100
TJERITA ROMAN
YIN LAN
101
„Boeat goena kaoe-poenja kaslametan saja moesti minta kaoe berlaloe dari ini kota,” saoet itoe gadis, tapi aer matanja djadi mengembeng waktoe ia berkata, „boeat Rosa enko tida tida oesa kwatir, saja nanti rawat padanja sabagi satoe soedara poetoesan peroet!”
„Sabagi satoe iboe!”
„Baek, sabagi satoe iboe,” saoet lagi itoe gadis, „djangan kwatir, enko, asal sadja kaoe bisa slamet, pertjaja kaoe enko pada saja?”
„Pertjaja,” kata Wen-Liang dengen girang, „saja tida bisa pertjajaken Rosa pada laen orang selaennja pada satoe bidadari sabagi kaoe, Hiang!”
Hiang-Nio laloe pergi sabentar dan tida lama lagi ia bawa nasi dan temen-temennja. Ia taro itoe di atas medja ketjil.
„Daharlah doeloe, enko,” kata ia kamoedian, „bisa djadi_kaoe belon makan, tapi daharlah sa'adanja sadja!”
„Oh, Hiang,” kata Wen-Liang, „djikaloe saja mempoenjai istri sabagi kaoe tentoe saja tida sampe djadi begini!”
„Soeda,” saoet itoe gadis sambil sendokin nasi, „djangan boeang tempo.”
Wen-Liang laloe dahar dan ia memang sedari tadi sore belon makan maka ia dahar banjak sekali. Lebih lagi Hiang-Nio saben-saben sendokin nasi.
Samentara itoe Hiang-Nio laloe toekar badjoe, sedeng jang tadi belepotan darah ia laloe rendem di dalem paso.
„Soeda, soeda,” kata Wen-Liang kostika Hiang-Nio maoe sendokin lagi nasi, „apa saja besok moesti dipotong, hingga ini malem moesti didjedjel begini banjak?”
„Kaoe toch boekan babi, mana bisa dipotong,” kata itoe gadis sembdari mesem. Boeat samentara roepanja marika loepaken kasoekerannja, tapi kamoedian Hiang-Nio kata lagi:
„Sekarang saja perloe dandanin, soepaja kaoe djadi bang Wen-Liang!”
„Dan kaoe djadi saja-poenja embok!” saoet Wen-Liang dengen tertawa.
„Soeda enko,” kata itoe gadis, „djangan membanjol, toekarlah. Pake sadja saja poenja saroeng dan ini ada setangan kepala!”
„Dari mana kaoe dapet itoe setangan kepala?” tanja Wen-Liang dengen heran.
„Ah, enko roepanja soeda lamoer,” kata itoe gadis, „apatah ini boekan jang baroesan dipake laken toetoep media ketjil itoe?”
„Boleh djadi saja lamoer, lamoer oleh kaoe-poenja kaeilokan, Hiang,” kata Wen-Liang.
Sasoedanja Wen-Liang pake itoe saroeng dan setangan, Hiang-Nio terpaksa moesti tertawa. Tapi tida lama, kamoedian ia kliatan djadi sedih dan ia djadi menangis dengen sesegookan.
„Hiang,” kata Wen-Liang sambil pegang poendaknja itoe gadis, „baroesan kaoe ketawa dan sekarang menangis, bagimana?”
Hiang-Nio menangis teroes, hingga Wen-Liang djadi bohhwat. Ia djoega sabenernja sanget berat moesti meninggalken pada itoe gadis dan lebi lagi ia moesti tinggalken iapoenja anak Rosa.
„Enko Wen-Liang,” kata itoe gadis dengen sasegoekan, „kita tida taoe kita berpisah sampe kapan.”
Wen-Liang tida bisa mendjawab, ia rasaken seperti djoega lehernja terkantjing.
„Soeda nasib,” berkata Wen-Liang dengen plahan.
