-73-
-74-
Dari aer moekanja jang begitoe keliatan asem sekali, orang lantes taoe kaloe itoe djedjaka sedeng oering oeringan, maka tida heran kaloe semoea boedjang itoe koetika hadepken itoe madjikan moeda dengen hati berkoeatir sekali sebab sasoeatoe kelambatan atawa kesalahan ketjil sadja, pasti aken dapet semprotannja.
Koetika djalan ka djoeroesan kamar mandi, lantaran memang pikirannja sedeng melajang tida keroeanan, tida ketaoean iapoenja handdoek jang dikepel di sabelah tangannja soeda kena sangkoet satoe pot kembang, jang ditaro di satoe medja ketjil, hingga djatohnja itoe pot djadi terbitken soeara gedoebrakan jang keras.
Seantero boedjang baek lelaki maoepoen prampoean pada memboeroe ka itoe tempat, tetapi semoea tentoe dengen perasa'an koeatir sekali, dan betoel sadja begitoe liat banjak boedjang pada mendatengin, dengen „lantjar” sekali Henri lantes semprot dan „tjoetji” itoe antero boedjang jang sabetoelnja dalem itoe hal sama sekali tida salah, dengen segala makian dan tjatjian.
Sasoedanja poeas baroe Henri masoek di kamar mandi, samentara Simin, toekang kebon dan Hasan, djongos roemah, maski dalem hati mengoetoek tida abisnja, itoe waktoe lantes sadja benain itoe petjahan pot dan sapoe itoe tanah jang berarakan.
Baroe sadja ini doea penggawe menindak kaloear, seabisnja trima itoe „pesenan” jang tida diharep dari marika poenja toean moeda, mendadak dari djalan besar ada biloek satoe auto, jang teroes brenti depan itoe gedong.
Hasan dan Simin lantes dateng menjamboet sembari boekaken pintoe auto, kerna dalem kandara'an mana ada doedoek Tjoe Liang Hin, atawa biasa djoega diseboet L. H. Tjoe bersama istrinja jang baroe poelang dari Toendjoengan, dimana iaorang blandja di bebrapa toko besar.
Dengen lebih doeloe tanjaken dimana adanja iapoenja poetra, njonja Liang Hin kamoedian baroe prenta Hasan dan Simin angkoet itoe sakean barang-barang jang ia bawa di itoe kandara'an. Samentara soeaminja lantes sadja masoek di kamar samping, jang ia biasa goenaken boeat tempat batja koran.
Simin jang liat madjikan toewanja masoek ka sitoe, lantes sadja lari ka dalem dan bawaken itoe koran-koran jang baroesan telah dibatja oleh Henri ; sedeng njonja Liang Hin teroes masoek ka dalem.
Tida selang satengah djam dari itoe sa'at di serambi depan dari itoe gedong, jang kapan ditilik dari besar dan modelnja serta diliat dari hiasan brikoet perabotannja, orang bisa bandingken sebagi satoe astana jang indah, di bawah penerangannja listrik keliatan doedoek itoe millionnair dengen ditemenin oleh istri dan anaknja, sembari masing, masing hadepken satoe tjangkir thee soesoe dan bebrapa stopflech jang terisi beschuit.
Dari sorot moekanja itoe ajah orang lantes bisa liat kaloe dalem hatinja ada semboeni itoe perasahan mendongkol dan goesar; kaloe meliat gerakannja itoe pemoeda, orang bisa bade kaloe ia ini sedeng masgoel dan poetoes harepan, sedeng njonja Liang Hin melaenken oendjoek paras sebagi orang jang koerang senang.
Ini semoea gerakan dan paras moeka, semoea ada disebabken oleh satoe pembitjara'an jang marika lakoeken, berhoeboeng dengen datengnja satoe balesan dari Semarang tentang itoe lamaran pada poetrinja Tio Keng Sin.