Siauw Ngo Gie 01

by Kuang Lou Wen dan Mi Tao Jen Peng

 

SIAUW NGO GIE
Bagian ka-doea
atawa
Pembrontakannja Siang Yang Ong

---

FATSAL I

Pada tamatnja ini tjerita bagian pertama kita telah tinggalken Tie Hoa berhadepan dengen Pek Hoedjin dan Hoen Soei, jalah istrinja Pek Giok Tong dan Kim-mo-Tjie poenja poetra jang masi ketjil serta Tio Houw dan Thio Liong, sekarang mari kita soesoel poela marika itoe.

Tetapi ia mengarti, ia moesti lekas menjingkir dari hadepannja itoe doea pahlawan, dari itoe laloe ia permissie dari Pek Hoedjin dan kamoe- dian, ia bertindak.

Tio Houw dapet liat sikepnja ini orang gagah, ia madjoe ka depan dan menjegah aken Hek-Holie pergi kabetoelan Tie Hoa ada di sitoe, ia mace minta orang poenja pertoeloengan.

„Ini waktoe di Kay-hong-hoe sabetoelnja tida ada orang jang pande,” begitoe ia kata, sebab apabila ada orang-orang jang pande, tentoelah ini pakerdjahan menganter Pek Ngo-tay-tay tida aken dipasrahken pada kita berdoewa. Akoe pikir Pek Giok Tong Loya, di waktoe hidoepnja senantiasa soeka moesoehi pada Siangyang-Ong, oleh kerna itoe, dalem ini perdjalanan begimana tjilaka djika kena bertemoe sama kontjo-kortjonja itoe radja-moeda, kita berdoewa soeda tentoe sadja tida mempoenjai kamampoean tjoekoep boeat menoelak itoe bahaja. Tapi kabetoelan sekali sekarang kita bertemoe sama kaoe, akoe sanget harep soepaja kaoe soeka memboewang sedikit tenaga membantoe kita menganterken sampe di iapoenja kampoeng kalahiran, kamoedian baroe kita sama-sama balik kombali. Dengen begitoe, soeda djangan kata lagi apabila tida bertemoe sama kita poenja moesoeh-moesoeh, taro kata bertemoe djoega, dari sebab ada kaoe, kita orang tida terlaloe merasa koewatir. Akoe rasa kaoe tentoe tida tega menampik, apabila kaoe soeka menginget itoe tali persobatan sama Pek Giok Tong Loja almarhoem."

Thio Liong jang berada di sitoe poen, toeroet memboedjoek soepaja Tie Hoa soeka meloeloesken. Djoestroe pada waktoe iaorang lagi bitjara, koenjoeng - koenjoeng ada angin aneh jang menioep, maka menoeroet Tio Houw, boleh djadi haloesnja Pek Ngo-loya jang dateng minta soepaja Tie Hoa toeroet menganter. Hek - holie maoe atawa tida terpaksa manggoetken kapala boewat meloeloesken.

Tio Houw berpaling boewat memanggil pada pengikoetnja.

„Kaoe poenja koeda kasiken boewat ditoenggangin oleh Tie Tayya," kata ia,

,,Habis akoe sendiri toenggang apa ?" menanja itoe pengikoet.

.,Boewat samentara ini kaoe terpaksa moesti djalan kaki doeloe, hingga kita sampe di tempat pembrentian, di mana kita bisa menjewa lagi satoe koeda boewat kaoe."

Itoe pengikoet terpaksa toentoen iapoenja koeda dan kasiken boewat ditoenggangin oleh Tie Hoa. Begitoelah Tie Hoa bersama Thio Liong dan Tio Houw djalanken iaorang poenja koeda dengen berendeng. Di sapandjang djalan Tio Houw menanjaken pada Tio Hoa tentang itoe perkara mametjahken Tong-bong-Tin dari Siang-yang-Ong dan orang jang ditanja moesti toetoerken satoe per satoe dengen ringkes.

Di itoe malem marika aken brenti menginep di satoe bilangan dari Siang - tjay-koan, pada waktoe iaorang ampir sampe, itoe penggawe jang brangkat doeloean boewat menjediaken kongkoan dateng menjamboet dan anter marika itoe ka itoe tempat penginepan. Ternjata itoe kongkoan ada satoe roemah penginepan jang besar, hingga itoe kreta-djoli dan kreta-kreta laennja, jang ditoempangin oleh Pek Hoedjin, iapoenja poetra dan boedjang boedjang prampoewan, bisa teroes masoek ka dalem itoe roemah-makan.

Pek Hoedjin sekali poen dengen pengaroehnja firman keizer, brangkat dari kota Radja boewat poelang ka kampoengnja dengen boleh menginep di pasanggrahan - pasanggrahannja pamerentah, tapi ia tjoema memake sadja tiga kamar dan satoe medja santapan dan minoeman. Apabila lebih dari sabagitoe, selamanja ia kaloewarken lagi oewang boewat membajar sabagimana moestinja. Hal mana ia kasi taoe dengen terang pada itoe orang-orang jang mengoeroes iapoenja kaperloean; tapi sekalipoen begitoe, boewat jang memangnja ia moesti dapat dari itoe pengoeroes, tida oeroeng ia kasi djoega persen dlapan tael perak.

Tio Seng, kapala itoe pengoeroes, tida brani trima itoe persenan, tapi Pek Hoedjin poenja mandoor kasi taoe, bahoewa di segala tempat madjikannja selamanja soeka berlakoe begitoe roepa. Ia kasi pikiran soepaja itoe kapala pengoeroes sabentar lagi soepaja pergi hatoerken trima kasi sadja pada madjikannja. Soeda tentoe sadja Tio Seng mendjadi sanget girang. Tida brentinja ia memoedji kamoerahan hatinja Pek Hoedjin, dan boewat bikin iapoenja poedjian djadi tambah „medok”, ia poedji-poedji djoega Pek Giok Teng almarhoem, katanja koetika hidoepnja ada satoe djago jang berboedi dan djarang ada bandingannja.

Di laen fihak, Tie Hoa, Thio Liong dan Tio Houw pada sasoedanja tjoetji moeka lantas berdoedoek minoem thee di itoe roemah poenja kamar sabelah Barat. Djika menoeroet pikirannja Tio Houw jang kasar, itoe waktoe djoega ia maoe soeroe orang sediaken minoeman, tapi Tie Hoa lantas menjegah.

„Djangan kasoesoe,” kata ia, „sekarang masi siang.”

„Kaloe menoeroet akoe poenja pikiran,” kata Tio Houw, „baek sembari minoem kita sembari mengobrol, dan ini malem kita moesti minoem sampe mabok baroe soeda.”

Djoestroe pada waktoe iaorang lagi mengomong, koenjoeng-koenjoeng di sabelah loewar ada kadengeran soewara riboet-riboet. Tio Houw lantas soeroe satoe pengikoet pergi liat, soeda terdjadi apa maka begitoe riboet. Itoe orang jang disoeroe lantas lakoeken itoe prentah, tida lama kamoedian dengen sikep jang goegoep ia masoek kombali.

„Tjilaka !” kata ia dengen bingoeng, „di loewar ada kimtjhe taydjin. la pakea maoe pake djoega kita poenja kong-koan ini.”

„Kimtjhe taydjin siapa ?” menanja Tio Houw.

„Menoeroet katanja itoe kimtjhe taydjin poenja pengikoet, ini oetoesan radja ada Lie Thian Siang Taydjin, jang dioetoes boewat preksa keadahanja soengei Hongho.”

Tio Houw mendenger itoe nama lantas sadja berseroeh dengen keras.- „Binatang jang koerang adjar!” kata ia dengen sengit „tjara bagimana ia ada mempoenjai itoe deradjat boewat tinggal dalem kita poenja kongkoan ini ? Toenggoe, akoe maoe pergi kaloewar....”

Tie Hoa lantas sentak tangannja Tio Houw, tapi loepoet, dan dalem sa'at itoe djoega itoe orang kasar berlompat kaloewar itoe roemah penginepan, di mana ia liat itoe pengoeroes lagi berloetoet di depan djolinja Lie Thian Siang, jang itoe waktoe soeda ditaro di moeka boemi, sedang itoe ambtenaar sendiri dengen pegangan pada tiang pemikoelannja itoe djoli, tjendrongken badannja kaloewar, sembari poęter-poeter kapalanja oendjoek iapoenja tingka jang tengik.

Dari iapoenja soewara bisa dikenalin ia ada saorang kalahiran Selatan. Dan ia itoe boekan laen dari itoe Lie Thian Siang, jang doeloean doedoek sebagi salah satoe hakim dari itoe pengadilan tjampoeran jang mempoenjai anem hakim, koetika lagi mamereksa perkaranja Ngai Houw. Ia memangnja ada kiatpay sama Ma Tjiauw Hian. Ini orang djoega jang soeroe Ngai Houw kenalin Ma Tjiauw Hian palsoe. Blakangan sasoedanja Ma Tjiauw Hian mati dihoekoem, ia tida brani berboewat boesoek lagi, maka iapoenja djabatan bisa naek mendjadi Kong-po-si-long, dan sekarang ia menerima prentah boeat bikin papreksahan keadahan gili-gilinja Soengei Koening.

Di sapandjang iapoenja perdjalanan ia bikin berbagi-bagi pameresan, hingga tempat-tempat jang diliwati poenja pendoedoek banjak jang merasa koerang senang. Sekarang ia djoestroe maoe balik kombali ka Kota Radja dan djalan liwat di sini. Oleh kerna ia poen berdjalan dengen menerima prentahnja keizer, jalah ada hak boewat memake pasanggrahannja pamerentah, maka pada waktoe ia sampe di bilangan itoe district, lantas ia soeroe itoe pengoeroes menjediaken tempat boewat ia bersama pengikoetnja mondok.

Itoe pengoeroes mengasi taoe bahoewa pasanggrahan jang disediaken boeat Lie Taydjin, letaknja masi doewapoeloeh lie lagi dari sini, sedeng di sini disediaken boeat pasanggrahannja Pek Ngo-tay-tay. Tapi Lie Thian Siang tida maoe mengarti.

„Akoe tida oesah perdoeli Ngo-tay-tay atawa boekan,“ kata ia dengen sombong, „pendeknja akoe maoe tinggal di sini dan abis perkara.“

„Kita orang bakerdja meloeloe menoeroeti sebagimana soerat prentah dari sabelah atas,“ manerangken itoe pengoeroes, „lagian ini waktoe Ngo-tay-tay soeda masoek ka dalem kongkoan, maka biar bagimana djoega akoe sanget bermoehoen soepaja Taydjin soeka berdjalan lagi bebrapa lie boeat menginep di pasanggrahan district Siang-tjay.“

„Tida, akoe tida maoe. Apa kaoe taoe bahoewa akos ada satoe oetoesan jang menerima firmannja keizer ?“

„Ngo-tay-tay djoega ada menerima firmannja keizer.“

„Hei koerang-adjar, kaoe masi maoe banjak batjot sadja !“ berseroeh itoe ambtenaar dengen goesar; „terang sekali jang kaoe maoe maen gila sama akoe. Hajolah, oppas-oppas, kasi hoekoeman rangket padanja !”

Itoe pengoeroes djadi sanget kaget dan katakoetan, dengen goegoep ia lantas berloetoet moehoen dikasi ampoen dan dikasianin. Djoestroe pada itoe waktoe Tio Houw kaloear dari dalem, lantas menanjaken katerangan pada itoe pengoeroes Tio Seng, orang siapa lantas toetoerken apa jang baroesan soeda dioetjapken oleh Lie Thian Siang.

„Kaoe boleh bangoen,“ kata Tio Houw kamoedian, „dan ini oeroesan boleh pasrahken sadja padakoe.“ Berkata sampe di sini ia berpaling ka djoeroesan itoe djoli dan berkata lagi: „Hei, Lie Thian Siang !“

Itoe ambtenaar jang masi berdoedoek teroes dalem iapoenja djoli, soeda liat njata, bahoewa itoe orang jang bitjara ada Tio Houw.

„Tio Hauw-Wie ada baek,“ kata ia.

„Akoe denger kaoe maoe tempatin ini kongkoan, apa betoel ?“ tanja Tio Houw jang tida memperdoeliken orang poenja tegoran.

„Akoe maoe tinggal di sini atawa tida, apa sangkoetannja sama kaoe? Akoe toch lagi beroeroesan sama itoe pengoeroes !“ kata Lie Thian Siang dengen angkoeh.

„Akoe tida maoe ambil perdoeli kaoe lagi beroeroesan sama itoe pengoeroes atawa boekan, tapi akoe rasa ada banjak lebih baek kaoe pergi mondok di pasanggrahan district Siang-tjay. Kaloe sadja kaoe masi maoe menengil . . . . .“

Sahabisnja berkata begitoe ia lantas goeloeng sabelah tangan badjoenja, bersikep maoe menoebroek ka djoeroesan djoli boeat memoekoel. Lie Thian Siang taoe jang ia bakal mendapet perkara tida enak, tapi beroentoeng Tio Liong itoe waktoe soeda mengikoeti kaloewar dan lantas menjegah perboeatannja iapoenja soedara angkat.

„Hajolah, kaoe moendoer, soedara,“ kata ia. kamoedian ia memandang pada Lie Thian Siang dan lantas menjodja sampe kadoewa tangannja ampir mengenaken moeka boemi.

„Akoe harep sadja Taijdjin djangan mendjadi goesar,”kata lagi ia, „baroesan akoe poenja soedara angkat jang bodo, lantaran mendenger Taijdjin hendak memake ini kongkoan, ia soeda berlakoe sedikit kasar. Tjoema sadja kita menerima prentahnja Pauw Siang Ja menganter pada Pek Hoedjin jang membawa maitnja iapoenja soeami berdjalan sampe di sini, atas prentahnja kapala district di sini telah disediaken kongkoan di ini tempat. Apabila Taijdjin hendak pake djoega ini tempat sabetoelnja tida ada halangannja boeat soeroe Pek Hoedjin pindah dari sini, tjoema sadja akoe ingin menanja pada Taijdjin, Pek Ngo Lo-Ja itoe apa ada soeatoe ambtenaar setia atawa soeatoe dorna ?”

„Och, ia ada satoe ambtenaar jang sanget setia,” kata Lie Thian Siang.

„Prihal setia atawa dorna boekannja boleh diroendingken oleh kita poenja diri sendiri,” kata lagi Thio Liong, hanja kaloe semoewa orang bilang itoe orang setia baroelah bisa dibilang setia, sebaliknja dibilang dorna tentoelah ada satoe dorna. Baroesan Taydjin bilang Pek Ngo-loya ada satoe ambtenaar jang setia, sekarang iapoenja poetra jang baroe sadja beroemoer tiga tahon, sabegitoe lekas masoek ka ini kongkoan, lantas sadja soeda djadi tidoer poeles, apabila maoe djoega menjoeroe Pek Hoedjin pindah, tentoe sekali moesti pondong dan bawa kaloewar pada itoe kongtjoe. Maka kaloe sadja lantaran itoe kongtjoe kena angin dan mendapet sakit, itoelah masi perkara ketjil, tapi apabila lantaran sakit sahingga djiwanja mendjadi tiwas, hal itoe tida bisa dibandingken djika Ngo-loya masi hidoep, djoega tida bisa dibandingken djika ia ada mempoenjai doewa atawa tiga poetra, sekarang hanja ia tjoema meninggalken itoe satoe poetra toenggal, apabila dengen sasoenggoenja kedjadian apa-apa, akoe rasa barangkali Taydjin poenja hati merasa sanget tida enak. Harep Taydjin soeka memberi kalonggaran, akoe sanget moehoen soepaja memandang pada itoe kongtjoe ketjil, dengen begitoe, boekan sadja Ngo-tay-tay aken bersoekoer atas Taydjin poenja boedi kabaekan, malah Ngo lo-ya marhoem poen, haloesnja aken merasa kacetangan boedi besar.”

„Sabaliknja”, ia tambain, „apabila Taydjin tida soeka pergi ka pasanggrahan district Siang-tjay lantaran sedikit djaoeh, di blakang ini roemah penginepan ada lagi roemah jang mempoenjai kamar-kamar lebih dari tigapoeloeh kamar. Dan apabila itoe Taydjin mąsi koerang soeka, di ini straat masi ada lagi satoe roemah penginepan jang besar, di mana Taydjin boleh menginep. Saoepamanja di sitoe Taydjin koewatir perabotannja koerang tjoekoep dan maoe pake djoega ini tempat, terpaksa kita aken minta Pek hoedjin pindah dari sini soepaja Taydjin boleh pake ini tempat”.

„Ach, moestail akoe maoe berlakoe begitoe kaliwatan.” kata Lie Thian Siang jang moelai djadi hilang kasombongannja. „Kaloe ada itoe halangan jang begitoe berat, soeda tentoe sadja akoe tiada brani mengganggoe. Akoe sama Pek Ngo Loya ada kawan sadjabat, biarpoen pada orang jang sama-sekali akoe tida kenal, akoe tida nanti maoe berboewat perkara jang melanggar kabedjikan. Tjoema sadja kaloe itoe toean jang satoenja lagi, bisa bitjara sabagimana toean sekarang, nistjaja tida nanti terdjadi ini pers-lisihan jang tida ada goenanja. Akoe maoe tinggal dalem itoe roemah jang di sabelah blakang, djangan kata ada tigapoeloeh kamar lebih, sekali poen tjoema ampat lima kamar, sama-sekali tida ada halangannja. Kaoe toeloeng kasi taoe pada Pek hoedjin, bahoewa akoe tida bisa katemoeken sendiri padanja, dan toean soedi toeloeng sampeken akoe poenja pengrasahan toeroet berdoeka atas meninggal iapoenja soewami”.

Thio Liong kombali menjodja sampe kadoewa tangannja ampir mengenaken boemi.

„Itoelah tandanja jang Taydjin soeka memberi kalonggaran jang loewar biasa”, kata ia.

Samentara Tio Houw di satoe pinggiran, masi teroes sadja merasa sanget moerka.

„Apa ia brani bilang tida maoe mengala, hm !” kata ia dengen oering-oeringan.

Thio Liong kombali poera-poera marahi pada soedara angkatnja.

Orang-orang jang berada di sitoe semoeanja pada memoedji bahoewa Thio Liong pande sekali bitjara. Tapi sabenarnja Thio Liong tida nanti mampoe oetjapken itoe matjem perkatahan, hanja ia lebih doeloe soeda dapat adjaran dari Hek-Ho-lie jang tjerdik. Koetika Tio Houw berlompat kaloewar, ia bersama Thio Liong poen mengikoetin. Ia liat orang apa jang lagi diadjak beroeroesan sama Tio Houw, lantas sadja ia adjarin itoe semoewa perkatahan jang baroesan Thio Liong oetjapken. Sebab ia taoe bahoewa sekalipoen dipoekoel, djoega tida ada goenanja. Salah salah lantaran itoe bisa menerbitken perkara jang tida enak bagi Pauw Kong kerna Lie Thian Siang bisa masoekin pangadoean pada Baginda Keizer, bahoewa Pauw Kong soeda biarken iapoenja orang sabawahan menghina pada satoe oetoesannja keizer.

Sasoedanja itoe oeroesan djadi beres, itoe tiga orang boeroe-boeroe masoek ka dalem iaorang poenja kamar sebla Barat, dengen naek di atas djendela iaorang mengintip Lie Thian Siang poenja djoli jang dianter oleh itoe pengoeroes ka roema blakang; di blakangnja itoe djoli ada mengikoeti bebrapa banjak kreta jang ditarik sama onta, jang mana bisa didenger dari lotjeng jang digantelken pada lehernja itoe binatang. Menoeroet doegahan sama-sekali tida koerang dari limapoeloeh onta penarik semoewanja pada dimasoekin ka blakangnja itoe roemah penginepan, dengen diikoetin oleh bebrapa banjak pengikoet-pengikoet.

Tie Hoa taoe itoe onta-onta ada memoewat mas dan perak atawa barang-barang jang berharga. Di achirnja ada mengikoetin doea penoenggang koeda, jang soeda membikin Tie Hoa mendjadi sanget terkedjoet, sebab ia liat marika itoe djalanken iaorang poenja kandaran dengen berendeng dan sampe di sabelah blakangnja itoe roemah penginepan baroe marika toeroen dari marika poenja toenggangan.

Iaorang poenja toeboe ada toedjoe kaki tingginja. Jang satoe memake satoe topi dari soetra koening dan pakean dari soetra idjo, begitoe poen warnanja iapoenja sapasang sepatoe zool tipis. Iapoenja warna koelit moeka seperti mas moeda, alisnja pandjang dan matanja galak, hidoengnja besar dan sedikit pesek, sedeng di bawah moeloetnja jang lebar ada toemboe koemis item jang berombe sampe di depan dadanja. Di pinggangnja ada tergantoeng satoe golok.

Jang laennja, iapoenja kapala memake satoe boengkoesan kapala dari soetra idjo, begitoe poen warnanja iapoenja pakean jang terbikin dari soetra dan sapasang sepatoe; sedeng di pinggangnja poen ada tergantoeng satoe golok. Tjoema japoenja koelit moeka itam seperti panlat koewali, halisnja gomplok tapi koemis dan djenggotnja tida dipiara pandjang.

Orang-orangnja satoe koening dan satoe itam, begitoe poen warna boeloenja marika poenja koeda, di atas mana masing-masing ada terikat satoe boengkoesan jang beroepa pandjang. Tie Hoa satelah meliat itoe semoewa, dalem hatinja lantas taoe bahoewa ini doewa orang ada orang-orang jang soeka berdjalan di waktoe malem. Tegasnja bangsa brandal atawa pentjoeri. la tida bisa mengarti mengapa Lie Thian Siang, satoe kimtjhe, bisa berdjalan sama-sama dengen pendjahat. Apa boekannja lantaran ia itoe bawa terlaloe banjak mas dan oewang, maka ia sampe perloe pake toekang toekang popio ?

Tapi itoe doewa boengkoesan londjong jang di iket di dekat selah, Tie Hoa doega pasti ada pakean jang soeka dipake di waktoe malem. Dan kaloe diliat paras moeka dan romannja itoe doewa orang, jang begitoe galak dan bengis, pasti sekali boekannja orang baek-baek. Lantaran ia merasa tjoeriga dan sangsi, laloe ia tanja pada Thio Liong apa kenal itoe doewa orang atawa tida. Orang jang ditanja bilang tida kenal.

„Apa kaoe bisa pergi tjari katerangan ?” tanja lagi Tie Hoa.

„Itoelah akoe maoe tjoba,” saoet Thio Liong.

„Nanti doeloe, biarken iaorang soeda rengse beresken iaorang poenja barang bawa'an.

Tida antara lama kamoedian santapan soeda disediaken, sasoedanja iaorang makan-minoem sampe kenjang dan bekas makan dibenahin, Thio Liong berkata, ia maoe moelai pergi mentjari taoe.

„Tapi kaoe moesti berlakoe sangat hati-hati, tida boleh berlakoe tjerobo,” kata Tie Hoa. „Tentoe sadja. Lagian orang-orangnja Lie Thian Siang kita sering katemoeken tatkala kita mengantar Pauw Siang-ija pergi ka kraton. Maka akoe maoe tjari doewa kenalan, pada siapa akoe rasa tida terlaloe soesa boeat mendapet katerangan tang bener.

Tida antara lama kamoedian Thio Liong soeda balik kombali dengen bersenjoem.

„Ternjata kaoe poenja doegahan ada benar sekali,” kata ia, Baroesan akoe mentjari doewa pengikoetnja Lie Thian Siang, jang satoe bernama Siong Sin dan jang laennja Tjia Kie. Menoeroet ini doewa orang poenja katerangan, Lie Thian Siang ada mempoenjai satoe soedara misan jang bernama Phoa Eng Hok, orang siapa soeda perna mendjabat pangkat tihoe di Na-leng, dan itoe doewa orang jang bertoeboe tinggi besar ada bekas orangnja itoe soedara-misan. Marika berdoewa saparo bakerdja sabagi tjinteng dan saparo membantoein menangkap pendjahat dan perampok. Kabetoelan pada satoe hari Lie Thian Siang pergi koendjoengin iapoenja soedara-misan itoe, dan itoe waktoe ia katemoeken itoe doewa orang jang bertoeboe begitoe keren dan gagah, lantas sadja ia pindjem marika itoe boewat melindoengin padanja di sapandjang perdjalanan.”

„Apa kaoe tanjaken djoega iaorang poenja she dan nama?” menanja Tie Hoa.

„Itoe doewa orang ada bersoedara satoe dengen laen, jang satoe bernama Heng Djoe Liong dan jang moedahan bernama Heng Djoe Houw.”

„Menoeroet akoe poenja doegahan,” kata lagi Tie Hoa, „Lie Thian Siang pake itoe doewa orang boekannja meloeloe boewat melindoengin padanja, akoe rasa tentoe ada lagi laen resia jang diklingkoengin.” „Itoelah akoe tida taoe,” kata Thio Liong.

„Akoe soeda dapat satoe pikiran. Sabentar, sasoedanja iaorang makan, akoe maoe mengintip dan mendengeri iaorang poenja pembitjarahan, boeat liat apa jang iaorang bitjaraken.”

Thio Liong manggoetken kapalanja menjataken satoedjoe.

Pada djam sapoeloeh malem Tie Hoa lantas selipken ka atas iapoenja thungsha dan goeloeng kadoewa tangan budjoenja; dari satoe gang di sabelah Timoer ia menoedjoe ka djoeroesan blakang, itoe bagian roemah jang ditinggalin oleh Lie Thian Siang, roemah mana ada memake satoe djendela besar di sabelah blakangnja. Tie Hoa lantas bikin petjah sedikit kertas jang menoetoepin itoe djendela, dari sitoe ia mengintip ka djoeroesan dalem.

Ternjata itoe waktoe Lie Thian Siang lagi oendang itoe doewa soedara berdoedoek makan dan minoem. Sedang perkara jang iaorang bitjaraken, adalah oeroesan menjoeroe itoe doewa orang pergi ka Kay-hong-hoe boewat memboenoeh pada Pauw Kong.

---

FATSAL II

Itoe waktoe Lie Thian Siang berdoedoek di sabelah tengahnja satoe medja jang penoeh sama barang santapan dan minoeman, sedeng doewa orang jang bermoeka koening dan item berdoedoek mengapit di kadoewa pinggiran.

„Kadoewa soedara," kata itoe ambtenaar dorna pada itoe doewa orang; tapi sabelonnja orang jang bitjara melandjoetken bitjaranja, dengen tjepat itoe doewa orang menjataken jang marika tida sanggoep trima itoe bahasa soedara dari saorang jang berpangkat hesar.

„Oh, itoelah tida perloe diriboetin," kata Lie Thian Siang, „kaoe berdoea toch ada orang-orang gagah di ini djeman, jang achirnja aken mendjadi orang-orang besar dan ternama, sabagi tiangnja negri. Akoe ada lagi satoe oeroesan besar jang meminta kadoewa soedara puenja tenaga bantoean; belon taoe kaoe berdoewa poenja katabahan bisa sampe di mana ?"

„Kita berdoewa menerima Taydjin poenja boedi jang begitoe besar," kata itoe doewa soedara dengen berbareng, „biar poen antjoerken kita poenja badan masi belon bisa membales boedi itoe. Prihal kita berdoewa poenja katabahan dan ilmoe kapandean, kita soeda bisa pahamken ilmoe djalan tjepet dengen tida bersoewara dan tiada meninggalken tanda bekasnja, biar poen naga di laoetan dan harimau di oetan, kita sanggoep taloekin dan tangkap. Kaloe Taydjin ada prentah apa-apa, biar moesti masoek di laoetan api djoega, kita tida nanti moendoer. Tjoema belon taoe perkara apa jang Taydjin maoe prentah kita lakoeken?"

„Oho, bagoes sekali !" kata itoe dorna dengen pengrasahan sanget girang. „Dengen teroes terang akoe maoe kasi taoe pada kaoe orang, akoe poenja goeroe ada minister karadjahan jang sekarang, jaitoe Bang Taysoe, orang siapa ada mempoenjai sakit hati pada si moeka itam dari Kay-hong-hoe, Pauw Kong, lantaran poetranja soeda dikasi hoekoeman katjip badannja sampe terpoetoes doewa. Sampe sekarang itoe sakit hati masi belon djoega bisa dibales, sebab biar poen beroelang-oelang ia masoekin pengadoean, tapi lantaran Baginda Keizer berfihak pada si moeka itam, djadi sampe ini sa'at ia itoe masi tinggal enak-enakan sadja. Akoe liat kaoe berdoewa poeaja roman begitoe keren dan tida sama dengen orang jang kabanjakan, soeda tentoe sadja kaoe orang poenja ilmoe kapandean poen ada tinggi, maka dengen sengadja akoe soeda adjak kadoewa soedara boewat masoek ka kota radja. Kaloe sadja kaoe orang bisa membinasaken djiwanja Pauw Kong, nistjaja kaoe orang bakal mendapet kasenangan dan beroleh djabatan tinggi. dengen tenaga bantoeannja akoe poenja goeroe. Laen dari itoe, kaoe aken mendapet satoe oepahan dari sadjoembla oewang sapoeloeh riboe tael perak. Belon taoe kadoewa soedara poenja pikiran bagimana ?"

„Boenoeh mati pada Pauw Kong, itoelah ada perkara jang kita soeka sekali !"

Dengen goegoep itoe dorna berbangkit boewat menjegah.

„Djangan bitjara begitoe keras," kata ia dengen soewara kaget. „Inilah ada perkara resia dan besar, sama sekali tida boleh bikin riboet. Apabila kadengeran oleh laen orang, nistjaja bisa bikin tjilaka kita semoewa."

Sahabisnja berkata ia lantas soeroe boedjangnja pergi meliat di loear apa ada orang atawa tida. Itoe boedjang lantas kaloewar dan tida lama kamoedian balik kombali dengen mengasi taoe bahoewa di loewar tida ada barang satoe manoesia. Tjoema sajang ia tjoema pergi tengok ka moeka dan tida pergi preksa ka blakang.

„Mengapa kadoewa soedara baroesan berkata begitoe?” menanja lagi itoe dorna.

„Dengen teroes-terang akoe bilang pada Taydjin,“ kata Heng Djoe Liong. „Kita orang biasa lakoeken pekerdjahan merampok di sapandjang lemba Soengei Koening, dan menoeroet katerangannja orang-orang dari golongan liok-lim, katanja akoe poenja ajah telah binasa di tangannja Pauw Kong, tjoema sadja akoe tida taoe doedoeknja perkara jang terang. Apabila dengen sasoenggoenja ia binasa dalem tangannja itoe ambnaar moeka itam, soeda tentoe sadja kita moesti bikin pembalesan atas sakit hatinja kita poenja ajah.“

„Kaloe perkara jang terdjadi di Kay-hong-hoe, tida ada satoe jang akoe tida taoe,“ kata Lie Thian Siang.

„Akoe poenja ajah bernama Heng Kit,“ menerangken Heng Djoe Liong, „doeloean ia poen melakoeken pakerdjahan liok-lim, blakangan ia masoek djadi saykong . . . .

„Oh, itoe perkara akoe taoe dari bermoela sampe di achirnja,” menjelak Lie Thian Siang. „Kiranja itoe saykong ada mendjadi kadoewa soedara poenja ajah. Oleh kerna kaoe orang poenja ajah soeka sekali maen tjatoer, seringkali ia temenin Bang Taysoe maen itoe matjem permaenan. Itoe hari Pauw Kong soeroe Tian Him Hoei memboenoeh pada Bang Taysoe, beroentoeng Bang Taysoe poenja redjeki sanget besar, maka kabetoelan itoe hari ia djoestroe lagi pergi menenamoe.

Tian Tjiauw jang maoe melakoeken itoe perboewatan boesoek, koetika itoe dateng ka Tjia-goat-hian, di mana ia katemoeken kaoe poenja ajah dan dengen tida banjak bitjara lagi lantas sadja ia soeda boenoeh mati kaoe orang poenja ajah itoe. Dengen begitoe, binasanja kaoe poenja ajah, boleh dibilang separo dalem tangannja Pauw Kong dan saparo di tangannja Lam-Hiap.

Memang djoega soeatoe laki-laki hidoep dalem ini doenia, apabila tida bisa membales sakit hatinja iapoenja ajah, tida bisa teritoeng satoe manoesia.

„Apabila akoe tida bisa memboenoeh pada si kapala areng, akoe bersoempa tida maoe djadi orang lagi,“ kata Heng Djoe Liong dengen pasti.

„Besok di district Siang-soei akoe maoe menoelis satoe soerat, jang kaoe orang boleh bawa ka akoe poenja roemah. Di waktoe siang kaoe orang moesti pergi bikin penjelidikan jang terang perdjalanannja boewat masoek, soepaja di waktoe malem kaee orang bisa melakoeken pakerdjahan dengen laloewasa. Apabila kaoe orang ada perloe pake barang apa-apa, boleh minta sadja pada akoe poenja anak. Akoe maoe menoenggoe kau orang poenja kabar di district Siang-soei dengen berpoera-poera sakit. Nanti, sasoedanja kaoe orang habis melakoeken itoe pakerdjahan, tida perdoeli berhasil atawa tida baroe akoe masoek ka kota radja“.

Tie Hoa, mendengerin sampe di sini, lantas taoe bahoewa itoe pembitjarahan soeda ampir sampe di achirnja, dan tida perloe ia moesti mendengeri lebih djaoe, maka ia lantas balik kombali ka kamarnja katemoeken Thio Liong dan Tio Houw.

„Satoe kali ini akoe soeda bisa menjelidikin sampe di dasarnja perkara“, kata ia pada doewa kawannja itoe. „Lantaran itoe djoega di hari esok akoe tida bisa mengikoet kaoe orang pergi ka Siang-yang“.

„Mengapa mendadak-sontak lantas tida maoe pergi?“ tanja Tio Houw.

Tie Hoa lantas toetoerken apa jang baroesan ia dapet denger. tapi Tio Houw jang adatnja berangasan, lantas sadja memaki kalang-kaboetan.

Djangan kasiken iaorang pergi melakoeken itoe pakerdjahan boesoek,“ kata ia. „Sekarang kita pergi tangkep iaorang bersama itoe dorna Lie Thian Siang, kamoedian kita pasrahken pada pembesar di ini tempat boewat dianterken ka Kay-hong-hoe.“

„Itoela tida bisa !“ menjegah Hek-ho-lie. „Djika berdasar sama omongan kosong sadja, tjara bagimana kita bisa mempoenjai alesan boewat tangkep iaorang? Kita moesti bisa dapet pegang iaorang poenja perboewatan jang berboekti, baroelah kita bisa menangkep; di itoe waktoe tida perdoeli bagimana djoega, iaorang tida nanti bisa menjangkal dan loepoetken dirinja dari hoekoeman negri. Tjoema akoe tida mengarti prihal Tian Twako jang dikataken soeda kasalahan boenoeh Heng Kit, sabetoelnja itoe oeroesan doedoeknja bagimana“

„Boekannja begitoe,“ menerangken Thio Liong. „Itoe semoewa ada karangannja itoe dorna Lie Thian Siang sadja, kerna akoe rasa ia hendak bikin itoe doewa orang poenja hati mendjadi panas, soepaja bisa melakoeken itoe pakerdjahan dengen soenggoe-soenggoe hati." „Ja, sekarang akoe mengarti,“ kata Hek-ho-lie, „tjoema doedoeknja perkara jang sabetoelnja begimana toch?“

Kaloe maoe dibitjaraken, itoelah ada satoe riwajat pandjang,“ kata Thio Liong. „Itoe wak toe ada satoe djanda toewa dari familie Oei, orang siapa ada mempoenjai toewa gadis, jang satoe bernama Kim Hiang dan jang laennja Giok Hiang. Jang terseboet blakangan soeda bertoendangan sama Tio Tek Seng poenja anak. Tapi pada waktoe menikah, itoe djanda-toewa soeroe Kim Hiang jang menggantiken adenja. Familie Tio liat itoe kamanten prampoewan boekannja ada itoe gadis jang dilamar, lantas sadja djadi riboet, hingga, Kim Hiang dalem kariboetan maboer poelang ka roemah iboenja. Itoe kadoewa besan lantas berkoetetan sama-sama dateng bikin pendakwahan pada siangya. Koetika siangnja panggil Kim Hiang dateng mengadep, ternjata itoe gadis roepanja sangat djelek dan djoega pikirannja koerang beres. sebab sesampenja di depan medja pengadilan ia lantas mengotje tida karoean. Tapi di itoe waktoe siangnja lantas djato pangsan dari iapoenja medja pengadilan. Blakangan kita minta pertoeloengan hweeshio dari Tay-siang-kok-sie boewat bikin pertanjahan pada dewa.

„Sampe sekarang akoe masi bisa inget boenjinja itoe djawaban dari dewa, jang kira-kira bermaksoed begini: ,Perboewatan gelap socsa didjaga, waktoe doedoek di medja pengadilan, pikiran djadi melajang, biar poen ada thabib jang pande tida nanti bisa mengobati, tapi satoe kali sobat baek dateng lantas bisa disemboehken.“ Itoe waktoe tida ada barang satoe orang jang bisa petjahkenmaksoednja itoe perkatahan samar. Tjoema taoe sadja djika ada sobat baek jang dateng tentoe bisa didapetken obatnja, Kabetoelan sekali Tian Him. Hoei dan di tengah perdjalanan ia katemoeken moeridnja Heng Kit, satoe saykong ketjil jang maboer dengen menggondol goeroenja poenja barang dan pakean. Tian Him Hoei denger iaorang bilang, bahoewa Heng Kit ada mempoenjai satoe boekoe jang dinamaken Im-mo-lek. Lantaran ini djoega Bang Taysoe soeda oendang padanja boewat bikin tjilaka pada Siangya. Kamoedian Lam Hiap di waktoe malem pergi masoek ka astananja Bang Taysoe, dan itoe waktoe djoestroe ia katemoeken Heng Kit lagi malakoeken iapoenja ilmoe boesoek, tapi itoe matjem ilmoe djahat, pantangan sekali tida boleh diliat oleh laen orang, dan itoe waktoe lantaran kera diliat orang, iapoenja ilmoe lantas djadi gagal sendirinja dan sabaliknja bikin mati pada dirinja. Dan moelai itoe waktoe Siangya poenja penjakit djadi baek dan oeroes itoe perkara menoekar kamanten prampoewan, Sabagimana kaoe soeda taoe, blakangan Lam-hiap lantas mendjabat pakerdjahan negri. Dengen begitoe, tjara bagimana bisa dibilang Tian Him Hoei atawa poen Siangya jang binasaken djiwanja Heng Kit? Itoe soeda terang sekali ada karangan djoesta boewat menipoe dan bikin panas hatinja itoe doewa begal."

„Och, kiranja begitoe," kata Tie Hoa, „besok akoe maoe koentit ini doewa orang, kerna akoe taoe ini waktoe di Kay-hong-hoe tida ada orang jang pande. Kaloe marika tida lakoeken itoe pakerdjahan memboenoeh djangan kata lagi, sabaliknja djika dengen sasoenggoenja iaorang lakoėken itoe perboeatan boesoek, boekannja akoė boeka moeloet besar, kaloe sampe ada satoe jang bisa melolosken dirinja, kaoe boleh sesalken akoe.“

Sekarang boekan sadja Tio Houw tida brani paksa Tie Hoa ikoet djalan sama-sama, sabaliknja ia memberi hormat pada Hek-ho-lie dan mamesen dengen wanti-wanti soepaja ia itoe bikin pendjagahan dengen hati-hati.

„Di hari esok akoe tida aken katemoeken lagi pada Ngo-tay-tay,“ kata Tie Hoa, „harep kaoe toeloeng sampeken akoe poenja hormat padanja.“

Pada waktoe pagi-pagi sekali, Tie Hoa menoenggoe Lie Thian Siang brangkat, tempo di sabelah loewar soeda kadengeran marika itoe poenja gerakan, dengen semboeni ia berdjalan kaloewar doeloean dari itoe roemah penginepan dan menoenggoe di tengah djalanan. Tida antara lama ia liat dari kadjaoehan ada mendatengin Lie Thian Siang poenja djoli sama ia itoe poenja barang-barang bawa'an dan pengikoet. Tie Hoa koentit marika itoe dengen tida berdjaoehan. Sahingga sore iaorang barne sampe di pasang- grahan district Siangsoei.

Tie Hoa meliatin sampe Lie Thian Siang dan pengikoetnja masoek ka dalem itoe Kongkoan, baroelah ia mentjari satoe tempat penginepan di dekat sitoe. Sabegitoe lekas ia masoek ka itoe tempat penginepan, lantas ia pesen toekang roemah makan, bahoewa ini hari lantaran ia soeda berdjalan djaoeh dan merasa sanget lelah, ia maoe tidoer siang-siang. Maka ia minta orang djangan ganggoe padanja.

Sasoedanja itoe toekang roemah makan berlaloeh, Tie Hoa lantas masoek ka dalem kamarnja dan lantas tapal pintoenja serta pademken djoega lampoe, kamoedian ia doedoek di atas pembaringan dengen bersila boewat bikin bening iapoenja pikiran sembari menarik napas pandjang. Ampir djam sapoeloeh liwat semoewa orang dalem itoe roemah penginepan soeda pada menggeros dan tjoema katinggalan sadja itoe orang-orang jang djalan meronda, dengen tida menoekar. lagi pakean malem. Tie Hoa kaloewar dari kamarnja dengen tindakan indap-indap, kamoedian ia tapal lagi itoe pintoe dengen masoekin tangannja dari djendela kamar.

Dengen satoe kali lompat sadja Tie Hoa soeda berada di atas gentengnja itoe roemah dan teroes naek ka atas woewoengan dan menoedjoe ka bagian blakangnja Lie Thian Siang poenja kongkoan. la lompati satoe pagar tembok dan pergi tjari kamar jang ditempati oleh itoe ambtenaar dorna, jang ternjata ada satoe roemah dari lima kamar besar. Satoe djendela sabelah blakang. ]kombali ia bikin petjah kertas toetoepannja, roepaken satoe lobang ketjil.

la liat itoe waktoe Lie Thian Siang lagi pegang' satoe soerat dan soeroe boedjangnja sediaken ampat boengkoes oewang dari limapoeloe tael perak, dan oendang itoe doewa orang gagah. Itoe boedjang lantas berdjalan kaloewas, tida lama kamoedian kadengeran soewara orang mendehem dan moeili pintoe lantas tertoelak, berbareng dengen itoe kaliatan Heng Djoe Liong dan Heng Djoe Houw bertindak masoek. Lie Thian Siang berbangkit dari iapoenja tempat doedoek serta silahken itoe doewa orang berdoedoek.

„Doedoeklah, soedara-soedara,“ kata ia dengen soewara manis.

„Itoelah kahormatan besar jang kita tida bisa trima,“ kata itoe doewa orang. Harap Taydjin soeka berdoedoek.“

„Akoe ada pembitjarahan penting jang moesti dibitjaraken dengen terang. Doedoek sadja, djangan berlakoe soengkan.”

Itoe doewa orang baroe brani doedoek, samentara boedjang-boedjang hatoerken tjangkir jang terisi thee.

„Seperti kemaren malem akoe soeda bilang, akoe tida aken brangkat teroes,” kata Lie Thian Siang; „akoe maoe toenggoe kaoe orang poenja kabar baek di sini. Ini ada sapoetjoek soerat, jang perloe sekali kaoe moesti simpen baek-baek djangan sampe djadi hilang. Kaoe orang boleh masoek ka pintoe kota Hong-tjeng-moei dan teroes ka Sip-djoe-kee, di mana kaoe boleh menanjaken satoe tempat jang dinamaken Song-tiok-kan-hang, jang letaknja di sabelah Oetara dari pintoe besar, di sitoe ada akoe poenja roemah. Kaoe boleh seboet akoe poenja nama, apa Lie Thian Siang Taydjin tinggal di sitoe atawa boekan. Biar kaoe soeda menanjaken tempat jang betoel, ini soerat kaoe masi belon boleh pasrahken pada siapa djoega. Kaoe haroes minta bertemoe sama akoe poenja anak, pada siapa kaoe kasiken sendiri soerat ini. Itoe waktoe akoe poenja anak tentoe aken oendang kaoe masoek ka dalem. Akoe poenja anak namanja Lie Beng. Sasoedanja sampe di sana dan ketemoe padanja, segala kaoe poenja barang kaperloean ia jang nanti sediaken. Dan di sini ada oewang doewa ratoes tael perak, tapi boekannja kaoe poenja oepahan, hanja boeat kaoe orang poenja onkost djalan. Nanti, sasoedanja kaoe lakoeken itoe pakerdjahan dengen berhasil, tentoe kita aken toeloeng soepaja kaoe orang bisa pangkoe pakerdjahan negri, sedeng akoe poenja goeroe djoega aken kasi satoe oepahan dari sapoeloeh riboe tael perak.” „Kita tida brani menerima Taydjin poenja persenan,” kata doewa candidaat pemboenoeh dengen berbareng. „Perkara kita melakoeken itoe pakerdjahan memboenoeh pada Pauw Kong, saparo bisa dibilang ada perkara kita bikin pembalesan atas sakit hatinja kita poenja ajah. Apabila sasoedanja itoe perkara dilakoeken dengen berhasil, Taydjin maoe menoeloeng pada kita orang dalem pakerdjahan negri, tentoe sadja kita aken merasa sanget bersoekoer tida abisnja. Taydjin boleh menoenggoe sadja di sini, kita maoe masoek ka dalem kota dan bakerdja dengen meliat gelagat; kaloe hari masi siang, kita maoe lantas meliat-liat djalanan boeat kita masoek ka Kay-hong-hoe, dan di itoe malem djoega kita aken lakoeken itoe pakerdjahan. Kita aken panggal kapalanja si moeka item dan boengkoes sama salembar kertas minjak, dan di itoe malem djoega kita aken kaloear dari kota boeat pasrahken itoe kapala pada Taydjin di sini”.

„Itoe semoea ada mengandel sama kadoea soedara poenja kapandean,” kata si dorna.

„Dan kita mengandel sama Taydjin poenja redjeki jang besar,” kata Heng Djoe Liong.

„Ha ha ha! Kaoe berdoea boleh siang-siang pergi tidoer dan mengaso, soepaja besok pagi-pagi bisa lantas brangkat, dan itoe waktoe kaoe orang boleh tida oesa katemoeken lagi akoe, hanja boleh lantas brangkat sadja. Akoe menoenggoe kaoe orang poenja kabar baek di sini”.

Itoe kadoewa soedara Heng lantas bongkokin badannja boewat membri hormat, kamoedian iaorang berlaloe dengen membawa itoe soerat dan oewang persenan, sedang Lie Thian Siang poen toeroet menganter sampe di pintoe. Tapi koetika itoe doea orang soeda berdjalan sedikit djaoe, kombali Lie Thian Siang panggil marika itoe dan dipesen lagi dengen poma-poma bahoewa iaorang haroes berlakoe dengen hati-hati, soepaja itoe perkara berhasil.

Itoe waktoe Tie Hoa pikir lebih baek ia balik poelang ka iapoenja tempat penginepan, sebab ia soeda dapetken apa jang ia ingin tade, tapi mendadak ia liat di kertasnja djendela sabelah depan jang poetih seperti saldoe, djoega, ada terdapat satoe lobang ketjil, hal ini soeda bikin ia terprandjat. Kerna orang jang soeka berdjalan malem, selamanja taoe bagimana tjaranja orang-orang dari iapoenja golongan.

Dengen meliat itoe lobang ketjil di atas itoe kertas djendela depan, Tie Hoa lantas mengatahoei, bahoewa di sana ada soeatoe orang jang berilmoe tinggi, jang djoestroe mengintip sabagimana djoega ia sendiri ada berboewat. Maka ia lantas bongkokin badannja dan kaloewarken iapoenja ilmoe kapandean berdjalan malem, menoedjoe ka djoeroesan Barat dengen melompati satoe pagar tembok.

Dalem sa'at itoe djoega ia denger soewaranja Heng Djoe Houw jang berseroeh: ,,Aja !" Dan berbareng dengen itoe ia liat ada satoe bajangan itam jang berklebat ka djoeroesan Selatan-barat. Tapi koetika ia tjari dengen terliti, itoe bajangan soeda djadi linjap dan tida bisa kaliatan lagi. Hal ini bikin Tie Hoa heran dan tida bisa mengarti.

„Siapatah orang itoe ?“ menanja ia pada diri sendiri. „lapoenja gerakan badan ada begitoe gesit dan tjepat, kepandeannja boleh dibilang ada lebih tinggi sapoeloeh kali dari akoe !“

Bermoela ia berniat boewat menjoesoel, tapi lantaran ia tida taoe ka mana ia moesti menjoesoel, terpaksa ia balik poelang ka iapoenja tempat penginepan. Sasampenja dalem iapoenja kamar, ia tida pasang lagi lampoe, hanja doedoek bersila kombali di atas iapoenja pembaringan boewat membikin sabar iapoenja pikiran dan menoenggoe terangnja tanah bersedia boeat brangkat.

Sekarang kita balik pada itoe doewa soedara Heng, jang membawa itoe sapoetjoek soerat dan oewang doewa ratoes tael perak. Koetika ia orang sempe di dalem kamarnja, dengen tida terdoega ada satoe barang jang menjamber dan mengenaken Heng Djoe Houw, poenja blakang leher. Begitoelah ia lantas kaloewarken satoe soewara treakan sembari berpaling boewat meliat ka blakang, tapi tida kaliatan satoe apa. „Engko, ini hal aneh sekali,” kata ia pada soedara toewanja. „Entah dari mana datengnja satoe batoe jang ditimpoekin dan mengenaken akoe poenja blakang leher.” Sahabisnja berkata ia lantas memaki kalang-kaboetan.

Heng Djoe Liong lantas menjeagah. „Djangan memaki, soedara,” kata ia. Itoe batoe iida bisa djadi ditimpoekin dari sabela loewa, sedeng di dalem kamar poen, tida ada laen orang. Boleh djadi ini kamar lantaran soeda terlaloe lama tida ditinggalin manoesia, djadi soeka didiamin oleh dewa-dewa, jang lantaran merasa iseng soeda tjoba maen-maen sama kaoe menimpoek dengen itoe batoe. Maka djangan sekali kaoe mengaloewarken perkatahan jang koerang - adjar, sebab kaloe membikin dewa djadi goesar, itoelah boekannja perkara jang boleh diboewat maen-maen.

„Akoe tida pertjaja perkara jang begitoean”. djawab adenja.

Sahabisnja berkata iaorang taro itoe boengkosan oewang di atas medja makan dan simpen itoe soerat dalem badan, kamoedian iaorang panggil djongos boewat bikin sedia makanan dan arak. Samingkin pikir itoe hal jang iaorang bakal hadepken, iaorang samingkin djadi goembirah, hingga dengen tida merasa lagi iaorang djadi mabok lantaran pengaraehnja aer kata-kata. Sasoedanja perabotan bekas makan diangkat, itoe doewa soedara lantas mendjadi poetes dan baroe mendoesin pada pagi jang berikoetnja.

——————

FATSAL III.

Sabagitoe lekas bangoen iaorang lantas soeroe orang sediaken iaorang poenja koeda sedeng itoe oewang iaorang niatan bagi boewat masing-masing bawa saparonja. Tapi koetika iaorang meliat ka atas medja makan, lantas iaorang djadi sanget terkedjoet, sebab itoe boengkoesan oewang tjoema katinggalan doewa boengkoes sadja.

„Engko, mengapa itoe boengkoesan oewang tjoema tinggal doewa?"“menanja Heng Djoe Houw.

„Masa !“ kata jang toewa'an, itoelah heran sekali. „Apa barangkali telah ditjoeri oleh orang-orangnja ini roemah penginepan? Tapi akoe rasa hal itoe tida bisa djadi. Djangan kata kita jang dateng menginep di sini dengen setjara officieel, biar poen tetamoe-tetamoe biasa djoega, toekang roemah makan tida nanti brani ganggoe barangnja. Sebab soeatoe roemah penginepan haroes mendjaga kapertjajahan“.

„Kita boleh tida oesa ambil perdoeli tentang itoe semoewa,“ kata Heng Djoe Houw, „kita poenja oewang hilang dan kita moesti minta ganti padanja.“

„Hei, itoelah djangan sekali-kali,“ kata Heng Djoe Liong dengen tjepat. „Tjoba kaoe pikir: kita soeda boeka moeloet besar di hadepan Taydjin, tapi sekarang kita poenja barang sendiri masi kita tida mampoe lindoengin, kaloe Taydjin dapet taoe hal ini, tjara bagimana ia bisa pertjaja jang kita bisa melakoeken itoe pakerdjahan? Maka boewat sekarang ada lebih baek kita trima oentoeng sadja, anggep sabagi djoega kita tjoema trima sedikitan. Lagian djika kita membawa terlaloe banjak oewang tjoema aken membikin berat sadja pada kita. Kita toch perloe moesti melakoeken pakerdjahan, boewat apatah riboetin itoe oeroesan oewang?"

Heng Djoe Houw terpaksa menoeroet engkonja poenja omongan. Begitoelah iaorang masing-masing ambil saorang saboengkoes dan lantas berdjalan kaloewar dari itoe roemah penginepan, di mana lebih siang orang soeda sediaken marika poenja koeda toenggangan. Itoe doewa soedara lantas brangkat menoedjoe ka kota radja, sedeng Tie Hoa teroes mengoentit dengen menggelap, kaloe boekannja ia djalan doeloean, tentoe ia mengikoeti blakangan. Di tengah perdjalanan lantaran Heng Djoe Houw masi sadja merasa sakit tentang itoe oewang jang hilang, tida brentinja ia menggrendeng, sekali poen engkonja memboedjoek soepaja ia berlakoe loewas dan bikin habis itoe perkara.

Tie Hoa jang mendenger itoe kadjadian, dalem hatinja merasa sanget heran, tjara bagimana itoe doewa orang bisa kahilangan oewang. Siapatah pentjoerinja? Djoestroe ia lagi berpikir begitoe roepa. Mendadak di sabelah depan ia liat ada satoe koeda jang dilariken dengen tjepet sekali, dari djoeroesan selan-barat menoedjoe ka djoeroesan Timoer-oetara. Di blakangnja itoe koeda ada berdoedoek saorang jang berpakean serba idjo, sedeng di pinggangnja poen ada tergantoeng satoe golok. Koelit moekanja itoe penoenggang koeda berwarna koening, sedeng boeloenja itoe koeda jang ditoenggangin berwarna koening gambir.

Tie Hoa kenalin orang itoe dan dalem hatinja berpikir: „Ini orang boekan laen dari Kang Hwan, dan sekarang maoe pergi ka mana?"

Pembatja tentoe masi inget, bahoewa Kang Hwan mengikoet pada Teng Kioe Djoe, jang mendjabat pangkat tikoan di district Tjio-moei, di mana ia telah beroentoeng dapet tangkap Tjoe Djian Hweeshio. Tjoe Djie si Botak dan Gouw Gwat Nio; tapi itoe kapala goendoel sama-sekali tida maoe mengasi katerangan satoe apa, biar poen ia soeda dikompès pergi-dateng. Teng Kioe Djoe koewatir itoe hweesbio djadi mati lantaran pekakas kompès dan lantaran soeda tida mendapat djalan, ia ambil poetoesan minta adviesnja Pauw Kong, di Kay-hong-hoe.

Di antara oppas - oppas politie ada saorang jang bernama Ong Ma, orang siapa ada mempoenjai satoe koeda jang bisa berlari dengen pesat, maka itoe koeda dikasi pindjem pada Kang Hwan soepaja ia bisa lekas dalem iapoenja perdjalanan pergi dan poelang ka dan dari Kay-hong-hoe. Koetika Teng Kioe Djoe maoe pegang itoe djabatan, Pauw Kong telah pesen dan antjam pada Kang Hwan, bila Teng Kioe Djoe sampe melakoeken sedikit sadja kasalahan, nistjaja Kang Hwan aken toeroet menanggoeng kadosahan. Oleh kerna itoe, Kang Hwan dengen sagenep hati dan tenaga bantoe pimpin iapoenja madjikan moeda.

Di laen fihak, lantaran Teng Kioe Djoe tida bisa terlaloe lama terpisa dari itoe pemimpin, djadi perloe sekali Kang Hwan lekas brangkat dan lekas balik lagi. Sabagitoe lekas ia soeda mendapet adviesnja Pauw Kong, biar poen malem-malem ia boeroe-boeroe balik kombali ka Tjio-moei. Tapi tida njana lantaran ia menoenggang itoe koeda bagoes, ampir sadja iapoenja djiwa djadi binasa.

Itoe hari ia djoestroe berdjalan di satoe djalanan jang datar dan soenji, ia lantas kedoet lesnja dan petjoet iapoenja kandaran, dan dalem sa'at itoe djoega, itoe binatang lantas pentang ampat kakinja dan lari seperti terbang, hal mana membikin enak rasanja hati si penoenggang. Tapi sama-sekali ia tida njana, di sabelah blakang ada orang jang mengoentit.

Heng Djoe Liong, Heng Djoe Houw dan Tie Hoa, semoewanja soeda dapet liat itoe koeda jang bisa lari seperti anak panah, tapi iaorang liat djoega di sabelah blakang ada mengikoeti saorang jang bisa lari seperti angin. Itoe orang toeboenja tjoema tiga kaki tingginja, dandanannja seperti biasanja orang jang paham ilmoe silat, sedang di pinggangnja ada tergantoeng satoe golok ketjil, jang kira-kira pandjangnja satengah dari toeboenja itoe orang jang membawa. Roepanja itoe golok, blakangnja tebal dan di dekat pegangannja ada perlindoeng boeat tangan.

Romannja itoe orang ampir mirip dengen romannja satoe monjet. Koelit moekanja semoe idjo, kadoewa matanja jang sipit bidjinja berwarna semoe koening, bibirnja tipis, pipinja tida berdaging hingga toelang pipinja menondjol kaloewar. Sekalipoen iapoenja kadoewa kaki ada begitoe pendek, tapi pada waktoe berlari boleh dibilang ada lebih tjepet dari satoe anak panah.

Bermoela ia terpisa sama itoe koeda iang ditoenggangin oleh Kang Hwan djaoe sekali, tapi perlahan-perlahan ia soeda bisa soesoel itoe koeda jang lagi lari seperti terbang. Kaliatan ia mamegang boentoetnja itoe koeda dengen kadoewa tangannja dan kadoewa kakinja berlompat ka atas dan lantas di'indjeken pada pantatnja itoe koeda, sedang badannja ditjendorongken ka djoeroesan blakang. Dengen begitoe ia boleh tida oesa berlari-lari lagi seperti doeloean. Roepanja itoe koeda poen djadi merasa heran mengapa ada laen orang jang menggemblok sembari menarik boentoetnja; tapi biar poen. ditendang toch tida bisa kena. Itoe orang sasoedanja bikin rata kombali iapoenja napas jang memboeroe, lantas lepasken itoe boentoet koeda jang ia pegang dan berlompat ka sampingnja itoe koeda dan berlari lagi, sabagi djoega orang jang maoe berlombah sama itoe binatang kaki ampat. Tapi lama kamoedian ia soeda bisa liwati itoe koeda, mendadak ia geraken kadoewa tangannja ka djoeroesan matanja itoe binatang.

Itoe koeda jang lagi enak-enak lari mendjadi sanget kaget dan lantas melengosken kapalanja, hal mana ampir sadja bikin Kang Hwan terlempar. la djepitken kadoewa kakinja boeat bikin badannja berimbang, tapi itoe koeda jang kaget lantas berontak dengen mengangkat kadoewa kaki depannja dan soeda tentoe sadja Kang Hwan terlempar djoega ka blakang. Beroenioeng itoe koeda lantas berdiri diam.

Kang Hwan lantas berbangkit dan keboet-keboet deboe jang menempel di pakeannja, kamoedian sembari mamegang lesnja itoe koeda ia menegor dengen goesar pada itoe orang kate.

„Hei, kaoe mengapa soeda berboewat begitoe koerang adjar ?” tanja ia dengen sengit. Itoe orang jang ditanja lantas menoelak pinggang.

„Ini boekit akoe jang boeka. ini poehoen-poehoen akoe jang tanem,” kata ia. „apabila orang mace liwati ini tempat, moesti bajar tjoeke. Kaloe kaoe brani bilang satoe patah „tida” sadja, dengen satoe tabasan akoe kirim kaoe poenja djiwa pergi katemoeken Giamkoen. Kaoe poenja Tjee-tjoe ini hari kabetoelan djalan liwat di sini, betoel ini boekannja kaoe poenja Tjee-tjoe poenja tempat tinggal, tapi dari sebab akoe ada mempoenjai oeroesan jang sanget penting, meliat kaoe poenja koeda toenggangan bisa lari begitoe tjepet, akoe djadi soeka sekali. Sekarang tida ada laen pembitjarahan, lekas tinggalken itoe koeda dan kasiken padakoe kaloe kaoe masi sajang kaoe poenja djiwa.”

Kang Hwan lantas tertawa bergelak-gelak.

„Kaoe ini ada satoe begal jang merampas orang poenja barang di djalanan ?” menegesin ia dengen sikap jang sabar dibikin-bikin.

„Ja, benar sekali kaoe poenja omongan, sobat.”

„Akoe liat kaoe poenja toeboe masi belon tjoekoep tiga kaki tingginja, sedang kaoe poenja roman poen sama - sekali tida bisa bikin dimaloein orang, begimana kaoe maoe membegal akoe? Tapi akoe ada saorang jang berhati moerah, akoe tida maoe dan tida tega binasaken kaoe poenja djiwa. Maka ada lebih tjerdik djika kaoe boeroe-boeroe menjingkir dari sini. Akoe masi ada laen oeroesan penting jang moesti dioeroes, tida ada tempo boewat meladenin pada kaoe, sekali poen akoe rasa kaoe ini ada soeatoe pendjahat oeloeng jang soeda sering berboewat kadosahan.”

Tie Hoa jang itoe waktoe soeda dateng lebih dekat mendenger itoe omongan, hatinja merasa sangat geli. Sebab ia taoe bahoewa Kang Hwan sabetoelnja tida mempoenjai kapandean tinggi, salaennja iapoenja lida jang pande bitjara dan menang gertak. Tapi tida taoenja si Kate boekannja orang jang mempan sama gertakan, hanja berkeras maoe djoega dapatken orang poenja koeda.

„Sajang dengen omongan baek dan perboewatan lemas, kaoe masi tida maoe pasrahken itoe koeda pada kaoe poenja Tay-ong”. kata si Kate. „Akoe liat di kaoe poenja pinggang ada tergantoeng satoe golok, tentoe kau ada mempoenjai djoega sedikit ilmoe kapandean; kaloe kaoe bisa menangken kaoe poenja Tay-ong poenja golok ini, dengen segala senang hati kaoe poenja Tjee-tjoe pasrahken iapoenja kapala padamoe. Sabaliknja djika kaoe tida bisa menangken akoe poenja golok ini, boekan sadja kaoe poenja koeda, malah kaoe poenja djiwa djoega akoe maoein, mengarti?”

„Sobat jang baek”, kata Kang Hwan, „kasiken akoe tempo boewat iket doeloe akoe poenja koeda ini, kamoedian baroe kita bertempoer”.

„Itoe sama-sekali tida ada halangannja”.

Kang Hwan lantas iket iapoenja koeda di satoe poehoen ketjil, kamoedian ia balik menghamperi pada si Kate, tapi boekannja boewat bertempoer.

„Ach, soedalah, kita poenja oeroesan bikin habis sampe di sini sadja”, kata ia, „dan apabila kaoe maoe bertanding djoega baek di laen hari sadja. Apa kaoe tida meliat ka'adahannja kita berdoewa poenja toeboe jang terpaoet begitoe djaoe, djangan kata baroe satoe, biar poen anam orang jang seperti kaoe ini tida nanti bisa makan padakoe”.

Itoe begal lantas tertawa berkakakan.

„Lebih baek kaoe lantas madjoe boewat trima binasa, djangan banjak moeloet,” kata ia.

Dalem sa'at itoe djoega kaliatan Kang Hwan tjaboet iapoenja golok. Srat! begitoelah kedengerannja. Kamoedian ia lantas oendjoek sikep jang seperti maoe madjoe menerdjang laksana satoe harimau lapar jang maoe menerkam korbannja. Itoe begal poen lantas kaloearken iapoenja golok pendek boewat bersedia, roepanja sama-sekali tida kaliatan seperti orang jang djeri atawa takoet. Itoe waktoe Heng Djoe Liong dan soedara moedanja poen soeda dateng dekat di itoe tempat, marika lantas brentiken koedanja boewat menjaksiken itoe karamean. Sabaliknja Tie Hoa tjoema bisa menjaksiken dari kadjaoehan dengen mengoempet, maski ia merasa sanget iboek bagi kaslamatannja Kang Hwan, jang ia taoe betoel ilmoe kapandeannja sanget rendah dan boekannja itoe brandal poenja tandingan. Tapi itoe waktoe ia tida bisa oendjoek moekanja boewat dateng menoeloengin, kerna ia koewatir membikin tjoeriga pada itoe doewa candidaat pemboenoeh.

Itoe ketjoe kiraken Kang Hwan menjaboet goloknja tentoe aken madjoe bertempoer, tapi tida njana sasoedanja menjaboet golok, lantas sadja ia itoe masoekin kombali sendjata itoe ka dalem saroengnja, kamoedian lantas menjodja dengen hormat padanja.

„Dengen teroes-terang akoe maoe kasi taoe pada Tjee-tjoe” kata ia, „akoe ini ada saorang jang sama-sekali tida mempoenjai ilmoe kapandean satoe apa. Ini waktoe akoe djoestroe menerima soeroeannja orang boewat melakoeken soeatoe pakerdjahan jang sanget penting. Akoe poenja tabeat soeka sekali bersobatan sama orang, kaloe boekannja akoe lagi ada oeroesan, ini koeda dengen segala senang hati akoe pasrahken pada kaoe dengen kadoewa tangan. Tjoema sebab ada itoe halangan, jaitoe oeroesan penting jang akoe moesti lakoeken, nanti sadja sasoedanja akoe sampe di kota radja dan bikin beres itoe oeroesan, akoe toenggoe kaoe ini di sini dan pasrahken ini koeda jang kaoe inginken. Soenggoe mati, akoe tida nanti berdjoesta, kaloe akoe berdjoesta, sasoedanja akoe mati tida poenja tempat mengoeboer.”

Itoe bangsat djadi bersenjoem dan tertawa geli.

„Apa kaoe kira akoe ini ada anak jang baroe beroemoer tiga tahon? Dan bisa kena ditipoe begitoe roepa? Kaloe akoe kasiken kaoe berlaloe dari sini, masatah kaoe begitoe goblok, kamoedian maoe menoenggoein lagi akoe di ini tempat? Djalanan besar jang bisa menemboes ka sana sini, sama-sekali ada toedjoe atawa delapan jabang, masatah kaoe begitoe gelo maoe djalan lagi di sini? Itoe tjoema mengoendjoek sadja kaoe poenja kadjoestahan. Hajolah, lantas kasiken itoe koeda atawa bertempoer, djangan poeter lida.”

Kang Hwan mengarti, bahoewa ia tida bisa poeter lida lebih lama, sebab orang tida maoe mengarti iapoenja omongan. Beroentoeng iapoenja loetoet ada sampe lemas dan iapoenja aer mata ada dekat, sembari berloetoet sembari mengoetjoerken aer mata dengen sesambatan, ia minta soepaja itoe begal soeka lepasken ia pergi dan djangan ambil iapoenja toenggangan. Sasoenggoenja djoega iapoenja kalakoean itoe bisa membikin orang djadi merasa kasian dan sedih, tapi toch itoe penjamoen sama-sekali tida bisa dibikin tergerak hatinja, sebaliknja ia soeda bikin Heng Djoe Liong dan Heng Djoe Houw djadi terharoe hatinja.

„Engko, ini orang barangkali soeda dikeberi,” kata jang moedahan, „kaloe tida masatah ia begitoe poenja bodji. Apa tida baek kita dateng sama tengah boeat menoeloengin?”

„Kaoe poenja omongan memang benar, soedara,” djawab jang toewa'an. „Tjoema sadja, kaloe menoeroet akoe poenja pikiran, ada lebih baek kita djangan tjampoer taoe laen orang poenja oeroesan.”

„Kita djika bertemoe sama orang dari satoe golongan, dengen satoe doewa perkatahan kita aken bisa bikin beres ini oeroesan, maka akoe rasa ada baek kaloe kita toeroet tjampoer tangan, sebab akoe merasa sanget kasian pada itoe orang.”

„Nah, kaloe kaoe kata begitoe,” kata Heng Djoe Liong, „baeklah kita toeroet tjampoer omong. Akoe poen merasa tida tega meliat keadahannja itoe orang jang minta-minta dikasianin begitoe roepa.”

Sahabisnja berkata begitoe, itoe doewa orang lantas toeroen dari iaorang poenja koeda dan ikat kadoewa koeda itoe di satoe pangkal poehoen di sabelah Selatan, kamoedian dengen menjengir marika mendeketi pada itoe doewa orang.

„Sobat,” kata Heng Djoe Houw, „soedalah, bikin habis sadja itoe perkara.”

Itoe orang kate lantes mendelikin matanja memandang pada itoe doewa orang jang baroe dateng.

„Kaoe berdoewa bilang apa ?” tanja ia dengen aseran.

„Kita berdoewa ada orang jang kabetoelan djalan liwat di sini,” kata Heng Djoe Liong, „lantaran liat ini orang minta-minta dikasianin begitoe poenja sedih, maka akoe harep kaoe soeka memandang kita berdoewa poenja moeka boeat bikin oeroeng sadja kaoe poenja pakerdjahan satoe kali ini.”

Kang Hwan meliat ada dateng bantoean, dengen tjepat ia lantas berloetoet di hadepannja itoe doewa soedara sembari minta-minta dengen sesambatan, maka itoe doewa orang soeda tentoe tida bisa meliat orang poenja permintahan jang disertaken dengen rintihan.

„Ini perkara ada kita berdoewa jang tanggoeng.” kata iaorang dengen berbareng, „kaloe ia tida maoe meloeloesken. biarlah ia tjoba-tjoba sama kita.”

Heng Djoe Liong lantas berpaling pada itoe perampok dan berkata lagi:

„Soedalah, sobat, bikin habis sadja ini perkara. Dengen teroes terang akoe kasi taoe pada kaoe, bahoewa kita berdoewa poen ada dari golongan Hap-djoe.”

„Apa, kaoe dari golongan hap-djoe ?” menanja si Kate.

„Itoe perkatahan hap-djoe” ada omongan resia di antara kaoem begal, jang artinja golongan kita atawa sasama badjingan. Itoe waktoe Heng Djoe Liong lantas goenaken lagi itoe omongan resia jang kira-kira berarti begini:

„Ja, kita ada kawanan dari satoe golongan. Akoe denger ini orang poenja permintahan jang begitoe menjedihken, hatikoe djadi tida tega. Akoe harep kaoe soeka berlakoe moerah dan lepasken padanja, dengen memandang pada kita berdoewa poenja moeka, tapi djangan maen-maen lebih lama lagi.”

Si Kate, satelah mendenger itoe omongan, lantas djadi sangat goesar; ia rasaken dadanja maoe meledak.

„Apabila kaoe orang ada dari kita poenja golongan,” kata ia dengen sengit, „masatah kaoe ambil fihaknja orang loewar?”

Menoeroet patoet, kaoe orang moesti tinggal neutraal, djangan koewatir jang akoe tida bisa dapetken itoe koeda, kamoedian, apabila kaoe berdoea maoe, akoe dengen senang hati aken kasiken itoe koeda pada kaoe orang. Itoelah baroe namanja persobatan di antara sasama kawan Liok-lim. Tapi toch sekarang sabaliknja kaoe orang soeda berfihak pada orang loewar boewat mintaken kalonggaran !”

Itoe doewa soedara Heng kena kapoekoel batang hidoengnja dan tida bisa memberi djawaban, tapi sabaliknja iaorang lantaran maloe mendjadi oering-oeringan.

„Kita menjelak dan bitjara begitoe, djoestroe kita memandang pada persobatan,” kata Heng Djoe Houw.

„Kaloe akoe tida maoe memandang persobatan bagimana?” balik menanja si Kate.

„Kaloe begitoe, barangkali kaoe soeda bosen hidoep,” kata lagi Heng Djoe Houw.

Kombali si kate tertawa bergelak-gélak.

„Itoelah bagoes sekali !” kata ia. „Apa kaoe orang ada mempoenjai nama atawa tida ?”

„Kaoe ingin taoe kaoe poenja Tjee-tjoe poenja nama besar?” tanja Heng Djoe Liong. „Akoe ada Hek-Hong Heng Djoe Liong dan ini ada akoe poenja ade, jang terkenal sabagi Oey-Hong Heng Djoe Houw. Kaoe ini, manoesia rendah, siapa kaoe poenja nama?”

„Apabila kaoe maoe menanjaken kaoe poenja Tay-ong,” djawab si Kate, „ia bertempat di Ngo-hwa-san, Wan-yo-nia, she Pwee bernama Houw dan mendapet gelaran Sam-tjio-toan-bengteng. Dari sebab kaoe berdoewa berfihak pada orang loear, tentoe kita moesti bertempoer. Sekarang akoe maoe tanja, apa kaoe orang maoe bertempoer satoe sama satoe, atawa kaoe berdoewa madjoe dengen berbareng?”

„Djika kaoe berdjoembla saratoes, sariboe atawa poen sapoeloeh riboe,” kata itoe doewa soedara dengen berbareng, „kita berdoewa aken menerdjang dengen berbareng, dan sekarang kaoe tjoema sendirian, poen kita aken menjerang dengen berbareng."

„Baek; kaoe orang boleh lantas madjoe boewat trima binasa," kata Pwee Houw jang lantas tja-boet goloknja.

Itoe doewa soedara poen lantas goeloeng ta-ngan badjoenja dan selitken oedjoeng badjoenja di pinggang, kamoedian tjaboet marika poenja golok. Kang Hwan di satoe pinggiran memboe-djoek sabisa-bisanja soepaja iaorang djangan djadi setori dan bertempoer.

„Och, djangan, djangan begitoe," kata ia.,,Lan-taran akoe poenja oeroesan, begimana kaoe orang djadi bermoesoehan dan bertaroeng. itoelah tida baek."

„Sekarang sebaliknja kaoe poenja oeroesan soe-da djadi abis," kata Pwee Houw.

Kang Hwan di satoe pinggiran meliati itoe tiga orang bertempoer, dan dalem sakedjapan mata sadja djadi begitoe seroeh. Ternjata itoe orang kate ilmoe kapandeannja ada sanget ba-goes, iapoenja golok pendek dimaenken dengen bagoes dan tjepet sekali, sedeng iapoenja gera-kan badan poen ada begitoe sebat dan gesit, dan iapoenja kaki sama-sekali tida bersoewara koetika mengindjek tanah.

Kang Hwan djoestroe meliatin dengen bengong terlongong-longong pada itoe pertempoeran jang begitoe rameh dan keras, mendadak ia inget itoe oeroesan jang ia lagi oeroes. Dengen tjepet ia menghamperi itoe poehoen, di mana ia ikat ia poenja koeda jang ia lantas tjemplak selanja.

„Boeat kadoewa toewan jang berboedi poenja pertoeloengan soeda pisahken akoe poenja pertjektjokan," kata ia dari atas koedanja dengen soewara keras, „akoe haroes hatoerken banjak-banjak trima kasi. Sekarang lantaran akoe, kadoe-wa toewan moesti bertaroeng sama itoe bangsat kate, boeat itoe saharoesnja akoe moesti mem-bantoein, tjoema lantaran akoe djoestroe mem-poenjai oeroesan jang sanget penting, terpaksa akoe moesti tinggalken kaoe orang."

Sahabisnja berkata begitoe ia tendang peroet koedanja dan kedoet les jang ia pegang, maka itoe koeda lantas lari seperti terbang. Heng Djoe Liong dan Heng Djoe Houw berpaling boewat meliat, kamoedian sembari bertaroeng iaorang menggroetoe: ,,Och, orang jang manis sekali dan baginilah ia soeda bales kita poenja pertoeloe-ngan !"

Tie Hoa jang meliatin dari kadjaoehan, dalem hatinja merasa sanget geli. „Ini kapala oppas sasoenggoenja tjerdik," begitoelah ia berkata dalem hati.

Samentara Pwee Houw, meliat Kang Hwan maboer, hatinja samingkin mendongkol dan ia rasaken dadanja maoe meledak. Dalem hatinja ia pikir, kaloe ia tida kasi adjaran jang keras pada itoe doewa manoesia, hatinja tida bisa men-djadi poewas. la soeda perna peladjarken sama-tjem ilmoe silat golok jang dinamaken Koen-tong-too, jang boleh dibilang ampir satoe roepa dengen ilmoe silat tangan kosong Tee tong-koen, jaitoe bergoelingan di moeka boemi dan meloe-loe menjerang pala moesoeh poenja bagian sabelah bawah, dan ini ilmoe orang-orang jang koerang pande apabila katemoeken, sedikitnja aken mendapet loeka berat dan tjilakanja djiwa-nja bisa djadi binasa.

la maoe goenaken itoe ilmoe. Itoe waktoe itoe doewa soedara Heng, meliat Pwee Houw menoekar tjaranja bersilat, jang toewa'an kiraken ia bakal mendapet koetika boewat binasaken moesoehnja, maka dengen zonder berpikir lebih djaoe lagi, lantas ia membatjok pada moesoehnja itoe; tapi Pwee Houw jang rebah di moeka boemi lantas bergoelingan tida brentinja sembari menjerang dengen seroeh pada iapoenja doewa lawanan, hal mana soeda membikin itoe doewa soedara djadi sanget kaget dan bingoeng, kerna iaorang tida sanggoep menangkis serangannja si Kate jang goenaken itoe matjem ilmoe silat loear biasa.

---

FATSAL IV.

Pwee Houw poenja ilmoe silat golok Koen-tong-too telah ditoeroenken oleh satoe goeroe jang ternama. la sendiri masi ada mempoenjai satoe soedara toewa jang diseboet Sam-tjio-sin-bin-yauw, Pwee Liong. jang dengen ia toeboenja ada sama pendek dan ketjilnja. Oleh kerna iaorang berdoewa poenja toeboe begitoe pendek dan ketjil, iaorang poenja goeroe lantas adjarin itoe matjem ilmoe, jang pada saban kali digoenaken senantiasa bisa berada di atas angin dan kaloe boekannja orang jang berilmoe silat tinggi, tida terlaloe gampang bisa petjahken itoe matjem serangan.

Orang jang bersilat dalem itoe matjem ilmoe penjerangan senantiasa mengandel sama poendak, sikoet tangan, paha dan dengkoel boewat berge- rak di moeka boemi, sedang golok jang digoenaken selamanja menjamber di bagian moesoehnja poenja sabelah bawahan loetoet, menoesoek atawa poen membatjok, jang apabila dapatken maksoednja, taro kata tida sempe mendjadi mati, toch djadi tjatjat boewat saoemoer idoep.

Heng Djoe Liong dan soedara moedanja itoe waktoe baroe merasa menjesal jang iaorang soeda toeroet tjampoer taoe laen orang poenja oeroesan dan merasa sanget djengkel pada Kang Hwan jang koerang penerima. Tapi lantaran marika tida bisa tahan serangannja itoe orang kate jang begitoe heibat dan tjepet, terpaksa iaorang lantas pandjangken tindakannja boewat merat.

„Akoe kira kaoe orang ada mempoenjai ilmoe kepandean jang tinggi,“ berseroeh Pwee Houw, „tida taoenja kaoe ada manoesia-manoesia jang tida ada goenanja. Kaloe kaoe orang tida berlaga berlakoe gagah boeat laenorang, nistjaja akoe maoe mengampoenin kaoe poenja djiwa katjwa, tapi sebab kaoè orang soeda berlaga oendjoek kakosenan di hadepan itoe orang jang kaoe maoe toeloengin, akoe moesti anterken djoega kaoe poenja djiwa pada Giam Koen.“

Ia oeber-oebar itoe doea suedara jang sipat-koeping ka djoeroesan Oetara dan achirnja iaorang sampe di deket satoe oetan ketjil. Itoe doea orang jang dioeber pikir maoe masoek ka dalem itoe oetan, sebab kaloe menoeroet atoeran biasa, bila iaorang masoek ka dalem itoe oetan, pemboeroenja tida aken mengedjar teroes, tapi, inget djika si moesoeh merasa sanget gemas, tentoelah iaorang aken dioeber teroes, iaorang berpaling ka blakang sembari berlari teroes.

Ternjata itoe waktoe Pwee Houw, sekali poen kadoea kakinja begitoe pendek, iapoenja tindakan ada sanget pesat, kerna itoe waktoe ia soeda ampir bisa menjoesoel, hal mana soeda membikin itoe doea soedara mendjadi sanget kaget dan lantas lari lagi dengen sakeras-kerasnja, sebab bertaroeng soeda ternjata iaorang boekan tandingannja si kate, sedang lari poen keliatannja si kate ada lebih tjepet. Dengen apa boleh boeat iaorang tjoba lari sakeras-kerasnja, barangkali sadja bisa terloepoet dari bahaja.

Pwee Houw mengedjar, koetika sampe di sabelah loewarnja itoe oetan, dengen tida terdoega dari djoeroesan Barat melajang satoe batoe, jang mengenaken iapoenja toelang samboengan dari kaki kanan, hingga dalem sa'at itoe djoega ia djato kasoempet menjioem boemi. Heng Djoe Houw menoleh dan dapet liat apa jang soeda terdjadi. „Engko, liat itoe badjingan meloso !“ berseroeh ia pada Heng Djoe Liong.

Itoe doewa orang lantas balik kombali dengen menengteng golok jang terhoenoes; iaorang pikir sekarang ada waktoenja boewat ia bikin pembalesan. Pwee Houw merasa sanget heran dan tida mengarti dari mana datengnja itoe batoe jang soeda membikin ia djadi meloso; tapi lantaran itoe waktoe kakinja soeda djadi pintjang, tentoe sadja ia tida oengkoelan boeat meladenin lagi pada iapoenja doewa petjoendang jang sekarang sebaliknja memboeroe padanja. Maoe atawa tida, terpaksa ia menahan amarah dan dengen keadahan pintjang ia berlari kaloear dari itoe oetan. Sedeng itoe doewa soedara poen tida maoe mengedjar lebih djaoe dan biarken si Kate maboer.

Soeda tentoe iaorang poen merasa sanget heran mengapa tida oedjan tida angin itoe orang kate djato meloso.

Samentara Tie Hoa jang meliatin dari kadjaoehan, sabegitoe lekas ia liat itoe doewa soedara Heng bertempoer sama itoe begal, hatinja merasa sanget girang. la anggep inilah jang dikataken : sang bango sama sang kerang berkoetetan, mengasi kaoentoengan pada toekang tangkep ikan, sebab kaloe Pwee Houw bisa boenoch mati itoe doewa soedara Heng, ia boleh tida oesa pergi ka Kay-hong-hoe boeat tangkep itoe pemboenoeh, sebaliknja kaloe djiwa itoe deewa soedara bisa memboenoeh Pwee Houw, poen ada satoe perkara baek, sebab itoe begal djahat pantes sekali disingkirken dari ini doenia soepaja djangan menjoesaken pada orang banjak.

Tapi tida njana Heng Djoe Liong dan soedaranja jang kena dikalahken, dan blakangan Pwee Houw mengoeber dengen tida maoe malepasken moesoeh-moesoehnja, lantaran ia berada di tempat jang djaoe ia tida bisa meliat dengen njata. Dalem sakedjap sadja Pwee Houw kaliatan saperti ada doea, laloe ia pandjangken lehernja boeat meliat lebih njata, tapi itoe orang kate soeda tida kaliatan lagi bajang-bajangannja. Tie Hoa tida bisa mengarti mengapa djadi begitoe, sabaliknja ia sangka iapoenja mata kaboer; dan tida bisa meliat dengen terang. Tida antara lama kamoedian ia liat lagi Pwee Houw berlari kaloewar dalem keadahan pintjarg sebagi koeda tjongkláng, sedang di blakangnja ada memboeroe itoe doewa soedara Heng, jang pada sasoedanja mengedjar sakoetika lamanja brenti mergoeber. Apatah jang soeda terdjadi ? Itoelah Tie Hoa, tida sanggoep bikin doega doegahan.

Sasoeda brenti mengedjar, Heng Djoe Liong berkata pada soedara moedanja : „Sasoenggoenja kita beroentoeng sekali bisa mendapet itoe toeloengan jang tida terdoega dan tida kataoean, bagimana terdjadinja. Tadi lantaran kita soeka tjampoer taoe laen orang poenja oeroesan, ampir sadja kita poenja djiwa melajang ka acherat, maka moelai dari sekarang di sapandjang djalanan tida perdoeli apa djoega terdjadi, kita boleh tida oesa tjampoer tane.“

Begitoelah iaorang ambil masing-masing poenja, koeda dan ditoenggangin dan landjoetken iaorang poenja perdjalanan. Tie Hoa laloe mentiari satoe; poehoen boewat oempatken dirinja soepaja djangan terliat oleh itoe doewa orang. Ia liat itoe doewa soedara lariken koedanja ka djoeroesan kota radja ia laloe moengoentit teroes sabagimana ia soeda berboewat.

Koetika ia sampe di pintoe kota Hong Tjeng Moei, matahari soeda moelai soeroet ka Barat, maka ia lantas mentjari satoe roemah penginepan dan pada sasoedanja makan sore ia kaloewar boewat membeli kertas merah, jang ia bawa poelang ka roemah penginepan boewat ditoelisken sedikit perkatahan. Ia menoenggoe sampe djam sapoeloeh malem dengen tida menoekar lagi pakean, hanja selitken sadja badjoe pandjangnja dan goeloengken iapoenja tangan badjoe dengen membawa itoe kertas dan satoe golok, ia kaloewar dari iapoenja kamar jang ia koentjiken dari sabelah loewar. Ada djadi ka biasa'annja Tie Hoa, sadari masoek golongan djago-toewa, djarang sekali toekar, pakean malem bila ia maoe melakoeken pakerdjahan apa-apa. Itoe waktoe, sebagitoe lekas ada di loewar kamarnja, lantas ia lompat naek ka atas genteng, meninggalken iapoenja roemah penginepan dan menoedjoe ka Kay-Hong-hoe. Waktoe sampe, ia denger toekang ronda mengoendjoek waktoe tengah malem. Di depannja itoe kantoor ada begitoe soenji dan tida kaliatan barang satoe bajangan manoesia ia lantas lompat naek ka atas tembok-pagar boewat mentjari kamar boekoenja Pauw Kong.

Ternjata itoe waktoe itoe ambtenaar jang berboedi seeda tidoer poeles, keadahan dalem kamar kaliatannja sangat goerem. Tie Hoa petjahken kertas djendela dengen membikin satoe lobang ketjil, dari mana ia mengintip ka dalem. Di atas satoe medja tjoema dipasang satoe pelita minjak, jang soemboenja soeda berkembang, maka sinar penerangannja djadi begitoe goerem. Itoe ambtenaar poenja boedak lagi tidoer dengen mendekam di atas medja terseboet.

„Ternjata Pauw Kong poenja redjeki ada sanget besar,“ berkata si pengintip dalem hati sendiri. „Kabetoelan akoe ketemoe Thio Liong dan Tio Houw dan kaloe boekannja akoe toeroet djalan sama-sama iaorang, bagimana akoe bisa dapet taoe itoe doewa bangsat maoe memboenoeh padanja?"

Kamoedian ia moelai toelak sedikit pintoenja itoe kamar jang kabetoelan tida ditapal dari sabelah dalem. Ia bertindak masoek dan kaloewarken itoe kertas jang ia lantas taro di atas satoe patsianto, sasoeda mana ia bertindak kaloewar lagi, sembari rapatken lagi itoe pintoe. Sabagitoe lekas Tie Hoa rapatken pintoe, ia soeda bikin kaget dan mendoesin pada Pauw Hin. Sebab pada itoe malem, Pauw Hin soeroe Lie Tjay jang mendjaga malem, tapi lantaran ia itoe terlaloe soeka tidoer, djadi koewatir ia bikin terlantar kawadjibannja maka beroelang oelang ia pesen soepaja Lie Tjay djangan terledor. Lie Tjay soedah menjanggoepin dan soeroe Pauw Hin pergi tidoer sadja dengen senang. Oleh kerna mendapet itoe persanggeepan, Pauw Hin baroe bisa pergi tidoer dengen hati lega. Koetika ia tidoer sampe djam doewa pagi, koenjoeng-koenjoeng ia mendoesin, lantas ia mendoega jang Lie Tjay tentoe tidoer. Maka dengen perlahan ia berbangkit dari pembaringannja mengintip ka loewar pintoe kamarnja, dan betoel sadja Lie Tjay lagi menggeros dengen mendekem di depan itoe pelita.

Ia menghamperi, dengen berdjingke-djingke ka blakangnja Lie Tjay dan menepok, hal mana soeda bikin itoe orang jang lagi tidoer djadi gelagapan dan boeka kadoewa matanja.

„Dari tadi djoega akoe soeda bilang, lebi baek kaoe sadja jang pergi tidoer,“ kata Pauw Hin. „Tida, akoe tida tidoer,“ djawab Lie Tjay sembari koetjak-koetjak mata.

„Hm ! masi brani berkeras bilang tida!"

„Memang sabetoelnja akoe tida tidoer. Tjoema baroesan akoe lajap-lajap sabentaran."

„Itoe pelita soemboenja soeda berkembang begitoe pandjang, tapi toeh kaoe masi brani bilang tjoema lajap-lajap sabentaran, bagoes betoel!"

„Akoe rasakan baroe sadja akoe meramken mata...."

„Hei, itoe soerat siapa jang masoekin ka sini?“ tapi Pauw Hin dengen kaget itoe waktoe ia dapat liat itoe soerat jang Tie Hoa taro di atas medja patsian.

„Akoe tida taoe,“ djawab Lie Tjay. „Akoe rasa memangnja soeda ada di sitoe."

„Omong kosong!" membentak Pauw Hin.

Lie Tjay tida bisa mendjawab.

Djoestroe itoe waktoe Pauw Kong tersedar dari tidoernja.

„Ada apa?“ menanja ia; „apa jang memangnja ada di sitoe?"

Pauw Hin dan Lie Tjay djadi saling mengawasi dengen pengrasahan kaget, kamoedian masing-masing letletken lidanja.

„Denger, siangya tanjaken hal itoe," berbisik Pauw Hin.

Sabahabisnja berkata begitoe pada kawannja, ia hampirken pembaringannja iapoenja madjikan dan boekaken kaen klamboenja, disangketken pada/ sangketannja. Pauw Kong lantas pake badjoe dan doedoek di atas itoe pembaringan.

„Barang apa jang baroesan kaoe tanjaken pada Lie Tjay?" ia tanja.

Pauw Hin tida brani toetoep itoe hal dan lantas kasi taoe, bahoewa di atas medja patsian ada terdapet satoe soerat dari kertas merah, tapi pintoe dan djendelanja sama-sekali tida ada tanda-tanda bekas diboeka, djadi tida ketaoean siapa iang soeda anterken.

„Tioba ambil dan bawa ka sini,“ mintah Pauw Kong.

Itoe waktoe Lie Tjay lantas goenting soemboenja itoe pelita jang soeda berkembang dan Pauw Hin ambil itoe soerat dan angsoerken pada ia poenja madjikan, jang lantas samboetin dan batja boenjinja seperti berikoet:

„Alam bisa menerbitken bintjana jang tida terdoega, manoesia menampak bahaja jang tida tersangka, Siangya setia pada negri dan menjinta pada rahajat, serta bakerdja dengen sagenap tenaga goena kaberoen toengan marika itoe. Besok malem Siangya moesti bikin pendjagahan keras dan hati-hati, sebab bakal ada pemboenoeh jang bermaksoed djahat. Warta dari saorang jang mentjinta.“

Pauw Kong pikir ini hal terdjadinja begitoe aneh, teroetama ia tida taoe siapa adanja itoe orang jang mengasi kabar, Tapi di laen fihak soeda membikin Pauw Hin djadi sanget kata koetan hingga iapoenja sa'antero toeboe bergoemeteran sabagi dioega orang jang kadinginan. Sedang Pauw Kong sendiri tida maoe riboetken itoe oeroesan, jalah ia lemparken itoe soerat di alas satoe medja toelis. la lantas bangoen dan berpakean dengen rapih dan di laen fihak ia soeroe orang sediaken iapoenja djoli dan pengikoet-pengikoet boewat masoek ka kraton. Dan soeda tentoe sadja Pauw Hin tida katinggalan.

Kabetoelan sekali itoe hari dalem kraton tida ada oeroesan apa-apa, djadi tida perloe ditoetoerkan. Sasoedanja ia kaloewar dari kraton dan dahar pagi, Pauw Kong oeroes sedikit pakerdjahan jang perloe, sampe dengen tida merasa lagi telah sampe waktoe tengahari. Pauw Hin dan Lie Tjay dalem hatinja merasa sanget iboek dan bingoeng, iaorang merasa sanget koewatir prihal itoe pemboenoeh jang bakal menjatronin sabentar malem.

Sadari Pek Giok Tong mendjabat pakerdjahan negri, di Kay-hong-hoe belon perna terdjadi lagi perkara iang saroepa itoe. Sekarang mendadak aken terbit lagi, kaloe doeloean ada Tian Him Hoei dalem kantoor, tida oesa dikoewatirken, sebab ada orang jang boleh diandelin; tapi sekarang di Kay-hong-hoe boleh dibilang tida ada orang jang pande, tidalah heran djika marika itoe djadi sangat katakoetan.

Sabaliknja Pauw Kong sama-sekali tida maoe seboet-seboet hal itoe. Pauw Hin kiraken madjikannja soeda meloepaken itoe oeroesan; tapi ia takoet timboelken itoe soewal pada itoe madjikan. Lie Tjay kedipin Pauw Hin mengasi tanda soepaja orang jang terseboet blakangan seboet itoe hal jang terdjadi samalem, tapi Pauw Hin golengken kapalanja sabagi, djoega mengasi taoe jang ia tida brani lakoeken hal itoe. Tapi blakangan ia braniken djoega hatinja, dengen memake alesan poera-poera menoewangin satjangkir thee pada madjikannja, kamoedian dengen gagagoegoe seperti maoe bitjara, tjoema ia bikin ia rasaken lehernja serat dan itoe perkatahan tida bisa dikaloewarken. Achirnja ia bisa djoega kaloewarken satoe patah perkatahan jang tida terang, jang mana tentoe sadja Pauw Kong tida bisa denger terang.

„Apa jang baroesan kaoe bilang?“ tanja ia pada itoe boedak. Pauw Hin jang memangnja takoet sekali pada madjikannja, lantas menelen iapoenja loeda sendiri dan pandjangken iapoenja leher, sabagi djoega maoe bikin terboeka iapoenja tenggorokan jang serat. Dengen mata jang tida brani meliat pada sang madjikan ia moendoer satoe tindak ka blakang, kamoedian ia lempengken lagi lehernja.

„Itoe....itoe perkara jang.... jang samalem, itoe..... soerat soe....“ kata ia dengen soewara serat dan perlahan. Tapi sabelonnja ia bisa me- landjoetken bitjaranja, Pauw Kong soeda delikin mata dan mengaloewarken soewara di idoeng, hingga omongan jang saparonja lagi lantas terbang ka mana taoe. la moendoer dengen tida brani bitjara satoe apa lagi.

Pauw Kong poenja tabeat selamanja tida soeka dan larang orang menjeboet tentang pemboenoeh jang maoein iapoenja djiwa, sedeng dalem itoe soerat ada terseboet soeatoe peringetan boeat bikin perdjagahan hati-hati. Menoeroet ia-poenja anggepan, soeatoe ambtenaar jang setia tida nanti menarik hatinja pemboenoeh dan jang soeka disatronin oleh orang-orang samatjem itoe, adalah ambtenaar-ambtenaar bangpak jang djahat dan temaha. la sendiri selamanja melakoeken pakerdjahan dengen betoel dan sadjoedjoernja, sama-sekali ia belon perna pake hati serong, sedang pada semoea orang selamanja ia soeka berlakoe dengen adil dan pantas, maka, meliat itoe soerat pembrian nasehat dari Tie Hoa, sama sekali ia tida merasa djeri atawa poen iboek.

Tatkala Pauw Kong masoek tidoer di waktoe lohor, Pauw Hin lantas goenaken ini koetika jang baek. Ia bawa itoe soerat dan pesen Lie Tjay moesti toenggoein sang madjikan jang bas rangkali, kaloe bangoen, maoe mamerentah apa-apa, sebab ia sendiri maoe pergi bikin persediahan aken mendjaga kedatengannja itoe pemboenoeh sabentar malem.

„Baek", kata Lie Tjay: „kaoe boleh boeroe-boeroe oeroes itoe perkara".

Pauw Hin lantas berdjalan kaloewar dari pintoe samping dan menoedjoe ka tempatnja penggawe jang berpangkat hauw-wie, di mana ia ketemoei Ong Tiauw dan Ma Han. Itoe doewa orang boeroe-boeroe berbangkit dan oendang itoe kapertjajahannja Pauw Kong boewat berdoedoek.

„Tida sari-sarinja Long-khoa Lo-ya ada mempoenjai tempo jang senggang boewat dateng tengokin kita orang di sini", kata Ong Tiauw.

„Akoe ini bisa dioepamaken koetjing jang soeka masoek ka roemah orang di waktoe malem", kata Pauw Hin, kaloe boekannja lantaran ada oeraesan tentoe tida dateng".

Ong Tiauw soeroe orang sediaken thee.

„Kaoe orang poenja kawadjiban ada boeat mengoeroes apatah?" Pauw Hin moelai berkata lagi.

„Apabila ada pakerdjahan jang kita koerang mengarti", kata Ong Tiauw dan kawannja dengen berbareng. „harep Liong-khoa Lo-ya soeka toeloeng oendjoekin dan kasi mengarti, tapi mengapa ini hari sabaliknja kaoe menanjaken hal itoe pada kita-orang?"

„Akoe koewatir kaoe orang tida mengarti apa jang mendjadi kaoe orang poenja kawadjiban, djika benar begitoe, soepaja gampang akoe kasi taoe."

„Kita orang poenja pakerdjahan mengoeroes itoe pekakas hoekoeman, kaloe Siangya doedoek di kantoor kita toenggoein iapoenja prentah dan laen-laennja lagi," kata Ong Tiauw. „Laen-laennja lagi apakah?" menanja Pauw Hin.

„Menangkap orang djahat dan perampok."

„Djadinja kaoe taoe, bahoewa kaoe orang ada mempoenjai kawadjiban moesti menangkep bangsat dan perampok. Dari ini malem djoestroe bakal ada orang djahat jang maoe melakoeken pemboenoehan dalem ini kantoor."

„Akoe tida mengarti kaoe poenja omongan. Pauw Hin lantas kasiken itoe soerat, jang lantas dibatja oleh itoe doewa hauw-wie. soerat mana soeda membikin iaorang djadi sanget kaget dan katakoetan.

„Ini soerat dari manatah datengnja?“ tanja marika dengen berbareng.

Pauw Hin lantas toetoerken dengen ringkes apa jang soeda terdjadi samalem, kamoedian ja berkata: „Sekarang laen-laen Hok-wie Lo-ya tida ada di sini, kaoe berdoewa maoe atoer bagimana?

„Akoe boleh soeroe orang mengoempet di kadoewa pinggirannja Siangya poenja kamar sabentar malem boewat bersedia menangkap itoe pendjahat," kata Ong Tiauw.

„Apa kaoe taoe, apabila Siangya sampe kenapa-napa, kita orang haroes menanggoeng kadosahan apa?"

„Soeda tentoe kita taoe. Kaoe boleh pergi lajanin sadja Siangya, sabentar malem kita aken bikin persediahan dengen lengkap."

Akoe harep kaoe sediaken orang banjakan, soepaja djangan sampe terdjadi hal jang tida diingin." Sahabisnja berkata Pauw Hin ambil kombali itoe soerat dan berlaloe dari sitoe.

Ong Tiauw dan Ma Han lantas panggil koempoel kapala-kapala oppas, Han Tjiat dan Touw Soen, pada siapa iaorang tjeritaken apa jang soeda terdjadi samalem. Itoe doewa kapala oppas djadi saling awasin dengen tida bisa berkata-kata. Kamoedian dengen goegoep iaorang pergi mamilih iaorang poenja orang sabawahan, semoewanja terdiri dari orang-orang moeda jang paling tinggi beroemoer tigapoeloeh tahon, bertoeboe gagah, mata terang dan gerakannja sebat.

Itoe málem sasoedanja makan sore, masing-masing pada bekal segala sendjata jang perloe dan tambang boewat mengiket bila itoe pendjahat atawa pendjahat-perdjahat bisa tertangkep. Ong Tiauw dan Ma Han telah tanja itoe doewa kapala oppas, iaorang soeda sediaken brapa banjak orang, maka Han Tjiat dan Touw Soen lantas panggil koempoel iapoenja orang-orang dan di-itoeng sama-sekali ada ampatpoeloeh orang, semoewa disoeroe bekal lentera maling. jaitoe teng jang di loewarnja ditoetoepin, kaloe perloe penerangan toetoepnja lantas diboeka. Begitoelah pada sasoedanja iaorang bersedia de- ngen lengkap, perlahan-perlahan iaorang masoek ka dalem boewat bikin pendjagahan di tempat jang ditinggalin oleh Pauw Kong, jaitoe satoe kamar-batja.

Itoe doewa kapala oppas bersama orang-orangnja mendjaga di sakiternja itoe kamar-batja, sedang di tiga kamar laen jang letaknja di sabelah Barat, Ong Tiauw mendjaga di sabelah Timoernja dan Ma Han di sabelah Baratnja dengen masing-masing membawa doewapoeloeh satoe orang. Pauw Kong jang berada di dalem itoe kamar batja soeda tentoe sadja denger jang di sabelah loewar ada pergerakan apa-apa; tapi ia taoe jang marika itoe maoe bikin pendjagahan bagi itoe pemboenoeh jang maoe dateng, maka ia tida menjegah. Ia ambil satoe boekoe dan batja itoe di bawahnja sinar penerangan.

Pauw Hin dan Lie Tjay poen tida menganggoer. Itoe waktoe soeda djam sembilan liwat, jang terseboet doeloean berdami sama Lie Tjay, lebih doeloe toetoep pintoenja itoe kamar-boekoe dan ditapal, dan dalem pintoe marika taro satoe medja patsian dengen di atasnja ditaroin lagi satoe korsi.

„Doeloean akoe perna denger Pek Giok Tong bilang,“ berbisik Pauw Hin pada kawannja,

„djika soeatoe orang jang ilmoe kapandeannja tinggi, pada waktoe maoe melakoeken pakerdjahannja, selamanja dimoelai antara djam sapoeloeh dan sabelas; dan kaloe ia maoe masoek senantiasa soeka mengambil djalan dari palangan pintoe jang sabelah atas, dari itoe sekarang apabila akoe berdiri di atas ini medja atawa korsi tentoe sekali akoe bisa dapet liat pada sabelonnja itoe orang bisa masoek, maka sabagitoe lekas akoe dapet liat padanja, akoe boleh lantas bestreak boewat mengasi taoe pada laen-laen orang, soepaja iaprang bisa menangkap pada itoe pendjahat atawa pendjahat-pendjahat.“

„Ternjata kaoe ini soeda taoe selak-seloeknja kabiasahan pendjahat,“ kata Lie Tjay.

„Ach, akoe tida bisa trima itoe poedjian,“ kata kawannja. Akoe bisa taoe djoega sedikit lantaran soeda sering akoe jakinken itoe oeroesan sama orang-orang jang pande dan mengarti.“ Djoestroe pada waktoe iaorang lagi bitjara, mendadak di sabelah loewar soeda kadengeran toekang ronda poekoel tongtongnja jang menandaken djam sapoeloeh.

„Sekarang soeda sampe waktoe,“ kata Pauw Hin. „Marilah kita naek ka atas itoe medja.“ la naek lebih doeloe ka atas itoe medja, kamoedian ka atas itoe korsi tapi di atas korsi katinggian, sabaliknja di atas medja terlaloe bawah dan tida bisa sampe ka itoe palangan pintoe. Maoe apa tida ia moesti berdiri di atas itoe korsi sembari bongkokin badannja dan bikin bolong kertasnja jang menoetoepin itoe palangan pintoe, dari mana ia mengintip ka loewar. Sedeng Lie Tjay naek ka atas itoe medja, bikin lobang di daon pintoe boewat meliat ka loewar.

Pauw Kong jang lagi membatja boekoe, denger iaorang poenja gerakan jang gedeboekan, tida taoe apa jang marika lagi kerdjaken. Laloe ia mengangkat kapala boeat menjataken. Itoe waktoe djoega hatinja mendjadi sanget geli. Sebab iaorang setia pada madjikannja, tjoema sajang iaorang poenja njali terlaloe ketjil. Sabenarnja djika itoe pemboenoeh ada orang jang mempoenjai ilmoe kapandean tinggi, masatah iaorang bisa menghalangin?

Sekarang kita tjoba liat pada itoe doewa candidaat pemboenoeh, sabagitoe lekas iaorang masoek ka dalem kota, lantas sadja menoedjoe kSip-dji-kee, di mana iaorang toeroen dari koedanja boewat mentjari taoe di mana letaknja Siong-tiok-hang, roemahnja Lie Thian Siang. Tatkala ia sampe di depan pintoenja itoe roemah jang marika tjari. lantas marika toetoerken maksoed kadatengannja jang ingin bertemoe sama Lie Beng, anaknja itoe dorna, Tida antara lama Lie Beng lantas kaloewar dan oendang itoe doewa orang masoek ka dalem kamar boekoe. Itoe doewa soedara Heng tadinja hendak djalanken kahormatan besar, tapi Lie Beng taoe jang ini doewa orang ada ajahnja poenja soeroean, maka ia tida brani kerlakoe koerang hormat. Lebih doeloe ia menanjaken itoe doea orang poenja she dan nama dan asal-oesoel. Heng Djoe Liong lantas trimaken itoe soerat jang ia trima dari Lie Thian Siang.

Pada sasoedanja membatja ajahnja poenja soerat, Lie Beng soeroe orangnja sediaken barang makanan dan minoeman boewat menghormat itoe doewa orang.

Esokan siangnja Heng Djoe Liong dan Heng Djoe Houw lantas menoekar pakean menjamar sebagi boedjang-boerjangnja koelawarga Lie, kamoedian iaorang pergi ka kantoor Kay-hong-hoe boewat meliat keadahannja itoe tempat. Pada- sanoedanja meliat dengen terang, ia orang lantas balik kombali ka roemabnja Lie Thian Siang.

Kira djam sembilan satengah iaorang lantas berdandan dengen rapih. Lie Beng dateng menanjaken pada marika, barang-barang apa jang perloe moesti dipake. Itoe doewa candidaat pemboenoeh lantas kasi taoe, maoe pake satoe lembar kaen minjak dan satoe kaen boewat memboengkoes.

„Pada sasoedanja kita memboenoeh Pauw Kong tida nanti balik kombali ka sini,“ kata Heng Djoe Liong. Kita maoe membawa ia poenja kapala jang dipanggal boewat dikasi liat pada lo-ja.“

„Akoe harap sadja toewan berdoewa bisa berhasil dalem ini pakerdjahan,“ kata anaknja si dorna. Tentoe kamoedian toewan-toewan aken mendapet pangkat jang besar dan kasenangan jang tida ketjil.“

Itoe doewa orang lantas boengkoes iaorang poenja pakean biasa dan gendong di blakangnja, sebab apabila iaorang bisa beroentoeng memboenoeh pada Panw Kong dan teroes maboer ka loewar kota, di tengah perdjalanan iaorang bisa menoekar pakean malem dengen, pakean biasa. Pada sasoedanja beres, Lie Beng lantas kasi slamat masing-masing dengen tiga tjawan arak dan oetjapken bebrapa perkatahan jang baek dan mengandoeng kaberoentoengan. Itoe waktoe soeda djam sapoeloeh, koetika Heng Djoe Liong dan soedaranja kaloewar di lataran, Lie Beng maoe soeroe orangnja memboekain pintoe.

„Tida perloe,“ kata Heng Djoe Liong.

Sahabisnja berkata begitoe, ia bersama adenja lantas berlompat naek ka atas genteng roemah, dalem sakedjap sadja iaorang tida kaliatan lagi bajang-bajangannja. Lie Reng meliat itoe keadahan, hatinja merasa sanget girang, ia pikir ini oeroesan tentoe dengen gampang sadja bisa berhasil.

Heng Djoe Liong dan Heng Djoe Houw menoedjoe ka kantoor Kay-hong-hoe, dan di tengah perdjalanan sama-sekali ia tida ketemoeken orang jang djalan liwat, sebab soeda djaoeh malem. Iaorang melompati pager temboknja itoe kantoor jang di sabelah depan dan teroes naek ka atas genteng roemah-roemah di sitoe boewat mentjari kamar tidoernja Pauw Kong. Jang satoe mengambil djalan ka timoer dan jang laen ka Barat. Kamoedian dengen mendekam di atas genteng iaorang pada mengawasi ka dalem roemah.

Dengen kaheranan iaorang mendapet kanjatahan, bahoewa dari pintoe itoe kamar boekoe ada mengaloewarken sorot penerangannja lampoe jang menjoroti pada satoe orang jang lagi mengintip di palangan pintoe, dan..... koetika iaorang lagi mengawasi dengen bengong dan kasangsian, mendadak doewa-doewanja rasaken masing-masing poenja telapakan kaki ditjekal orang dan diangkat ka atas hingga doewa-doewa djadi menoengging dengen tida berdaja.

---

FATSAL V.

Tie Hoa jang pada sasoedanja meninggalken itoe soerat, teroes balik kombali ka iapoenja roemah penginepan. Pada hari jang berikoetnja, sasoedanja ia dahar sore, lantas ia bikin beres rekeningnja, koetika pintoe kota ampir ditoetoep ia lantas meninggalken itoe roemah makan dan pergi ka satoe waroeng thee, di mana ia minoem thee sampe itoe waroeng hendak ditoetoep, baroelah ia meninggalken itoe tempat. Tapi lantaran itoe waktoe masi belon djaoe malem, ia loentang-lantoeng di djalan besar hingga djam sapoeloe, pada waktoe mana ia lantas menoedjoe ka kantoor Kay-hong-hoe.

Sasampenja di itoe kantoor poenja pagar tembok jang sabelah Barat, ia lantas berlompat naek. Ia memang soeda taoe di mana letaknja Pauw Kong poenja kamar-batja, dan tida djaoe dari itoe kamar-boekoe ada satoe poehoen besar. Apabilah ia pandjat poehoen terseboet, jang tangkalnja sanget tinggi dan besar, nistjaja ia bisa meliat dengen njata ka segala djoeroesan. Bagian daonnja itoe poehoen ada sanget lebat, hal mana ada baek sekali boewat ia oempatken diri.

Itoe waktoe soeda liwat djam sapoeloeh dan Tie Hoa taoe bahoewa itoe orang-orang jang melakoeken pemboenoehan dengen sigra aken sampe. Tida antara lama kamoedian, dari kadjaoehan ia liat ada doewa bajangan itam jang berlompat naek dari pager tembok menoedjoe ka itoe kamar-boekoe. Tapi itoe doewa orang lantas mamentjar, jang satoe menoedjoe ka dioeroesan Timoer dan jang laen ka Barat. Hal mana soeda membikin iboek hatinja kita poenja Hek-ho-lie. Sebab itoe candidaat pemboenoeh ada doewa, sedang ia tjoema sendirian, lagian ia tida bisa malepasken sendjata resia. Djika ia bisa, tentoe lebih doeloe ia roeboehken jang sa- toe, tinggal satoe ada gampang diperlakoekennja. Oepamanja ia tjoema bisa menangkep jang satoe, sedang jang laennja merat, itoelah tida bagoes. Sekarang terpaksa ia moesti tangkep doeloe jang di sabelah Timoer, sebab letaknja ada lebih deketan, kamoedian baroe kasi bagian pada jang satoe lagi.

Sasoedanja berpikir tetap. Tie Hoa lantas toeroen dari itoe poehoen, sedang itoe candidaat pemboenoeh jang di sabelah Timoer ada Heng Djoe Liong, jang djoestroe mendekam di genteng bagian depan roemah jang terletak di itoe djoeroesan. Tie Hoa lantas mengintip ka atas woewoengan roemah terseboet, ia liat itoe pendjahat lagi mengawasi ka dalem kamar-boekoenja Pauw Kong sembari mendekem dan bengong. Mendadak di atas woewoengan roemah jang di sabelah Barat ada menongol saorang laen, jang membikin Tie Hca djadi sangat terprandjat. Sebab ia kiraken itoe orang poen ada kawannja itoe doewa pendjahat.

Lantaran takoet kaliatan, Tie Hoa boeroe-boeroe bongkokin badannja boewat mengoempat; tapi ternjata sabalıknja itoe orang sendiri tida koewatir diliat oleh Tie Hoa. Sebab itoe waktoe Tie Hoa liat is gerakin kadoewa tangannja, lebih doeloe ia itoe menoendjoek pada Tie Hoa, kamoedian ia menoendjoek dizinja sendiri dan lantas oendjoek doewa djeridjinja, blakangan kombali rangkepken kadoewa tangannja dan mengoendjoek ka djoeroesan kakinja itoe pemboenoeh jang di dekatnja dan djoega jang di depan The Hoa. Hek-ho-lie jang tjerdik lantas sadja mengarti apa itoe orang, jang dimaksoedken oleh jang boekan laen artinja: itoe orang dan Tie Hoa berdoewa masing-masing menjekal betisnja itoe doewa pendjahat boewat ditangkep. Soeda tentoe sadia hatinja merasa sanget girang, sekali poen ia tida kenal siapa adanja orang itoe. Ia taoe jang sekarang itce doewa pendjabat tida ada satoe jang bisa melolosken diri, sebab ada orang jang membantoein menangkep.

Tie Hoa liat itoe orang gerakin lagi tangannja dan manggoetken kapala, berbareng dengen itoe ia menghamperi dengen tjepat ka blakangnja itoe pendjahat jang ada dekatnja. Tie Moa poen lantas mandjat ka atas woewoengannja itoe roemah, sembari ia berboewat begitoe, ia perhatiken romannja itee orang ada banjak mirip sama Tjhio Peng, tapi ada mirip djoega sama Pwee Houw. Iapoenja pakean kaliatannja sanget gerombongan, tapi boleh djadi iapoenja ilmos kapandean tida ketjil. Tjoema sadja itoe waktoe ia tida bisa adjak orang itoe bitjara.

Begitoelah dengen berbareng iaorang menjekal betis kakinja itoe doewa pendjahat, hal mana membikin itoe doewa pendjahat djadi berontak lantaran kaget, hingga djadi kadengeran soewaranja genteng jang berotokan petjah. Ampir dalem sa at itce djoega kadengeran di dalem roemah djadi riboet besar, sedeng dalem kamar boekoenja Pauw Kong poen ada kadengeran soewara orang berseroeh „Aja !“ dan bergedeboekan sebagi barang-barang berat jang djato.

Ong Tiauw dan Ma Han jang bersemboeni di roemah-roemah sabelah Barat dan Timoer bersama itoe ampatpoeloeh doewa oppas dengen berbareng pada kaloewar. Sebab masing-masing soeda meliat apa jang soeda terdjadi di genteng itoe doewa roemah. Kadoewa fihak lantas soeroe orang-orangnja memboeka toetoepan lentera maling, kerna kiraken fihak jang laen tida taoe hal itoe.

Samentara Pauw Hin jang mandjat di atas medja dan korsi mengintip dari atasan pintoe, soeda tentoe sadja meliat dengen terang apa jang soeda terdjadi di atas gentengnja itoe doewa roemah. Tatkala ia meliat itoe doewa pendjahat mendekam, ia berniat maoe bertreak bikin riboet, tapi ia djadi kamekmek koetika ia liat ada lagi doewa orang laen. Dalem hatinja berpikir, ini malem ada dateng bebrapa banjak pemboenoeh. Itoe waktoe djoega ia lantas berseroeh keras, lantaran kakinja dikedjetken dan loepa jang itoe waktoe ia lagi mengindjek di atas korsi, soeda tentoe sadja ia djadi djato dan menimpa ka atas badannja Lie Tjay, sedeng itoe korsi lantas terbalik dan djato ka atas djoebin.

Lie Tjay jang katimpa poen djadi kaget dan berseroeh, hingga dalem itoe kamar boekoe jang tadinja begitoe soenji dengen mendadak djadi sanget rame, hal mana soeda membikin kaget djoega pada Pauw Kong, hingga satoe lembar boekoe jang ia lagi batja djadi robek dan itoe boekoe terlempar ka tana.

Djoestroe keadahan dalem kamar sedang kaloetnja, di sabelah loewar roemah orang pada berseroeh: „Pendjahat pendjahat jang dari atas genteng soeda djato kanjoeknjoek ka bawah !“

Di itoe waktoe djoega Ong Tiauw dan Ma Han dengen mengapalai itoe ampatpoeloeh doewa oppas dateng mengoeroeng itoe doewa pendjahat. Di laen fihak itoe doewa orang jang menangkep pendjahat djoega berlompat toeroen ka moeka boemi. Jang satoe orang soeda taoe ada Tie Hoa, sedang jang satoenja lagi ada Kok In Hoei, jang mempoenjai gelaran Sin-heng-boe-eng dan soeka menoenggang kalde dengen mengadep ka djoeroesan pantatnja itoe binatang jang ditoenggangin.

Kok In Hoei, seperti dalem laen bagian dari ini riwajat telah ditoetoerken, pergi tengok keadahannja iapoenja moerid. Tjiauw Boen Tjoen, kamoedian bertemoe sama San-see-gan dan laen-laennja, itoe waktoe ia mendapat taoe bahoewa iapoenja moerid ada satoe anak jang berbakti. Koetika berpisahan sama marika itoe, djoestroe ia hendak pergi ka Siamsay, afdeeling Djoe-leng. boewat mentjari pada Biauw Kioe Sik; koetika ia djalan sampe di Siangsoei, ia katemoeken Lie Thian Siang jang di'iringken oleh Heng Djoe Liong dan Heng Djoe Houw.

Ia liat itoe doea orang poenja paras moeka koerang baek dan menjoerigaken, tambahan iapoenja onkost djalan soeda poetoes. Maka ia lantas mentjari satoe roemah penginepan di mana ia mondok. Pada malemaja ia berniat „pindjem“ onkost djalan pada Lie Tian Siang. Sebab ia taoe itoe ambtenaar dorna poenja oewang didapatken boekan dengen djalan halal, dan tida ada halangannja kaloe ia „pindjem" dari orang jang saroepa itoe.

Kira pada djam sapoeloeh lebih ia dateng ka kongkoannja Lie Thian Siang dan dapat denger marika itoe poenja perdamian boewat memboenoeh pada Pauw Kong, hal mana soeda membikin hatinja djadi tergerak. Semoewa orang taoe bahoewa Pauw Kong ada satoe ambtenaar jang setia, djoedjoer dan pinter, maka ia mendapat niatan boewat pergi menoeloengin. Tapi, terlebih doeloe ia maoe tjoba tjoba itoe doewa pendjahat ada mempoenjai kapandean jang brapa tingginja, maka ia lantas timpoek Heng Djoe Houw sama satoe Hoei-hong-sek, dan dari marika itoe poenja pembitjarahan, ia lantas mendapat taoe itoe doewa pendjahat tida mempoenjai ilmoe kapandean tinggi. Blakangan ia lantas „ambil“ iaorang poenja oewang saratoes tael perak boewat onkost di perdjalanan.

Di perdjalanan ka Pak-khia, kombali ada terdjadi itoe perkara Pwee Houw, si Kate, dan ia djoegalah jang soeda kasi persen Pwee Houw satoe Hoei-hong-sek, koetika itoe orang kate lagi mengoeber-ngoeber itoe doewa soedara Heng. Sebab iapoenja pikiran ada berlaenan sama Tie Hoa. Ia koewatir itoe candidaat pemboenoeh binasa di tangannja Pwee Houw, kerna djika kedjadian begitoe, ia tida aken bisa oedjoek ilmoe kepandeannja di hadepan Pauw Kong.

Pada sasoeda menoeloengin itoe doewa candidaat pemboenoch, ia teroes mengoentit dengen semboeni. Itoe waktoe ia soeda taoe, bahoewa Tie Hoa ada orang jang meoe menangkep itoe doewa pendjahat, bila iaorang lagi maoe melakoeken pakerdjahannja; tapi sebaliknja Hek-ho-lie tida dapet liat padanja.

Itoe waktoe Kok In Hoei menjekel betis kakinja itoe pendjahat dan bikin orang itoe djato kasoempet ka moeka boemi, tapi iapoenja tjekelan teroes menjekel dengen keras, biar poen orang jang ditjekel berontak-rontak dengen keras sembari boelak-balik mengglisahan.

„Panggang roti, balik-balik roti jang dipanggang!“ begitoelah beroelang-oelang ia berkata dengen teroes menjekel keras pada itoe pendjahat. Samentara itoe pendjahat jang terbanting pergi dateng tida brani memboeka soewara, sekalipoen badannja merasa sanget sakit lantaran dibanting pergi-dateng begitoe roepa. Pauw Kong jang berrada di dalem kamar boekoe, dalem hatinja berpikir, tjara begimana ada toekang roti dateng ka sini?

Di laen fihak Tie Hoa poen djorokin itoe pendjahat ka bawah dan ia poen berniat menjekal teroes dan goebak-gabik itoe pendjahat soepaja djadi tida berdaja. Tapi ternjata Tie Hoa poenja tenaga tida tjoekoep koewat aken menjampeken iapoenja maksoed itoe. Sabagitoe lekas ia bersama Heng Djoe Liong djato sampe ka moeka boemi, itoe candidaat pemboenoeh lantas kedjatken sabelah kakinja dan itoe kaki mengenaken sabelah tangannja Tie Hoa jang lagi menjekal kakinja lagi, hingga dalem itoe waktoe djoega itoe tangan jang menjekal djadi terlepas doewa-doewanja.

Heng Djoe Liong lantas lompat bangoen dan menjaboet iapoenja kolok jang lantas dibatjoken ka djoeroesannja Tie Hoa, dan Hek-ho-lie poen terpaksa moesti menangkis sama iapoenja golok. Begitoelah itoe doewa orang lan- tas bertempoer dengen sengit.

„Djika akoe teroes-meneroes goebak-gabiken kaoe seperti roti jang lagi di panggang" berseroeh Kok In Hoei, tentoe dalem kaoe poenja hati merasa tida ridla dan taloek. Maka sekarang akoe maoe lepasken doeloe pada kaoe, soepaja kaoe boleh mengaso doeloe.“

„Djangan, djangan lepasken padanja !“ berseroeh Tie Hoa dengen goegoep. „Sebaliknja kaoe moesti iket dan ringkoes padanja“.

„Oh, ja, akoe loepa“, kata Kok In Hoei ; „tapi sekarang soeda katlandjoer dilepasken, nanti sadja blakangan ringkoes padanja kaloe soeda tertangkap lagi“.

Itoe waktoe Heng Djoe Houw soeda bisa berbangkit, dengen gergetan ia menghoenoes goloknja ditabasken pada Kok In Hoei. Hal mana membikin Hek Ho-lie mendjadi sanget terkedjoet. Sebab ia liat Kok In Hoei sama sekali tida bersendjata, ia anggep itoe tabasan nistjaja aken membikin itoe orang mendjadi terbelah doewa.

Tida taoenja Kok In Hoei poenja gerakan ada begitoe tjepat laksana kilat, sabagitoe lekas itoe golok maoe sampe, ia soeda berlompat ka blakangnja itoe orang jang menabas dan dalem sa'at itoe djoega ia kasi persen satoe tondjokan di lamboenghia Heng Djoe Houw, jang lantas berdjengit lantaran kasakitan.

Itoe waktoe Ong Tiauw, Ma Han, Han Tjiat, Touw Soen dan laen-laen oppas sembari membawa lentera dan sendjata pada dateng mendeketin hendak membantoe. Hek Ho-lie taoe, bahoewa iaorang poenja kapandean sanget berwates, sedang ini doewa pendjahat soeda berbidji mata merah, biar poen ia berdoewa poenja ilmoe kapandean tida terlaloe tinggi, tapi djika moesti bertaroeng sama Ong Tiauw, Ma Han dan itoe oppas-oppas tida berbeda sabagi orang toewa melawan anak-anak ketjil, dalem sedikit sa'at sadja tentoe ada bebrapa di antaranja jang tiwas djiwanja.

„Toewan-toewan sekalian dan kaoe orang, kapala-kapala oppas !“ berseroe ia, „tida perloe kaoe orang membantoe toeroen tangan. Ini doewa pendjahat ketjil pasrahken sadja pada kita berdoewa boewat menangkep. Kaoe orang terlebih perloe pergi ka kamar-boekoe boewat melindoengin pada Siangya“.

Ong Tiauw, Ma Han dan jang laen-laen lantas menoeroet sabagimana omongannja Hek Ho-lie, tjoema meninggalken bebrapa kawannja jang memegang lentera, soepaja bisa mengasi panerangan pada itoe orang-orang jang lagi bertaroeng. Di laen fihak, Tie Hoa jang lagi bertempoer sama Heng Djoe Liong, masi sadja belon bisa mendapet kamenangan, hingga hatinja merasa sanget iboek, kaloe bisa ia ingin sekali lantas bisa tangkap moesoehnja, soepaja bisa membantoein itoe orang menangkap pada Heng Djoe Houw. Tjoema sajang itoe kainginan tida bisa kasampean.

Tapi sabaliknja di fihak sana, fihaknja Kok In Hoei, kadengeran satoe soewara „trang !“ sebab Heng Djoe Houw poenja golok soeda terlempar dan djato ka moeka boemi, lantaran tangannja jang mamegang golok ditendang oleh Kok In Hoei. Sabagitoe lekas ia tida bersendjata, Heng Djoe Houw lantas gerakin kadoewa tangannja dan berlompat dari kalangan bertanding, kamoedian ia lantas lari dengen sipat-koeping.

„Aja, itoe pendjahat soeda melariken diri !“ berseroeh Kok In Hoei dengen loetjoe.

Tie Hoa jang djoestroe bertempoer djadi sangat iboek mendenger itoe pendjahat jang satoenja lagi bisa melariken dirinja. „Djangan kasi ia lari !“ berseroeh ia.

„Eh, kaoe djangan lari !“ kata Kok In Hoei dengen djinaka. „Sebab iaorang tida kasiken kaoe lari.“

Semoewa oppas jang lagi mamegangin lentera di dekat sitoe pada merasa geli dalem hatinja mendenger omongannja itoe orang, berbareng dengen itae, iaorang merasa heran atas orang itoe poenja ilmoe kapandean jang begitoe tinggi. Sebab biarpoen itoe pendjahat poenja golok dimaenken begitoe poenja bagoes, toch tida bisa mengenaken badannja itoe orang koeroes, kerna iapoenja gerakan badan ada begitoe tjepat dan gesit. Sabaliknja dalem sakedjepan sadja ia soeda bisa tendang moesoehnja poenja golok. Biar poen di moeloetnja membilang djangan lari, tapi sabaliknja ia tida maoe mengoeber, hanja berdiri mengawasi itoe candidaat memboenoeh berlompat naek ka atas genteng roemah.

Tatkala sabelah kakinja Heng Djoe Houw batoe mengindjek genteng, itoe orang lantas berkata: „Hajolab, lekasan toeroen!“ Sedang itoe candidaat pemboenoeh soenggoe - soenggoe menoeroeti omongannja itoe orang, sebab dalem itoe waktoe djoega ia lantas djato gadeboekan ka atas tanah. Oppas-oppas jang mamegangin lentera tjoema meliat sadja itoe orang pandjangken badannja dan berlompat ka atas, kamoedian ia tepok itoe candidaat poenja toelang kering dari sabelah kakinja jang belon mengindjek genteng, dan dalem sa'at itoe djoega Heng Djoe Houw lantas djato dari atas itoe roemah.

Sedang itoe orang, Kok In Hoei, menghamperi dan menendang pada itoe orang jang baroe djato sembari berkata: „Djangan bergerak lagi, sobat ; mengaso sadja di sitoe.“

Itoe candidaat pemboenoeh dengen sasoenggoenja djoega mendenger kata. Ia meringkoek dengen tida bergerak barang sedikit. Kamoedian Kok In Hoei lantas menghamperi pada Heng Djoe Liong jang masi bertaroeng sama Tie Hoa.

„Kaoe poenja ade soeda mengaso di sana,“ kata ia, „Mengapa kaoe masi belon masoe toeroet mengaso?“ Tie Hoa maskipoen teroes bertempoer, tapi ia soeda liat dengen teges apa jang soeda terdjadi. Dalem hatinja memoedji bahoewa ini orang sasoenggoenja ada mempoenja ilmoe kapandean jang sanget tinggi.

Heng Djoe Liong itoe tida ada kagoembirahan boewat bertanding teroes. Ia pikir paling betoel djika ia pandjangken kakinja boewat merat. Sahabis berpikir ia lantas poera-poera membatjok pada moesoehnja, tapi ampir dalem sa'at itoe djoega ia tarik kombali goloknja dan balikin badannja dan teroes maboer. Tapi itoe orang koeroes ketjil mengandang di iapoenja djalanan sembari menoeding dengen teloendjoeknja.

„Djangan lari !“ kata ia.

Tatkala ia maoe poeter haloean lari ka djoeroesan Barat, itoe orang koeroes soeda menoenggoe di sitoe. Heng Djoe Liong taoe, bahoewa tida gampang boewat ia melariken diri. Samentara itoe, Tie Hoa soeda dateng memboeroe dan membatjok padanja. Ia lantas egosin itoe batjokan. Tapi itoe orang koeroes lebih siang soeda mengandang lagi di hadepannja.

Heng Djoe Liong pikir, inilah ada satoe koetika baek boewat ia, sebab itoe orang koeroes sama-sekali tida bersendjata. Maka dalem sa'at itoe djoega ia lantas membatjok pada itoe orang jang mengandang, tapi dalem sakedjapan sadja itoe orang soeda linjap dari hadepannja, hingga iapoenja batjokan djato di tempat kosong. Sabagitoe lekas berkelit, Kok In Hoei lantas angkat sabelah kakinja menendang dan mengenaken Heng Djoe Liong poenja tangan kanan, lantaran apa golok jang ia pegang djadi terlepas dari pegangannja dan djato ka moeka boemi dengen soewara berkontrangan. Heng Djoe Liong lantas balikin badannja dan lari. Tie Hoa mengoeber dari blakangnja. Itoe orang koeroes lantas berseroeh: „Hei, orang she Heng, kaoe poenja perboewatan membikin akoe djadi tida bisa pandang mata. Kaoe berdoewa ada soedara poetoesan peroet; tapi sekarang satoe kena tertangkep, jang satoe lagi maoe melariken diri. Taro kata kane bisa lolosken dari, kaoe bisa hidoep brapa tahon lagi? Saoepamanja kaoe orang poenja pakerdjahan bisa berhasil, kamoedian tentoe sama-sama mendapat djabatan tinggi dan menoenggang koeda besar jang bagoes; sekarang kaoe orang poenja pakerdjahan telah mendjadi gagal, toch saharoesnja moesti sama-sama hadepken kasoekeran dan sama-sama menerima binasa, dengen begitoe baroelah bisa diseboet laki-laki.”

Itoe waktoe Heng Djoe Liong masi teroes lari sembari berpikir.

„Eh, djangan lari; kaloe lari boekannja satoe laki-laki. Apalagi memangnja kaoe tida nanti bisa terlolos dari sini. Kaoe haroes taoe, sekalipoen sama sobat djoega, haroes sama-sama soesa, apa lagi kaoe orang berdoewa jang bersoedara dari satoe kandoengan.”

Itoe waktoe Heng Djoe Liong soeda lari sampe di bawah satoe pagar tembok dan djoestroe ia berniat lompat ka atas, tapi ia lantas oeroengken niatnja itoe lantaran mendenger omongannja Kok In Hoei jang sangat menjolok iapoenja pendengeran. Itoe waktoe djoega ia membanting kakinja dan mengelah napas.

„Ach, soedalah, akoe tida maoe lari,” kata ia. „Kaoe orang boleh dateng ka sini, maoe diboenoeh atawa di-iris-iris djoega, boleh menoeroet sabagimana kaoe orang soeka.” „Itoe baroelah djago jang sedjati,” kata Tie Hoa jang dateng menghamperi dan panggil bebrapa oppas boewat menjekal pada kamoedian lantas di-iket kaki tangannja seperti satoe samseng. Di laen fihak Heng Djoe Houw lebih siang soeda di-iket begitoe roepa oleh bebrapa oppas, jang memang soeda sediaken talinja. Itoe waktoe semoewa orang pada bersoerak dengen rameh : „Semoewanja soeda tertangkap :

Ong Tiauw dan Ma Han dateng membri hormat pada Tie Hoa dan menghatoerken trima kasi atas ia itoe poenja tenaga bantoean, begitoe poen itoe bebrapa kapala oppas. Tie Hoa lantas menghamperi pada itoe orang koeroes dan menanjaken ia itoe poenja nama dan tempat tinggal dan tjara bagimana ia bisa taoe ka'adahannja itoe doewa pendjahat jang hendak melakoeken pemboenoehan. Kok In Hoei lantas toetoerken ia-poenja ka'adahan diri dan apa jang ia soeda liat dan denger.

Semoewa orang kombali membri hormat pada Kok In Hoei serta hatoerken trima kasi atas ia-poenja tenaga bantoean. Itoe waktoe Pauw Kong soeroean Pauw Hin boekaken pintoe kamar boekoenja dan oendang itoe doewa hauw-wie masoek katemoeken padanja.

Pauw Hin dan Lie Tjay dengen repot benahin itoe korsi dan medja di tempat asalaja, dan memboeka tapalan pintoe serta diboekaken, kamoedian Pauw Hin berdiri di atas tangga-batoenja itoe kamar dan bersedia; „Siang-ya oendang Ong Hauw-wie dan Ma Hauw-wie boewat bitjara.”

Itoe doewa orang lantas menjaoet dan minta Tie Hoa bersama Kok In Hoei menoenggoe doeloe, kamoedian iaorang mengikoetin Pauw Hin masoek ka dalem itoe kamar boekoe. Satelah meliat pada Pauw Kong, itoe doewa orang lantas membri hormat serta menghatoerken kakagetan berhoeboeng sama itoe hal jang baroe terdjadi dan sateroesnja iaorang menerima kasalahan atas katledorannja.

„Itoe pendiahat - pendjahat ditangkep oleh siapa ?” menanja itoe ambtenaar.

Ong Tiauw lantas toetoerken apa jang soeda terdjadi.

„Oendang itoe doea orang gagah masoek ka sini,” kata lagi Pauw Kong.

Ong Tiauw lantas kaloear dari itoe kamar dan oelangken perkatahannja iapoenja chef. Itoe doea orang menjaoet dengen berbareng dan mengikoet Ong Tiauw masoek ka itoe kamar. Sesampenja iaorang lantas berloetoet di hadepan Pauw Kong.

„Akoe Tie Hoa jang rendah membri hormat pada Siangya,” kata jang satoe.

„Akoe Kok In Hoei mendjoera di hadepan Siangya,” kata jang laen.

„Kadoea orang gagah diharep soeka bangoen sadja dan boleh berdoedoek.”

Tapi itoe doea orang tida brani berdoedoek dan pada sasoedanja dioendang beroelang-oelang, baroelah iaorang brani berdoedoek. Pauw Kong liat Tie Hoa poenja roman berbeda dengen orang jang kabanjakan, sedeng Kok In Hoei poenja toeboe koeroes kering dan tingginja masi belon tjoekoep lima kaki. lapoenja moeka berwarna merah, halis pendek dan matanja boender. Romannja tida berbeda dengen satoe monjet. Sedeng iapoenja pakean jang begitoe boeroek dan roedin, tida berdjaoehan sama satoe pengemis. Manakala orang liat iapoenja roman dan dandanan, tida nanti ada saorang jang bisa mengetahoei ia ada mempoenjai ilmoe kapandean jang begitoe tinggi.

„Atas toean berdoea poenja tenaga bantoean jang berharga akoe haroes hatoerken banjak trima kasi,” kata Pauw Kong. „Nanti apabila ini oeroesan soeda mendjadi beres, tentoe akoe aken madjoeken voorstel pada baginda keizer soepaja toean berdoea bisa mendjabat pakerdjahan negri.”

Itoe doewa orang menjataken jang iaorang tida ingin mendjabat pakerdjahan negri. Iaorang tjoama mengharep sadja soepaja Siangya bisa mendapet kaselamatan dan tida koerang satoe apa. Pauw Kong lantas prentah orang bawa masoek itoe doea pendjahat. Itoe kawanan oppas lebih siang soeda lepasken itoe doewa soedara Heng poenja pauwhok dan dengen tangan teriket iaorang didorong masoek ka dalem itoe kamar. Tapi itoe doewa soedara. Heng menghadepin itoe ambtenaar dengen berdiri tegar dan tida maoe berloetoet.

Semoewa orang soeroe iaorang berloetoet; tapi itoe doewa soedara tinggal berdiri dengen kadoewa mata mendelik. Pauw Kong pikir ini doewa pendjahat boekannja orang baek-baek, maka lantas prentah oppasnja pergi ambil itoe pekakas hoekoem katjip jang memake kapala andjing-andjingan.

---

FATSAL VI.

Itoe doewa soedara Heng makanja tida maoe berloetoet pada Pauw Kong, sebab memangnja soeda didamiken lebih doeloe.

„Engko, akoe denger lantaran itoe orang koeroes kering omong begitoe roepa,“ kata ia, „lantas sadja kaoe tida djadi melariken diri.”

„Akoe tjara bagimana bisa tega melarikan diri sendirian sadja,“ djawab jang toewahan. Biar bagimana djoega kita moesti mati-hidoep bersama-sama.“

„Kaloe begitoe, apabila kita katemoeken itoe ambtenaar, tida perloe kita moesti berloetoet dan mendjoera.“

Biarpoen kita berloetoet dan mendjoera djoega, kita orang poenja djiwa tida nanti diampoenin. Maka lebih baek kita orang poewasken doeloe kita poenia moeloet, kaloe kita bertemoe sama si moeka itam, lantas sadja kita memaki kalang-kaboet, sebab achirnja toch kita aken mati djoega. Maoe diboenoeh atawa poen di'iris-iris, boleh menoeroet iaorang poenja soeka.“

„Baeklah; doewapoeloeh tahon kamoedian kita aken mendjadi orang dewasa lagi.“

Begitoelah iaorang soeda lempar ka sampingperkara mati atawa hidoep, maka iaorang tida maoe berloetoet koetika mengadep pada Pauw Kong. Iaorang pandang itoe ambtenaar berdoedoek dengen lempang di hadepan medja, sekali poen itoe waktoe ini orang besar memake pakean biasa dan boekan pakean kabesaran, toch romannja sanget angker dan bisa membikin keder orang poenja hati. Pauw Kong sabagitoe lekas meliat pada itoe doewa orang, hatinja djadi sanget goesar. „Hei, pendjahat ketjil” kata ia dengen keren sembari menoeding pada itoe doea candidaat pemboenoeh. „Akoe ada kasalaban apa, maka soeda mendjangkitken kaoe orang poenja hati jang djahat? Tapi akoe tida maoe tjari taoe kaoe orang poenja hal-ichwal lebih djaoe, hanja maoe lantas kasi hoekoeman jang satimpal sama kaoe orang poenja perboewatan. Hajo bawa itoe pekakas hoekoeman katjip jang memake kapala andjing.”

Ong Tiauw dan Ma Han lantas menjaoet dan bawa masoek itoe pekakas menghoekoem ka dalem kamar boekoe, kamoedian soeroe oppas melepasken toetoepannja jang tersoelan dengen oeler dan naga. Ong Tiauw dan Ma Han lantas tjekal itoe doewa orang boewat djalanken hoekoemannja.

Tie Hoa dan Kok In Hoei lantas moendoer ka satoe pinggiran. Djoestroe pada itoe waktoe, Tie Hoa rasaken di blakangnja ada orang menarik padanja, koetika ia menengok, ternjata orang itoe boekan laen dari Kang Hwan, orang siapa lantas membri hormat padanja.

„Aja, kaoe masi ada di sini ?” kata ia. „Di djalanan kaoe dapetken perkara jang sanget mengagetken, akoe rasa.”

„Mendapet kakagetan apa ?” menanja Kang Hwan jang berlaga pilon.

„Kaoe katemoeken Pwee Houw jang membegal apa boekannja satoe kakagetan ?”

„Tjara bagimana kaoe bisa taoe hal itoe ?” menanja Kang Hwan dengen heran.

„Akoe soeda menjaksiken sendiri apa jang soeda terdjadi,” kata Tie Hoa.