-107-
-108-
beroentoengan dan kasenangannja itoe sepasang penganten.
Selagi itoe malem Nora dan Tjeng Giok bakal itjipken itoe sa'at perlintasan dari penghidoepannja jang penoeh madoe pertjintahan, adalah entjek Keng Sin dan njonjanja sedeng berdoeka sekali, berhoeboeng dengen satoe hal jang terdjadi dengen mendadak.
Boeat dapet taoe ini hal jang dimaksoedken, lebih doeloe kita moesti tengok keada'annja Henri Tjoe, jang sakean lama kita tinggalken dalem ini tjerita, kerna ialah jang tersangkoet paling teroetama.
Sebagimana orang masih inget itoe poetra millionnair lantaran ingin dapetken Nora, soeda tida segan lakoeken itoe kakedjian dan kedjahatan, tetapi dasar Toehan maha adil, maka tida heran kaloe satoe tempo iapoenja kedjahatan djadi ketahoean, hingga boeat itoe ia moesti alamken hal-hal jang menjemarken antero kahormatan familienja.
Sadjek dari Hing Bie disoeroe lakoeken itoe pemboenoehan, dan sedari berhasilnja itoe akal kedji, Henri Tjoe lantaran koeatir perboeatannja ketahoean, hingga dirinja bisa terantjem oleh hoekoeman wet, ia soeda brangkat ka Singapore, dimana ia soeda poeasken napsoenja dalem berbagi-bagi plesiran jang tida ada watesnja. Tetapi baroe sadja ia berdiam di ini tempat bebrapa boelan sadja, tida taoenja iapoenja tabeat jang boeroek soeda soeroeng ia boeat djato dalem tjoeram jang lebih hina, kerna di sana salaennja ia bawa kelakoean sebagi „pentol” soehian, poen ia soeda tida segan lakoeken perdjinahan dengen istrinja orang-orang baek, jang ia dapetken dengen pengaroe dari oewangnja. Malah di achirnja ia soeda bisa perkosa djoega bebrapa gadis jang masih di bawah oemoer.
Ini perboeatan jang blakangan soeda bikin ia rasaken „sempit” sekali aken tinggal lebih lama di Singapore lantaran mana ia achirnja ambil poetoesan boeat kombali di Java.
Tetapi itoe batin jang soeda boeroek, maski permoela hendak dirobah kerna sedar sama bahaja jang mengantjem, toch tinggal tida bisa berobah, maka di Soerabaja djoega ia soeda lakoeken itoe perkosahan pada bebrapa gadis Boemipoetra dan Tionghoa.
Lantaran ini djoega satoe waktoe politie soeda bisa tjioem baoe, hingga dengen zonder ampoen lagi itoe poetra millionnair didjebloesken dalem tahanan boeat dipreksa perkaranja.
Ajahnja Henri maoe goenaken pengaroeh oewang boeat kaloearken poetranja dari itoe „doos item”, kerna antero pers Melajoe Tionghoa di Soerabaja dan laen-laen tempat, soeda kabarken itoe kedjadian, malah antaranja soeda pada bongkar djoega itoe bebrapa kaboesoekannja, hingga bikin bernoda iapoenja kahormatan familie.
Bebrapa advocaat soeda diminta pertoeloengannja, tetapi semoea njataken tida sanggoep, kerna kasaksian dan boekti-boekti sanget memberatken.
Apa poela baroe sadja doea hari itoe penahanan dilakoeken, bebrapa kedjahatan laen toeroet terbongkar, jang semoeanja sanget berat.
Kabar tentang ditangkepnja itoe poetra millionnair, djoestroe dibatja oleh entjek Keng Sin koetika itoe maleman poetrinja, jang bermoela hendak didjadiken istrinja itoe orang termaksoed, sedeng rajahken ia- poenja pesta nikah jang saderhana tetapi penoeh kegoemilangan dan kaberoentoengan.
Membatja itoe kabaran tentang perboeatannja iapoenja bakal mantoe, sasoenggoenja ada berarti satoe
