tjari itoe gadis, koetika ia sampe di itoe tempat jang dimaksoedken dengen zonder soesah ia lantes bisa taoe dimana sabetoelnja Nora ada berdiam kerna politie di Batavia sendiri oleh Nora soeda dikasi taoe, agar tida bikin soesah iaorang.
Maski bermoela itoe penggawe politie hendak goenaken kakerasannja wet boeat bekoek itoe sepasang merpati, toch lantaran ditanggoeng oleh itoe madjikan, jang namanja ada sanget terkenal dalem kalangan dagang di Batavia, achirnja itoe politie moesti balik ka kantoornja dengen tangan kosong. Atas voorstelnja itoe madjikan, itoe hamba wet lantes poeter telefoon ka Semarang dan minta entjek Keng Sin sendiri ka sana.
Mendenger katerangan dari politie, entjek Keng Sin jang sekarang moelai berobah pikiran, djadi tarik kombali perminta'annja, dan dengen itoe hamba wet balik kombali ka Semarang dengen zonder bisa berboeat laen dari pada minta ganti karoegian boeat itoe ongkos jang dipake.
Berobahnja ini pikiran dari itoe ajah, ada disebabken kerna bebrapa familie dari Nora anggep pertjoema iboekin itoe anak prampoean kerna toeroet anggepannja ande kata bisa dibawa poelang, toch kahormatannja soeda „tertjemar.“
Tetapi ini anggepan ada ditentangin dengen keras oleh njonja Keng Sin, jang sebagi iboe tentoe sekali tida tega moesti biarken anaknja berada dalem itoe keada'an.
Maski demikian entjek Keng Sin jang terkenal angkoeh sekali, atawa bisa djoega dibilang mata doeitan, koekoeh tida soedi akoeh lagi anak pada Nora, sebaliknja ini gadis lantaran pertjaja bahoea dirinja ada poenjaken kamampoehan boeat berdiri sendiri, tentoe sadja tida djadi keder.
Bebrapa waktoe berselang sedari datengnja di Batavia, Nora soeda beroentoeng bisa bekerdja pada sala satoe H. C. S. particulier, dengen penghasilan jang loemajan djoega, apa poela Tjeng Giok jang semingkin madjoe dalem kerdjahannja selaloe tida kasi Nora goenaken oewangnja sendiri, hingga oewang jang didapet dari itoe kerdjahan Nora bisa simpen brikoet oewang jang ia koempoelken sendiri di waktoe masih tinggal bersama orang toewanja.
Nora dan Tjeng Giok tinggal dalem satoe roemah, melaenken terpisah kamarnja sadja, kerna apa saban waktoe poelang kerdja marika bisa berdampingan satoe sama laen.
Boeat hiboerken hatinja, Nora dan Tjeng Giok, kapan tida doedoek mengobrol di pekarangan roemah, tentoe ia pergi pesiar di straat straat jang rame, atawa kadang-kadang ia mengobrol sama toean dan njonja roemah. Toean dan njonja Vermeulen jang ditoempangin roemahnja, tida brentinja memoedji bagimana itoe sepasang merpati jang saling menjinta bisa hidoep dalem itoe keada'an, zonder marika lakoeken apa-apa, jang melaenken bisa dilakoeken oleh soeami-istri jang soeda menikah dengen sah.
Satoe waktoe, sakira toedjoe boelan sadjek berdiamnja di Batavia, selagi kabetoelan terang boelan, Tjeng Giok dan Nora, mengobrol di bawah penerangnja boelan poernama, sedeng toean dan njonja roemah itoe waktoe djoestroe lagi koendjoengin satoe pesta dari bangsanja.
Di ini koetika jang baek, djedjaka kita bisa dapetken boeat roendingken itoe soeal jang terdapet dalem marika poenja penghidoepan.
