrinja pada soeatoe hari.

Inilah meliwatin takeran kesabaran. Itoe djanda lantes oesir Tjing-biauw dari roemahnja dan maoe atawa tida terpaksa itoe lelaki moesti berlaloe, sebab ia sendiri tida bisa bilang jang itoe roemah memang ia-poenja, dan sasoeatoe orang poen taoe, itoe djanda boekan ia jang ada mempoenjai harta.

Blakangan ia dapet kabar bahoea Hoei-nio telah menikah den gen Oen-liang. Iapoenja sifat jang tida bagoes moentjoel kombali dan dengen pengharepan jang Hoei-nio tida loepaken marika-poenja perhoeboengan jang doeloe, pada soeatoe hari ia moentjoel di roemahnja Oen-liang.

Dan betoel sadja Hoei-nio tida loepaken itoe perhoeboengan antara marika berdoewa, tapi lantaran itoe boekan Hoei-nio samboet ia-poenja kedatengan dengen girang, saperti jang Tjing-biauw ada harep, tapi sabaliknja itoe njonja moeda djadi goesar dan oesir padanja saperti saekor andjing goedikan.

Moelai itoe waktoe Tjing-biauw mengilang dari itoe tempat, dimana ia telah menoentoet pengidoepan dengen menganggoer . . . . . . . . .

Samentara itoe Hoei-nio idoep beroentoeng den gen soeaminja . . . . . . . . . . .

TAMAT.

BOEAT LAEN BOELAN:

HIKAJATNJA

TJAN HANG

OLEH

HARAKAWA MASIDHA

Riwajatnja itoe Maling-hagoena jang soeda membikin gempar kota Semarang.

DRUKKERIJ
"L I T E R A"
PANGERAN SOEMEDANGWEG 89

TELEFOON No. 1025
BANDOENG.

,