-79-
-80-
samentara tangannja jang baroe lepas itoe roda stuur laloe disenderken di senderan tempat doedoeknja.
„Djangan goesar engko baron,” djawab Hing Bie dengen soeara dibikin-bikin. (engko baron ada djoeloekan jang biasa digoenaken oleh itoe goendal) „Owe baroesan mendadak rasaken sakit peroet, maka sasoedanja sakean lama menoenggoe tapi engko belon dateng, owe laloe poelang boeat itoe kaperloean. Dan baroe sadja owe hendak kaloear, mendadak si Amat soeda menjoesoel.”
„Soeda djangan banjak rewel dan tjoba toeroet di blakang, goea ada perloe bitjara sama loe. Goea baroesan dateng lebih laat sebagimana goea djandji, kerna di roemah goea ada dapet oeroesan,” kata itoe poetra millionnair.
Masin dari itoe kandara'an moelai berboenji dan tida brapa sa'at kamoedian roda-rodanja lantes terpoeter, dan achirnja itoe auto linjap di biloekan djalan besar, antara laen kandara'an jang berseliweran.
Henri lariken kandara'anja dengen tjepet, dan achirnja itoe kandara'an dibrentiken di Paneleh. Itoe Chrysler sportmodel jang baroesan „terbang” sekarang telah brenti depan satoe gedong ketjil, jang letaknja di tempat sepi. Samentara Hing Bie lantes boekaken pintoe auto dan Henri kaloear dari itoe kandara'an.
Dengen tindakan tida sabaran Henri masoek ka itoe roemah, dengen di'ikoetin oleh itoe goendal, sedeng dari sabelah dalem moentjoel satoe prampoean Soenda, jang parasnja loemajan djoega, siapa lantes pelok itoe engko baron dengen kelakoean manis sekali.
Itoe prampoean Soenda boekan laen dari Njai Siti, sala satoe boengah berdjiwa jang termashoer di Bandoeng, tetapi blakangan soeda djadi piarahan (goendiknja) Henri.
Sedeng biasanja kapan disamboet oleh itoe njai, Henri lantes bales melok dan tjioem, adalah sekarang ia tida mengopen selaennja minta soepaja itoe njai berlaloe dan tida ganggoe pembitjara'annja. Sebaliknja Siti jang dapet liat ini perobahan dalem hatinja djadi mendongkol, tetapi sebab taoe Henri poenja oewang ada „empoek”, maka dengen sabarin hatinja ia ngelojor.
Henri ambil tempat doedoek di satoe korsi, sedeng Hing Bie djongkok di atas djoebin, kamoedian itoe poetra millionnair laloe toetoerken, bahoea ia ada maoein satoe gadis di Semarang, hingga kamoedian ia madjoeken lamaran. Dari sini ia terangken djoega dengen djelas bagimana itoe lamaran soeda ditolak, dan bagimana kadoea orang toewanja poenja sikep terhadep itoe oeroesan.
Koetika baroe sadja bitjara sampe di sitoe itoe pembitjara'an djadi poetoes, kerna kadengeran tindakan kaki menghamperin dari sabelah dalem. Tida lama kamoedian satoe baboe prampoean moentjoel sembari bawa satoe glas terisi ijs dan satoe botol limonade.
Sasoedanja boeka itoe botol dan isi itoe glas, boedjang terseboet laloe persilahken toeannja minoem, sedeng ia sendiri menoenggoe di sitoe. Tapi atas prentanja atawa lebih betoel atas oesirannja Henri itoe boedjang jepet menjingkir ka dalem.
Sabegitoe lekas itoe boedjang berlaloe pembitjara'an lantes disamboeng lagi, tetapi ini kali Henri oetaraken maksoednja boeat dapetken itoe gadis jang ia gilain