-42-
-43-
tinggal toendoekin kepalanja dengen sikep pendiam sekali, saolah-olah sedeng berpikir keras. Marika berdoea tida mendoesin bahoea tida djaoeh dari sitoe, di bawahnja poehoen Sawo, sapasang mata jang bersorot penasaran sekali, ada ikoetin marika poenja tindakan.
Itoe mata boekan laen dari matanja itoe pemoeda, jang tadi diterangken sebagi orang jang taro perhatian pada Nora dengen tjara begitoe roepa, hingga loepaken dirinja sedeng berada dalem satoe medan perdjamoean; dan dimana sadja itoe sapasang merpati berada, di sitoe djoega iapoenja sorot mata jang bringas sebagi matjan ditoedjoeken, sebagi djoega kaloe Nora poenja paras jang tjantik, ada mendjadi boelan-boelanan dari matanja.
Siapa adanja ini pemoeda, jang dari gerakannja keliatan sebagi orang jang hendak toeroet menjelak antara Nora dan Tjeng Giok? Ia itoe boekan laen dari Henri Tjoe, poetranja sala satoe millionnair dari Soerabaja. Adanja Henri di itoe perdjamoean, disebabken ia ada bersobat baek sama Fredie, jang djadi kawan sekolanja di H.B.S. Soerabaja. Maskipoen ia-poenja oesia ada lebih toewa tiga taon dari itoe djedjaka jang sekarang bertoendangan, toch ia masi tinggal doedoek di klas ampat, sedeng Fredie soeda loeloes dalem oedjian pengabisan pada satoe taon jang laloe.
Lantaran ia toeroet menginep di roemahnja Fredie, maka tida heran kaloe ia soeda poenjaken itoe banjak tempo, dan bisa toenggoe sampe Fredie sendiri poelang ka roemahnja. Itoe waktoe ia boekan mengobrol sama laennja, hanja mengoempet di bawah poehoen Sawo, kerna sadjek ia liat parasnja Nora, ia djadi ketarik sekali, dan hendak tjari taoe lebih djaoeh.
Tetapi koetika brapa sa'at kamoedian itoe sapasang merpati jang dimaksoedken soeda pada poelang, di itoe waktoe baroe ia hampirken itoe rombongan djedjaka jang sedeng asik pada boenjiken tetaboean viool, guitaar, piano dan sebaginja.
Selagi Tjeng Giok anterken Nora poelang ka roemahnja, dan ia sendiri kamoedian dianterken oleh soepir, adalah Henri itoe waktoe masih diam di itoe gedong dimana ada dirajahken itoe perdjamoean. Kendati ia sabetoelnja ada pande djoega dalem permaenan moesik, toch lantaran hatinja itoe sa'at sanget kaloet, maka ia tinggal doedoek mendengerin sadja, tjoema kadang-kadang kapan ada jang adjakin mengobrol, ia toeroet djoega bitjara sedikit, tapi tida oeroeng dengen roepa ogah-ogahan.
Ia niat tanjaken pada Fredie tentang oeroesannja itoe sapasang merpati, tetapi lantaran djoestroe Fredie masih melajang dalem itoe perasahan broentoeng sama Nelly, toendangannja, maoe atawa tida ia kepaksa moesti bersabar, sampe sabentar di waktoe iaorang sama-sama poelang.
Kapan sabentar lontjeng oetaraken djam satoe lebih, satoe tanda kaloe itoe waktoe soeda liwat tengah malem, dan tetamoe sebagian besar soeda pada poelang, baroelah maksoednja Henri bisa terkaboel, kerna itoe sa'atlah Fredie baroe deketin padanja dan adjak ia poelang.
Dengen satoe auto Buick Sedan, Fredie dan Henri menoedjoe ka roemahnja, dan dalem ini perdjalanan poelang Henri dapet kasempetan boeat tjari taoe siapa adanja itoe gadis jang pake rok biroe toewa dan itoe djedjaka penganternja.
Maski sabetoelnja ia sendiri sedeng mabok sama itoe perasahan broentoeng dari pertamoeannja itoe
