― 13 ―
― 14 ―
sabelah dalem. Waktoe meliat potongan badannja, Nora soeda bisa lantes tebak, siapa adanja itoe tetamoe jang diseboet baroesan.
Maski hati itoe waktoe djadi bergontjang tida keroeanan, toch ia rasa maloe sekali kaloe sebagi gadis modern ia moesti keder boeat hadepin itoe pemoeda, maka sasoedanja prentah soepirnja bawa itoe auto ka garage, ia laloe baliken badannja boeat masoek ka itoe roemah, dan sesa'at ini djoestroe Tjeng Giok, itoe pemoeda jang berada di sitoe, menoleh ka djoeroesan loear, lantaran mendenger soeara brisik dari itoe kandara'an.
Masing-masing poenja lirikan mata djadi berbentrokan satoe sama laen, dan itoe doea pemoeda moekanja djadi merah, seperti satoe sama laen rasaken djengah, tetapi tida loepoet begitoe lekas itoe rasa kesima djadi ilang, Tjeng Giok, lantes berdiri dan manggoetken kepalanja, sedeng Nora itoe waktoe dengen senjoeman jang tida begitoe njata telah membales sebagimana lajiknja.
„Nona apatah entjek Keng Sin ada di roemah ?” Tjeng Giok moelai menanja dalem bahasa Blanda, samentara soearanja masi separo kikoek, kerna itoe pertemoean jang tida terdoega soeda bikin ia djadi kelabakan tida keroeanan.
„Itoe saja koerang terang, tetapi baek saja tjoba tengok di dalem, kerna koetika satoe djam berselang saja kaloear boeat pesiar, papa baroe sadja poelang,” djawab Nora dengen soeara lebih tabah, tetapi tida oeroeng ada oendjoeken tanda-tanda sebagi orang jang sedikit kikoek. „Baek engko doedoek doeloe sabentaran, nanti saja panggilken.”
„Trima kasi boeat kaoe poenja kebaekan,” kata poela itoe djedjaka sembari doedoek kombali di itoe korsi jang terdapet di tengah itoe roeangan.
Nora itoe waktoe laloe permisie ka dalem, dan berlaloe dari sitoe. Pertama kali ia menoedjoe ka roeangan makan, kerna ia kira ajahnja sedeng dahar siang, tetapi disini ia tida katemoeken, maka ia teroes ka serambi blakang, dan disini djoega itoe ajah tida ada, maka achirnja ia masoek lagi ka sabelah dalem dan tengok kamar ajahnja. Pintoe kamar mana jang terkontji dari sabelah dalem soeda bikin Nora lantes mengarti kaloe ajahnja sedeng tidoer. Sebab merasa tida enak boeat djemoer tetamoenja terlaloe lama, maka Nora lari ka dapoer boeat katemoeken iboenja, tetapi dari boedjang prampoean ia dikasi taoe kalo itoe iboe djoestroe menenamoe ka sabelah tetangganja, jang itoe waktoe soeda oendang boeat mengobrol.
Lantaran ini Nora djadi kepaksa moesti lajanin poela tetamoenja maka ia laloe katemoein lagi pada Tjeng Giok, jang itoe waktoe masi sadja doedoek di tempat baroesan. Tjoema dari aer moekanja bisa dibade kaloe pemoeda kita keliatannja tida sabaran.
„Papa lagi tidoer, tapi saja kira tida lama lagi ia nanti bangoen, kerna biasanja ia tida tidoer lebih lama dari satoe djam kapan soeda terlaloe sore. Tjoema apatah saja bisa taoe engko poenja kaperloean jang hendak dibitjaraken sama papa ?” kata Nora koetika ia baroe sadja sampe di depan, hingga Tjeng Giok lantaran saking kesoesoe boeat berdiri, soeda djadi kabentoer kakinja dengen kaki medja.
„Kaperloean apa jang saja hendak bitjaraken?” mengoelangin itoe djedjaka. „Itoe saja sendiri tida taoe, kerna tadi pagi sekira djam sembilan sala satoe orang soeroean dari entjek Keng Sin soeda mintabuku
