-70-
-71-
sekali papa nanti goenaken itoe hak sebagi ajah boeat paksa kaoe toeroet itoe kahendak, dan bila perloe papa nanti „stop“ kaoe poenja peladjaran dengen begitoe semoea djadi beres.”
Nora tinggal boengkem, tetapi iapoenja mata jang mengembeng aer mata, soeda memaksa boeat ia menjingkir dari sitoe. Sebaliknja njonja Keng Sin jang dari setadian dengerin itoe „debat“ sekarang madjoe ka depan boeat gantiken gadisnja.
Sebagi iboe jang poenjaken pikiran lebih „dingin“ dan perasa'an jang bisa mengimbangin, njonja Keng Sin itoe waktoe lantes kasi mengarti pada soeaminja, bagimana ia moesti beroeroesan dengen anak jang soeda gadis, dalem hal minta ia timbang soeal perdjodoan. Lebih djaoeh ia ada madjoeken pikiran soepaja soeaminja soeka bales itoe soerat soesoelan dari Soerabaja berhoeboeng dengen itoe pelamaran, bahoea lantaran Nora masih dalem sekola, maka kepastian dalem ini dikabarken laen kali, bila itoe anak soeda loeloes dalem oedjiannja jang pengabisan.
Ini voorstel permoela oleh entjek Keng Sin tentoe sekali tida disetoedjoein dan sebagi alesan ia bilang itoe penoenda'an nanti mendjadi sebab, aken itoe pelamaran ditarik kombali, sebab temponja terlaloe lama. Tetapi koetika istrinja menjemprot, dan kasi djengekan pedes, bahoea itoe tjara berkoeatir ada sebagi orang jang „kelaparan“ sama kekajahan, achirnja lantaran merasa maloe ia menoeroet djoega.
Moelai itoe waktoe entjek Keng Sin tida mendesek lagi, tetapi tida oeroeng Nora rasaken apa-apa jang mengantjem pada peroentoengannja, maka dalem soerat-soeratnja pada Tjeng Giok ia terangken dengen djelas sasoeatoe hal jang ia koeatirken.
VII.
GOENAKAN AKAL KEDJI.
Kaloe apa jang diingin tida bisa didapet. Dan segala moeslihat soeda djadi keepepet. Akal kedji tentoe sigra orang goenaken. Pada orang jang saroepa Hoe djoeloeken „Siauwdjin“ diberiken.
Soeatoe sore koetika matahari soeda soeroep di podjokan doenia sabelah koelon, dan tjoeatja soeda djadi ampir gelap, sebagi tanda bahoea hari aken terganti oleh malem, dimana pekarangan dari satoe gedong jang indah di Kapassari ada brenti satoe auto Chrysler sportmodel, dengen kapnja jang terboeka.
Dari ini kandara'an tida brapa lama poela ada toeroen, satoe djedjaka sembari tangan kanannja menenteng racket, dan tangan laennja mcnjingtjing satoe badjoe djas gabardine warna aboe-aboe. Dari iapoenja tjelana flanel jang warnanja koening dan sepatoe karet serta badannja jang melaenken pake satoe kemedja dengen schillerkraag jang keliatan basah oleh kringet, lantes sadja kita bisa taoe kaloe ia baroe abis maen tennis.
Itoe djedjaka boekan laen dari Henri Tjoe jang di bagian depan ada diperkenalken pada pembatja, sebagi sala satoe saingan dari Tjeng Giok, atawa lebih teges itoe orang jang dibikin terdendem oleh Nora poenja paras jang eilok, koetika ini nona koendjoengin itoe pesta pertoendangan dari sobatnja.
