dengen toendangannja toch menginget sama persobatannja, terpaksa Fredie terangken, sabegitoe djaoeh jang ia taoe dari Nelly, tentang Nora dan Tjeng Giok.
Henri djadi girang sekali koetika dapet kenjatahan bahoea itoe djedjaka penganter tida lebih dari penggawe pamannja itoe gadis tapi toch tida oeroeng dalem itoe kagirangan ada terselip djoega kakoeatiran, kapan ia inget bagimana Nora dan Tjeng Giok bergaoel begitoe rapet.
Dengen zonder oendjoek gerakan satoe apa jang bisa djadi kentara boeat itoe sobat, Henri tinggal diam; koetika itoe auto sampe, dengen lebih doeloe permisie ia laloe masoek ka kamar paviljoen, jang memang disediaken boeat ianja, selama ia berdiam di itoe kota.
Sebaliknja dari Fredie jang lantes tidoer poeles dengen dapetken impian-impian jang moeloek, adalah Henri itoe malem bisa dibilang tida sakedjepan bisa tidoer poeles, kerna iapoenja pikiran teroes terganggoe oleh parasnja itoe nona rok biroe toewa.
Tetapi begitoe itoe otak soeda djadi panas lantaran itoe pikiran, begitoe djoega iapoenja ingetan jang lebih gampang dipengaroehken oleh kedjahatan dari pada kebaekan, lantes timboel niatan-niatan jang kedji.
„Kaloe Tjeng Giok oepamanja lebih broentoeng hingga bisa tempatin hatinja itoe nona, toch saja masih poenjaken harta, jang dengen itoe saja bisa bikin „doenia” djadi terbalik. Misalnja saja masih bisa pengaroehken orang-toewanja dengen sorotnja berliant, dan kaniaja itoe djedjaka dengen segala tipoe dan moeslihat”. Dengen ini poetoesan baroe Henri bisa merasa poeas dalem hatinja.
Pada besokan paginja sasoedanja mata-hari naek tinggi, baroe itoe pemoeda bangoen dari tidoernja. Dari salembar soerat jang diselipin di sela daon pintoe, ia dapet kenjatahan kaloe Fredie soeda brangkat satoe djam berselang ka roemahnja Nelly. Koetika ia menoleh pada lontjeng kamar, ia dapet kenjatahan kaloe itoe waktoe soeda djam satengah sembilan.
Dengen zonder ajal lagi dan sebagi djoega itoe poetoesan semalem soeda pasti, ia lantes mandi dan salin pakeannja. Kamoedian begitoe beres ia laloe. katemoein entjek dan entjim Kim Beng, sama siapa ia toetoerken, lantaran ada kaperloean jang ia baroe inget maka ia terpaksa moesti brangkat itoe hari djoega ka Soerabaja. Sasoedanja permisie ia laloe pake autonja Fredie jang itoe waktoe menoenggoe di pekarangan, dan dengen ini kandara'an ia angkoet antero koffer pakeannja boeat dibawa ka station Pontjol, tetapi lebih doeloe ia mampir di Plampitan boeat pamitan sama Fredie.
Itoe waktoe kreta api jang bakal bawa ia ka Soerabaja kabetoelan tida lama lagi aken brangkat, maka ia tida oesah djemoer diri terlaloe lama boeat menoenggoe di itoe station.
V.
SATOE LAMARAN.
Ada hari dimana oedjan toeroen me-
nakoelin.
Tapi ada hari djoega mata-hari ber-
sinar goemilang,
Demikian adanja nasib manoesia jang
soeda dipasti'in.
Dalem itoe boekoe Takdir boeat ma-
sing-masing orang.
