Siauw Ngo Gie 02

by Kuang Lou Wen dan Mi Tao Jen Peng

 

SIAUW NGO GIE

Bagian ka-doea

atawa

Pembrontakannja Siang Yang Ong

---

„Kaloe kaoe soeda taoe terlebih baek lagi,“ kata Kang Hwan sembari tertawa.

„Itoe waktoe akoe kiraken dengen sasoenggoenja kaoe maoe berantem sama orang, tidak taoenja kaoe lantas maboer. Bagoes betoel! Tapi, kaoe kapannja sampe ka ini?“

„Kamaren. Pada sasoedanja akoe menanjaken pikiran Siang-ya, akoe lantas oeroes sedikit pakerdjahannja akoe poenja lo-ja ; tapi masi ada bebrapa soerat jang masi belon ditoelis beres dan besok pagi-pagi akoe baroe bisa brangkat poelang. Baroesan akoe denger telah dapet ditangkep doewa pendjahat jang hendak melakoeken pemboenoehan, maka akoe lantas masoek boewat meliat, tida taoenja ada marika itoe. Marika telah beboewat apa-apa jang berboedi padakoe. Maka akoe harep kaoe soeka mintaken keadilan pada siangja, pada sasoedanja dikasi hoekoeman katjip, akoe maoe sediaken doewa peti mati, sekedar menjataken akoe poenja trima kasi atas iaorang poenja boedi kabaekan,“

„Oleh kerna kaoe ada mempoenjai maksoed begitoe,“ kata Tie Hoa, „akoe sendiri poen merasa sanget sajang atas marika berdoewa poenja kadjoedjoeran, di antara golongan liok-lim jang berhati djoedjoer seperti iaorang, sasoenggoenja djarang sekali bisa didapetken, akoe rasa tjoema sebab iaorang terkena oborannja Lie Thian Siang dan pengaroehnja pikiran jang hendak bikin pembalesan atas sakit hatinja iapoenja ajah. Lagian ia disanggoepin boewat mendapet pangkat dan kaberoentoengan di hari kamoedian, dengan begitoe, soeda tentoe sadja iaorang maoe bakerdja dengea sagenep tenaga dan hati.

„Kaloe diliat dari perkara iaorang bertanding sama Pwee Houw boewat menoeloengin kaoe, boleh dibilang ada saorang jang baek. Akoe maoe pergi masoek lagi ka dalem boewat mintain ampoen pada Siangja, barangkali sadja Siangya soeka memandang akoe poenja moeka dan mengampoenin iaorang poenja djiwa.“

Djoestroe ia berdoewa lagi bitjara, di lataran orang lagi menggelar salembar tiker dan itoe doewa soedara Heng didorong kaloewar dari kamar boekoe boewat mendjalanken iaorang poenja hoekoeman.

„Toewan-toewan djangan toeroen tangan doeloe,“ kata Tie Hoa. „Akoe maoe masoek ka dalem boewat mintain iaorang ampoen pada Siangya, barangkali sadja akoe poenja maksoed bisa berhasil.

„Sahabisnja berkata ia lantas masoek ka dalem kamar dan berloetoet di hadepan Pauw Kong.

„Akoe harep Siangya soeka brentiken doeloe itoe napsoe kagoesaran,“ kata ia.

„Tie Tjongsoe boleh berbangkit sadja,“ kata Pauw Kong. „Kaloe ada pembitjarahan boleh dibitjaraken dengen plahan-plahan.“

Tie Hoa lantas toetoerken apa jang soeda terdjadi, moelai dari perkara katemoeken Pek Ngotay-tay hingga perkara itoe doewa orang menoeloengin Kang Hwan. Achirnja ia berkata : „Akoe harep Siangya soeka timbang, perkara membales sakit hatinja iapoenja ajah, itoelah perboewatan jang berbakti, membales kabaekannja Lie Thian Siang, itoelah perboewatan jang patoet. Sedeng perkara menoeloengin pada Kang Hwan, itoelah kaloewar dari iapoenja hati jang tida tega.

Biar poen iaorang telah dateng ka sini boewat bermaksoed djahat pada Siangya, tida bisa dikataken orang jang terlaloe djahat. Apabila Siangya bisa mengasi kalonggaran loewar biasa, mengampoenken iaorang poenja kadosahan dari hoekoeman mati, nistjaja iaorang aken merasa sanget bersoekoer dan djoengdjoeng tinggi Siangya poenja buedi kabaekan jang besar. Boewat membales boedinja Lie Thian Siang sadja iaorang maoe melakoeken itoe pakerdjahan dengen mengorbanken iaorang poenja djiwa. Apabila Siangya meagampoenin pada marika dan trima bakerdja di Kay-hong-hoe, akoe taoe iaorang tentoe soeka membales Siangya poenja boedi kabaekan, biar doen marika poenja badan moesti djadi antioer dan leboer. Bersama ini, akoe saorang jang sanget rendah, braniken hati madjoeken itoe advies dan bermoehoen Siangya poenja timbangan jang maha adil.“

Pauw Kong lantas manggoetken kapalanja.

„Och, kiranja begitoe,“ kata ia. „Sabaliknja akoe jang soeda kaboeroe napsoe mendjadi goesar.“

Sahabisnja berkata ia lantas prentah soepaja itoe doewa orang dibawa masoek lagi ka dalem kamar. Ong Tiauw lantas pergi kaloewar boewat bawa lagi itoe doewa soedara Heng masoek. Tapi iaorang tetap tinggal berdiri djedjak dan tida maoe berloetoet.

„Baroesan,“ kata Pauw Kong, „lantaran akoe merasa sanget goesar, soeda tida menanjaken. lebih djaoe kaoe berdoewa poenja asal-oesoel dan apa sebabnja maka maoe memboenoeh padakoe. Tjobalah sekarang kaoe orang tjeritaken dengen terang.”

„Kita berdoewa ada mempoenjai sakit hati jang sanget besar pada kaoe," kata itoe doewa orang, "jaitoe pemboenoehan atas dirinja kita poenjajah. Saorang lelaki jang hidoep dalem ini doenia, apabila tida bisa membales sakit hatinja iapoenja ajah, boleh dibilang masi lebih rendah dari satoe binatang."

„Kaoe berdoewa sasoenggoenja ada bangsa kasar dan pendek pikiran." menjelak Tie Hoa dari satoe pinggiran. "Sebenernja kaoe orang kena disesatken oleh Lie Thian Siang dengan iapoenja tjerita djoesta, tapi sebaliknja kaoe maoe pertjaja itoe obrolan kosong. Ia sengadja obor-obor kaoe berdoewa dengan itoe tjerita djoesta soepaja kaoe orang dengan ridla hati dateng melakoeken pemboenoehan di sini, dan inilah yang dinamaken pindjem tangan boewat memboenoeh orang.

„Tatkala itoe dorna bitjara sama kaoe orang, akoe poen mendengerin di sebelah loewar. Katanja kaoe poenja ajah telah diboenoeh mati oleh Tian Him Hoei, apa boekannja begitoe ?"

„Ja, bener begitoe," kata itoe doewa soedara Heng dengan berbareng. "Tapi ada lagi soeatoe hal laen. apa kita poenja oewang djoega kaoe jang tjolong."

„Itoe oewang akoe jang ambil," menjelak Kok In Hoei, "Kaoe orang djangan terka orang jang tida berdosa."

„Kaloe begitoe," kata Heng Djoe Liong, "sabenernja kita poenja ajah tjara bagimana matinja ?" Tie Hoa lantas toetoerken apa jang ia soeda denger dari Thio Liong. Achirnja ia berkata : "Apabila kaoe tida pertjaja akoe poenja omongan ini, sekarang di hadepannja Siangya dan sekalian Hauw-wie-lo-ja, kaoe boleh tanjaken apa betoel atawa tida doedoeknja perkara begitoe roepa."

„Tie Tjongsoe poenja omongan sedikit poen tida salah," kata Pauw Kong. "Djadinja kaoe berdoewa lantaran itoe oeroesan dateng ka sini boewat melakoeken pemboenoehan padakoe ? Tapi akoe poen tida maoe terlaloe salahken padamoe, dan djoega tida maoe binasaken kaoe poenja djiwa, kerna menginget kaoe berdoewa ada anak jang berbakti. Sekarang akoe maoe melepasken kaoe pergi dari sini. Atas kaoe poenja perboewatan jang kliroe, apa maoe dirobah atawa tida, itoelah menoeroet sebagimana kaoe orang soeka; tapi kaloe kaoe orang tida maoe merobah itoe kesalahan dan kena tertangkep lagi oleh akoe, pasti sekali akoe tida nanti mengasi lagi kaentengan seperti sekarang. Oppas-oppas, lepasken ini doewa orang poenja iketan."

Ong Tiauw dan Ma Han dateng menghamperi dan melepasken tali iketannja itoe doewa soedara Heng, hal mana soeda membikin iaorang djadi melongo dan tida taoe apa jang marika moesti berboewat.

„He, mengapa kaoe orang tida hatoerkan trimakasi pada Siangya", kata Tie Hoa, "jang soeda melepasken kaoe poenja djiwa dari bahaja maoet ?"

Heng Djoe Liong dan Heng Djoe Hoew terpaksa berloetoet di hadepan Pauw Kong dan berkata dengen berbareng : "Lantaran kita berdoewa poenja kabodohan, ampir sadja menjilamenjilakai Siangya poenja djiwa. Sekarang sekalipoen kita berdoewa poenja kadosahan ada begitoe besar, toch Siangya soeda berlakoe begitoe moerah tida maoe menghoekoem pada kita. Kita berdoewa poenja djiwa boleh dibilang Siangya jang hidoepken kombali”.

„Mengapa kaoe orang tida maoe minta pakerdjahan di Kay-hong-hoe pada Siangya, agar kaoe bisa membales Siangya poenja boedi kabaekan?” menjelak Tie Hoa dari pinggir.

„Kita orang telah menerima orang poenja permintahan toeloeng jang begitoe soenggoe-soenggoe”, kita Heng Djoe Liong, „apabila sekarang kita bekerdja di Kay-hong-hoe, boekantah aken dikataken orang sabagi manoesia hina.jang sabentar-bentar ganti boeloe? Pribahasa ada bilang : mantri jang setia tida nanti bekerdja pada doewa madjikan”.

„Kaoe sasoenggoenja ada bangsa kasar”, kata lagi Tie Hoa „Doeloe Han Sin moelai bekerdja pada Tjouw Pa Ong sebagi satoe soldadoe penoenggoe kantoor, tapi blakangan di bawah prentahnja Han Ong beroelang-oelang ia membikin djasa besar, hingga ia diangkat mendjadi Sam Tjee Ong. Apatah ia itoe boekannja mantri jang kerdja pada doewa madjikan? Ini waktoe ada koetika jang sanget baek. Tida lama kamoedian Gan An-ie Taydjin aken poelang ka kota radja, apabila kaoe bekerdja di Kay-hong-hoe, asal sadja Siangya mengaloewarken satoe pata perkatahan, nistjaja kaoe lantas bisa mendjabat pakerdjahan negri. Kaoe djangan dengeri obrolan Lie Thian Siang, jang mengataken Bang Thay-soe maoe menoeloeng soepaja kaoe mendjabat pakerdjahan negri. Sebab, ini waktoe ia sendiri masi moesti berdiam di roeinahnja mamikirken iapoenja kasalahan, tjara bagimanatah ia bisa menoeloeng kaoe-orang?”

Itoe doewa soedara Heng pikir Tie Hoa poenja omongan ada benar sekali. Sang ade lantas berkata: „Engko, baeklah kita memoehoen Siangya poenja pertoeloengan.”

Itoe doewa soedara lantas berloetoet kombali dan mendjoera beroelang-oelang sampe kapalanja mengenaken djoebin serta minta dikasianin. Maoe atawa tida, terpaksa Pauw Kong manggoetken kapalanja dan trima itoe doewa orang. Sabetoelnja kaloe tida ada itoe perkara menoeloengin Kang Hwan. pasti sekali iaorang poenja djiwa lebih siang soeda katemoeken Giam-koen. Maka orang selamanja haroes lakoeken perkara baek dan patoet.

Pauw Kong soeroe itoe doewa orang menoekar pakean, sebab iaorang masi pake itoe pakean boewat djalan malem. Oleh kerna iaorang poenja pakean memang ada terboengkoes dalem iaorang poenja pauwhok, djadi tida soesa lagi boewat marika toekaran. Kok In Hoei lantas berpamitan boewat brangkat poelang. Pauw Kong tida kasiken ia poelang, sebab maoe dipoedjiken pada baginda keizer soepaja dikasi pegang djabatan negri.

Tapi Kok In Hoei beroelang-oelang menoelak dan iapoenja sikap ada begitoe pasti. Koetika Pauw Kong kasi ia persen oewang djoega ia tida maoe trima. Pauw Kong taoe bahoewa tabeatnja ini orang sangat loewar biasa, maka ia soeroe orang sediaken satoe medja Bantapan dan minoeman, ditemenin oleh sekalian Hauwwie. Kamoedian ia menanjaken pada Tie Hoa tentang ka'adahan di kota Siang-yang dan radja-moeda Siang-yang Ong. Tie Hoa lantas toetoerken dengen ringkes prihal oeroesan mamepetjahken Tong-tong tin, sedang itoe prins ka mana ia soeda pergi tida ada saorang jang taoe. Lantaran itoe waktoe soeda laat, Tie Hoa lantas berpamitan sama Pauw Kong dan menoedjoe ka tempatnja itoe hauw-wie-hauw-wie, di mana ia bersama Kok In Hoei doedoek makan-minoem dengen ditemenin oleh Ong Tiauw dan Ma Han. Soeda tentoe sadja ada teritoeng djoega itoe doewa soedara Heng.

Di hari jang berikoetnja, Kok In Hoei melandjoetken iapoenja peidjalanan, sedang Tie Hoa jang soeda poedjiken Heng Djoe Liong dan soedara moedanja bakerdja di Kay-hong-hoe, itoe waktoe ia djadi menjesal. Sebab ia pikir, laoetan jang bagimana dalemnja masi bisa didjakdjakin, tapi manoesia poenja hati soeker sekali dikatahoei sampe abis. Apa tjilaka kaloe itoe doewa orang pikirannja berobah lagi, sedeng iapoenja ka'adahan ada begitoe berdeketan sama Pauw Kong, djika sampe terdjadi perkara jang di loewar doegahan, ia tida bisa terlepas dari itoe tanggoengan. Apa boleh boewat, ia moesti tinggal berdiam di Kay-hong-hoe, soepaja saban waktoe bisa menilik itoe doewa orang poenja kalakoean. Pauw Kong jang sadari masi pagi soeda masoek ka kraton, koetika ia kaloewar dari astana dan masoek ka dalem iapoenja kamar-boekoe, lantas ada satoe oppas jang mergasi taoe bahoewa samalem di dalem roemah penggadean merk Heng Hin, jang letaknja di sabelah Timoer dari Kou-lauw, telah terdjadi perkara djiwa besar, sama-sekali ada toedjoe orang jang mendjadi korban pemboenoehan. Itoe orang-orang jang terboenoeh, doewa di antaranja toekang meronda malem, sedang jang laennja semoewa ada penggawe dari itoe roema penggadean, jang terboenoeh di iaorang poenja kamar. Ini pagi tikoan dari district Siang-hoe dengen membawa toekang preksa mait dan bebrapa oppas telah bikin papreksahan ka itoe roemah penggadean.

Dari hasilnja papreksahan, ternjata loeka-loekanja orang-orang jang terboenoeh berwarna merah, jang menandaken ada perboewatannja orang-orang jang soeka djalan malem. Itoe pendjahat atawa pendjahat-pendjahat telah mengambil djalan masoek dari tembok Timoer dan masoek ka dalem itoe roemah penggadean. Oewang jang ditjoeri sama-sekali berdjoembla saratoes tael perak lebih. Sekarang itoe tikoan telah dateng mengadep dengen membawa sala satoe leerling pengawe jang bernama Lie Siauw Djie, menoenggoe Siangya poenja papreksahan.

Pauw Kong pikir, ini kombali ada perkara gelap. Itoe oppas lantas kaloewar boewat melakoeken prentahnja iapoenja madjikan. Tida lama kamoedian itoe tikoan soeda masoek ka dalem itoe kamar boekoe, dan lantas membri hormat pada Pauw Kong lantas oendang ia berdoedoek. kamoedian menanjaken prihal itoe pemboenoehan di roemah penggadean merk Heng Hin. Itoe tikoan lantas toetoerken seperti jang telah diloekisken di atas tadi. Kamoedian ia hatoerken procesverbaalnja itoe leerling penggawe boewat dipreksa oleh Pauw Kong, berikoet satoe staat papreksahan tentang loeka-loekanja itoe orang jang terboenoeh. „Apa Koei-koan ada bawa djoega itoe orang-orang dari itoe roemah penggadean?“ menanja Pauw Kong.

„Ja, ada: sekarang ada di loewar menoenggoe Losoe poenja papreksahan,“ saoet itoe kapala district.

Fan Sioe Djin poen ada mendjadi Pauw Kong poenja moerid. Doeloean itoe djabatan dipangkoe oleh Tji Koan, tapi ia itoe sekarang soeda naek pangkat mendjadi tihoe di Tji-tjioe-hoe dan djabatannja digantiken oleh ini Tan Sioe Djin, jang djoega ada kaloewaran sekolahan dan sanget djoedjoer dan bersih kalakoeannja. Lantaran ini perkara ada sanget soeker dan djiwa jang terboenoeh poen banjak, maka ia rapportken pada Kay-hong-hoe.

Pauw Kong soeroe oppas bawa masoek doeloe pengoeroes itoe penggadean jang tersangkoet. Tida lama kamoedian bibawa masoek saorang jang berpakean idjo dan memake kopiah ketjil. Pauw Kong liat iapoenja roman sabar dan baek, jang ada soeroep sama ka'adahannja orang dagang, sedikit poen tida teroendjoek sikap jang djahat atawa galak.

„Akoe, Ong Tat, memberi hormat di hadepan Siangya,“ kata itoe orang.

„Tjoba kaoe tjeritaken apa jang kaoe taoe berhoeboeng dengen itoe perkara pemboenoehan dalem itoe roemah penggadean jang terdjadi samalem,“ kata Pauw Kong.

„Samalem koetika pendjahat masoek,“ kata Ong Tat, „kita, orang djoestroe lagi pada tidoer di sabelah depan, djadi sama-sekali tida taoe apa jang soeda terdjadi di kamar blakang, dimana sama-sekali ada tidoer anam penggawe. Lima di antaranja telah terboenoeh mati, dan tjoema itoe satoe sadja jang masi tinggal hidoep. Menoeroet katanja itoe leerling penggawe jang masi hidoep, pendjahat jang masoek sama sekali ada doewa orang, dan segala pembitjarahannja doewa pendjahat itoe semoewa ia telah denger dengen terang. Romannja poen ia telah liat dengen njata.”

Pauw Kong prentah bawa Ong Tat kaloewar, bawa masoek itoe teerling penggawe. Koetika itoe orang masoek, ternjata masi moeda sekali, paling banjak baroe sembilan belas tahon. lapoenja kepala terboengkoes oleh satoe sapoetangan batis. Ia berloetoet di hadepan Pauw Kong boewat menoenggoe papreksahan.

„Siapa kaoe poenja nama?” menanja itoe ambtenaar.

„Lie Siao djie,” djawab itoe leerling penggawe.

„Soeda brapa lama kace bekerdja dalem itoe roemah penggadean?”

„Kira soeda tiga tahon lebih.”

„Kenapa kaoe poenja kepala di'iket? Apa mendapet loeka?”

„Tida dan maka diboengkoes lantaran sakit kepala. Kaloe boekannja lantaran sakit kepala, boleh djadi djoega akoe soeda kena diboenoe oleh itoe doewa pendjahat.”

„Kenapa djadi begitoe?” menegesken Pauw Kong.

„Kamar blakangnja itoe roemah penggadean,” menerangken Lie Siao Dji, tida ada tempat tidoer jang di dalemnja di-angetin sama api, hanja tjoema memake randjang biasa sadja, atawa memasang papan-papan di atas doewa bangkoe. Laen dari itoe ada terdapet djoega satoe lemari jang berbareng digoenaken seperti medja. Akoe lantaran sakit kapala dan takoet katioep angin, sebab sedikit sadja katioep angin, lantas sadja kapala sakit dan rasanja seperti menoesoek ka datem hati. Kerna itoe, akoe lantas tidoer dalem itoe lemari-medja, atas adviesnja akoe poenja entiek, jang djoega telah binasa di tangannja itoe doewa pendjahat.

„Itoe lemari-medja di sabelah dalemnja tida memake pintoe, djadi tida engap kaloe akoe tidoer di dalemnja. Kira djam sembilan lebih, lantaran akoe poenja kapala masi teroes sakit akoe tida bisa poeles. Itoe waktoe akoe denger, di lataran ada soewara toekang ronda jang bertreak: „Adoeh !“ Kamoedian dibarengin sama soewara gedeboekan. Akoe rasa boleh djadi orang telah boenoeh pada itoe toekang ronda jang bertjilaka. Berbareng dengen itoe, akoe pikir tentoelah ada perampok jang menjatronin, hingga samingkin akoe tida bisa poeles.

„Blakangan akoe denger bergeraknja djendela jang diboeka dan dari sabelah loewar ada berlompat masoek doewa bajangan itam. Kamoedian kaliatan doea sinar terang seperti kilat jang digerakin dalem tangannja itoe doea orang. Dan akoe liat iaorang lantas menghoenoes golok dari saroengnja.

Beroelang-oelang akoe denger soewara batjokan-batjokan dan treakannja orang-orang jang diboenoeh, tapi itoe tjoema terdjadi dalem sedikit waktoe, sebab tida lama kamoedian ka'adahan lantas djadi soenji lagi.

„Di sabelah dalem ada goedang tempat taro barang-barang gadean jang berharga, jaitoe barang perhiasahan emas. perak dan permata. Itoe doewa perampok lantas masoek ka itoe goedang dengen meroesakin selot-selotnja. Kamoedian akoe denger dalem kamar ada kadengeran soewara bergebroekan dan bergombrangan. Boleh djadi barang-barang jang iaorang „benahin” boekan sedikit djoemblanja. Tapi lantaran sanget katakoetan, akoe tida brani boeka soewara dan tinggal diam dengen tida brani berkoetik. Blakangan iaorang kaloewar lagi dari itoe goedang dan kombali iaorang gerakin itoe barang jang bisa mengaloewarken sinar lerang.

„Kita berdoewa soedara," kata salah - satoe antaranja pada kawannja, „tida maoe melakoeken pakerdjahan dengen gelap. Maka kita berdoewa poenja she dan nama perloe ditoelisken, soepaja orang bisa taoe siapa jang telah melakoeken ini pakerdjahan.”

„Boewat kita berdoewa sama-sekali tida ada halangannja.” kata itoe kawan jang moekanja koening, sebab tida mempoenjai tempat kadiaman jang tertentoe. Tapi, dari sebab kita seringkali berdiam di Tjo-tjioe-kio, dalem roemahnja Lou Toako, apabila ini hal dapet didenger oleh politie dan pembesar negri, nistjaja aken menjilakai pada Lou Toako. Kita haroes inget Lou Toako poenja deradjat ada lebih penting dari kita berdoewa, maka djangan sekali kita membikin ia terkena sangkahan djelek. Lagian, pada doewa hari jang berselang, kita poenja omongan jang dioetjapken pada orang dari itoe roemah penggadean boleh dipikirken dengen pandjang oleh marika itoe. Dengen begitoe, kita berdoewa tida bisa dibilang telah melakoeken pakerdjahan dengen menggelap. Apabila iaorang ada mempoenjai kapandean, tida ada halangannja menjelidikin pada kita orang.“

„Kaoe poenja omongan ada benar sekali,“ kata orang jang bitjara doeloean dan moekanja berwarna itam. „Akoe satoedjoe dan tarik kombali omongankoe jang doeloean.”

„Sahabisnja iaorang berkata begitoe, lantas pada mengilang di tempat gelap.” begitoelah Lie Siao Dji menoetoep iapoenja penoetoeran.

„Apa kaoe taoe,” menanja lagi Pauw Kong. „bahoewa dalem kaoe orang poenja roemah penggadean telah terdjadi perkara apa-apa?”

„Taoe,” djawab Siao Dji.

„Perkara apatah? Tjobalah kaoe toetoerken dengen terang.”

„Pada tiga atawa ampat hari jang berselang,” kata lagi Lie Siao Dji, „telah dateng doewa orang jang maoe menggade satoe gelang dari batoe giok poetih. iaorang minta dipegang gade boewat limapoeloeh tael perak; tapi kita poenja toekang taksir tjoema maoe pegang boewat harga doewapoeloeh tael perak sadja. Itoe doewa orang lantas bitjara kasar jang tida atoeran dan paksa maoe djoega barangnja dipegang gade seperti iaorang telah minta. Lantaran tida maoe tjerewet, kita poenja toekang taksir tambah sampe tigapoeloeh tael perak. Tapi ternjata iaorang sanget biadab, sebab lantas memaki kalang-kaboetan. Kmoedian iaorang menegasken apa kita maoe trima atawa tida barangnja digade menoeroet marika poenja permintahan. Kita poenja toekang taksir tetapken bahoewa kita tida bisa pegang boewat itoe harga jang terlaloe tinggi.

„Achirnja iaorang menanja lagi dengen aseran, apa kita brani menjeboet tiga kali tida maoe menoeroetken iaorang poenja permintahan. Kita poenja toekang taksir bilang, djangan kata tiga kali, biar poen tigapoeloeh kali djoega brani. Iaorang lantas mengantjem bahoewa kita moesti berhati-hati, dalem tiga hari lamanja iaorang maoe dateng menerima kombali modalnja. Kita poenja toekang taksir menanjaken, apa iaorang kenal pada kita poenja madjikan? Iaorang bilang tida kenal, tapi moesti berhati-hati sadja. Sahabisnja mengantjem iaorang lantas berlaloeh. Tatkala itoe doewa perampok gerakin itoe barang jang bisa mengaloewarken sinar terang, akoe kenalin iaorang poenja roman, jang boekan laen dari romannja itoe doewa orang jang menggadeken itoe gelang batoe giok”.

„Apa kaoe denger iaorang menjeboetken iaorang poenja she dan nama ?” menanja lagi itoe ambtenaar jang mamereksa.

„Tida; sadari bermoela sampe di achirnja iaorang tida menjeboet marika poenja nama”, djawab Lie Siao Dji.

Pauw Kong mendenger omongannja Lie Siao Dji, jang menjeboet romannja itoe doea perampok, satoe itam dan satoe koening, ia djadi inget pada Heng Djoe Liong dan Heng Djoe Houw. Laloeh ia kasi prentah satoe oppas boewat panggil pada itoe doea soedara, berikoet djoega Tie Hoa, jang itoe waktoe masi belon poelang. Tida antara lama kamoedian itoe tiga orang soeda dateng dan berdiri di satoe pinggiran.

„Lie Siao Dji,” kata Pauw Kong, „apa kaoe bisa kenalin paras moekanja itoe doewa pendjahat?”

„Soeda tentoe sadja bisa; biar poen satoe tahon lagi, djoega akoe masi bisa kenalin iaorang poenja roepa.”

„Baroesan kaoe bilang, jang satoe itam dan satoe lagi koening,” kata lagi itoe ambtenaar jang pande, „djika dibandingken sama kita poenja. doewa orang ini, jang djoega satoe koening dan satoe itam, bagimana, sama atawa tida ?” „Itoe doewa pendjahat toeboenja ada banjak lebih pendek dari ini toewan, malah ada banjak lebih koeroes.”

Pauw Kong lantas kasi prentah Ong Tat boleh bawa poelang iapoenja leerling penggawe itoe dan boleh lakoeken teroes pakerdjahannja sabagimana biasa. Sedang itoe mait-mait dari orang-orang jang terboenoeh, boleh dimasoekin dalem peti sabagimana biasanja, tapi djangan dikoeboer doeloe, hanja ditaro satoe di soeatoe tempat jang sepi. Nanti pada sasoedanja ini perkara mendjadi beres, baroelah boleh dikoeboer. Di laen fihak ia kasi prentah pada tikoan dan orang-orang politie boeat pergi menjelidikin itoe doewa perampok. Tan Sioe Djin tikoan lantas berpamitan poelang, sedang Tie Hoa, Heng Djoe Liong dan soedara moedanja poen berlaloeh dari itoe kamar boekoe.

Pauw Kong soeroeh Pauw Hin pergi panggil itoe doewa kapala politie, Han Tjiat dan Touw Soen. Tida antara lama kamoedian itoe doewa orang dateng masoek dan berloetoet hadepannja iapoenja chef. Pauw Kong lantas toetoerken itoe perkara pemboenoehan di dalem roema penggadean Heng Hin, kamoedian prentah iaorang membawa bebrapa poeloeh politie brangkat ka Tjo-tjioe-kio, menjelidiki keada'annja itoe orang she Lou jang diseboet itoe doewa hegal, begitoe poen itoe doewa-doewa begal sendiri, jang bermoeka item dan koening. Kamoedian iaorang dipasrahken satoe soerat dienst jang soeda disediaken, agar bisa minta pertoeloengan pada politie di itoe tempat boewat membantoe menangkep itoe orang-orang djahat bila soeda bisa diketemoeken. Laen dari itoe, Pauw Kong sendiri kasi iaorang ongkos boewat di djalanan, serta djandjiken apabila itoe oeroesan soeda beres aken dikasi lagi persen jang berdjoembla besar.

Han Tjiat dan Touw Soen memdjoera boewat hatoerken trima kasi. Kamoedian iaorang memilih doewabelas pembantoe jang moeda dan koewat dengen membekal berbagi-bagi matjem sendjata. Marika itoe semoewanja soeda biasa melakoeken pakerdjahan menangkep maling dan perampok. Sekarang baek kita tjoba tengok pada Lie Beng anaknja Lie Thian Siang, jang doeloean kita tinggaken pada sasoedanja berpisahan sama itoe doewa soedara Heng.

Pada sasoedanja itoe doewa candidaat pemboenoeh brangkat, Lie Beng senantiasa berkoewatir dan kaget-kaget sadja, lantaran apa samaleman itoe ia sama-sekali ia tida bisa tidoer. Kira pada djam ampat pagi ia soeroe orangnja pergi mendenger kabar di depan kantoor Kay-hong-hoe. Itoe orang soerpehan baroe balik poelang pada waktoe soeda terang tanah dengen membawa kabar bahoewa Pauw Kong masi teroes masoek ka kraton sabagimana biasa.

Lie Beng lantas taoe bahoewa itoe oeroesan telah djadi gagal. la soeroe lagi orang boewat menjerepin ka mana perginja itoe doewa candidaat pemboenoeh; tapi doewa hari kamoedian baroe ja bisa dapet kabar bahoewa Heng Djoe Liong dan Heng Djoe Houw telah menaloek pada Kay-hong-hoe. Satrimanja itoe kabar Lie Beng boeroe - boeroe menoelis pada ajahnja boewat mengasi taoe itoe oeroesan, soerat mana malem-malem djoega ia soeroe orang bawa ka district Siangsoei.

Lie Thian Siang jang mendapet itoe kabar, boekan maen poenja terkedjoet dan katakoetan. Tapi, takoet tinggal takoet, kaloe tida balik ka kota radja, itoelah tjoema menambahken sadja iapoenya kadosahan. Maka biar poen ia taoe pasti apabila ia masoek ka kota radja, tentoe Pauw Kong aken mendakwa ia pada baginda kaizer dan iapoenja kadoedoekan tentoe bakal gondjet, djabatan boleh hilang, itoe harta jang ia telah dapet koempoel dengen pameresan moesti dilindoengin. Begitoelah ia mentjari bebrapa toekang poopio menganter itoe kalde-kalde jang memoewat oewang ka iapoenja kampoeng kalahiran. Di laen fihak dengen hati kebat-kebit ia masoek ka kota radja boewat merapportken ia poenja pakerdjahan. Masi oentoeng, Pauw Kong tida mendakwa padanja, sedang baginda keizer djoega tida mengalowarken firman jang menjela atawa memoedji ia poenja pakerdjahan, salaennja doewa perkatahan „soeda taoe.“

Lie Thian Siang merasa maloe sendirinja, laloe masoekin request verlof sakit dan blakangan ia masoekin lagi satoe request minta brenti dengen hormat dari pakerdjahan negri boewat tinggal senang dalem ia poenja roemah tangga sendiri. Itoe semoewa permintahan telah diloeloesken oleh baginda keizer.

Sekarang kita balik lagi pada itoe doewa kapala oppas dari Kay-hong-boe, Han Tjiat dan Touw Soen, jang membawa salosin orang-orang politie dengen menjamar menoedjoe ka Tjo-tjioe-kio. Sesampaenja di itoe tempat, ia orang menginep dalem satoe roemah makan besar. Ini Tjo-tjioe-kio terkenal djoega dengen nama Tjo-kio-tien, tempat mana sedari iboe soeri Lie Tay-houw balik kombali ka dalem kraton, atas Pauw Kong poenja pakerdjahan jang berdjasa, Lie Tay-houw lantas kaloewarken oewang negri saratoes riboe tael perak boewat mendiriken lagi satoe gredja Thian-tjee jang baroe, di mana ada didiriken satoe medja sembajang itoe iboe seori sebagi satoe tanda peringetan.

Baginda keizer hendak membri djabatan pada Hwang Tjong Hwa, itoe orang jang merawati pada Lie Tay-houw koetika asi sengsara ; tapi dari sebab ia tida ada mempoenjai kamampoean boewat mendjalanken kawadjibannja, laloe soeroe ia pilih sendiri saroepa pakerdjahan jang ia bisa lakoeken. Itoe orang jang saderhana lantas bilang ia maoe mendapet pakerdjahan kapala kampoeng sampe tiga toeroenan tapi semoewa kapala kampoeng di seloeroe negri moesti berada di bawah iapoenja prentah. tegesnja ia ingin mendjadi kapala dari semoewa kapala kampoeng.

Baginda Song Djin Tjong lantes anoegrahken ia satoe gelaran Soe Pin Thian Hee To Tee Hong, jang mempoenjai deradjat sama dengen tihoe, begitoe poen ia poenja gadji. Tanah-tanah jang termasoek mendjadi miliknja Thian Tjee Bio berikoet itoe gredja sendiri, semoewanja dioeroes oleh ianja, lantaran apa dengen mendadak iapoenja ka'adahan roemah tangga mendjadi hartawan. Tjoema sajang ia tida mempoenjai anak.

Di itoe tempat ada satoe koelawarga Lou bernama In Pheng, saorang boesoek jang tida mempoenjai pakerdjahan tentoe. Ia ada mempoenjai doewa soedara toewa jang bernama Lou In Pioe dan Lou In Pa, semoewanja mendjabat pakerdjahan militaire tingkatan rendah. Dari sebab iaorang poenja soedara moeda, Lou In Pheng, soeka sekali perkara sama orang, itoe doewa soedara toewa lantaran merasa maloe, lantas pinda ka laen tempat.

Lou In Pheng ada mempoenjai satoe anak lelaki bernama Lou Khay dan satoe anak prampoewan bernama Lou So Tjin. Doewa-doewanja telah pahamken ilmoe silat jang baek djoega. Oleh kerna Lou In Pheng poenja tjampoeran sangat tjampoer adoek, boleh djadi itoe doewa anaknja poenja ilmoe kapandean mendapat pengadjarannja orang-orang dari golongan liok-lim.

Lou So Tjin poenja ilmoe kapandean terlebih lagi bagoes dan mengheranken, jaitoe samatjem ilmoe kapandean jang ditoeroenin oleh iapoenja ma-angkat, dan itoe ma-angkat boekan laen dari istrinja Hwan Thian Poo, Loan Hie Hong.

Dari Sebab Lou In Pheng mengiler sama harta kakajahan Hwan Tjong Hwa, laloeh ia kasiken Lou Khay mendjadi anak-poengoetnja itoe orang hartawan. Blakangan Hwan Tjong Hwa meninggal doenie, Lou Khay kaboengin bapa-poengoetnja sabagiana biasanja satoe anak, dan oleh kerna Hwan Tjong Hwa tida mempoenjai sanak koelawarga jang dekat, djadi tida ada orang jang riboetin iapoenja harta peninggalan. Maka itoe ajah poengoet poenja gelaran djoega lantas ditoeroenken pada Lou Khay. Tapi pada sasoedanja habis berkaboeng, dengen perlahan moelai ada orang jang memboedjoek soepaja Lou Khay pake lagi iapoenja she jang sedjati.

Lou Khay jang bertabeat boeroek, dengen gampang sadja dibikin tergerak hatinja. Ia sama-sekali meloepaken boedi kabaekannja ia poenja bapa poengoet dan lantas toekar memake lagi she Lou. Dari sebab ia berkoewasa atas itoe Thian Tjee Bio dan tanah-tanah di sakiternja, oewang banjak, penghasilan poen sampe besar. Lantaran pengaroehnja oewan, ambtenaar civiel dan militaire, tida ada satoe jang brani bertentangan dengen ianja. Orang-orang ketjil, soeda tentoe sadja, terlebih lagi takoet padanja.

Lantaran merasa dirinja ditakoetin orang, lantas sadja ia mendjadi satoe djagoan jang tida segan melakoeken segala matjem kadjahatan, seperti lepas oewang panas dengen memake rente berat, merampas orang poenja tanah atawa sawah, djoewal beli dengen paksahan dan laen-laen matjem perboewatan jang terkoetoek. Kaloe sadja ada orang jang berbantah sedikit, lantas sadja ia soeroe orang-orangnja kasi labrakan sampe satengah mati. Koetika Lou In Pheng mati, terlebih lagi braninja berboewar segala perboewatan jang kedjam dar boewas, seperti djoega tida ada oendang-oendang negri dan hoekoemannja Allah. Lantaran itoe orang kasiken ia satoe gelaran Oa-Giam-Ong, atawa radja noraka jang hidoep.

Sebab kaloe orang bermoesoehan sama ianja, maoe tjeritaken perkara berklai, orang tida bisa menang padanja lantaran ia ada sedia toekang-toekang berklai jang boekan sedikit djoemblanja; maoe bitjaraken bikin perkara pada pembesar negri terlebih lagi tida goenanja. Asal sadja ia mengirim satoe kaartjis nama jang doewa djari lebarnja, sentoe sekali orang jang mendakwa padanja bakal dikerem dalem kamar tahanan satoe boelan lamanja atas iapoenja permintahan jang orang tida brani bantah. Dalem itoe satoe boelan, kaloe doewa minggoe sadja lamanja ia kasi prentah boewat djangan kasi makan pada itoe orang tahanan, boekantah orang itoe bisa mati lantaran kalaparan?

Tjoema ada satoe hal jang boleh dibilang mendingan djoega. Lantaran ia tida soeka sama paras tjantik dan konde litjin, djadi ia tida taoe mengganggoe orang poenja anak bini. Malah ia sendiri poen tida mempoenjai istri. Sabetoelnja orang jang berpengaroeh dan hartawan seperti ianja, dengen gampang sadja ia bisa mendapet satoe istri jang tjantik. Entah apa sebabnja sama-sekali ia tida bernapsoe sama orang prampoewan. Maka dalem roemahnja ia tjoema mempoenjai sadja satoe koelawarga prampoewan, jaitoe iapoenja soedara prampoewan, Lou So Tjin, bersama ia poenja boedak-boedak dan boedjang-boedjang prampoewan.

Sekarang iapoenja ade prampoewan itoe soeda beroemoer doewapoeloeh tahon, tapi sama-sekali belon mempoenjai toendangan, sebab tadinja terlaloe mamilih orang. Koelawarga jang baek dan berderadjat tinggi, tida kasoedian mendapet mantoe jang begitoe matjem, sedang bangsa jang ketjil sabaliknja fihaknja koelawarga Lou jang memandang enteng. Kaloe maoe dibitjaraken paras moekanja Lou So Tjin boleh dibilang sangat eilok dan tjantik, tambahan ada mempoenjai ilmoe kapandean silat jang bagoes. Tjoema sajang iapoenja kalakoean tida bresih dan soeda bernoda.

Oleh kerna Lou So Tjin soeda beroemoer doewapoeloeh tahon dan belon djoega besoe-wami, seringkali ia sesalken engkonja, jang tida maoe berkalakoean baek hingga membikin terlantar iapoenja waktoe moeda. Pada saban kali ia bertemoe sama pamoeda jang tjakap, selamanja ia soeka oendjoek iapoenja kalakoean jang genit. Lantaran apa orang lantas kasi ia satoe gelaran jang tida terlaloe manis maksoednja, jaitoe Kioe Bwee Sian Houw alias siloeman rase jang mempoenjai sembilan boentoet.

Pada boelan Shagwee tanggal doewapoeloeh delapan, soeda dekat pada harian pemboekahan Thian Tjee Bio boewat orang-orang jang maoe sembajang, dan itoe sembajangan dilakoeken dari sigwee Tjee-it sampe satoe boelan lamanja. Itoe pemboekahan itoe gredja, berdjenis-djenis pedagang jang maoe mentjari kaoentoengan semoewa pada dateng pada pengoeroesnja Lou Khay, boeat menjewa tempat di sakitrnja itoe gredja, di mana iaorang boleh taro barang dagangannja. Tapi Lou Khay sama-sekali tida maoe amil poesing itoe oeroesan, hanja pasrahken sadja dalem tangannja iapoenja pengoeroes jang merangkep pakerdjahan kassier.

Pada itoe hari koetika ia lagi berdoedoek dalem iapoenja kamar batja, mendadak dari loewar ada dateng masoek doewa tetamoe, semoewanja orang dari Lay-tjioe di bilangan Shoatang, jang satoe bernama Kee Sian dan mempoenjai gelaran Kim Kak Lok, dan jang satoe lagi bernama Tio Poo dan tergelar Tiat-tboei-ho. Kou Khay trima kadetengannja itoe doewa tetamoe dengen girang, pada sasoedanja satoe sama laen membri hormat, ia lantas oendang itoe doewa sobat boewat berdoedoek dan soeroe boedjangnja menjediaken thee.

„Kadoewa hiantee bebrapa lama ini apa ada baek ?“ menanja toewan roemah.

„Mengandel sama Toako poenja redjeki, kita orang tida koerang satoe apa,“ mendjawab itoe doewa tetamoe dengen berbareng.

„Kadoewa hiantee dateng dari mana ?“

„Dari kota radja,“ menerangken Kee Sian.

„Apa dalem kota radja telah dilakoeken „peroesahan“ apa-apa ?“

„Ach, Toako, djangan seboet hal itoe,“ kata lagi Kee Sian. „Kita orang di kota radja telah menerbitken kaonaran jang boekan ketjil.“

„Kaoe orang selamanja terlaloe penakoet,“ kata Lou Khay. „Telah terdjadi perkara apa sih, makanja begitoe iboek ?“

„Itoe kaonaran jang kita terbitken telah mengambil korban bebrapa djiwa manoesia,“ kata itoe doewa pendjahat dengen berbareng.

„Toako tentoe masi inget akoe poenja satoe gelang batoe giok“, menjamboeng lagi Tio Poo, „barang mana kaloe digadeken di penggadean di sini, selamanja soeka dipegang boeat limapoeloeh tael perak; tapi roemah penggadean di kota radja, roepanja tida niatan bakerdja, koetika kita kakoerangan ongkos dan menggadeken itoe gelang, ia orang tjoema maoe pegang boewat tigapoeloeh tael perak sadja. Lantaran apa kita orang djadi bertjektjok dan bilang dalem tiga hari kita orang maoe ambil poelang modalnja. Oleh kerna kita soeda oetjapken itoe perkatahan, tida bisa tida kita moesti boektiken kita poenja antjeman.

„Pada itoe malem kita orang masoek ka dalem itoe roemah penggadean, jang memake merk Heng Hin, bermoela kita boenoeh doewa toekang ronda, dan koetika soeda masoek ka dalem itoe roemah gade, kombali kita telah boenoeh lima penggawe jang berada di sitoe. Kita beroentoeng bisa gondol sedikit barang permata. Tadinja kita maoe meninggalken kita poenja nama, tapi lantaran koewatir membikin soesa pada toako, kerna kita seringkali soeka dateng ka sini, maka kita lantas oeroengken itoe niatan”.

Lou Khay lantas tertawa berkakakan.

„Kiranja tjoema perkara sabagitoe sadja,” kata ia achirnja. „Biar poen perkara jang lebih besar dari itoe, sedikit poen akoe tida merasa koewatir atawa takoet.“ Sahabisnja berkata ia lantas soeroean orangnja menjediaken barang santapan dan minoeman. „Lebih baek kita orang makan minoem dengen senang.“ menambahken lagi ia.

„Djangan,“ kata itoe doewa pendjahat. „Kita tida bernapsoe boewat makan minoem, sebab kita perloe oempatken diri, soepaja djangan kena tertangkap.“

„Kamana kaoe orang maoe pergi, boekantah ada banjak lebih laloewasa unggal di sini sadja ?“ menjegah Lou Khay. „Menoeroet akoe poenja pikiran, biar poen ka kaoe orang poenja roemah djoega, boleh tidå oesa poelang. Di sini kaoe orang toch boleh berdiam dengen senang dan tida oesa koewatir satoe apa.“

Lantaran Lou Khay menjegah dengen keras, itoe doewa pendjahat maoe apa tida tinggal makan dan minoem di sitoe. Begitoelah itoe tiga orang makan minoem sampe poewas.

Doewa hari kamoedian, sampelah waktoenja pemboekahan sembajang di Thian Tjee Bio. Kee Sian, Tio Poo bersama Lou Khay berdami maoe djalan-djalan ka itoe gredja. laorang toekaran pakean jang mentereng. Baroe sadja Lou Khay mamesen pada bebrapa belas boedjangnja menjediaken kantong-kantong oewang boewat dibagiken pada bebrapa roemah pendjoedian jang ia boeka, mendadak ada dateng masoek satoe boedjang dengen tersipoe-sipoe dan tersanga-sanga, hingga dalemn sakoetika lamanja ia tida bisa berkata-kata.

„Toa.... toa.... toaya, tjitji... la...ka.“ kata ia achir-achir. „Dalem bebrapa tahon ini, dalem kita poenja gredja tida taoe dateng orang-orang jang mendjoewal silat; tapi sekarang ada dateng doewa orang dari itoe golongan jang maoe memboeka itoe matjem pertoendjoekan. Tadi koetika kita orang menanjaken apa iaorang soeda melaporken namanja pada pengoeroes dan mendapat idjin. Iaorang bilang tida mengarti. Dan koetika kita orang mintain oewang, boekan sadja ia tida maoe kasi, sabaliknja ia soeda maki-in kita orang.....”

Baroe sadja mendenger sampe di sini, Lou Khay soeda mendjadi sangat moerka.

„Kaoe orang sama-sekali tida ada goenanja,” kata ia dengen aseran. „Apa kaoe orang tida bisa kasi hadjaran keras pada iaorang?”

„Lantaran kita orang meliat toeboenja itoe orang sangat kasar dan tinggi,” kata itoe boedjang, „kita orang koewatir tida bisa menangken pada marika.”

„Kaoe ini benar goblok sekali! Apa tida bisa panggil banjakan orang boewat keroeboetin padanja?”

Baroe sadja Lou Khay bitjara sampe di sini, mendadak ada dateng masoek lima atawa anam orang dengen tergoepoe-goepoe, dalem ka'adahan babak-beloer dan berlepotan darah.

„Toaya, tjilaka besar,”" kata bebrapa soewara dengen rameh, „di gredja ada orang jang bikin riboet !”

---

FATSAL VIII.

Soeda tentoe sadja itoe hal soeda membikin Lou Khay djadi samingkin goesar, hingga ia rasaken dadanja maoe meledak.

„Segala tjetjere brani maen gila sama akoe!” berseroeh ia dengen keras.

Itoe waktoe djoega ia soeroe orangnja panggil koempoel iapoenja toekang-toekang berklai boewat dateng ka itoe gredja, kamoedian ia bertiga dengen membawa bebrapa belas pengikoet menoedjoe ka Thian Tjee Bio. Blakangan lantas berkoempoel lagi ampat atawa limapoeloeh goendalnja, dengen laga jang tengal pada mengiringken madjikannja mengikoet ka gredja terseboet.

Sasampenja ia itoe gredja, ia menanjaken di mana adanja itoe doewa orang jang bikin riboet. Orangnja kasi taoe, marika itoe ada di sabelah Barat dari pekarangan itoe gredja. Laloch ia bersama semoewa pengikoetnja menoedjoe ka itoe tempat, tida antara lama kamoedian lantas kadengeran di sabelah depan soewara orang banjak jang berkata: „Nah, toe'pa dianja, soeda dateng !” Berbareng dengen itoe banjak orang jang pada lari dengen saraboetan. Sebab pada saban kali ini gredja bikin sembajangan, orang-orang jang dateng bersoedjoet boekan maen banjaknja, ada jang bajar kaoel, ada jang minta kaselamatan dan redjeki, ada jang mendjoewalan, ada djoega jang tjoema dateng djalan-djalan boewat meliat karamehan sadja. Dalem bebrapa tahon ini segala matjem pertoendjoekan orang bisa liat di sitoe, tjoema pertoendjoekan silat sadja jang tida ada.

Sekarang mendadak ada dateng orang-orang jang memboeka itoe matjem pertoendjoekan, soeda tentoe sadja banjak sekali orang jang tertarik dan ingin menjaksiken itoe pertoendjoekan jang soeda lama tida ada. Biasanja kaloe orang jang maoe memboeka pertoendjoekan apa sadja, lebih doeloe moesti kasi taoe maksoednja pada orang jang mengoeroes itoe gredja dengen membajar oewang tjoeke. Apabila orangnja Lou Khay merasa senang, seringkali soeka membantoein boewat menambahken ramehnja itoe pertoendjoekan.

Di antara orang-orang jang mendjoewal silat, oemoemnja djarang jang mempoenjai ilmoe kapandean jang berisi. Sebab orang-orang jang mempoenjai ilmoe kapandean sasoenggoenja, kaloe boekannja bekerdja dengen mendapet gadji tetep dari negri, tentoelah melakoeken pakerdjahan poopio. Kaloe sadja waktoe iaorang kapoetoesan ongkos djalan, baroelah mendjoewal silat, djadi boekan pakerdjahan jang tetep, hanja boewat sasemben sadja.

Pada bebrapa tahon jang berselang, ada banjak toekang-toekang mendjoewal silat kampoengan, jang sama-sekali tida mempoenjai kapandean sedjati, koetika dateng mendjoewal silat ka itoe gredja, lantas sadja pada maboer, kerna takoet dimoesoehi oleh orang-orangnja Lou Khay. Ia orang sengadja berboewat begitoe boewat membikin takoet pada jang laen-laen hingga tida brani dateng mendjoewal silat lagi ka itoe gredja, dan di laen fihak hendak oendjoek kakosenannja pada pendoedoek di itoe tempat, soepaja orang banjak djadi samingkin takoet padanja.

Tjoema sadja itoe orang-orang jang sekarang mendjoewal silat ka sitoe, sama-sekali boekannja toekang mendjoewal silat, hanja orang-orang jang bakerdja di bawah prentah Gan Sin Bin. jang satoe bernama Liong Tho dan jang laennja bernama Yauw Beng. Sabagimana pembatja soeda taoe, koetika menaloekin orang-orang di Koensan, iaorang poera-poera menaloek pada Tjiong Taypoo dan koetika orang mametjahken Tong Bong Tin, iaorang diwadjibken melindoengken pada Gan Sin Bin,

Blakangan koetika Tie Hoa mengala gandjarannja pada Sim Tiong Goan dan teroes maboer, Gan Sin Bin moestiken orangnja pergi tjari djoega pada Tie Hoa sampe dapet, sebab dikoewatir pada koetika firman keizer dateng meminta itoe orang tapi orangnja tida ada. Semoewa orang pada berdami boewat mentjari pada Hek-ho-lie, tapi tjoema Tjhio Peng saorang jang tida kaliatan mata-idoengnja. Maka iaorang pada sasoe danja berdami dengen mateng, dengen terpentjar pada menoedjoe ka kota radja, saparo boewat mentjari pada Tie Hoa, saparo boewat menjerepin di mana adanja Siang yang Ong, jang apabila bisa dikatemoeken, tida perdoeli bersama kontjo-kontjonja, semoewa moesti ditangkep dan troes dibawa ka kota radja.

Koetika iaorang maoe brangkat, dari Kay-hong-hoe telah dikirim sadjoembla oewang boeat ia orang poenja ongkos, pada sasoedanja menerima ongkos, masing-masing mamilih sendiri kawan boewat sama-sama djalan. Liong The lantaran ada tersangkoet familie sama Yauw Beng, maka iaorang berdjalan sama-sama; tapi iaorang boekannja maoe mentjari Tie Hoa atawa poen Siangyang Ong, hanja hendak poelang menengokin roemah, lantaran iaorang koewatir disoeroe mendjabat pakerdjahan di kota radja, djadi tida sempet boewat poelang lagi ka roemah.

Tatkala iaorang sampe di Tjo-kio-tien, moesti membiloek mengambil djalan ka Sin-yan-tjioe, tapi itoe doewa orang jang memangnja kasar dan bodo, tambahan bikin perdjalanan dengen tida memake kandaran, itoe waktoe iaorang merasa tjape dan lelah lantas iaorang brenti mengaso di bawahnja satoe gombolan poehoen, tapi dengen tida merasa lagi iaorang djadi mengantoek dan kapoelesan. Koetika iaorang mendoesin, semoewa barang bawa'annja telah digondol orang pada waktoe ia lagi menggeros dengen enak, lantaran apa pada iaorang tjoema katinggalan sadja pakean jang dipake di badan berikoet iapoenja golok jang tergantoeng di masing-masing poenja pinggang, begitoe poen Yauw Beng poenja gembolan tida tertjoeri.

Itoe doea orang lantas saling awasin dengen bingoeng dan tida bisa berkata-kata dalem sasa'at lamanja. Kamoedian iaorang saling sesalken satoe sama laen. Jang satoe bilang mengapa akoe kapoelesan, kaoe djoega toeroet tidoer; tapi jang laennja bilang, akoe jang tidoer doeloean, kaoe jang tetoeroetan tidoer. Achirnja iaorang mengoetoek pada itoe pentjoeri jang koerang adjar. Tapi apa jang iaorang bisa berboewat? Barang-barang soeda hilang, sekalipoen mengoetoek kerak-keroek toch itoe barang-barang tida nanti bisa balik kombali. Dengen apa boleh boewat iaorang moesti trima oentoeng.

laorang lantas berbangkit dan pergi menginep di satoe roemah penginepan, tapi lantaran oewang jang tersimpen dalem dompet koelit tida sabrapa, boleh dibilang iaorang soeda tida mempoenjai bekal lagi boewat meneroesken perdjalanannja. Di hari jang berikoetnja Liong Tho berkata pada kawannja:,,Nanti kaloe kita soeda sampe di tapel wates Sin-yang-tjioe, kita boleh tida oesa koewatir kalaparan; tapi samentara ini, apa boleh boewat kita moesti brangkat pagi-pagi dan kita poenja doeit jang masi katinggalan kita boleh goenaken boewat bajar pemondokan kamoedian melandjoetken lagi perdjalanan dengen mengiket peroet.“

Kabetoelan iaorang djalan meliwati Thian Tjee Bio, di mana ada berkroemoen banjak sekali orang. Mendadak Yauw Beng mendapat satoe pikiran bagoes.

„Soedara Liong.“ kata ia, „di sini ada satoe tempat baek boewat dapetken oewang, oleh kerna ini waktoe kita lagi kapoetoesan ongkos, mengapatah kita tida maoe mentjari sedikit oewang di sini, agar djangan di sapandjang djalanan kita moesti bikin pindjeman pada orang, begitoe djoega moesti menoenggoe pada sasoedanja kita bisa sampe di bilangan Sin-yang-tjioe, dengen begitoe, boekantah ada banjak lebih baek ?“

„Tjari oewang dengen tjara bagimana?“ menanja Liong Tho.“

„Boekantah kaoe ada mempoenjai kapandean ilmoe silat ?“ balik menanja Yauw Beng. „Orang jang mempoenjai ilmoe kapandean silat, boekankah boleh pertoendjoeken kapandeannja pada orang banjak boewat mendapetken oewang?“

Itoe omongan soeda membikin tersedar otaknja Liong Tho jang poentoel. laorang lantas mengoempoel doewa tiga ratoes tangtjhie, jaitoe sisa katinggalan dari apa jang iaorang poenjaken di itoe waktoe, kamoedian iaorang mamilih satoe tempat di loewarnja itoe gredja jang sabelah Barat, Yauw Beng soeroe Liong Tho menoenggoe di sitoe dan lantas berlaloéh, tida lama kamoedian ia balik kombali dengen membawa satoe papan jang dilapisin tanah poetih. Liong Tho tida mengarti apa goenanja itoe papan, dan ia lantas tanjaken hal itoe pada kawannja.

„Ini papan akoe baroe beli,“ manerangken Yauw Beng. „Pada sasoedanja kita mempoenjai ini papan, akoę bisa pertoendjoeken akoe poenja kapandean malempar tempoeling.“

„Ach, kombali kaoe benar, soedara,“ kataLiong Tho.

Yauw Beng taro itoe papan dan berlaloe lagi, sedikit sa'at kamoedian ia soeda balik kombali dengen berlari-lari, dan di blakangnja ada mengikoeti saorang jang mengoeber sembari moeloetnja tida brentinja berkaok „Aja, aja.“ Liong Tho doega tentoe kawannja soeda menerbitken kaonaran, dan ia lantas tanjaken hal itoe pada Yauw Beng. Kiranja itoe orang jang mengedjar ada satoe sinshe siang-miah, jang lagi mamegang pit dan tjepoek aer bak boewat meliatin orang poenja peroentoengan Yauw Beng dengen tida kata ba atawa boe, lantas sadja rampas itoe pit dan bak, kamoedian baroe ia bilang maoe pindjem doeloe sabentaran, dan lantas sadja ia berlari-lari, maka itoe toekang meliatin lantas mengoeber padanja.

„Tida perloe kaoe mengoeber,“ kata Yauw Beng. „Nanti pada sasoedanja akoe pake lantas akoe poelangin lagi.“

Tapi itoe sinshe siang-kiah tida ambil perdoeli mengedjar teroes dan berkaok-kaok, jang dari soewaranja bisa dikenalin ada orang kalahiran Selatan.

„Aja, ini orang soeda nerampas akoe poenja pit dan bak,“ kata ia.

Lantaran itoe, kabetoelan sekali djadi menarik orang banjak poenja perhatian, hingga boekan sedikit orang-orang jang mengikoeti ka sitoe. Tapi Yauw Beng tida mengopenin, lantas sadja ia moelai meloekisken gambar sama itoe pit di atas itoe papan jang dilapisan loempoer poetih. Itoe gambar meroepaken satoe orang, dengen mata, idoeng, moeloet dan koeping. malah dibagian peroetnja dibikinken djoega satoe poesernja. Sasoedanja seleseh bikin iapoenja loekisan, baroelah ia pasrahken kombali itoe pit dan tjepoek bak pada itoe sinshe khwa-miah, jang lantas berlaloe dengen menggroetoe.

Dengen zonder bikin banjak reclame lagi, itoe waktoe soeda berkroemoem banjak orang jang mengeroeboengin pada iaorang. Yauw Beng dan Liong Tho bereboet maoe kasi pertoendjoekan doeloean; tapi achirnja Liong Tho jang moelai bikin pemboekahan. Tjoema sadja ia tida biasa oetjapken omongan sabagimana biasanja toekang mendjoewal silat,

„Kita orang ada dari laen tempat”, kata ia dengen serat, „dan boekannja soeda biasa mendjoewal silat. Tjoema dari sebab tida mempoenjai oewang boewat ongkos makan dan mondok, terpaksa kita memboeka ini pertoendjoekan. Tapi kita tjoema mempoenjai sedikit tenaga jang kasar boewat dipertoendjoeken pada toewan-toewan sekalian dan djangan dipandang sabagi pertoendjoekan silat jang biasa, hanja anggep sadja sebagi memberi sedikit pertoeloengan pada kita orang”.

Sahabisnja berkata ia lantas moelai iapoenja ilmoe silat golok jang pada saban tiga kali batjokan atawa toesoekan dibarengin sama satoe tendangan. Begitoelah sateroesnja, sebab memangnja ia tida mempoenjai lagi laen matjem kamampoean. Pada sasoedanja berselang bebrapa sa'at lamanja, di antara penonton ada jang memoedji bahoewa iapoenja ilmoe silat golok sasoenggoenja bagoes sekali. Maka ia lantas brenti bersilat, ampir dalem sa'at itoe djoega ada bebrapa banjak oewang jang dilemparken ka dalem kalangan. Yauw Beng lantas kasi liat iapoenja ilmoe silat gembolan dalem bebrapa djoeroesan, djoega ada banjak orang jang malemparken oewang.

Yauw Beng lantas berdiriken itoe papan jang ada loekisannja orang-orangan. Bermoela ia timpoeken tempoelingnja pada itoe orang-orangan poenja bagian halis, blakangan ia djoedjoe bagian kadoewa matanja itoe loekisan, dan itoe tiga tempoeling semoewanja mengenaken dengen djitoe sekali, hingga orang banjak menjamboet dengen tampik-soerak jang rioeh sekali. Kombali orang banjak melemparken oewang ka dalem kalangan. Tatkala Yauw Beng hendak menimpoeken lagi iapoenja tempoeling ka djoeroesan itoe gambar orang poenja bagian poeser, mendadak dari sabelah loewar ada mendesak masoek ampat atawa lima orang, jang semoewanja memake topi dengen miring dan mendeliken matanja.

„Siapa jang kasi idjin kaoe orang memboeka pertoendjoekan di sini ?” menanja salah satoe di antaranja dengen laga jang tjongkak.

Ini doewa orang kasar, manatah bisa oetjapken perkatahan manis dan lemboet. „Apa kaoe maoe perdoeli siapa jang kasi idjin ?” kata marika dengen berbareng.

„Apa kaoe orang soeda kasi laporan pada pengoeroes ?”

„Kita tida mengarti apa jang dinamaken laporan pada pengoeroes?”

„Apabila kaoe orang belon kasi lapor, moesti brentiken ini pertoendjoekan.” Liong Tho dan Yauw Beng meliat dalem sakedjapan mata sadja soeda mendapet begitoe banjak oewang, manatah iaorang bisa kamgoan boewat lantas brentiken iaorang poenja pertoendjoekan. Achirnja iaorang djadi tjektjok dan teroes berklai. Fihak orang-orang Lou Khay lantaran mengandel pada marika poenja madjikan poenja pengaroeh, memang soeda biasanja soeka berboewat jang tida patoet, apa lagi sekarang ada orang jang brani membantah iaorang poenja kainginan. Tjoema sadja itoe ampat atawa lima boewaja-darat, jang tida mempoenjai kapandean satoe apa, salaennja menang gertak, dalem sedikit tempo sadja soeda kena dilabrak soengsangsoembel dan babak-beloer dengen mengaloewarken darah.

„Kaoe orang djangan lari dan toenggoe di sini, kaloe betoel laki-laki,” kata itoe bebrapa goendal djahat jang babak beloer.

„Soeda tentoe sadja kita maoe berdiam teroes di sini,” saoet itoe doewa orang. „sebab kita masi perloe sama oewang.”

Itoe bebrapa goendal jang telah mendapat labrakan lantas pada lari boewat mengasi kabar pada madjikannja. Orang-orang jang menonton banjak jang kasi pikiran soepaja itoe doewa orang lekasan menjingkir dari sitoe, sebab itoe orang-orang boekannja boleh diboewat maen-maen.

„Saoepamanja boleh diboewat maen-maen,” kata Yauw Beng, „lebih siang kita soeda menjingkir; tapi djoestroe lantaran tida boleh diboewat maen-maen, kita sengadja maoe maen-maen sama iaorang.”

Liong Tho koempoelken itoe oewang jang berarakan di atas tanah. Berhoeboeng dengen itoe di sabelah loewar kadengeran soewara riboetriboet. Penonton jang bernjali ketjil lantas pada lari menjingkir dengen kalang-kaboet.

,,Mana dianja ?" kadengeran satoe soewara menanja di sabelah loewar.

,,Masi ada di sabelah dalem; iaorang belon lari," saoet bebrapa soeara.

Itoe waktoe Lou Khay. Kee Sian dan Tio Poo mendesek masoek lebih doeloe, sasampenja ia berpaling pada semoewa pengikoetnja dan pesen iaorang djangan toeroen tangan doeloe, kamoedian ia balik memandang pada Liong Tho dan Yauw Beng.

,,Apa kaoe berdoewa ada toekang mendjoewal silat ?" menanja ia.

,,Ja, bener; kaoe ini inanoesia maoe apa ?" djawab Yauw Beng.

,,Kaoe ini ada saorang jang beroesaha boewat mentjari penghidoepan," menjelak Tio Poo,

,,mengapa katemoe moeka lantas sadja mengaloewarken omongan jang koerang-adjar?"

,,Kaoe poenja omongan seperti kentoet sadja," berseroeh Liong Tho dengen goesar ,,Siapatah djoega jang beroesaha boewat mentjari penghidoepan? Kaoe tida sedilikin doeloe siapa adanja kaoe poenja kadoewa loya ini."

,,Apa? Loya ?" menjentak Tio Poo dengen goesar. Kaoe poenja engkoe maoe kasi labrakan padamoe."

Sahabisnja berkata ia lantas berlompat menjerang pada Liong Tho. Sabagitoe lekas ia berdiri dengen djedjak lantas ia menondjok pada itoe orang jang diserang. Liong Tho lantas samboet itoe kepelan dengen menjengkerem, sebab lebih siang Tio Poo soeda tarik poelang iapoenja kepelan. Begitoelah dalem ampat atawa lima djoeroesan iaorang bertempoer. Tiat-thoei-ho lantas menjapoe sama kakinja dari samping, jang tida ampoen lagi mengenaken toeboenja Liong Tho dan teroes roeboeh ka moeka boemi seperti satoe poehoen jang ditebang.

Liong Tho memangnja tida mempoenjai ilmoe kapandean tinggi dan apabila ia menggoenaken sendjata golok, djoega ia moesti toeroen tangan doeloean, nistjaja ia bisa kaloewarken iapoenja ilmoe silat jang membatjok atawa menoesoek tiga kali, lantas dibarengin dengen satoe kali tendangan. Dengen begitoe ia bisa mengangsek seperti satoe kerbo gila dan sedikitnja tentoe ia bisa menang di atas angin. Tapi djika disoeroe bertanding ilmoe silat tangan kosong soeda tentoe sadja tida ada goenanja.

Sabagitoe lekas Liong Tho djato meloso, Yauw Beng lantas mendjadi iboek dan goesar, dengen satoe kali lompat ia menjengkeram pada Tio Poo, orang siapa tentoe sadja tida maoe kasiken dirinja ditjekal orang. Itoe waktoe djoega ia pentang kadoewa tangannja sembari berlompat menendang. Dak mengenaken badannja Yauw Beng, jang lantas djadi sempojongan sedikit.

„Aja, anakkoe, mari tjoba lagi satoe kali!" berseroeh ia.

Sasoenggoenja djoega, „boek!" kadengerannja Tio Poo poenja tendangan mengenaken lagi bagian pinggangnja itoe orang jang menangtang. tendangan mana membikin Yauw Beng djadi sempojongan lagi doewa atawa tiga kali. Tapi ternjata ia ada sampe bengal dan koewat menahan sakit.

,,Hei, anakkoe, tjoba lagi satoe kali," kata ia sembari berdjengit.

Sabetoelnja kaloe berboewat apa-apa soeda berhasil, djangan sekali soeka kaenakan dan oelangken berkali-kali itoe perboewatan. Tapi Tio Poo pikir lawanannja ada sangat goblok, maoe manda ditendangin begitoe roepa, maka dengen zonder berpikir lebih mateng, kombali ia menendang. Sebab ia pikir, taro kata tida mendjadi mampoes, toch sedikitnja moesti roeboeh ka moeka boemi. Tjoema sadja satoe kali ini, Yauw Beng tida berlakoe bodo lagi seperti doeloean, tatkala itoe tendangan ampir sampe, dengen sabelah tangan kanannja ia menondjok sakeras-kerasnja pada itoe pendjahat poenja bagian loetoet.

,,Adoeh !" bertreak Tio Poo jang lantas djato tjelentang lantaran loetoetnja kena ditondjok begitoe roepa.

Kim-kak-lok dateng memboeroe dan lantas bertaroeng sama Yauw Beng, dalem doewa atawa tiga djoeroesan, ia lantas goenaken kapalanja menjeroedoek ka djoeroesan dadanja iapoenja lawanan, jang lantas tjendorongken toeboe bagian atasnja ka blakang boewat mengegos itoe seroedoekan kapala, berbareng dengen itoe ia menondjok sakeras - kerasnja pada Kee Sian poenja moeka.....

Ini Kee Sian mengapa dikasiken itoe gelaran Kim-kak-lok? Kerna ia bisa goenaken kapalanja menjeroedoek seperti satoe kambing. Kaloe sadja japoenja kapala mengenaken lawanannja poenja badan, nistjaja lantas djato tjelentang dengen tida bisa menapas. Tjoema sadja sekarang ia katemoeken Yauw Beng, ia katemoeken tandingannja jang keras. Sebab ia itoe sekalipoen boekan ada mempoenjai ilmoe ,,wedoek" jang tida bisa mempan barang tadjem, tapi ia poenja koelit, daging dan oerat-oerat dari tjiptahannja Allah memang sanget kasar dan koewat dan iapoenja tenaga soeda tentoe sadja boekannja boleh diboewat maen-maen.

Maka itoe waktoe, sabagitoe lekas iapoenja kepelan mengenaken moekanja Kim-kak-lok, lantas sadja itoe pendjahat djadi berkaok lantaran kasakitan dan teroes roeboeh dengen djoempalitan. Yauw Beng madjoe memboeroe dengen niatan kasi persen lagi satoe tendangan; tapi Kee Sian jang gerakan badannja gesit, dalem itoe waktoe djoega lantas goenaken tipoe Lee-hie-ta-teng, berlompat bangoen dari tempat di mana ia djato. Dan djoestroe di itoe waktoe Lou Khay dateng memboeroe dengen membawa sendjata.

Di laen fihak Tio Poo poen lebih siang soeda berbangkit dan menghoenoes goloknja bertempoer sama Liong Tho. Sabagimana biasanja, Liong Tho tida maoe kasiken laen orang bergerak lebih doeloe, hanja dengen lantas ia kaloewarken iapoenja ilmoe „tiga kali batjokan golok dibarengin sama satoe kali tendangan,” lantaran apa soeda membikin Tio Poo terserang dengen ripoeh dan gelagapan, hingga ia rasaken kapalanja djadi poesing.

Kee Sian jang soeda bisa bernapas poen, lantas menjaboet iapoenja golok dan menjerang pada Yauw Beng, orang siapa lantas kaloewarken iapoenja gembolan besi jang sabesar pinggang. Itoe waktoe Kee Sian poenja golok membatjok ka djoeroesan atasan kapalanja. la menoenggoe sampe itoe golok soeda dateng dekat, baroelah ia mengangkat gembolannja boeat menangkis „Trang !” kadengerannja itoe golok jang beradoe sama itoe gembolan. Kee Sian rasaken iapoenja telapakan tangan jang mamegang golok seperti maoe terbeset. la lantas lemparken goloknja dan balikin badanja teroes maboer. Tio Poo lama-lama taoe djoega jang Liong Tho poenja ilmoe silat golok tjoema sabagitoe sadja, koetika ia meliat Kee Sian kena dikalaken oleh Yauw Beng, ia lantas tida mengopenin pada lawanannja sendiri, hanja lantas sadja menoesoek dengen goloknja ka djoeroesan Yauw Beng poenja blakang; tapi orang jang diserang poen soeda dapet taoe hal itoe, dengen tjepat ia balikin badannja sembari menjampok sama iapoenja gembolan. Goloknja Tio Poo jang kena tersampok, djoega tida bisa dipegang kekal dalem tangannja dan teroes djato ka moeka boemi.

Beroentoeng ada dateng Lou Khay jang menjelak. Ia menjerang dengen goloknja pada Yauw Beng jang maoe mengedjar Kee Sian, tapi koetika iapoenja golok ditangkis oleh moesoehnja, dengen tjepat ia tarik poelang dan begitoelah sateroesnja ia tida kasiken goloknja djadi beradoe sama sendjatanja iapoenja moesoeh, Baroe sadja berdjalan ampat atawa lima djoeroesan, di sabelah sana kadengeran Liong Tho djato tjelentang lantaran kena diseroedoek oleh Kee Sian. Hal mana soeda membikin Yauw Beng djadi terkedjoet dan bengong sakoetika lamanja. Sama-sekali ia tida njana djoestroe pada itoe waktoe Tio Poo menendang dari blakang ka iapoenja tekoekan loetoet. Soeda tentoe sadja kakinja djadi lemas dan teroes djato kasoempat.

Djoestroe pada waktoe Lou Khay maoe membatjok pada blakangnja, mendadak ada kadengeran saorang berseroeh dengen lagoe bitjara Selatan.

„Hola, kaoe binatang-binatang,” kata itoe orang jang berlompat menghamperi, „apa brani melakoeken pemboenoehan di tempat terboeka dan di waktoe siang?” Berbareng dengen itoe ia lantas menjerang pada Lou Khay dengen tida banjak bitjara lagi. Itoe orang boekan laen dari Seng-tjhioe-sioe-soe, Pang Jan. la berdjalan bersama-sama Ngai Houwdan Lou Tien bertiga. Di sapandjang djalan iaorang mentjari taoe di mana adanja Tie Hoa dan Siang-yang-Ong.

Di tengah perdjalanan, Ngai Houw bilang ia maoe pergi tjari satoe orang, lebih baek berpisahan sadja dan bertemoe kombali di kota radja. Ini semoewa tersebab Ngai Houw tida bisa akoer sama Pang Jan. Maka ia maoe menjimpang ka Yang-tjioe boewat tengok iapoenja goeroe.

Louw Tien jang djalan berdoewa sama Pang Jan, itoe hari sampe di Tjio-kio-tin boewat brenti mengaso dan makan. Itoe toekang roemah makan jang soeka banjak mengomong berkata pada ia orang Mengapa toewan-toewan tida maoe pergi liat karamean?”

„Liat karamean apa ?” menanja Pang Jan.

„Di sini ada satoe gredja jang diseboet Thian Tjee Bio”, djawab itoe toekang roemah makan. „Doeloean, Pauw Kong dari Kay-hong-hoe telah ketemoeken iboe soeri Lie Tayhouw di ini tempat, dan blakangan pada sasoedanja iboe soeri balik poelang ka dalem astana, lantas soeroe bikin baroe itoe Thian Tjee Bio, hingga sekarang itoe gredja ada rameh sekali sama orang-orang jang dateng bersoedjoet. Akoe rasa toewan berdoewa baek sekali pergi nonton doeloe ka itoe gredja, kamoedian baroe brangkat lagi”.

Apabila menoeroet pikirannja Louw Tien, tida maoe pergi nonton.

„Kita orang perloe boeroe-boeroe brangkat ka kota radja,” kata ia. Apatah perloenja pergi menonton segala karamean jang begitoean?” Pang Jan terpaksa moesti manggoetken kapalanja boewat menjataken iapoenja satoedjoe. Pada sasoedanja iaorang makan, Pang Jan lantas pergi ka loewarnja itoe roemah makan, ia liat ada bererot-rerot goendoekan orang jang pada menoedjoe ka djoeroesan Barat, deng-n tida merasa lagi ia poen toeroet mengikoetin pada itoe rerotan orang banjak. Tida lama kamoedian itoe gredja soeda kaliatan, tapi ia liat banjak orang jang pada lari sana-sini dengen seraboetan. Dengen rioeh kadengeran orang banjak bertreak: „Riboet! Roesoeh! Perklaian sengit !”

Pang Jan lantas dateng memboeroe dan mendesak di antara orang banjak, iapoenja kadatangan djoestroe kabetoelan sekali, sebab itoe waktoe Lou Khay djoestroe hendak memboenoeh pada Yauw Beng, di laen fihak ia liat Liong Tho poen soeda kena diringkoes orang. Hal mana membikin Pang Jan djadi kaget, sembari menjaboet golok sembari memaki ia menerdjang pada Lou Khay. Pada waktoe ia berdoewa bertempoer, Yauw Beng poen di'iket oleh orang-orangnja Oa-Giam-Ong. Kee Sian poengoet goloknja Liong Tho, dan Tio Poo poengoet ia sendiri poenja golok jang lebih doeloe terlepas dari tangannja, semoewanja dateng mengeroeboetin pada Pang Jan.

Pang Jan jang dikeroeboetin bikin perlawanan sembari memaki, tapi sedikit poen ia tida merasa takoet pada itoe tiga pendjahat, sabaliknja itoe tiga pendjahat poen tida pandang mata pada Pang Jan. Sembari bertaroeng Lou Khay menanja pada Pang Jan, bahoewa sama-sekali iapoenja kontjo-kontjo ada brapa banjak, soepaja gampang ditangkep semoewanja boewat pasrahken pada pembesar di ini tempat. Tapi Pang Jan tida maoe ambil perdoeli orang poenja pertanjahan. Begitoelah iaorang bertempoer bebrapa lamanja dengen berimbang masing-masing poerja kakoewatan. Mendadak dari djoeroesan Selatan ada dateng lagi saorang laen, jang dengen soewara lemah-lemboet menanjaken apa sebabnja iaorang bertaroeng.

„Apatah sebabnja maka kaoe orang bertaroeng begini sengit ?” menanja orang itoe Sabetoelnja lantaran oeroesan apa sih? Tjobalah kaoe orang tjeritaken padakoe, kamoedian masi ada banjak tempo boewat melandjoetken lagi ini pertempoeran.”

„Aja, Toako, mengapa maoe mengopenin pada iaorang?” berseroeh Pang Jan. „Kita poenja orang semoewanja kena ditangkap dan di'iket oleh marika. Toch, di sana, tjoba liat sendiri sadja.”

Orang itoe boekan laen dari Louw Tien, jang koetika mentjari pada Pang Jan tida kaliatan mata-idoengnja, ia lantas tanjaken pada toekang roemah makan, baroelah ia taoe, bahoewa kwannja soeda pergi djalan-djalan ka gredja Thian Tjee. la merasa koewatir sekali, jang Pang Jan aken menerbitken kaonaran apa-apa. Maka ia lantas dateng menjoesoel ka sini. Sasampenja ia denger rameh orang bitjara bahoewa soeda terdjadi perkara pemboenoehan. la pikir siang hari begimana ada orang brani melakoeken pemboenoehan di ini gredja. Lantaran ia sangka Pang Jan jang menerbitken katjilakahan apa-apa, ia lantas memboeroe ka itoe tempat bertaroeng, dan liat Pang Jan lagi dikroeboetin oleh itoe tiga orang.

Blakangan koetika Pang Jan oendjoekin padanja bahoewa Liong Tho dan Yauw Beng telah kena tertangkap dan di-iket, terpaksa ia poen lantas menghoenoes goloknja dan madjoe menerdjang boewat membantoei kawannja. Satoe kali Louw Tien toeroet toeroen tangan, kadoewa fihak poenja ilmoe kapandean lantas ternjata terpaoet djaoeh sekali. Dalem sakedjapan mata sadja, ia soeda kasi labrakan itoe tiga pendjahat djadi gelagapan dan terdesak dengen ripoeh.

Hal mana membikin iboek pikirannja Lou Khay, djoestroe pada waktoe ia hendak kasi prentah orang-orangnja madjoe mengeroeboetin boeat perang sabil, mendadak di sebelah Selatan ada kadengeran soeara riboet-riboet: „Nona soeda dateng !” dan itoe kawanan goendal pada menjingkir ka pinggir boeat mengasi satoe djalan. Ampir dalem sa'at itoe djoega dari sabelah loear ada dateng masoek satoe gadis jang parasnja sanget eilok tapi tingkanja genit.

Pembatja tentoe soeda mendoega bahoewa ini gadis ada Lou So Tjin, soedara prempoeannja Lou Khay. Itoe waktoe ia berpakean badjoe dan tjelana jang serba ringkes dan tida memake koen. Tjoema di loearnja ia ada memake satoe djoeba pandjang. Sebab ia mendapet kabar dari boedjang-boedjang bahoewa di gredja soeda terdjadi satoe perklaian heibat, antara iapoenja orang-orang dengen bebrapa toekang mendjoewal silat. Koetika ia sampe, djoestroe pada waktoe engkonja, dan iapoenja doea kawan lagi kena didesek keras oleh satoe pemoeda tjakap, maka ia lantas melepasken iapoenja djoeba dan berkata:

„Engko-engko sekalian, harep soeka menjingkir, biarken akoe jang menangkep pada ini manoesia-manoesia koerang-adjar.”

Louw Tien lantaran meliat orang jang dateng ada satoe prampoewan, ia tida maoe madjoe menjerang; tapi Pang Jan sama-sekali tida maoe ambil perdoeli itoe, hanja lantas sadja madjoe menjerang sama iapoenja golok. Lou So Tjin tida menangkis orang poenja batjokan itoe, hanja moendoer satoe tindak ka blakang boewat mengegos itoe batjokan, kamoedian ia mengangkat sabelah kakinja menendang ka djoeroesan tangannja Pang Jan jang mamegang golok dan itoe tendangan telah mengenaken dengen telek, hingga Pang Jan lantas berseroeh lantaran kasakitan serta melepasken itoe golok jang ia pegang. Ampir dalem sa'at itoe djoega Lou So Tjin bongkokin sedikit badannja dan menjapoe sama sabelah kakinja. Pang Jan jang masi rasaken sakitnja ia poenja tangan, tida sempet berkelit, maka dalem itoe waktoe djoega ia lantas djato roeboeh sabagi satoe gedebong jang ditebang. Lou So Tjin lantas madjoe menerdjang pada Louw Tien.

---

FATSAL IX.

Kioe-bwee-sian-ho dari satadian soeda memperhatiken romannja Louw Tien jang sanget tjakap, hingga iapoenja hati merasa tertarik. Samentara Louw Tien jang meliat Pang Jan kena diroeboehken dan teroes tertangkap, soeda tentoe sadja ia djadi sangat goesar; sekarang ia soeda tida maoe ambil perdoeli lagi apa itoe moesoeh ada satoe prampoewan atawa boekan, hanja lantas sadja madjoe menjerang dengen mengaloewarken iapoenja sa'antero ilmoe kapandean. Ia bernapsoe sekali dengen satoe kali tabas sadja bikin poetoes kapalanja itoe prampoewan genit kamoedian dengen tida soesa ia bisa beresin jang laen-laennja Tapi, ia poen taoe bahoewa ini prampoewan poenja ilmoe silat ada sampe tinggi, sebab kaloe boekannja begitoe, tentoelah Pang Jan tida nanti bisa dikalahken dengen begitoe gampang. Maka ia poeter goloknja dengen katjepetan seperti angin dan kilat. Ia bersilat dalem ilmoe silat jang dinamaken Ban-sin-too. Iapoenja golok sabentar menjamber ka atas, sabentar menjamber ka atas, sabentar ka bawah, kamoedian ka kiri dan ka kanan, tjepatnja malebihken dari titiran, hal mana soeda membikin Lou So Tjin djadi sangat ripoeh dan sama-sekali tida mendapat koetika boewat membales menjerang. Masi oentoeng iapoenja gerakan badan sampe sebat dan bisa mengegos kiri-kanan dengen tjepat; tapi biar poen begitoe, ia taoe lama-lama tentoe ia bakal tjilaka.

Ia pikir tjilaka betoel, kaloe ini hari moesti kena dikalahken oleh ini orang. Malah iapoenja engko poenja nama jang soeda begitoe termashoer, dalam sakedjapan tentoe aken djadi ternoda. Lantaran hatinja bingoeng dan takoet, matanja djadi koerang awas, sedeng iapoenja gerakan badan dan kaki tangan djoega tida begitoe laloewasa lagi seperti doeloean.

Louw Tien meliat itoe keadahan, dalem hatinja merasa sanget girang dan taoe jang ia tentoe bakal bisa kalahken itoe prampoewan, Lou So Tjin jang soeda berniat berlompat kaloewar dari kalangan bertanding, laloeh poera-poera membatjok pada moesoehnja, tapi Louw Tien tida kena diakalin, boekanja ia berkelit, sabaliknja ia menendang ka djoeroesan tangannja itoe prampoewan jang membatjok.

„Adoeh !“ berseroeh Kioebwee-sian-ho lantaran kasakitan ; „Kontrang !“ soewaranja iapoenja golok jang terlempar ka moeka boemi. Louw Tien barengin ini koetika jang baek lantas angkat goloknja menoesoek ka djoeroesan blakangnja Lou So Tjin, sebab itoe prampoewan djoestroe soeda belikin badannja boewat maboer. Apabila Lauw Tien teroesken iapoenja toesoekan dengen keras, tida ampoen lagi tentoe itoe golok terpendem dalem badannja itoe prampoewan genit; tapi ia lantaran merasa tida tega dan tida maoe membinasaken djiwa manoesia, ia djadi berlakoe ajal sedikit. Inilah jang dikataken manoesia tida berniat meloekai pada sang matjan, tapi sabaliknja sang matjan sengadja maoe menjilakai pada manoesia.

Lou So Tjin lantaran kaget dan katakoetan, iapoenja moeka jang dipoepoerin dengen tebel berobah mendjadi koening seperti salembar kertas. Ia taoe goloknja Louw Tien jang berada di blakangnja, biar poen maoe berkelit djoega tida nanti bisa dikasi liwat; tapi soeda tentoe sadja ia moesti berdaja sabisa-bisanja boewat singkirken itoe toesoekan jang sanget berbahaja. Tjoema sadja dalem sa'at itoe djoega ia mendapet kanjatahan jang Louw Tien soeda perlahanken iapoenja gerakan tangan jang menoesoek, sabagi djoege merasa tida tega menoesoek padanja. Dalem tempo jang begitoe pendek, ia bisa pikir bahoewa Louw Tien ada saorang jang berboedi dan baek hati. Ia terasa sanget bersoekoer atas boedi kabaekanja itoe anak moeda jang tjakap.

Itoe semoewa hal terdjadi dalem tempo jang sangat pendek. Pada waktoe Louw Tien bersangsi dan Lou So Tjin berpikir, terdjadi dalem sedikit sa'at sadja. Tapi itoe prampoewan bengal tida tinggal diam, sembari berpikir tangannja mengambil saroepa barang jang berwarna merah dari badannja, jang kamoedian ia keboetken ka djoeroesan moekannja Louw Tien, orang siapa dalem sa'at itoe djoega kapalannja djadi poesing dan mata gelap, kamoedian ia djato kasoempet dengen tida inget orang.

„Manoesia koerang-adjar, brapa banjak sih kaoe poenja kapandean !“ berseroeh Lou So Tjin jang sekarang bisa berlakoe katak lagi. Ia berpaling pada engkonja dan berkata lagi: „Engko-engko sekalian boleh soeroe orang ringkoes padanja, tapi djangan binasaken iapoenja djiwa.“

„Baeklah,“ djawab Lou Khay.

Kamoedian ia kasi prentah pada orang-orangnja boewat iket pada Louw Tien dan bersama tiga orang jang laennja dibawa ka roemahnja. Orang-orang jang menjaksiken itoe karamehan atawa poen kariboetan, semoewa pada boebaran. Banjak di antaranja jang berhati baek merasa sangat koewatir bagi kaselamatannja itoe ampat orang jang terdjato di dalem tangannja itoe orang-orang djahat. Lou So Tjin lantas poengoet kombali iapoenja golok dan pake lagi iapoenja djoeba, lantas poelang doeloean ka roemahnja.

Lou Khay bersama Lee Sian dan Tio Poo dengen di-iringken oleh kambrat-kambratnja mengiringken itoe ampat orang tawanan menoedjoe ka ia poenja roemah. Sasampenja ia soeroe taro itow ampat orang tawanan di moeloet pintoenja iapoenja kamar-boekoe. Koetika iaorang soeda berdoedoek di dalem itoe kamar, Tio Po lantas menanja : „Toako, itoe bebrapa orang tawanan maoe dibagimanain ?“

„Boenoeh sadja pada marika itoe,“ kata Lou Khay dengen tida berpikir pandjang.

„Djangan,“ menjega Kee Sian. Akoe liat itoe ampat orang boekannja bangsa sembaranganAkoe rasa ada lebih baek tanjaken doeloe ia. orang poenja asal oeooel, kamoedian masi ada banjak tempo boewat memboenoeh pada iaorang. Lagian, tadi akoe denger ada So Tjin bilang djangan boenoeh pada itoe anak moeda. Salaennja itoe, akoe liat marika itoe boekannja seperti orang sini, malah salah satoe di antaranja iapoenja lagoe bitjara seperti orang dari Selatan, jang kaloe boekannja kawanan Liok-lim tentoelah Eng-djiauw (perkatahan resia bangsa pendjahat jang berarti ambtenaar atawa politie). Maka akoe rasa paling betoel kita moesti tanjaken doeloe iaorang poenja hal-ichwal.“

„Kaloe soedara bilang begitoe, baeklah,“ kata Lou Khay jang tida mempoenjai pikiran tetap.

Tapi baroe sadja ia maoe soeroean orang-orangnja pergi bawa itoe ampat orang boewat ditanjaken katerangan, mendadak ada dateng masoek satoe boedjang jang mengasi taoe bahoewa di loewar ada Tjoi Tay-ya dateng mengoendjoengin, dan tida antara lama lantas berdjalan masoek satoe orang, jang mendjadi kita poenja kenalan lama. Orang itoe boekan laen dari Tjoei Liong jang mendapat gelaran Pintiat-ta, itoe eigenaar roemah makan Kie-tjhoen0wan dan blakangan kena dioeber-oeber oleh Ngai Houw ; blakangan lagi ia dateng ka Kou-tjioe-tiam, jang letaknja di Kou-tjioe-kang, di mana ada satoe soedara moedanja, Tjoei Pa, memboeka satoe roemah makan jang memake merk Hin-liong-tiam, dan di sini poen ia tida bisa tinggal senang sebab soeda doebrak-abrik oleh San-see-gan, Tjie Liang dan Ngai Houw.

Koetika di dalem gredjanja Nio Too Hin, kombali ia terkena oleh Tjie Liang poenja sendjata resia, sahingga ia djadi terpentjar sama iapoenja soedara moeda. Ia sendiri pergi menaloek pada Siang-yang Ong dan pada sasoedanja Siang-yang Ong kena dilabrak oleh orang-orangnja Gan Sin Bin, ia bertemoe sama Hong-Bian-long, Tjoe Eng, orang siapa kasi taoe tentang keadahannja itoe radja moeda dan soeroe ia pergi djandjiken orang-orang boewat membantoe lagi pada Siang-yang Ong boeat terbitken pembrontakan. Maka sekarang ia datang ka sini, perloenja boewat djandjiken Lou Khay menaloek pada itoe radja moeda dan bantoe bikin pembrontakan.

Itoe tiga orang lantas menjamboet kadatengannja itoe tetamoe, pada sasoedanja Tjoei Liong dan Lou Khay saling djalanken kahormatan, orang jang terseboet blakangan kasi adjarkenal tetamoenja pada Kee Sian dan Tio Poo. Koetika Tjoei Liong maoe masoek ka dalem itoe kamar boekoe, ia soeda liat itoe bebrapa orang tawanan jang kaki tangannja terikat, tapi dalem sawaktoe itoe ia belon bisa kenali siapa adanja marika itoe. Tapi Pang Jan lantas sadja bisa kenalin pada Tjoe Liong, hal mana soeda membikin ia mendjadi girang. Ada ini orang dateng, kita boleh tida oesa merasa takoet. Itoe waktoe Louw Tien poen soeda djadi sedar dari pangsannja. Kombali ia mengaloewarken satoe treakan dan teroes melekin kadoewa matanja.

„Prempoean koerang-adjar !“ kata Louw Tien. Koetika memboeka kadoea matanja ia mendapet kenjatahan dirinja dan laen-laen kawannja, semoea di-iket seperti samseng.

Sekarang pada waktoe iaorang tida ada di sini.“ berbisik Pang Jan, „akoe maoe kasi taoe kaoe soeatoe hal. Sabentar djika iaorang dateng, kita moesti mengakoeh bahoewa kita semoa ada orang-orang dari Ong-hoe dan akoe maoe bitjara dengen bahasa resia sama iaorang. Djika marika menanjaken pada kaoe orang, boleh bilang sadja jang kaoe orang masi belon peladjarken itoe bahasa resia. Kaoe bernama Tjin Louw, sedeng kaoe, Liong Tho, bernama Liong Beng dan kaoe, Yauw Beng, bernama Yauw Tho. Soedara Tjin akoe jang bawa dateng ka Ong-hoe, sedeng kaoe berdoea belon lama masoek bakerdja pada Ong-ya. Ingetlah baek-baek, djika kita bisa berboeat dengen bagoes, nistjaja kita orang poenja djiwa bisa katoeloengan.“

Semoea orang manggoetken kapala menandaken jang iaorang setoedjoe. Itoe doea orang kasar soeda tentoe sadja soeka menoeroet, sedeng Louw Tien dalem samentara ini tida bisa pikir daja jang lebih baek, maoe apa tida ia moesti menoeroetin Pang Jan poenja akal.

Itoe waktoe di sebelah dalem kadengeran orang lagi pada bitjara.

„Lou Toako akoe sengadja dateng ka sini boewat bitjara sama kaoe," kata soewaranja Tjoei Liong.

„Ada perkara apa,“ menanja Lou Khay.

„Ini waktoe Siangyang-Ong...... Lou Toako akoe poenja omongan ini ada melanggar larangan negri ; akoe harep soepaja kaoe soeroe kaoe poenja orang-orang berlaloe dari sini.“

„Akoe poenja orang-orang semoewanja boleh dipertjaja,“ kata Lou Khay, „djika ada omongan apa-apa, boleh diomongken sadja dengen tida oesa koewatir.“

„Tadi koetika akoe lagi maoe masoek, akoe liat di sana ada bebrapa orang jang diringkoes kaki-tangannja. Apa sebabnja iaorang diperlakoeken begitoe?“ Baroe sadja Lou Khay maoe mendjawab, mendadak kadengeran di sabelah loewar ada soewara orang berseroeh.

„Aja, Tjoei Toako,“ kata soewaranja Pang Jan, „roepanja kaoe soeda tida maoe kenalin lagi pada sobat-sobat. Itoelah terlaloe angkoeh dan tida bagoes !“

„Siapatah itoe orang jang bitjara ?“ menanja Tjoei Liong, jang masi belon bisa kenalin pada itoe orang jang bitjara.

„Banjakan ada orang jang kenal pada Toako,“ kata Lou Khay. „Tjoba lekasan pergi kaloewar tengok.“

Tjoei Liong lantas kaloewar dan liat, dalem sa'at itoe djoega ia kenalin Pang Jan, orang siapa lantas berkata: „Tjoei tay-ya, apa masi bisa kenalin akoe jang hina-dina ini?“

„Ai, kiranja Pang-ya,“ berseroeh Tjoei Liong. „Lou Toako, mengapa soeda ringkoes padanja? Ini boekan orang loewar, hanja sala satoe dari sobat-sobat jang berkoempoelan di Ong-hoe poenja Tjip-hian-tong. la soeda berboewat kasalahan apa pada Toako, makanja diringkoes?“

Lou Khay jang mengikoeti kaloewar lantas kasi katerangan apa jang soeda terdjadi.

„Kaloe begitoe tida ada kasalahan apa-apa jang terlaloe besar,“ kata Tjoei Liong.

„Tida,“ kata Lou Khay.

Kaloe begitoe, akoe harep sadja Toako soeka memandang akoe poenja moeka malepasken pada iaorang.

Lou Khay manggoetken kapala dan prentah orang-orangnja boewat memboekaken itoe ampat orang poenja tali ringkoesan. Itoe ampat orang lantas berbangkit dan keboet-keboet masing-masing poenja pakean. Pang Jan lantas menghamperi pada Tjoei Liong boewat membri hormat dan menanjaken iapoenja kawarasan.

„Tjoei Toako poenja sobat ini,” kata ia, „akoe rasa ada sobat dari golongan „hap-djoe” barangkali ?”

„Boekan,” djawab Tjoei Liong.

Lou Khay mendenger itoe omongan, lantas mendoega bahoewa iaorang ada dari golongan perampok atawa jang biasa diseboet liok-lim, makanja bisa bitjara dalem itoe bahasa bangsat. Tjoei Liong lantas adjar Pang Jan berkenalan sama Lou Khay.

„Ini Seng-tjhioe-sioe-soe. Pang Jan; Pang-ya, ini ada Lou Khay Toako, jang tergelar Oa-Giam-Ong.” begitoelah Tjoei Liong berkata boewat adjar itoe doewa orang berkenalan satoe sama laen. Kamoedian ia minta Pang Jan adjar kenal ia itoe poenja tiga sobat jang laennja. Dan begitoelah Pang Jan poen lantas adjar kenal iapoenja tiga kawan itoe, pada Lou Khay dan Tjoei Liong. Di laen fihak Lou Khay panggil Kee Sian dan Tio Poo boewat berkenalan pada marika itoe, Pada sasoedanja beres, laloe pada mengambil tempat doedoek dan minoem thee.

„Pang-heng,” kata Tjoei Liong, „apa kaoe taoe perkaranja Ong-ya?”

„Akoe bersama laen-laen kawan dan Ong-ya poenja Ong-koan bertempoer sama Pak-hiap, Lam-hiap dan laen-laen,” kata Pang Jan, „tapi tida njana kita poenja fihak kena dikalahken dan Ong-ya melariken diri, entah ka mana. Sebab kita tjari sana-sini tida bisa dikatemoeken. Sampe sekarang kita orang poen djoestroe mentjari teroes pada Ong-ya, tapi masi belon djoega beroentoeng bisa dikatemoeken. Baroesan kita orang kabetoelan liwat di Thian Tjee Bio, lantas djadi setori dan berklai sama orang-orangnja Lou Toako. Beroentoeng Tjoei Toako kaboeroe sama orang-orangnja dateng, kaloe tida, tentoe sekali kita tida brani bitjara dengen teroes-terang.” Taro kata Lou Toaya menanjaken pada kita orang, pasti sekali kita tida nanti brani bitjara dengen sabetoelnja. Maka Tjoei Toako poenja kadatengan, itoelah ada kita orang poenja peroentoengan bagoes.

„Kaloe kaoe orang tida taoe di mana adanja Ong-ya,“ kata lagi Tjoei Liong, „akoe sabaliknja taoe. Sebab koetika akoe pergi ka Tek-an-hoe, bertemoe sama Tjoe Eng……“

„Apa boekannja jang tergelar Hong-bian-long?" memotong Pang Jan.

„Ja, benar ianja. Ong-ya koetika meliat iapoenja oeroesan roesak, lantas bawa iapoenja poetra-poetra bersama Loei Eng dan laen-laen, melolos kaloewar dengen mengambil djalan dari kolong lemari. jang ditaro di satoe roewangan jang dinamaken Eng-tong, di mana ada satoe djalanan dalem tanah, jang meneroes ka satoe tempat, ampat lie djaoenja dari loewar kota. Namanja itoe tempat Heng-hoa-tiam, di mana Ong-ya ada mempoenjai satoe taman boengah, sedang itoe djalanan dalem tanah menemboes sampe di satoe pertengahan dalem taman terseboet. Di sitoe telah disediaken bebrapa kreta dan koeda-koeda. laorang goenaken itoe kandaran-kandaran menoedjoe ka negri Leng-hee.

„Radja dari itoe negri Leng-hee maoe pasrahken iapoenja tachta karadjahan pada Ong-ya, tapi Ong-ya menoelak. Itoe radja Leng-hee lantaran menginget doeloean, koetika Tio Kong Bie Lo-Ong-ya bawa pasoekan balatentara melabrak negri Leng-hee dan soeda sampe di depan pintoe kotanja itoe negri. Radja itoe negri jang berbertachta di itoe waktoe lantas masoekin satoe request menaloek. Djika menoeroet pikirannja laen-laen penggawe perang, tiada maoe meladenin orang poenja permintahan bertaloek, hanja maoe melabrak teroes bikin petjah itoe kota dan basmi semoewa pendoedoeknja sampe, bresih. Tapi Lo-Ong-ya tida satoedjoe, sabaliknja ia trima dengen baek penaloekannja radja Leng-hee dan kasi tinggal itoe karadjahan boewat berdiri teroes.

„Tatkala Lo-Ong-ya balik poelang ka Kraton, Tio Pou. itoe bangsat toewa, lantas bikin tjelahan, katanja soeda satoe kali salah tida boleh dibikin salah boewat kadoewa kalinja. Lo-Ong-ya sanget djengkel mendenger itoe tjelahan dan ia lantas gantoeng diri sampe mati dalem iapoenja astana. Radja Leng-hee mendenger itoe kabar, lantas brentiken iapoenja oepeti jang saban taon biasanja ia kirim ka Tiongkok, di laen fihak ia mengatoer dan mendidik satoe pasoekan balatentara besar, boewat bikin pembalesan atas Lo-Ong-ya poenja sakit hati. Koetika Siang-yang-Ong mengatoer dan mendidik pasoekan balatentara di Siangyang, itoe radja poen ada menoelis soerat, katanja apabila kamoedian Ong-ya maoe gerakin balatentara, boleh kasi kabar padanja, ia maoe membantoe sabagi barisan jang madjoe paling moeka.

„Sekarang lantaran Ong-ya tida maoe trima iapoenja tachta karadjahan, ia maoe membri bantoean sama iapoenja pasoekan balatentara boewat bikin pembalesan sakit hati jang doeloe. Loei Eng berdami sama Tjoe Eng, aken mengoendang orang-orang jang gagah di sa'antero doenia (Tiongkok), dengen perdjandjian barang siapa jang soeka membantoe, Ong-ya soeka bagi tanah boewat masing-masing poenja bagian. Sekarang jang soeda dioendang, di Lam-yang-hoe, Tong-hong Liang, jang tergelar Hok-tee-koen-ong; di Siamsay, Tiaw-thian-nia poenja Toa-tjee-tjoe-Ong Kie Tjouw, tergelar Tjoei-kie-lin, dan Sam-tjee-tjoe--Ong Giok, tergelar Kim-kiong-siauw-dji-long, sedeng Soe-tjee-tjoe dan Ngo-tjee-tjoe, Hok-bian-poan-koan, Yauw Boen dan Hwa-bian-poan-koan, Yauw Boe, doewa-doewa mendjaga di benteng Yauw-tjong-tjoe, soeda tentoe sadja aken toeroet membantoe djoega.

,,Laen dari itoe, masi banjak lagi orang-orang gagah jang soeda berdjanji maoe membantoe seperti Hwe-poan-koan, Tjioe Liong di Tjioe-kee-hang, Peng-poan-koan, Tjion Soei, di Thoo-hwa-kauw, Hoe-i-mo-thoei, Koo Sia, di Tou-liong-phoo, Kim-siang-thauw-tho, Teng Hoei Him di Kim-hong-too, Hok-tee-tay-awee, Tong-hong Beng, di Tay-swee-hong dan Tji bian-thian-ong, Tong-hong Tjeng, dan itoe semoewa ada orang-orang jang mempoenjai pengaroeh besar sadja, tapi masi ada bebrapa banjak kita poenja kawan-kawan di darat dan aer jang akoe tida bisa inget satoe-satoenja. Akoe poenja kedatengan ka sini, perloenja boewat mengoendang pada Lou Toako, soepaja soeka pergi lebih doeloe ka kota Lam-yang-hoe di tempatnja Tong-hong Liang di mana semoewa orang aken pada berkoempoel. Iaorang soeda menetapken pada Goew-gwee tiap goew di Pek-see-tan aken didiriken satoe loetay boewat mamilih orang-orang gagah dan menoenggoe waktoenja kapan Ong ya maoe bergerak. Belon taoe apa Pang-heng taoe ini hal apa tida ?"

Pang Jan mendengeri Tjoei Liong poenja pembitjarahan jang pandjang-lebar, hatinja merasa sangat girang. Tida njana mengalamken ini bahaja, sebaliknja bisa mendapat taoe di mana adanja Siang-yang-Ong dan dapat taoe djoega begitoe banjak perkara penting.

,,Bagoes, bagoes sekali!" kata Pang Jan dengen berpoera-poera. ,,Sekarang kita taoe ka mana kita moesti menoedjoe."

Lou Khay kasi prentah pada orang-orangnja boewat bikin sedia makanan dan minoeman. Pang Jan menoelak dan berpamitan boewat brangkat, tapi Lou Khay menghalangin dan tida maoe lepasken ia pergi.

,,Pang-heng, djangan begitoe," kata ia. ,,Akoe dengen mamindjem Tjoei-heng poenja hawa bisa berkenalan dan sekarang djoestroe koetika jang sangat baek boewat kita bergaoelan lebih rapet. Apabila Pang-heng menjelah padakoe, apa boleh boewat akoe tida brani paksaken diri boewat bergaoelan sama Pang-heng jang menganggap berderadjat lebih tinggi dari akoe."

,,Oh, masalah boleh dibilang begitoe," kata Pang Jan. ,,Kita orang jang sama-sama membantoe pada Ong-ya, apabila kamoedian Ong-ya soeda naek di tachta karadjahan, kaoe dan akoe tentoelah aken mendjadi mantri dari satoe karadjahan....."

,,Tapi, biar bagimana djoega," memotong Lou Khay, ,,akoe harep Pang-heng djangan menoelak lagi."

,,Akoe sendiri tida ada halangan." kata Pang Jan, ,,tapi akoe poenja doea kawan ini moestio brangkat doeloean, sebab kita masi ada bebrapa sobat-sobat jang djoega mentjari Ong-ya, tapi tida taoe di mana ioarang meosti tjari, Maka sekarang perloe sekali moestio lekasan kasi iaorang kabar, agar iaorang bisa lega pikiran dan taoe ka mana marika moesti menoedjoe."

,,Kaloe begitoe," menjelak Tjoei Liong, ,,boleh makan minoem doeloe di sini, kamoedian baroe brangkat djoega, masi banjak tempo."

Liong Tho dan Yauw Peng berkata dengen berbareng : "Kita orang tida lapar, ada lebih baek kita brangkat siangan."

,,Apabila kaoe orang bertemoe sama iaorang." kata Pang Jan, ,,soeroe iaorang pada dateng ka sini, sebab Lou Toako poen boekannja orang loewar."

,,Baeklah," djawab itoe doewa orang dengen berbareng.

,,Apa kita orang poenja sendjata bakal dikasi poelang atawa tida?" menambahken Yauw Beng.

,,Soeda tentoe sadja dikasi kombali," saoet Lou Khay. Sahabisnja berkata ia lantas prentah orangnja ambilin itoe doewa orang poenja sendjata.

,,Akoe poenja dan ini soedara Tjin poenja sendjata," menjelak Pang Jan. ,,toch boleh dikombaliken pada kita orang, sebab kita sekarang soeda mendjadi sobat satoe dengen laen."

Lou Khay manggoetken kapala dan lantas soeroe orang-orangnja sekalian bawa Pang Jang dan Louw Tien poenja sendjata. Liong Tho dan Yauw Beng lantas berpamitan dan semoea orang maoe pada menganter, tapi Pang Jan lantas menjegah.

,,Akoe sendiri tida menganter," kata ia, ,,maka toewan-toewan sekalian poen tida perloe mengantar pada iaorang."

Tjoema sadja sabagitoe lekas itoe doewa orang soeda kaloewar dan orang lagi asik menjeka medja boewat sediaken barang santapan, mendadak Pang Jan berlaga berseroeh seperti orang jang dapat inget apa-apa.

,,Hei, kadoewa soedara, akoe ada sedikit omongan," kata ia. ,,Apabila kaoe orang bertemoe sama Sin-hwee-tjiang-koen. Han kie dan It-kie, Biauw Thian Lok....."

Berkata sampe di sini ia lantas berdjalan kaloear. Tida saorang jang menaro tjoeriga bahoewa ia berboewat begitoe dengen mengandoeng maksoed laen. Lagian orang-orang jang ia seboet, semoewanja ada orang-orang dari Ong-hoe jang soeda mati dalem paperangan di Tong-bong-tien. Tatkala ia dateng dekat pada Liong Tho dengen soewara perlahan ia berkata: ,,Kaoe pergi katemoeken ambtenaar di ini tempat dan minta iaorang kirim orang-orang ka sini pada djam sapoeloeh boeat membantoe pada kita orang."

Sahabisnja berkata ia lantas balikin badannja dan masoek lagi ka dalem sembari berkata lagi: ,,Djangan salah, soeroe iaorang dateng ka sini, kita orang menoenggoe; apabila iaorang tida taoe djalannja, akoe harep sadja kaoe orang soeka anterken sampe ka sini."

Lou Khay jang tida taoe oedjoeng poehoennja antas sadja menjeletoek: Betoel; bawa itoe temen-temen dateng ka sini."

Hal mana soeda membikin Pang Jan merasa sanget geli dalem hatinja. Begitoelah semoewa orang pada berdoedoek dan tida lama kamoedian barang santapan soeda disediaken berikoet djoega minoemannja. Lou Khay toewangin sendiri tetamoenja poenja tjawan-tjawan arak. Pada sasoedanja orang minoem tiga tjawan arak dan makanan dikaloewarken lima matjem, iaorang lantas moelai pasang omong ka Barat dan ka Timoer. ,,Kadoewa toewan Kee dan Tio,” kata Pang Jan, ,,akoe rasa tentoe ada dari kita poenja golongan ,,hap-djoe ?”

,,Ja, bener; kita semoewa ada dari satoe golongan,” kata itoe doewa pendjahat dengen berbareng.

,,Toewan berdoewa lakoeken pakerdjahan” di mana ?"

,,Kita orang baroe melakoeken pakerdjahan di kota radja.”

,,Wah, pakerdjahan di kota radja, tentoelah bisa mendapet kaoentoengan bagoes !”

Dasaran itoe resia maoe terboeka, dengen tida bertjoeriga lagi itoe doewa pendjahat lantas toetoerken iaorang poenja perboewatan di dalem itoe roemah penggadean merk Heng Hin dengen sadjelas-djelasnja.

Pang Jan pikir, ini kabetoelan sekali. Biar poen ia mengalamken satoe bahaja besar, toch mengasisoeatoe hasil jang sanget menggirangken. Pertama ia bisa mendapet taoe tentang di mana adanja Siang-yang-Ong. kadoewa bisa mendapet taoe siapa pendjahatnja jang soeda melakoeken itoe perampokan dan pemboenoehan di kota radja. Sahabisnja berpikir ia lantas kasi tanda dengen lirikan pada Louw Tien kamoedian dengen radjin dan terlaten ia memboedjoek soepaja Lou Khay, Kee Sian, Tio Poo dan Tjoei Liong minoem arak banjakan. Sebab ia berniat bikin mabok marika itoe. Menoenggoe kadatengannja pasoekan negri kamoedian sama-sama menangkep pada itoe kawanan pendjahat.

——————

FATSAL X.

Itoe waktoe hatinja Pang Jan merasa sanget girang. la pikir, tida sia-sia ia menaloek pada pamerentah dan berloetoet mengangkat goeroe pada Pak-hiap. Sekarang dalem iapoenja pakerdjahan jang pertama sadja, ia soeda bisa berboewat doewa matjem djasa jang tida bisa dibilang ketjil. Boekan sadja ia sendiri boleh merasa bangsa, malah moekanja iapoenja goeroe poen toeroet mendjadi terang Djoestroe ia lagi kalelap dalem iapoenja pikiran sendiri, mendadak ia djadi tersedar oleh satoe boedjang jang menghamperi dan bitjara pada Lou Khay.

,,Toaya, di loewar ada orang jang minta bitjara," kata itoe boedjang.

Lou Khay lantas meninggalken perdjamoean sembari maminta ma'af dan lantas kaloewar; berselang brapa lamanja, satoe boedjang laen dateng masoek mengoendang toewan Tjoei Liong boewat bitjara di dalem sama iapoenja madjikan.

Tjoei Liong lantas berbangkat dari tempat doedoeknja mengikoeti itoe boedjang masoek ka dalem. Lou Khay oendang Tjoei Liong berdoedoek di sampingnja satoe medja model boelan sabelah, jang ditaro berdempet sama tembok dengen terapit oleh doewa korsi.

„Akoe ada satoe perkara jang hendak minta Toako poenja tenaga bantoean," kata toewan roemah. „Itoe orang she Tjin, kawannja Pang Toaya, koetika bertempoer di gredja, telah ditangkep oleh akoe poenja soedara prampoewan. Akoe liat dengen terang koetika iaorang bertempoer, akoe poenja ade prampoewan soeda kateter dan koetika goloknja itoe orang she Tjin ditoesoeken, apabila diteroesken toesoekan itoe niatjaja akoe poenja ade prampoewan soeda djadi tiwas djiwanja. Tapi roepanja ia berhati moerah dan tida maoe membinasaken djiwanja akoe poenja ade prampoewan, dari apa bisa dikatahoei, bahoewa ia itoe ada saorang jang berhat back dan djoedjoer.

,,Baroesan satoe boedjang prempoean dateng ka sini. Boleh djadi akoe poenja ade prempoean memoedji pada itoe anak moeda, maka itoe boedjang prempoean brani bitjara padakoe tentang itoe pamoeda jang gagah, tjakap dan baek hati. Omongan mana sosda membikin mendoesin padakoe. Ini waktoe akoe poenja ade prempoean oemoernja soeda doeapoeloe tahon lehih sedikit ; tapi ia masi belon mempoenjai toendangan. Akoe liat itoe orang she Tjin, romannja begitoe tjakap dan djoedjoer di hari kemoedian tentoe ia bakal mendjadi orang besar. Sekarang akoe maoe minta Toako djadi tjomblang bitjaraken oeroesan pernikahan antara itoe pemoeda dan akoe poenja ade prempoean. Tjoema sadja masi belon taoe apa ia soeda mempoenjai toendangan atawa belon, kaloe belon, kebetoelan sekali ini perdjodoan bisa dirangkapken, sebagi djoega soeda ditakdirken oleh Thian jang koewasa."

Tjoei Liong beroclang-oelang manggaetken kapala. Kaloe sadja ia belon mempoenjai toendangan, akoe tanggoeng ini oeroesan satoe kali dibitjaraken lantas bisa djadi," kata ia dengen segala kasanggoepan.

Lou Khay lantas mengangkat kadoewa tangan menjodja pada Tjoei Liong sampe kadoewa tangannja ampir sampe ka moeka boemi. Tjoei Liong poen lantas membales hormat sabagimana pantasnja. Begitoelah itoe doea orang kombali berdjalan kaloewar sama-sama, dan itoe orang-orang jang lagi pada doedoek makan, semoewanja pada berbangkit dan oendang itoe doewa orang boeat berdoedoek lagi.

„Akoe poenja tabeat sanget tida sabaran," kata Tjoei Liong: Sekarang akoe mage menanja pada Pang hiantee, apa Tiin hiantee soeda mempoenjai toendangan atawa belon?"

Pang Jan jang tjerdik, dalem sa'at itoe djoega taoe tentoe ada oeroesan penting, makanja orang soeda menanjaken hal itoe.

,,Aja," kata ia, ,,akoe poenja sobat ini ada satoe sobat baroe, djadinja akoe tida taoe hal itoe. Soedara, apa kaoe soeda mempoenjai toendangan atawa belon?" bogitoelah ia menanja pada Louw Tien sembari kedipken matanja. maksoednja soepaja Louw Tien mendjawab belon. Sebab ia doega keras tentoelah itoe prampoean genit meresa penoedjoe pada itoe anak moeda jang tjakap. la mage soeroe Louw Tien poera-poera menjanggoepin boeat menikah, soepaja bisa akalin ambil itoe prampoean poenja barang aneh. Djika itoe prampoewan soeda tida mempoenjai itoe barang aneh, dengen gampang sadja bisa tangkap padanja.

Tida taoenja Louw Tien ada saorang djoedjoer jang terlaloe koekoeh sama adat istiadat. Ia poen mengarti Pang Jan poenja maksoed, tapi ia tida bisa poera-poera bilang bahoewa ia belon bertoendangan. Sabaliknja iapoenja paras moeka berobah mendjadi merah seperti tjabe dan dalem bebrapa sa'at lamanja ia tida bisa berkata-kata. Pang Jan mendesak beroelang-oelang, dan dari sebab ia tida maoe mendjoesta, lantas sadja ia bilang dengen sadjoedjoernja. „Akoe boekan sadja soeda bertoendangan," kata ia, malah soeda menikah."

Pang Jan dalem hatinja djadi sangat riboet. Dalem hatinja berkata: „Ini orang soenggoe terlaloe tida ada goenanja. Berdjoesta di antara pendjahat masa boleh djadi apa sih !"

Djawabannja Louw Tien jang sadjoedjoernja soeda membikin Lou Khay djadi poetoes harepan, sabagi djoega kapalanja digoejoer sama aer dingin. Pang Jan dengen paras moeka jang saparo soenggoe-soenggoe dan saparo maen-maen memandang pada itoe toewan roemah.

„Oh, kiranja akoe poenja soedara ini soeda menikah," kata ia; ,,tapi akoe sendiri masi belon mempoenjai toendangan. Akoe rasa Tjoei Toako poenja pertanjahan tentoe ada sebabnja. Apa barangkali ada soeatoe oeroesan jang menggirangken? Akoe sendiri tida merasa maloe boewat oeroesan begitoe. Kita poenja nabi ada bilang Perkara tida berbakti ada tiga matjem; tida mempoenjai toeroenan ada jang paling heibat. Maka sekarang akoe maoe minta pertoeloengan pada toewan-toewan sekalian jang berada di sini, apabila ada perdjodohan jang menjotjokin, soekalah kiranja toeloeng bitjaraken boewat akoe."

Sahabisnja berkata ia lantas tertawa bergelak-gelak. Louw Tien lantas memandang padanja dengen mata mendelik dan moeka berengoet, Tjoei Liong lantas berpaling pada Lou Khay.

,,Begimana, soedara ?" menanja ia.

Lou Khay keroetken halisnja dan golengken kapala sedikit. Samentara Pang Jan jang merasa ingin sekali tipoe dan dapetken itoe barang aneh jang digoenaken oleh itoe gadis, roepanja tida maoe moendoer dan mendesak. ,,Kaoe berdoewa djangan bitjara seperti orang lagi maen bade-badean," kata ia. ,,Kaloe ada pembitjarahan apa-apa, mengapa tida maoe dibitjaraken dengen teroes-terang sadja ?"

Tjoei Liong jang koerang akal, terpaksa lantas toetoerken dengen teroes-terang apa jang iaorang soeda damiken, tadi koetika di dalem.

,,Ade prampoewannja Lou Toako maoe ditoendangin sama Tjin hiantee," kata ia, ,,tapi sajang sekali Tjin hiantee soeda beristri. Itoelah boekannja perkara maen bade-badean."

,,Aja, aja," kata Pang Jan jang berlaga salah denger orang poenja omongan, ,,itoe oeroesan akoe tida brani bitjaraken; akoe ini orang dari golongan apa, tjara bagimana brani bikin perhoeboengan familie sama koelawarga jang berderadjat tinggi !"

Omongannja Pang Jan jang sengadja maen gila, soeda membikin Lou Khay djadi bingoeng dan tida taoe moesti mendjawab bagimana.

,,Djika menoeroet akoe poenja pemandangan," kata lagi Tjoei Liong, Pang Toaya tida bisa ditjela,..."

,,Tida, tida boleh," memotong Pang Jan. ,,Akoe ini orang bangsa apa. Perkara pernikahan moesti satoe sama laen poenja deradjat berimbang, dan kaloe perampoewannja eilok moesti bersoewami pada laki jang tjakap. Masatah pantas djika gowak di pasangin sama boeroeng Hong? Tjoei Toako boleh tida oesa bitjaraken teroes ini oeroesan, sebab tjoema aken membikin akoe merasa maloe pada bajangan sendiri sadja dan tida ada moeka boewat berdiam lebih lama di sini."

Ini omongan jang dioetjapken satjara tjerdik, soeda membikin Tjoei Liong dan Lou Khay djadi merasa tida enak, sedang Tjoei Liong jang goblok lantas sadja dengen soenggoe-soenggoe berfihak pada Pang Jan.

,,Kaloe menoeroet akoe poenja pendapatan," kata ia, soedara poenja ade prampoean oemoernja soeda besar, dan kita orang tida lama kamoedian aken mengikoet perang pada Ong-ya, dengen begitoe, kaloe ade ditinggal sendirian di roemah tentoe koerang bagoes, sabaliknja, masatah maoe dibawa ka medan perang jang soeda tentoe sadja terlebih lagi tida baeknja? Maka tida lebih baek bikin beres ade prampoean poenja oeroesan pernikahan, soepaja kaoe djadi terlepas dari tanggoengan besar. Apabila ini oeroesan soeda dibikin beres, nistjaja kaoe bisa mengikoet perang pada Ong-ya dengen soenggoe-soenggoe hati."

Lou Khay jang tida berpikiran pandjang, achirnja kena djoega dibikin tergerak hatinja oleh Tjoei Liong poenja desekan. Tjoei Liong mendesek lagi beroelang-oelang dengen berbagi-bagi perkatahan jang enak kadengerannja.

,,Ja, baeklah, kita boleh atoer begitoe sadja, kata Lou Khay achir-achir,

,,Bagoes sekali !" kata Tjoei Liong. ,,Perkara djodo boekannja menoeroet manoesia poenja kamaoean, hanja memang soeda ditakdirken oleh Thian. Akoe jang mendjadi tjomblangnja, tapi siapa jang mendjadi penanggoengnja ? Akoe harap sadja kadoewa soedara Kee dan Tio soedi mendjadi penanggoengnja. Sebab ini oeroesan poen ada soeatoe perkara baek."

Kee Sian manggoetken kepala menjataken satoedjoenja; tapi Tio Poo golengken kapala.

„Akoe tiada bisa," kata ia, sebab selamanja akoe tida taoe tjampoer perkara jang saroepa ini. Maka akoe harep sadja toewan-toewan djangan mendjadi goesar."

Tio Poo makanja tida maoe mendjadi penanggoeng ada sebabnja. la seringkali dateng ka roemahnja Lou Khay dan lantaran ia dianggep sebagi sobat back, djadi tida menjingkir dari Lou Khay poenja koelawarga prempoewan, ia sering kali bertemoe sama Lou So Tjin dan boekan djarang iaorang soeka pasang omong dengen oeplek. Tio Poo liat kaloe So Tjin lagi bitjara padanja seringkali maen mata dan oendjoek inpoenja tingga lakoe jang genit. Maka ia sendiri soeda mengandoeng niatan boewat melamar pada itoe gadis, tjoema sajang ia tida bisa mendapet koetika jang baek, sedeng ia sendiri merasa berat boewat memboeka moeloet dengen langsoeng.

Sekarang dalem perdjamoean makan ia meliat Tjoei Liong teroes-meneroes mendesak Lou Khay soepaja kasiken ade prampoewannja pada Pang Jan, soeda tentoe sadja hatinja merasa sanget tida senang. Tapi, sabalikaja orang maoe minta ia mendjadi toekang tanggoeng, soeda bisa dimengarti jang ia tida nanti soedi lakoeken hal itoe. Kaloe boleh dan bisa, ia merasa ingin sekali bikin ini oeroesan djadi gagal, baroelah hatinja merasa senang.

„Kaoe, Kee Toako bagimana, apa soeka mendjadi toekang tanggoeng?" menegasken Tjoei Liong, koetika meliat Tio Poo tida maoe. Apabila kaoe poen tida soeka, terpaksa akoe sendiri jang aken merangkep mendjadi penanggoeng djoega."

,,Akoe tida ada kaberatan dan soeka mendjadi penanggoeng," djawab Kee Sian.

,,Sekarang bagimana, Lou Toako, apa soeka bikin beres ini perdjodoan ?" menanja Tjoei Liong pada toewan roemah. ,,Tjomblang dan penanggoengnja semoewa soeda sedia, tjoema tinggal menoenggoe diberesken sada."

,,Ja, akoe soeka," djawab Lou Khay.

,,Pang Toaya," kata lagi Tjoei Liong, ,,sekarang kaoe djangan menjindir lagi padakoe, dengen membilang segala gowaklah, boeroeng honglab, begini dan begitoe, semoewanja omong kosong sadja. Kaloe menoeroet akoe poenja pemandangan, ini perdjodoan djoestroe ada sangat sembabat, tjoema itoe nona adatnja ada sedikit tinggi dan angkoeh. Tapi enaknja tida mempoenjai mertoewa lelaki atawa prampoewan dan djoega tida mempoenjai barang satoe ipar prampoewan. Sedang iapoenja paras jang eilok dan tjantik, soeda tida oesa dibitjaraken lagi. Malahan kaoe ini waktoe ada bakerdja pada Ong-ya, bila kamoedian itoe pakerdjahan besar bisa berhasil, tentoelah kaoe aken mendapet djabatan jang tida ketjil. Sekarang djangan bengong sadja, lekasan kasiken barang pandjernja."

,,Ach, kaoe ini sasoenggoenja bisa mamikir dengen sampoerna betoel," kata Pang Jan.

,,Akoe boekannja mengeboel, biar poen socatoe ma tjomblang jang paling bisa mengomong tida nanti bisa menang sama akoe."

Pang Jan lantas kaloewarken satoe batoe giok jang di-ikatken pada iapoenja tali pinggang dan dipasrahken pada Tjoei Liong, oleh siapa kamoedian dengen kadoewa tangan diangsoerken pada Lou Khay.

,,Menerima pandjer haroes terboengkoes oleh satoe lembar kertas merah, baroelah tjotjok dengen atoeran," kata ia,,,tapi sekarang di mana moesti tjari itoe matjem kertas?" „Ach, kaoe ini terlaloe banjak tjingtjong," kata Lou Khay

„Boekannja begitoe, atoeran tida boleh diboewang." Kamoedian ia berpaling pada Pang Jan dan menambahken: Pang-ya, mari sini, kaoe orang sekarang moesti mendjalanken peradatan, jang menandaken soeda teriket mendjadi satoe familie."

„Begitoelah iaorang lantas djalanken peradatan mengakoe familie, jang satoe menjeboet,, Toakoe" dan jang laen membahasaken „Moayhoe."

„Bagoes!" kata Tjoei Liong dengen goembirah. „Sekarang kaoe orang soeda mendjadi Toakoe dan Moayhoe."

Kamoedian satoe sama laen lantas pada berdoedoek kombali di masing-masing poenja tempat doedoek. Tjoei Liong dan laen-laen orang pada menghatoerken slamat pada itoe doewa jang baroe ikat perhoeboengan familie.

„Pang Toaya, sekarang oeroesan soeda mendjadi beres," kata Tjoei Liong, kaoe maoe hatoerken trima kasi apa pada jang mendjadi tjom- blang?"

„Itoelah soeda sedia," kata Pang Jan; „araknja akoe' poenja Toakoe akoe maoe toewangin tiga tiangkir pada Toako, sabagi akoe poenja tanda trima kasi."

Semoewa orang djadi tertawa besar mendenger omongannja Pang Jan.

„Masi ada soeatoe hal jang menjoesaken," kata lagi Pang Jan. „Akoe dan akoe poenja kawan ini tida bisa menoenggoe lama di sini, besok djoega akoe maoe pergi mentjari pada Ong-ya di negri Leng-hee, soepaja bisa mamilih hari baek boewat geraken balatentara menjerang pada karadjahan Song. Sedang itoe paperangan belon tentoe bisa djadi beres dalem tiga ampat tahon, malah boleh djadi djoega sampe belasan tahon, belon djoega bisa merampas negri Song poenja karadjahan. Oleh kerna itoe, djadi tida taoe sampe kapan ini pernikahan baroe bisa dilakoeken. Maka ini hal, haroes sekali ditanjaken dengen terang pada Toakoe, kapan itoe pernikahan bakal dilakoeken. Tjoema sadja dalem tangsi tida di-idjinken orang menikah.”

„Kaoe poenja omongan ada benar djoega,” kata Tjoei Liong. jang lantas memandang pada Lou Khay dan berkata lagi: „Lou Toako kaoe pikir bagimana?”

Lou Khay lantas keroetken halisnja.

„Terpaksa moesti minta „Moayhoe” tinggal lamahan di sini,” kata ia, „boewat menoenggoe sampe bisa dipilih satoe hari jang baek dan teroes menikah.”

„Itoe tida bisa,” kata Pang Jan. „Akoe asal sadja mendapat taoe Ong-ya berada di mana, kaloe sadja akoe ada mempoenjai sajap, [tentoelah akoe soeda lantas terbang menjoesoel, soepaja bisa lantas bertemoe sama Ong-ya. Lagian Ong-ya selamanja tida boleh berdjaoehan sama akoe.”

„Djika maoe dibitjaraken prihal akoe poenja koelawarga,” kata Lou Khay, „akoe ada mempoenjai doewa empe; tapi sadari lama iaorang soeda pindah ka laen tempat dan tida taoe bikin perhoeboengan satoe apa. Laen dari itoe akoe tida mempoenjai laen familie jang dekat, Oleh kerna begitoe, tida ada halangannja ini oeroesan diatoer dengen lekas. Maka dalem satoe hari ini boleh soeroe orang tjari hari baek dan doewa lantas lakoeken itoe pernikahan soepaja akoe boleh terlepas dari tanggoengan besar. Lagian akoe poen maoe brangkat ka Lam-yang-hoe.” „Apatah perloenja mentjari orang boeat mentjari hari,” kata Pang Jan, „akoe sendiri poen bisa.”

„Itoe terlebih baek lagi,” kata Tjoei Liong, „djadi tida oesa memboewang banjak tempo.”

Sahabisnja berkata ia lantas soeroe orang mengambil satoe boekoe lak-djit, jang lantas di samboeti oleh Rang Jan boeat dipreksa. Kabetoelan sekali ini hari djoestroe ada Hong-too-kiac-djit alias hari jang baek dan beroentoeng.

„Ini hari djoestroe ada hari baek,” kata Pang Jan. „Apabila suliwatnja ini hari, sahingga satengah boelan kamoedian masi tida ada lagi hari jang baek, malah semoewanja ada banjak sekali halangannja.”

„Nanti atawa sekarang ini oepatjara pernikahan sama sadja moesti dilakoeken,” kata Tjoei Liong; „maka lebih baek ini hari sadja dilakoeken, sebab djoestroe djato hari jang sanget baek. Dengen begitoe, biar poen kita mengiring perang pada Ong-ya, toch ade prampoewan bisa sama-sama toeroet ka dalem tangsi sama soewaminja. Lagian ia ada mempoenjai ilmoe kapandean jang begitoe tinggi, dengen apa ia bisa membikin djasa-djasa dalem paperangan. Boekantah ia aken mendjadi satoe pendekar prampoewan ? Sabaliknja djika ia belon menikah, itoe hal tida nanti bisa dilakoeken, sebab ada banjak sekali halangannja.”

Lou Khay memangnja ada saorang jang tida mempoenjai pikiran sendiri jang tetep, tapi itoe waktoe mendenger Tjoei Liong poenja omongan jang begitoe enak sebaliknja ia djadi bingoeng dan tida taoe apa jang ia moesti berboewat. Tambahan Tio Poo di satoe pinggiran teroes-meneroes bikin bantahan, kerna ia memang ingin sekali soepaja itoe oeroesan bisa djadi gagal.

,,Ini oeroesan menika jang besar," kata ia, ,,mana boleh diatoer setjara begitoe poenja saderhana. Lagian Lou Toako jang mendjadi kapala familie, sedikitnja moesti kasi taoe pada semoewa tetangga dan moesti bitin rame-rame, sedeng kemanten prempoewan djoega haroes doedoek di dalem djoli penganten dengen dianter oleh saprangkat tetaboean. Dengen begitoe, baroelah tida membikin katjiwa Lou Toako poenja deradjat."

,,Dalem ini oeroesan kita tida boleh memake pemandangan jang saroepa itoe," kata lagi Tjoei Liong jang membelar teroes. ,,Penganten lelaki saorang pengoembarahan jang tida mempoenjai roemah tangga di sini, sekarang djika maoe soeroe kamanten prampoewan naek djoli dengen di'iringken oleh saprangkat tetaboean, itoe djoli kamanten maoe digotong ka mana? Kaloe boekannja begitoe, tentoelah moesti sediaken satoe roemah boewat djadi tempat-tinggalnja penganten lelaki, di mana moesti disediaken segala perabotan jang perloe dan mas kawin. Itoe semoewa tida lebih tjoema boewat kaliatannja ,,teebian" sadja, tapi oewang jang dikorbanken djoemblanja boekan sedikit. Perkara oewang masi tida sabrapa, tapi perkara mengiring pada Ong-ya ada soeatoe oeroesan besar. Malah kaloe boekannja lantaran ini oeroesan besar, apatah perloenja moesti begitoe terboeroe-boeroe dan itoe oepatjara nikah moesti dilakoeken dalem hari ini djoega? Perkara jang saroepa ini, sadari doeloe-kala seringkali terdjadi, jaitoe jang dinamaken „poengoet-mantoe."

,,Apa betoel boleh diatoer begitoe sadja?" menegasken Lou Khay jang tida mempoenjai katetepan pikiran sendiri.

„Soeda tentoe sadja boleh sekali," menetapken Tjoei Liong.

„Kaloe boleh, baeklah atoer sadja begitoe," kata Lou Khay.

„Djika maoe diatoer sekarang moesti lekasan kasi kabar pada orang di dalem," kata Tjoei Liong, soepaja orang bisa bikin persediahansegala apa jang perloe."

Lou Khay manggoetken kepala dan soeroe satoe boedjang kasi kabar ka dalem, nona SoTjin moesti diriasin dan dipakeken pakean kamanten dan malem aken dilakoeken oepatjara sembajang pada Thian dan bertemoenja kadoea penganten. Di laen fihak ia kasi prentah pada bebrapa boedjang laen boewat bikin persediahan segala kaperloean sembajang, seperti hio, lilin, kertas, medja samkay dan sebaginja. Sedeng ia sendiri poen lantas menoekar pakean baroe dan bagoes boewat hadepken itoe pesta pernikahan.

Louw Tien pergi mengaso di dalem satoe kamar boekoe, jang letaknja di sabelah loewar. Di laen fihak, Tio Poo koetik Kee Sian dan diadjak pergi kaloear boewat pasang omong di tempat jang tida ada orang. Sedeng Tjoei Liongisi tjomblang membantoei Lou Khay mengoeroes segala kaperloean pesta, hingga iaorang djadi sangat repot. Louw Tien koetika meliat tida ada orang laen, lantas menanjaken pada Pang Jan mengapa melakoeken perkara jang saroepa itoe.

„Kaoe gila barangkali, Pang Toako," kata Louw Tien dengen soewara koerang senang. „Apa perkara menikah boleh diboewat maen-maen? Tadi di hadepan orang banjak akoe tida bisa menjega pada kaoe. Orang jang seperti kita, masatah maoe mendjadi soewaminja satoe prampoewan jang mendjadi ade prampoewannja orang jang seperti Lou Khay?“

„Och, kiranja kaoe masi belon mengarti akoe poenja maksoed,“ kata Pang Jan dengen tertawa. „Apa kaoe kira akoe kapengenan mendapat istri jang begitoean? Akoe berboewat begini, tida laen tjoema ingin dapetken itoe prampoewan poenja barang aneh jang bisa membikin orang djadi diato pangsan, djika ia keboetken barang itoe di hadepan orang poenja moeka. Akoe ampir tida maoe pertjaja jang kaoe tida taoe bahoewa akoe berboewat begitoe perloenja tjoema hendak tipoe iapoenja barang aneh itoe. Sebab djika kita tida bisa dapetken iapoenja barang aneh itoe, nistjaja kita orang aken kena tertangkap oleh ianja.“

„Ja, sekarang akoe soeda mengarti,“ kata Louw Tien. Tjoema sadja kaoe harces sekali dari moeloet teroes ka dalem hati, djangan mabok pipi litjin lantas meloepaken perkara besar.“

„Apabila akoe poenja omongan tida teroės ka kalem hati, biarlah akoe mati dengen tida mendapat tempat boewat mengoeboer.“

„Boekannja akoe tida pertjaja. Akoe tjoema koewatir sadja kaoe poenja pikiran djadi bergontjang kerna pengaroehnja paras eilok.“

„Apabila kaoe denger di sabelah blakang ada soewara riboet-riboet,“ kata Pang Jan, „akoe harap kaoe soeka lantas dateng membantoe, sebab akoe poenja ilmoe kapandean sangat berwates. Djangan membikin akoe sampe mendapat kasoekeran dari marika itoe.“

Tatkala iaorang lagi pasang omong, satoe boedjang dateng masoek kasi taoe, bahoewa sekarang soeda sampe waktoenja boewat „ba-mantoe“ pergi mandi dan toekar pakean penganten. Pang Jan lantas mengikoeti itoe boedjang masoek ka blakang boewat mandi. Pada sasoedanja ia bikin bresih iapoenja badan, lantas ia menoekar pakean baroe dan kaloewar ka pertengahan, di mana soeda menoenggoe Tjoei Liong dan Lou Khay, jang antara ia ka hadepan satoe medja samkay. Tida antara lama kamoedian dari dalem kaliatan kaloewar bebrapa boedak prampoewan jang menbawa teng soetra, kamoedian di sabelah blakangnja berdjalan kamanten prampoewan dengen moeka tertoetoep dan dipimpin oleh satoe boedjang prampoewan.

Pang Jan bersama itoe kamanten prampoewan lantas sembajang dengen berbareng di hadepan itoe medja samkay, kamoedian iaorang dianter masoek ka dalem kamar penganten, jaitoe kamarnja Lou So Tjin sendiri, di mana kamanten melepasken iapoenja toetoepan prampoewan moeka, boewat minoem arak dengen satoe sama laen menoekar tjawan. Begitoelah Pang Jan berdiam teroes dalem itoe kamar kamanten. Sedang itoe boedjang prampoewan, jang tadi memimpin kamanten prampoewan, djoega lantas moendoer kaloewar dari itoe kamar.

Lou So Tjin sekarang baroe meliat tegas pada iapoenja kamanten lelaki, hal mana soeda membikin ia djadi sangat terkedjoet. la toendoekin kepalanja dengen mengelah napas perlahan. la merasa heran sekali mengapa iapoenja engko boleh djadi begitoe tida kaoeroesan. Sebab orang jang ia penoedjosi ada itoe pamoeda gagah dan tjakap, tapi sekarang orang jang mendjadi iapoenja soewami ternjata ada saorarg laen, jang boekan sadja ilmoe kapandeannja tida tinggi, malah iapoenja roman poen tida tjakap, lagian oemoernja poen soeda toewa djoega. Orang jang seperti ini sedikit poen tida ada bagian jang boleh dikagoemin. Soenggoe tjilaka sekali akoe poenja peroentoengan saoemoer hidoep djika moesti dipasrahken pada ini manoesia. Apa barangkali itoe boedjang prampoewan soeda bitjara salah? Tapi, biar bagimana djoega ini waktoe ia tida bisa bikin perbantahan lagi, sebab iaorang berdoewa soeda sama-sama sembajang di hadepan medja samkay. Tegasnja itoe perkara pernikahan soeda mendjadi beres, sekali poen ia tida satoedjoe djoega, soeda kasep.

Itoe waktoe ia djadi sangat mendongkol dan tida maoe trima oentoeng. Ia berniat pasti maoe tangkap kamanten lelaki poenja kasalahan, tida perdoeli apa djoega adanja kasalahan itoe, satoe kali ia dapatken djalan, lantas sadja ia maoe oendjoek kagoesarannja dan dengen zonder banjak bitjara lagi ia maoe boenoeh mati pada ini lelaki jang ia tida soeka.

---

FATSAL XI.

Itoe sapasang kamanten, doea-doeanja mengandoeng niatan jang koerang baek. Fihak prempoean lantas meliat Pang Jan boekannja Louw Tien, hatinja merasa sanget gemes dan djengkel. Sedeng Pang Jan, jang memang boekan soenggoe-soenggoe maoe mendjadi soeaminja itoe Kioe-bwee sian-ho jang genit, hanja ingin tipoe orang poenja wasiat. Koetika meliat Lou So Tjin oendjoek iapoenja paras moeka jang tida manis, lantas sadja ia mendapet taoe, bahoewa ini prempoean genit tida soeka padanja. Tapi ia ada sampe tjerdik dan bengal, sebaliknja ia oendioek moeka manis dan mengangkat tangan menjodja sampe ampir mengenaken djoebin.

„Nona,” kata ia, „akoe she Pang dan bernama Jan. Sedari lama akoe bekerdja pada Ong-ya. Tida njana blakangan ini Ong-ya poenja pekerdjahan djadi gagal, hingga akoe djadi terpentjar sama akoe poenja djoengdjoengan itoe. Apabila boekannja ini waktoe Ong-ya berada di negri Leng-hee, nistjaja akoe tida nanti tega berpisahan sama kaoe, nona. Tapi akoe poen tida bisa lama-lama berpisahan sama akoe poenja djoengdjoengan. Samentara kaoe sama akoe, dasaran soeda ditakdirken moesti berdjodo, maka ini hari kita bisa terangkap mendjadi satoe. Itoelah akoe poenja kaberoentoengan jang boekan ketjil. Tadi siang akoe meliat nona poenja ilmoe kapandean ada begitoe tinggi, jang ada soeroep sekali djika dikası gelaran pendekar prempoean. Ini hari lantaran kaoe soeda berdjodo sama akoe, mendjadi kawan saoemoer hidoep, akoe ada niatan ingin berladjar ilmoe silat pada nona. Belon taoe apa nona soedi mengadjar atawa tida? Kakaloe soeka, sekarng djoega akoe maoe mengangkat goeroe pada kaoe.”

Lou So Tjin mendenger Pang Jan poenja omongan jang begitoe marendah, hatinja djadi lembekan sedikit. Ia pikir ini orang biar poen tida terlaloe tjakep sabagimana itoe pamoeda, tapi iapoenja tabeat tentoe sekali sabar dan manis. Djika diliat dari iapoenja pembitjarahan jang begitoe roepa, biar poen akoe hendak mentjari iapoenja kasalahan, taro kata ia maoe kerasken djoega hati boewat memboenoeh pada Pang Jan, ia merasa tida tega berboewat begitoe. Achirnja ia djadi berbalik berpikir, apa boleh boewat, lebih baek akoe menerima oentoeng sadja, dasaran akoe poenja peroentoengan tjoema sabagini, ja moesti trima sadja, apa jang nasib kasiken. Oleh kerna mamikir begitoe, Lou So Tjin berbalik djadi girang dan oendjoek iapoenja moeka manis.

„Siangkong doedoeklah,” kata ia. „Lagian djika bitjara djangan terlaloe marendah begitoe rоepa“

(Ada samboengannja).