18
TJERITA ROMAN
YIN LAN
19
Akoe djadi bergidik dan braniken hati boeat iroep aer dari itoe oemboel. Akoe sendok dengen kadoea telapakan tangankoe, tapi waktoe itoe aer sampe di bibirkoe akoe tida tahan lantaran dinginnja ada melebihin dari ijs. Akoe berdjengit dan djadi seder, akoe tjelingoekan dan dari djendela ternjata tjoeatja soeda djadi terang.
Hawa oedara betoel sadja ada sanget dingin, hingga akoe rasaken meresep sampe di toelang-toelang, inilah ada hawa Poentjak jang terkenal. Akoe rasaken kakikoe bekoe, bultzak seperti djoega baroe digoejoer dengen aer ijs.
Akoe lontjat dari pembaringankoe dan boeka djendela, oedara ada penoeh oewap, sedeng goenoeng-goenoeng tertoetoep dengen halimoen. Plahan-plahan dengen terkena sorotannja mata-hari itoe pedoet djadi semingkin tipis dan moelai tertampak goeratan-goeratannja goenoeng-goenoeng di sakiternja.
Akoe lantas teken bel dengen pengharepan zuster Yin Lan jang bakal dateng, tapi sebaliknja dari ia moentjoel satoe djongos. Akoe merasa djengkel.
„Mana zuster Yin Lan?” akoe menanja pada itoe djongos.
„Ini hari ia dapet vrij.” itoe djongos mendjawab. Akoe tida brani menanjaken lebih banjak, tapi akoe soeroe itoe djangos sediaken aer panas di kamar mandi.
Sa'abisnja goejoer badan dengen aer anget, akoe laloe toekeran dan pergi di kamar dokter, boekan dengen maksoed boeat dipreksa, tapi lantaran akoe kapingin taoe satoe dan laen tentang Yin Lan. Akoe tida mengerti, pengaroeh apa jang menjoeroeng boeat akoe berboeat begitoe, tapi semingkin lama akoe djadi lebih perhatiken pada itoe nona Tionghoa jang hidoep saolah-olah terhoekoem dalem itoe kasoenjian, djaoe dari karamean doenia, berbeda dengen gadis-gadis modern di kota'an jang dojan plesir dan tida tahan kaloe satoe minggoe tida pergi di tempat dansa atawa bioscope.
Sasoedanja preksa akoe-poenja badan, dokter tida dapetken penjakit apa-apa dalem badankoe, sebab akoe memang tida sakit, tapi ia melaenken nasehatken boeat meng aso kira-kira satoe boelan, lantaran zenuwoverspanning. Akoe taoe itoe dan sasoedanja akoe taoe akoe dirawat oleh Yin Lan, djangan kata soeroe diam di sitoe satoe boelan, biar saoemoer hidoepkoe akoe soeka! Begitoelah itoe perasa'an dateng padakoe, dengen zonder akoe mengataoein dan zonder disengadja.
Begitoe tjepet akoe-poenja kaki bisa membawa padakoe, akoe lantas pergi di bagian blakang dan dapetken di sitoe satoe paviljoen moengil jang mengadepin goenoeng Gede. Akoe harep bisa katemoeken Yin Lan di sitoe, tapi waktoe akoe sampe di sitoe akoe melaenken katemoeken baboenja, jang mengasi taoe padakoe, bahoea Yin Lan pergi di Patjet boeat membeli sajoeran dan boenga-boenga.
Akoe djadi sanget mendongkol. Kenapa Yin Lan tida kasi taoe doeloe padakoe, kaloe ia hendak berpergian? Tapi achirnja akoe djadi maloe dengen mempoenjai pikiran begitoe. Akoe ada hak apatah atas itoe gadis? Tida sama sekali, ia boekan sanak boekan kadang, kenal poen baroe.
Iapoenja tempat tinggal ada diatoer dengen sanget saderhana. Satoe korsi zitje ada di sablah depan, potpot kembang jang toemboe dengen bagoes. Di podjokan ada satoe piano, atas mana ada satoe viool